O Le Avanoa i le Olaga

W. Christopher Waddell

O Le Fitugafulu

E ala atu i lau auaunaga tuuto ma le ositaulaga lotomalie, o le a avea ai lau misiona ma eleele paia ia te oe.

O se mea taua i le olaga o se faifeautalai o lana faatalanoaga mulimuli, po o le, “faatalanoaga o le a alu [i le fale],” ma le peresitene o le misiona. I le fatu o le faatalanoaga, o se talanoaga lea o mea e foliga mai o se olaga atoa o aafiaga e manatuaina pea ma lesona autu na maua i le na o le 18 i le 24 masina.

E ui o le tele o nei aafiaga ma lesona e taatele i le galuega faafaifeautalai, ae o misiona taitasi e tulaga ese, i luitau ma avanoa o le a faloina ma tofotofoina ai i tatou e tusa ai ma o tatou lava manaoga faapitoa ma uiga patino.

I aso ua leva ae tatou te le’i taitai tuua o tatou aiga ma auaiga faalelalolagi e auauna atu i se misiona faafaifeautalai, sa tatou tuua ai o tatou matua faalelagi e faataunuu la tatou misiona i le olaga nei. O loo i ai so tatou Tama oi le Lagi, na te silafia i tatou—o o tatou malosiaga ma vaivaiga, o tatou tomai ma gafatia. Na te silafia po o lē fea le peresitene o le misiona ma soa ma o lē fea foi au paia ma tagata sailiili tatou te manaomia ina ia mafai ona avea ai [tatou] ma faifeautalai, o le tane, ma le tamā, ma ē umia le perisitua e mafai ona avea ai i tatou.

E tofia e perofeta, tagatavaai, ma talifaaaliga ia faifeautalai i lalo o le taitaiga ma le musumusuga a le Agaga Paia. O peresitene musuia o misiona e taitaia siitaga [o faifeautalai] i le tai ono vaiasoma vave ona iloa o loo silafia lelei lava e le Alii le mea e finagalo o Ia e auauna ai faifeautalai taitoatasi.

O ni nai tausaga ua mavae, sa auauna faamisiona ai Elder Javier Misiego, mai Madrid, Sepania, i Arisona. I lena taimi, o lona valaauga o le misiona i le Iunaite Setete sa foliga mai sa fai lava si ese, ona o le toatele o alii talavou mai Sepania sa valaauina e auauna atu i lo latou lava atunuu.

I le faaiuga o se faeasaite a le siteki, lea sa valaaulia ai i laua ma lana soa e auai, sa oo atu ai se tagata ua le toaga i le Ekalesia, o lē sa aumai e sana uo ia Elder Misiego. O le taimi muamua lea na faatoa oo ai lenei alii i totonu o le falesa talu mai le tele o tausaga. Sa fesiligia ia Elder Misiego pe na te iloaina se tagata e igoa ia José Misiego i Madrid. Ina ua tali atu Elder Misiego o le igoa o lona tama o Jose Misiego, sa toe fesili atu ma le fiafia le alii i nisi fesili e faamautu ai o le Jose Misiego sa’o lea. Ina ua iloa sa la talanoa e uiga i le tagata lava lea e tasi, sa amata loa ona tagi le tagata lea ua le toaga i le Ekalesia. “Sa na o lou tamā le tagata na ou papatisoina i la’u misiona atoa,” sa ia fai atu ai ma faamatala le mea na i ai lana misiona, i lona mafaufau, o se toilalo. Sa ia tuuaia ona tausaga o le le toaga i le lotu i nisi o lagona o le le atoatoa ma le popole, ma le talitonu i se isi itu, sa ia tuua i lalo le Alii.

Ona faamatala lea e Elder Misiego le taua o lenei faifeautalai lea ua manatu ua toilalo i lona aiga. Sa ia ta’u atu ia te ia, o lona tamā, sa papatisoina a o avea ma se talavou matua nofofua, sa faaipoipo i le malumalu, ma o Elder Misiego o le lona fa o lana fanau e toaono, ma o tama uma e toatolu ma se tuafafine sa auauna atu o ni faifeautalai faamisiona, ma sa toaaga uma i latou i le Ekalesia, ma o i latou uma o e ua faaipoipo ua faamauina i le malumalu.

