M̧alijon̄ an Tōmak eo Ami
Jen Elder Neil L. Andersen
Jen Doulul eo an Jon̄oulruo Rijilōk ro
Āinwōt an kijeek eo ukōt aen ko n̄an juon steel, ilo ad tiljek ilo iien mālijon̄ ad tōmak, kar kōkāāl kōj kōn jetōb im kar kōkajoorļo̧k.
Jon̄oul iiō rem̧ootļo̧k ke kōrā eo ippā, Kathy, im n̄a kar jokwe ilo São Paulo, Brazil, Būreejtōn David Marriott eaar tōl ilo Brazil São Paulo Interlagos Mission. E im kōrā eo ippān, Neill, im ļaddik ro nejier Will, Wesley, im Trace raar jokwe epaake kōm̧. Raar em̧m̧akūt jān kapijuknen eo aer, pejnej eo aer, im elōn̄ ilo baam̧le eo aer n̄an uwaak e juon kūr jān juon rikanaan n̄an jerbal e juon mijen.
Būreejtōn Marriott eaar kūr ļo̧k eō juon ālkin rālep. Leddik eo nejier eaiboojoj, em̧m̧an 21-an iiō, Georgia, juon senior ej ekkatak violin ilo Indiana University, juon wa eaar dibwōj e ilo tōre eo ej baajkōļ ļo̧k n̄an m̧weo ālkin juon kweilo̧k an Kabun̄ in. Ripoot eo jinoin, eaar em̧m̧an an Georgia pād. Awa ko tok ālik jekjek eo an eaar nana ļo̧k.
Baam̧le im ro m̧ōttaer raar jino jitlo̧k im jar kōn kabwilōn̄lōn̄ n̄an Georgia. Jinen eaar ketok bon̄on eo jān Brazil. Ke ej joktok ilo Indiana raan eo juon eaar ioon ajri ro nejin rōrūtto, ro raar kōmjaaļaļ ilo kōmeļeļeik bwe raar pād ippān Georgia ke eaar mej ļo̧k.
Iaar mijōk baam̧le eo an Marriott ilo wāween in im ilo allōn̄ ko im iiō ko raar ālkin. Raar jan̄, raar jar, raar ekōnono kōn Georgia, raar en̄jake metak eļap im būrom̧ōj, bōtaab tōmak eo aer eaar jab m̧ōjņo̧ļo̧k. Ilo m̧wen̄an eo an jibbon̄in, jaar ron̄ kōn bwebwenato ko rōm̧m̧an kōn mour ko raiboojoj an baam̧le eo an Bowen im Wilberger.1
Menin letok eo an tōmak ej juon menin letok ekwojarjar an jetōb ejjeļo̧k wōņāān. “Men in mour indeeo,” Jisōs eaar jar, “bwe ren jeļā Kwe juon wōt Anij e m̧ool, im Jisōs Kraist, eo Kwaar jilkintok.”2
Tōmak eo ad ej pedped ioon Anij, Jemed, im ilo Nejin, Jisōs Kraist, ad Rilo̧mo̧o̧r im Ripinmuur. Rejtake kōn jeļā eo ad bwe tallep in ko̧jpeļ eo em̧ōj an bar jepļaaktok n̄an laļ in, bwe Bok in Mormon ej naan an Anij, im bwe rikanaan ro im rijilōk ro rainin rej kabwijer kii ko an priesthood eo. Jej kaorōk tōmak eo ad, jerbal n̄an kōkajoorļo̧k tōmak eo ad, jar n̄an kōļapļo̧k tōmak, im kōm̧m̧an aolep men ilo kajoor eo ad n̄an kōjparok im bōbrae tōmak eo ad.
Rijilōk Piter eaar kōm̧eļeļeik menin juon men eaar ņa etan “māllejon̄ ami tōmak.”3 Eaar en̄jake. Kememej naan ko an Jisōs:
“Simōn, …Setan ear kōņaan bōk eok bwe en liklik eok āinwōt wit:
“A I ar jar kōn eok bwe am̧ tōmak e jāmin jako.”4
Piter eaar tokālik kōketak ro jet: “kwom̧win jab bwilōn̄,” eaar ba, “kijeek enaaj itok bwe en māllejon̄ kom̧, āinwōt eļan̄n̄e men eo ekāāl ej waļo̧k n̄an kom̧.”5
Mālijon̄ kein reppen rej ejaaki n̄an kōm̧m̧an bwe kom̧in kajoorļo̧k, ak ewōr aer aorōk n̄an kadikļo̧k ak em̧ool kakkure leke eo ami ilo Nejin Anij im n̄an kōm̧ōjņoik kom̧ n̄an dāpij kallim̧ur ko ami n̄an E. Mālijon̄ kein ekkā aer ukukōt m̧ōraer, kōm̧m̧an bwe en pen n̄an kili. Rej jino waļo̧k ilo m̧ōjņo ko ad, m̧ōjņo ko ad, tōnkwadik ko ad, ak ilo men ko raorōk tata n̄an kōj. Juon idajon̄jon̄ eo lukkuun pidodo wōņake n̄an juon armej emaron̄ in mālijon̄ pen n̄an armej eo juon.
