Yumi Bin Raetemdaon Fet long Atonmen blong Jisas Kraes long Hat blong Yumi, o No ?

I Kam long Linda K. Beton

Rilif Sosaeti Jeneral Presiden

Blong mekem, kipim, mo stap glad long ol kavenan blong yumi, bae i pruf se Atonmen blong Jisas Kraes, i tru, oli raetemdaon long hat blong yumi.

Ol sista blong mi we mi lavem tumas. Yufala i bin stap long maen mo hat blong mi blong sam manis nao, taem mi stap tingting hevi long bigfala responsabiliti ia. Nating we mi no filim inaf long responsabiliti ia we i stap long mi, mi save se koling ia i kam long Lod tru long profet we Hem i jusum, mo blong naoia, hemia i inaf. Ol skripja oli tijim se nomata oli kamaot tru long voes blong miwan o tru long voes blong ol wokman blong mi, i semmak.¹

Wan long ol bigfala presen we i kam wetem koling ia, i stret save ia, se Papa long Heven i lavem evriwan long ol gel blong Hem. Mi bin filim lav we Hem i gat long wanwan long yumi!

Semmak long yufala, mi lavem ol skripja! Insaed long buk blong Jeremaea, yumi faenem wan skripja we mi laekem tumas. Jeremaea i laef long wan taem mo ples we i had, be Lod i letem hem blong luk fastaem “wan taem blong hop long taem blong kam tugeta blong Isrel long las dei” ²—taem blong yumi. Jeremaea i profesae:

“Long taem ya we i stap kam, niufala promes ya we bambae mi mekem wetem yufala i olsem. Mi bambae mi putum loa blong mi long tingting blong yufala, mo bambae mi raetemdaon long hat blong yufala. Mo mi bambae mi God blong yufala mo yufala bambae i man blong mi. …

“… Yufala evriwan bambae i save mi, i stat long ol haeman, gogo kasem olgeta we oli no gat nem. Nao mi bambae mi fogivim yufala, mi tekemaot ol sin blong yufala, mo bambae mi no moa save tingbaot olgeta bakegen.”³

Yumi nao, pipol ia we Jeremaea i bin luk. Olsem wanem? Yumi bin invaetem Lod blong raetemdaon loa, o doktrin, insaed long hat blong yumi? Yumi biliv se fogivnes we i stap tru long Atonmen we Jeremaea i stap tokbaot, i blong wanwan long yumi?

Sam yia i pas, Elda Jefri R. Holan i bin serem ol filing blong hem long saed blong ol bigfala rus blong fet blong ol paeonia we oli stap muv i kam long Sol Lek Vale, iven afta we ol pikinini blong olgeta i ded. Hem i talem: “Oli no bin mekem hemia from wan program; oli no bin mekem hemia from wan sosol aktiviti; oli mekem from fet blong gospel blong Jisas Kraes i bin stap long sol blong olgeta, i stap insaed long bun blong olgeta.”

Hem i tokbaot, wetem filing:

“Hemia i wan wei ia nomo we ol mama oli save berem ol bebi blong olgeta, long ol bokis blong bred mo afta gohed mo talem: ‘promes graon i stap samples. Bae yumi kasem vale.’

Oli bin save talem hemia from ol kavenan mo doktrin mo fet mo revelesen mo spirit.”

Hem i endem toktok blong hem wetem ol toktok ia we i mekem man i tingting: “Sapos yumi save kipim hemia insaed long famle mo Jos blong yumi, ating bae plante samting i kam stret olgetawan nomo. Ating bae plante samting we yumi no nidim bae oli kamaot long laef blong yumi. Mi harem se ol hankat ia, i no gat plante samting i save go insaed. Semmak olsem ol bubu blong yumi oli mas jusum wanem blong tekem, ating bae namba 21 senturi bae i lidim yumi blong disaed: ‘Wanem bae yumi putum insaed long hankat ia?” Hem i wanem i stap long sol blong yumi; samting ia we i stap insaed long bun blong yumi.”⁴ O, blong talem long nara wei, hem i wanem we oli raetemdaon long hat blong yumi!