Sa amata ona tagi lotulotu le faifeautalai lē toaga ua maea lana misiona. E auala mai i ana taumafaiga ua ia aoaoina ai nei, e toatele olaga ua faamanuiaina, ma sa auina atu e le Alii se alii faifeautalai mai Madrid, Sepania, e oo atu i se faeasaite i Arisona e ta’u atu ia te ia sa le’i toilalo o ia. E silafia e le Alii le mea e finagalo o Ia e auauna ai faifeautalai taitoatasi.

Po o le a lava le auala e filifilia ai e le Alii i tatou i le taimi o se misiona, o faamanuiaga o le galuega faafaifeautalai e le i fuafuaina e muta pe a faamaloloina i tatou e lo tatou peresitene o le siteki. O lau misiona o se nofoaga o aoaoga faamasani mo le olaga atoa. O aafiaga, lesona, ma molimau e maua e ala i auaunaga faamaoni ua fuafuaina e aumai ai se faavae e faaogatotonu i le talalelei, o le a faapea ona tumau ai i le olaga nei ma oo atu i le faavavau. Ae peitai, ina ia faaauau pea faamanuiaga pe a maea le misiona, e i ai tulaga e ao ona ausiaina. I le Mataupu Faavae ma Feagaiga tatou te faitau ai faapea, “Aua o i latou uma o e e fia mauaina se faamanuiaga i lo’u lima ia mau i le tulafono na tofia mo lena faamanuiaga, ma ona tulaga” (MF&F 132:5). O lenei mataupu faavae o loo aoaoina i le tala o le Esoto.

Ina ua uma ona maua mai lona faatonuga mai le Alii, sa toe foi atu Mose i Aikupito e aveese mai le fanauga a Isaraelu mai le nofopologa. Sa le mafai e lea mala ma lea mala ona faamautuina lo latou saolotoga, lea na oo atu ai i le mala lona 10 ma o le mulimuli foi lea: “Aua o le po nanei ou te ui ane ai i le nuu o Aikupito, ma ou taia ulumatua uma lava i le nuu o Aikupito” (Esoto 12:12).

Ina ia puipuia mai le “na te fasiotia” (fuaiupu e 23), na faatonuina ai e le Alii ia Lona nuu e osi se taulaga, o se tamai mamoe “ia sa’o ona lelei” (fuaiupu e 5), ma ia aumai le toto mai le taulaga. Ia latou “ave nisi toto” ma nini ai faitotoa o fale taitasi— “i pou e lua [o le faitotoa] ma … lona faalava i luga” (fuaiupu e 7)—faatasi ai ma le folafolaga lenei: “Ou te vaai atu foi i le toto, ona ou sosopo ai lea ia te outou, e le oo foi ia te outou le mala e fano ai” (fuaiupu e 13).

“Sa o loa le fanauga a Isaraelu, ma fai e pei ona sa poloaiina ai e le Alii” (fuaiupu e 28). Sa latou faia le taulaga, aumai le toto, ma nini ai o latou fale. “Ua oo i le tulua o po ma ao, ona fasi ai lea e Ieova o ulumatua uma lava i le nuu o Aikupito” (fuaiupu e 29). Sa puipuia Mose ma lona nuu, e tusa ai ma le folafolaga a le Alii.

O le toto na faaaoga e tagata Isaraelu, o le faatusa o le Togiola i le lumanai a le Faaola, o se taunuuga o le taulaga sa latou osiaina. Ae peitai, o le taulaga ma le toto lava ia semanu e le lava mo le mauaina o le faamanuiaga folafolaina.Ana le ninia le pou o le faitotoa i le toto, semanu e le aoga le taulaga.

Na aoao mai Peresitene Thomas S. Monson: “O le galuega faafaifeautalai e faigata. E manaomia ai le malosi o se tagata, e uma i ai le malosi o se tagata, e manaomia ai le taumafaiga sili ona lelei a se tagata. … E leai se isi galuega e manaomia ai ni itula uumi po o le tuuto tele naua po o se ositaulaga faapena ma le tatalo faatauanau” (“That All May Hear,” Ensign, May 1995, 49).