Ewi wāween ami “dim im jamin makūtkūt”6 ilo iien mālijon̄ an tōmak? Kom̧in lukōj kom̧ make ilo luukkun men ko me raar jipan̄ kalōk pedped in tōmak eo ami: kom̧in kōjerbal tōmak ilo Jisōs Kraist, kom̧in jar, kom̧in kejōkļo̧kjeņ kōn jeje ko rekwojarjar, kom̧in ukwelo̧k, kom̧in kōjparok kien ko, im kwon jerbal n̄an ro jet.
N̄e jelm̧ae juon m̧ālijon̄ an tōmak―jekdo̧o̧n ta eo kom̧ij kōm̧m̧ane, jab kōttoļo̧k kom̧ jān Kabun̄ in! Kōttoļo̧k kom̧ make jān aelōn̄ in kiin̄ eo an Anij ilo juon mālijon̄ an tōmak ej āinwōt door jikin kone eo jān lan̄ ilo tōre eo aire eo loe.
Rijilōk Paul eaar ba, “Kom̧ jab bar ruwamāejet im ri ito-itak, a kom citizen ippān ro rem̧m̧an, im kom̧ nukun Anij.”7 Ej ilo kōjparok eo an Kabun̄ in me jej bōbrae tōmak eo ad. Kweilo̧k ippān ro jet rej tōmak, jej jar im lo uwaak ko n̄an jar ko ad; jej kabun̄-jar kōn al, kwalo̧k naan in kam̧ool eo kōn Rilo̧mo̧o̧r, jerbal n̄an ro jet, im en̄jake jetōb in Irooj. Jej bōk m̧ōttan kwojkwoj eo, bōk kōjeram̧m̧an ko an priesthood eo, im kobaļo̧k ilo tampeļ eo. Irooj eaar kwalo̧k bwe kajoor eo an anij ej waļo̧k ilo kain̄i ko.8 N̄e kom̧ij jelm̧ae juon mālijon̄ an tōmak, pād wōt ilo kejparok im m̧weo im̧ōn Anij. Iien otemjeļo̧k ewōr juon jikin n̄an kom̧ ijin. Ejjeļo̧k mālijon̄ ekanooj ļap jejjab maron̄ anjo ioon ippān doon.9
Būreejtōn Thomas S. Monson eaar ba: “Bar āinwōt jon̄ak ko an mour an jukjuk in pād em̧ōn̄ an oktak jab kadikdik. M̧wil ko me juon iien raar ļōmņak kake rejjab jejjet im ettoon rejja kiiō kaorōki ijoke barāinwōt ļōmņak kar kili im errā kake jen elōn̄ armej ro.”10
Elōn̄ rūm̧m̧an ded ro ilo Kabun̄ in eļe jān jon̄an iiō in aer rūm̧m̧an ded. Ilo aer lo mour ko aer kiiō ej oktak jān ke raar kōtmene, raar kōjparok kien erreo.11 Emaron̄ in juon mālijon̄ an tōmak eo aer. Ij kwaļo̧k kautiej eo aō em̧wilaļ im nōbar eo n̄an rikaļoor rein an Kraist.