Olsem wan niu Rilif Sosaeti presidensi, mifala i bin askem strong long Lod blong save ol stamba samting we bae Hem i wantem yumi putum insaed long Rilif Sosaeti hankat blong yumi blong gohed blong muvum wok ia. Mifala i bin filim se Papa long Heven, bae i faswan, mekem yumi helpem ol gel blong Hem we Hem i lavem blong oli andastanem doktrin blong Atonmen blong Jisas Kraes. Taem yumi mekem olsem, yumi save se fet blong yumi bae i kam antap, semmak long tingting blong yumi blong laef long stret mo gud fasin. Seken, taem mifala i stap lukluk long bigfala nid blong mekem ol famle mo ol hom oli kam strong moa, mifala i bin filim se Lod bae i wantem yumi leftemap tingting blong ol gel blong hem blong oli glad blong holemtaet kavenan blong olgeta. Taem oli holemtaet ol kavenan, famle i kam strong moa. Laswan, mifala i filim se Hem i wantem yumi blong wok wan wetem ol narafala okseleri mo wetem ol prishud lida blong yumi, mo traehad blong go aot mo helpem olgeta we oli stap long nid blong oli gohed folem rod ia. Hem i strong prea blong mifala se wanwan long yumi bae i openem hat blong yumi mo letem Lod i raetemdaon long hem ol doktrin blong Atonmen, ol kavenan mo fasin blong stap wan.

Olsem wanem nao bae yumi luk se bae yumi mekem ol famle oli kam strong moa mo helpem ol narawan, sapos yumiwan, yumi no raetemdaon faswan long hat blong yumi wan dip mo strong fet long Jisas Kraes mo Bigfala Atonmen blong Hem? Tunaet mi wantem serem tri prinsipol blong Atonmen, we sapos yumi raetemdaon long hat blong yumi, bae i leftemap fet blong yumi long Jisas Kraes. Hem i hop blong mi se taem bae yumi andastanem ol prinsipol ia, bae i blesem wanwan long yumi, nomata yumi niu long Jos o yumi memba longtaem finis.

Prinsipol 1: “Evri samting we i no stret long laef, bae i save kam stret tru long Atonmen blong Jisas Kraes.”⁵

Mifala, wetem yufala, i witnes blong Atonmen blong Sevya blong yumi, Jisas Kraes. Ol testemoni blong mifala, semmak olsem hemia blong yufala, oli raetemdaon long hat blong yumi taem yumi fesem ol defren kaen jalenj mo hadtaem. Sapos yumi no andastanem stret plan blong stap glad blong Papa long Heven, mo Atonmen blong Sevya olsem stamba blong plan ia, bae yumi luk se ol jalenj ia oli no stret. Yumi evriwan i serem ol tes blong laef tugeta. Be long ol fetful hat, oli raetemdaon: “Evri samting we i no stret long laef, i save kam stret tru long Atonmen blong Jisas Kraes.”

From wanem Lod i letem yumi safa mo gat hadtaem insaed long laef ia? I simpol. Hem i pat blong plan blong mekem yumi gro mo progres! Yumi bin “singaot wetem glad”⁶ taem yumi bin save se bae yumi gat janis blong kam long wol ia blong gotru long laef ia. Elda Dalin H. Oks i bin tijim, “Jenis we yumi evriwan i nidim blong eksperiensem long ol laef blong yumi i kam isi nomo taem yumi safa o gat hadtaem bitim taem we yumi stap gud mo stap kwaet.”⁷

Eksampol blong wan fetful paeonia sista i soemaot trutok ia. Meri Lois Woka i bin mared long 17 yia long Jon T. Moris, long Sent Luis, Misuri. Tufala i bin krosem ol flat ples wetem ol Sent long 1853, mo tufala i kasem Sol Lek Vale afta fas yia mared blong tufala. Long rod blong tufala, oli bin safa mo sakrifaes semmak long ol nara Sent. Be safaring mo hadtaem blong tufala i no finis taem tufala i kasem Sol Lek Vale. Long yia afta, Meri, we i gat 19 yia, i raetem: “Mitufala i gat wan boe i bon. …Wan naet, taem hem i gat tu o tri manis … wan samting i talem long mi se ‘Bae yu lusum smolwan ia.’”

Long winta, helt blong bebi i go nogud. “Mifala i mekem evri samting, … be bebi i no kam gud. …Long nambatu Febwari, hem i ded …mo mi drink kap ia we i konkon blong livim mit mo blad blong mi i go.” Be tes blong hem i no finis yet. Hasban blong Meri tu i sik, mo tri wik afta bebi i ded, man blong hem i ded.

Meri i raetem: “So mi hemia, mi yangfala, mo mi lusum long 20 dei, hasban mo wan pikinini ia nomo blong mi, long wan defren ples, longlongwe long famle blong mi mo wetem wan hil blong hadtaem long fored blong mi … mo mi wantem tumas se mi tu, bae mi ded mo joenem olgeta we mi lavem.”