O se taunuuga o lena taulaga, tatou te foi mai ai mai a tatou misiona ma a tatou lava meaalofa. O le meaalofa o le faatuatua. O le meaalofa o le molimau. O le meaalofa o le malamalama i le matafaioi a le Agaga. O le meaalofa o le suesue i aso uma i le talalelei. O le meaalofa o le tautuaina o lo tatou Faaola. O meaalofa ua teuina ma le faaeteete i tusitusiga paia ua mafo’efo’e, o kopi masaesae o le Tala’i La’u Talalelei, o api talaaga a le faifeautalai, ma ni loto faafetai. Ae peitai, e pei o le fanauga a Isaraelu, o faamanuiaga faifai pea e o faatasi ma le galuega faafaifeautalai e manaomia le faaaogaina pe a maea le osigataulaga.

O ni nai tausaga ua mavae, a o ma pulefaamalumalu ai ma Sister Waddell i le Misiona a Sepania Paselona, ou te tuuina atu ai se tofiga mulimuli se tasi i faifeautalai taitoatasi i le taimi o a latou faatalanoaga mulimuli. A o latou foi atu i aiga, e talosagaina i latou ia vave ona faaalu se taimi e mafaufau ai i lesona ma meaalofa na tuuina atu ia i latou e se Tama oi le Lagi agalelei. Sa talosagaina i latou e tusi ma le agaga tatalo se lisi ma mafaufau i ni auala e faaaoga lelei ai na lesona i le olaga pe a uma le misiona—o lesona o le a aafia ai itu uma o o latou olaga: filifiliga faaleaoaoga ma faalegaluega, faaipoipoga ma fanau, auaunaga i le lumanai i le Ekalesia ma le mea aupito sili ona taua, o ai o le a faaauau pea ona avea ai i latou, ma lo latou atinaega faifai pea o ni soo o Iesu Keriso.

E leai se faifeautalai ua maea se misiona e faapea, ua tuai tele ona mafaufau i lesona na maua mai e ala i le auaunaga faamaoni, ma ia atili faaaogaina ma le maelega. A tatou faia faapea, o le a tatou lagonaina atoatoa le faatosinaga a le Agaga i o tatou olaga, o le a faamalolosia o tatou aiga, ma o le a tatou latalata atili atu i lo tatou Faaola ma le Tama oi le Lagi. I se konafesi aoao na muamua atu, sa tuuina atu ai e Elder L. Tom Perry le valaaulia lenei: “Ou te valaau atu ia te outou faifeautalai ua maea misiona ina ia toe tuuto atu outou lava, ina ia toe faaosofia i le naunau ma le agaga o le galuega faafaifeautalai. Ou te valaau atu ia te outou ia outou foliga i vaega, ia avea ma vaega, ma ia faatino le vaega o se auauna a lo tatou Tama oi le Lagi. … Ou te manao e folafola atu ia te outou o loo teuina ni faamanuiaga maoae mo outou pe afai e faaauau ona outou fetaomi atu i luma ma le naunautai lea sa ia te outou muamua o ni faifeautalai faamisiona” (“O Faifeautalai ua Taliu Mai le Misiona,” Liahona, Ian. 2002, 88, 89; Ensign, Nov. 2001, 77).

O lenei la, i alii talavou o le taimi nei o le a auauna atu i se misiona faafaifeautalai, ou te faasoa atu le fautuaga a Peresitene Monson mai ia Oketopa o le tausaga ua te’a: “Ou te toe fai atu i mea ua loa ona aoao mai e perofeta—o alii talavou agavaa uma lava, malolosi e tatau ona saunia e auauna atu i se misiona. O le galuega faafaifeautalai o se tiute faaleperisitua—o se matafaioi ua faamoemoe le Alii mai ia i tatou ua tele naua mea ua tuuina mai i ai” (“A o Tatou Toe Potopoto Faatasi Ai,” Liahona Nov. 2010, 5–6).

E pei lava o faifeautalai i aso la ma aso nei, e silafia oe e le Alii, ma ua i ai se aafiaga faalemisiona ua saunia mo oe. Na te silafia lou peresitene o le misiona ma lona faletua lelei tele, o e o le a alolofa ia te oe e pei lava o le laua fanau, o e o le a sailia musumusuga ma taitaiga mo oe. Na te silafia au soa taitoatasi ma mea o le a e aoaoina mai ia i latou. Na te silafia eria taitasi o le a e galue ai, o le au paia o le a e feiloai i ai, o tagata o le a e aoaoina, ma olaga o le a i ai ou aafiaga mo le faavavau.