“Anij eaar kwaļo̧k bwe kajoor ko rekwojarjar an tūm̧wōņ im orļo̧k … kōm̧m̧an ikōtaan wōt juon em̧m̧an im kōrā, kar m̧are ilo jejjet āinwōt ļeo im lio pālele.”12 Ilo Kallim̧ur Ekāāl Rilo̧mo̧o̧r eaar ļōn̄aj jon̄an an mour in n̄an rikaļoor ro An ke Eaar kwaļo̧k: “Jabdewōt eo kalimjōk juon kōrā ej ļōn̄ … kadede ilo būruwōn.”13 Eaar katakin kōj n̄an jab liakeļo̧k ro jet, bōtaab E jab jejjet n̄an kōnono. “Ilo̧k” Eaar ba, “jab bar jerawiwi.”14
Ewōr juon m̧ōttam ilo baam̧le eo am̧. Kom̧ maron̄ in jeļā juon āinwōt e, ak bōlen kom̧ij kōņaan āinwōt e. Tiljek iien otemjeļo̧k, jerbal m̧ool ilo Kabun̄ in, lōke ilo jikin jerbal, kile jen baam̧le eo an, im ke eaar ļōmņak kōn m̧are im ajri, eaar juon eo ejjeļo̧k pāleen. “Iaar kōm̧m̧ane kālet eo,” liin eaar ba, “n̄an likūt aō … leke ilo Jisōs Kraist. Ewōr aō tōmak … bwe ejjeļo̧k … kōjeram̧m̧an naaj dāpiji … ailo aō … tiljek wōt n̄an bujen ko aō, ekoba kien erreeo.”15
Bar juon m̧ōttam eaar jerbal e juon mijen ejej uwaan, ālkin juon jikuul in kaminene epen. Eaar kōjatdikdik bwe en wōr juon an baam̧le. Mālijon̄ an tōmak eo an: en̄jake ko kōn kōņaan ejja armej āinwōt e. Eaar jeje tok n̄an eō jem̧aanļo̧k: “Kar kallim̧uri eō ilo kōjeramman in patriak eo aō bwe enaaj wōr aō make baam̧le juon raan. Men̄e … ilo mour in ak eo juon, [Ijjab] jeļā. … [Bōtaab] ijjab kōņaan kōm̧m̧an jabdewōt me enaaj kakkure kōjeram̧m̧an ko Anij eaar kallim̧ur kaki. …Mour kōn [kien erreo] ej juon idajon̄jon̄, bōtaab ta jaar jab itok n̄an laļ in n̄an jelm̧ae apan̄ ko im n̄an kwaļo̧k n̄an Anij ad iakwe im kautiej … kōn kōjparok kein ko An? Ijeram̧m̧an kōn ājmour em̧m̧an, ko̧jpeļ eo, juon baam̧le ej iakwe, im ro m̧ōtta rejouj. Ij kam̧oolol kōn kōjeram̧m̧an ko aō rōllōn̄.”16
Jum̧ae ko an laļ in, ekōjkan ami maron̄ kanooj kajjitōk eļap? Irooj ej uwaak:
“Bwe ļōmņak ko Aō re jab ļōmņak ko ami; im ial ko ami re jab iaļ ko Aō.
“Bwe āinwōt an lan̄ ko re utiej jān laļ, āindein iaļ ko Aō re utiej jān iaļ ko ami.”17
Rikalo̧o̧r rein ruo an Kraist im jon̄oul taujin ko raar āinwōt er raar en̄jake kallim̧ur eo an Rilo̧mo̧o̧r. “Aō aenōm̧m̧an Ij lewōj n̄an kom̧, jab āinwōt an laļ lewōj, N̄a ij lewōj n̄an kom̧.”18
En̄in ej bar juon mālijon̄. Aolep iien ewōr jet ro rekōņaan jab kautiej Kabun̄ in im kakkure tōmak. Rainin rej kōjerbal Internet.
Jet iaan meļeļe ko kōn Kabun̄ in, jekdo̧o̧n ewi jon̄an an em̧m̧an, ejjab m̧ool. Ilo 1985, Ij kememej juon m̧ōtta eaar itok n̄an jikin jerbal eo aō ilo Florida. Ewōr ippān juon Time magazine ņa etan “Challenging Mormonism’s Roots.” Eaar kōnono kōn juon leta eo kab loe, bōlen kar jeje jen Martin Harris, me kar jum̧ae bwebwenato eo an Joseph Smith kōn an kar lo pileij ko an Bok in Mormon.19
Eo m̧ōtta eaar kajjitōk eļan̄n̄e meļeļe in ekāāl enaaj kakkure Kabun̄ eo an Mormon. Bwebwenato eo kar ba juon em̧m̧aan eaar etal jān Kabun̄ in kōnke peba eo. Tokālik, ro jet raar etal jān Kabun̄ in.20 Ijeļā eaar juon mālijon̄ an tōmak eo aer.
Jet allōn̄ tok ālik, ro retijem̧ļo̧k raar lo (im rinana eo ear kwaļo̧k) bwe leta eo eaar lukkuun in riab. Ij kememej ļo̧k lukkuun kōjatdikdik bwe ro raar etal jān Kabun̄ in kōnke m̧on eo naaj bar jepļaaktok n̄an Kabun̄ in.
Jet rej kajjitikin tōmak eo aer ke rej lo juon ennaan kar kōm̧m̧an jān juon ritōl an Kabun̄ in iiō ko remootļo̧k me ejjab jejjet ippān katak eo ad. Ewōr juon pedped aorōk me ej tōl katak eo an Kabun̄ in. Katak eo ej katakin jān aolep 15 ro uwaan Būreejtōnji eo Kein Kajuon im Doulul eo an Jon̄oulruo Rijilōk ro. Ejjab ņojak ilo juon pārokūrāāp ejalikkar an juon kōnono. Pedped ko rem̧ool emakijkij katakin im jān elōn̄. Katak eo ad ejjab pen n̄an loe.