Meri i gohed: “Wan Sandei naet, mi bin stap wokbaot wetem fren blong mi … hem i tokbaot hasban blong mi we i no stap, mo we mi stap miwan, mo taem mi stap krae, mi save luk, olsem se i wan visen long tingting, sap hil blong laef we bae mi mas klaem mo filim se hemia i ril tru. Wan hevi tingting i foldaon long mi, from se enemi i save stret wetaem blong kik, be [Sevya Jisas Kraes blong yumi i gat paoa blong sevem yumi. Tru long help we i kam long Papa, mi bin save faet wetem evri paoa we mi luk se oli kam agensem mi long tetaem ia.”⁸

Meri i bin lanem, taem hem i gat 19 yia, se Atonmen i givim stret save se evri samting we oli no stret long laef ia, oli save, mo bae oli kam stret—iven harem nogud we i bigwan tumas.

Prinsipol 2: I gat paoa long Atonmen blong mekem yumi save winim man o woman ia we i folem fasin blong wol, mo kam ol tru disaepol blong Jisas Kraes.⁹

I gat wan wei blong helpem yumi save wetaem nao yumi lanem wan doktrin o wan prinsipol blong gospel. Hem i taem yumi save tijim doktrin o prinsipol ia long wan wei we wan pikinini i save andastanem. Wan gudfala risos blong tijim ol pikinini blong andastanem Atonmen, i wan samting olsem we i stap long Praemeri lesen. Ating hemia i save helpem yumi taem yumi tijim ol pikinini blong yumi, ol apu pikinini, o ol fren we oli gat defren bilif we oli wantem andastanem impoten doktrin ia.

“Wan woman i wokbaot folem wan rod, mo i foldaon insaed long wan dip hol, mekem se hem i no save klaemaot. Nomata wanem hem i stap mekem, hem i no save kamaot hemwan. Woman ia i singaot blong kasem help mo i glad taem we wan i pas kolosap i harem hem, mo i pusum wan lada i go daon long hol. Hemia i letem hem blong klaemaot long hol mo i fri bakegen.

“Yumi olsem woman ia insaed long hol. Blong mekem sin, i blong foldaon insaed long hol, mo yumi no save kamaot yumiwan. Semmak olsem wan we i pas kolosap i harem singaot blong woman ia, Papa long Heven i sendem Wan Stret Pikinini blong Hem blong givim rod blong kamaot long hol. Atonmen blong Jisas Kraes, yumi save komperem long lada ia we i go daon long hol.”¹⁰ Hem i givim rod blong klaemaot. Be Sevya i mekem moa bitim blong mekem lada i go daon. “Hem nao i kamdaon insaed long hol, mo i mekem i posibol blong yumi yusum lada blong ronwe.”¹¹ “Semmak olsem woman ia insaed long hol i mas klaemaot long lada, yumi mas sakem sin blong yumi mo obei long ol prinsipol mo odinens blong gospel blong klaemaot long hol blong yumi mo mekem Atonmen i wok long laef blong yumi. Long wei ia, afta we yumi mekem evri samting, Atonmen i mekem se i posibol long yumi blong kam klin inaf blong gobak long ples blong Papa long Heven.”¹²

I no longtaem i pas, mi gat janis blong mitim wan paeonia blong tedei, wan gel blong God mo i jes baptaes long Jos long Jile. Hem i wan singgel mama wetem tu yangfala boe. Tru long paoa blong Atonmen, hem i bin save putum laef blong hem bifo i go biaen, mo naoia i stap traehad blong kam wan tru disaepol blong Jisas Kraes. Taem mi tingting long hem, wan prinsipol we Elda Deved A, Bedna i kam long maen blong mi: “Hem i wan samting blong save se Jisas Kraes i bin kam long wol blong dedfrom yumi—hemia i stamba mo fandesen blong doktrin blong Kraes. Be yumi nid tu blong glad se Lod i wantem, tru long Atonmen blong Hem, mo tru long paoa blong Tabu Spirit, blong laef insaed long yumi—i no nomo blong lidim yumi, be tu, blong givim paoa long yumi.”¹³

Taem sista ia blong Jile mo mi i stap toktok raon long wei blong stap long rod we i go long laef we i no save finis, hem i bin glad blong talem long mi se hem i gat strong tingting blong gohed long rod ia. Plante taem, hem i bin stap aotsaed long rod long laef blong hem, mo hem i talem se i no gat wan samting “longwe” aotsaed long rod we hem i wantem bak insaed long laef blong hem. Paoa blong Atonmen we i save mekem samting i stap laef insaed long hem. Oli raetemdaon long hat blong hem.