E ala atu i lau auaunaga tuuto ma le ositaulaga lotomalie, o le a avea ai lau misiona ma eleele paia ia te oe. O le a e molimauina le vavega o le liua a o galue le Agaga e ala atu ia te oe e pai atu i loto o i latou e te aoaoina.

A o e sauniuni e auana atu, e tele lava ni mea e tatau ona fai. O le avea ma se auauna mataalia a le Alii, o le a tele atu ni mea e manaomia ai nai lo na o le vaetofiaina, faapipiina o se pine o le igoa, po o le ulufale atu i se nofoaga autu e aoaoina ai faifeautalai. O se faagasologa e vave lava ona amata mai a o lei ta’ua oe o se “Elder.”

Ia e taunuu atu i lau misiona ma lau lava molimau e uiga i le Tusi a Mamona, na maua e ala i le suesue ma le tatalo. “O le Tusi a Mamona o le faamaoniga mamana lea o le paia o Keriso. O le faamaoniga foi lea o le Toefuataiga e ala mai i le Perofeta o Iosefa Samita. … I le avea ai ma se faifeautalai, e ao lava ona muamua i ai sa oe lava molimau patino e moni le Tusi a Mamona. … O lenei molimau a le Agaga Paia o le a avea ma taulaiga tutotonu o lau aoao atu” (Tala’i La’u Talalelei: O Se Taiala mo le Galuega Faafaifeautalai [2004], 103).

Ia taunuu atu i lau misiona ma le agavaa i le mafutaga a le Agaga Paia.I upu a Peresitene Ezra Taft Benson: “O le Agaga o le elemene aupito taua e tasi i lenei galuega. Faatasi ai ma le faalauteleina e le Agaga o lou valaauga, e mafai ona e faia vavega mo le Alii i totonu o le misiona. A aunoa ma le Agaga, o le a le mafai ona faamanuiaina oe e tusa lava po o a au taleni ma tomai” (i le Tala’i La’u Talalelei, 176).

Ia taunuu atu i lau misiona ua e saunia e galue. “O lou faamanuiaina o se faifeautalai [o le a] muai fuatiaina i lou tautino e saili, aoao, papatiso, ma faamau.” O le a faamoemoeina oe e te “galue malosi i aso uma, i le [faia] o le mea sili e te mafaia ia aumai ai agaga ia Keriso” (Tala’i La’u Talalelei, 10, 11).

Ou te toe tuuina atu le valaaulia a Elder M. Russell Ballard, na tuuina atu i se vaega na muamua atu o alii talavou na sauni e auauna atu: “Matou te vaavaai atu ia te outou, o’u uso e, talavou o le Perisitua Arona. Matou te manaomia outou. E pei o le autau e 2,000 a Helamana, o outou foi o atalii agaga o le Atua, ma e mafai foi ona faaeeina outou i le mana e fausia ai ma puipuia ai Lona malo. Matou te manaomia outou e osi feagaiga paia, e pei foi ona sa latou faia. Matou te manaomia outou ia usiusitai lelei ma faamaoni, e pei foi ona sa i ai i latou” (“O Se Tupulaga Sili Ona Maoae o Faifeautalai,” Liahona, Nov. 2002, 46).

A o e taliaina lenei valaaulia, o le a e aoaoina se lesona sili, e pei ona sa aoaoina e Elder Misiego ma i latou uma o e sa galulue ma le faamaoni, foi atu, ma faaaogaina. O le a e iloaina o tuleiga a lo tatou perofeta, o Peresitene Thomas S. Monson, ua moni ia: “O le avanoa faamisiona i le olaga atoa e a oe lea. O loo faatalitali mai faamanuiaga o le faavavau mo oe. O lou avanoa lea ia le avea oe ma se tagata matamata ae ia avea ma tagata e faatinoina le tulaga o le auaunaga faaleperisitua” (Liahona, Iul. 1995, 55). Ou te molimau atu ai i le moni o lenei mea i le suafa o Iesu Keriso, amene.