Paoa ia i no mekem nomo se bae yumi klaemaot long hol, be tu, hem i givim paoa blong gohed long stret mo smol rod we i lidim yumi gobak long ples blong Papa long Heven.

Prinsipol 3: Atonmen i bigfala pruf we yumi gat long lav we Papa i gat long ol pikinini blong Hem.

Bae i gud tumas blong yumi tingting hevi long bigfala tingting blong Elda Oks: “Traem tingting se olsem wanem nao Papa long Heven bae i harem nogud blong sendem Pikinini blong Hem blong gotru long bigbigfala safaring from ol sin blong yumi. Hemia i bigfala pruf blong lav we Hem i gat long wanwan long yumi!”¹⁴

Bigfala aksen blong lav ia, i sapos blong sendem yumi i godaon long ni blong yumi blong prea wetem tingting i stap daon, blong talem tangkyu long Papa long Heven blong lavem yumi inaf, mekem se Hem i bin sendem Wan Stret Pikinini Ia Nomo blong Hem mo Pikinini ia we i stret evriwan blong Hem i safa blong ol sin blong yumi, ol harem nogud mo evri samting we yumi luk se i no stret long laef blong yumi wanwan.

Tingbaot woman ia we Presiden Ukdof i bin tokbaot i no longtaem? Hem i talem: “wan woman we i bin gotru long plante yia blong tes mo harem nogud i bin talem, tru long krae blong hem, ‘mi kam blong luksave se mi mi olsem wan 200 vatu not—we i benben, i brok, i doti, we oli yusum fulap, mo i damej. Be mi mi wan 200 vatu not. Mi gat praes. Nomata mi no luk olsem, mo nomata oli benbenem mo yusum mi, praes blong mi i ful 200 vatu.’”¹⁵

Woman ia i save se hem i wan gel blong Papa blong hem long Heven, mo praes blong hem i bigwan inaf blong Hem i sendem Pikinini blong Hem blong pemaot hem, hem stret. Evri sista insaed long Jos i mas save wanem we woman ia i save—se hem i wan gel blong God we i lavem hem tumas. Olsem wanem nao taem yumi save praes blong yumi, bae i jenisim wei we yumi kipim ol kavenan blong yumi? Olsem wanem nao, taem yumi save praes blong yumi i jenisim filing blong yumi blong givhan long narawan? Olsem wanem nao, taem yumi save praes blong yumi, i mekem yumi wantem moa blong helpem ol narawan blong andastanem Atonmen semmak olsem yumi—dip insaed? Taem wanwan long yumi i gat doktrin blong Atonmen we oli raetemdaon dip long hat blong yumi, nao bae yumi stat blong kam kaen pipol ia we Lod i wantem yumi blong stap taem Hem i kambak bakegen. Bae Hem i luksave yumi olsem ol tru disaepol blong Hem.

Mi prea se Atonmen blong Jisas Kraes bae i mekem wan bigfala jenis i kam insaed long hat blong yumi. ¹⁶ Taem yumi kam klia long doktrin ia, we wan enjel blong God i talemaot olsem wan gud nius blong bigfala glad¹⁷, mi promes se bae yumi filim olsem ol pipol blong King Benjamin oli filim. Afta we oli bin prea strong se bae Atonmen i stap long laef blong olgeta, “oli bin fulap long glad”¹⁸ mo “oli bin glad blong mekem wan kavenan wetem God, blong mekem tingting blong hem mo blong obei long ol komanmen blong hem long saed blong evri samting.”¹⁹ Blong mekem, kipim, mo stap glad long ol kavenan blong yumi, bae i pruf se Atonmen blong Jisas Kraes, i tru, oli raetemdaon long hat blong yumi. Plis tingbaot ol trifala prinsipol ia, ol sista:

“Evri samting we i no stret long laef, bae i save kam stret tru long Atonmen blong Jisas Kraes.”²⁰
I gat paoa long Atonmen blong mekem yumi save winim man o woman ia we i folem fasin blong wol, mo kam ol tru disaepol blong Jisas Kraes.²¹
Atonmen i bigfala pruf we yumi gat long lav we Papa i gat long ol pikinini blong Hem.²²

“Long taem ya we i stap kam,” Lod i talem: “[Bae] mi putum loa blong mi long tingting blong yufala, mo bae mi raetemdaon long hat blong yufala. Mo mi bambae mi God blong yufala mo yufala bambae i man blong mi.”²³ Mi invaetem yumi blong askem Lod blong raetemdaon ol prinsipol ia blong Atonmen insaed long hat blong yumi. Mi testifae se oli tru. Long nem blong Jisas Kraes, amen.