Ritōl ro an Kabun̄ in rej m̧ool ak rejjab wānōk. Kememej naan ko an Moronai: “Jab liakeļo̧k eō kōnke aō jab wānōk, im jab jema … ; ak ijjelo̧kin in leļo̧k kam̧m̧oolol ko n̄an Anij bwe Eaar kōm̧m̧an im kalikkar n̄an kom̧ jab wānōk ko ami, bwe kom̧in maron̄ jeļā n̄an jeļāļo̧kjeņļo̧k jān kar kom̧.”21
Joseph Smith eaar ba, “Ijjan̄in kar jiron̄ kom̧ iwānōk―bōtaab ejjeļo̧k bōd ilo revelesōn .”22 Kabwilōn̄lōn̄ eo ilo pein Anij ilo bwebwenato im jem̧ļo̧k eo an Kabun̄ eo an Jisōs Kraist im Armej ro Rekwojarjar ilo Raan-ko Āliktata ej ilo meļeļe kōn meram an kajjitōk ilo jetōb. Būreejtōn Ezra Taft Benson eaar ba, “Aolep [armej] āliktata rej jutak kōn tōmak, im ewōr … aikuj kōm̧m̧ane ijo rej pād ie.”23 Jab ilbōk n̄e ej waļo̧k n̄an eok!
Eo eaorōk tata, mālijon̄ ko renaaj eppen. Emaron̄ wōr en̄taan, boktak, jab kiki ilo bon̄, im pet in kiki ko retutu kōn dānin kōmjaļļaļ. Ak mālijon̄ ko ren jab mej ilo jetōb. Rej jab aikuj kōm̧m̧an bwe jen kowaan bujen ko ad ak kōttoļo̧k kōj make jān m̧weo im̧ōn Anij.
“Kememej, … bwe ej ioon ejm̧aan in ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko ami, bwe n̄e devil enaaj jilkintok kōto ko an rekajoor … n̄e aolep wōt dekā im lan̄ rekkajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok … kōnke ejm̧aan eo kom̧ar ekkal ioon, … pedped eo eļan̄n̄e armej rej ekkal ioon rej jamin bun̄.”24
Āinwōt an kijeek eo ukōt aen ko n̄an juon steel, ilo ad tiljek ilo iien mālijon̄ ad tōmak, kar kōkāāl kōj kōn jetōb im kar kōkajoorļo̧k.
Elder D. Todd Christofferson eaar kōmeļeļeik ta eo eaar katak jān juon an make mālijon̄: “Men̄e Iaar en̄taan iien eo, ilo Aō reilikļo̧k kiiō, Ij kam̧oolol bwe eaar jab juon uwaak eo em̧ōkaj n̄an jorrāān eo aō. Jekjek eo me Iaar make kiel eō n̄an oktakļo̧k n̄an Anij kōn jipan̄ kar juon tōrein katakin eō kōn wāween eo em̧ool kōn jar im bōk uwaak ko n̄an jar im kar katakin eō ilo juon iminene eo n̄an bōk juon tōmak ilo Anij. Iaar itok n̄an jeļā Rilo̧mo̧o̧r eo aō im Jemedwōj Ilan̄ ilo juon wāween eo im n̄an juon jon̄ak eo me emaron̄ kar jab waļo̧k. … Iaar katak n̄an lōke Irooj kōn aolepen būruwōI. Iaar katak n̄an etetal Ippān jen raan n̄an raan.”25
Piter eaar kōmeļeļeik en̄jake kein āinwōt “ aorōk jān gold.”26 Moronai eaar kobaik naan in kam̧ool in “melijon̄ in ami tōmak.”27
Ilo aō kar ijjino, kōn bwebwenato in baam̧le eo an Marriott. Wiik eo lo̧k Kathy im n̄a kar kobaļo̧k ippāer ilo lōb eo an Georgia. Jon̄oul iiō em̧ōj aer eļļā. Baam̧ļe eo im ro m̧ōttaer raar kōnono kōn iakwe im em̧em̧ļo̧k ko aer kōn Georgia. Eaar wōr juon būjāān mouj n̄an kam̧oolol kōn mour eo an. Ilubwilijin dān in kōmjaaļaļ ko, jinen Georgia eaar ekōnono kōn ļapļo̧k in tōmak im meļeļe eo eaar bōke, im jemen Georgia eaar jiron̄ eō kōn kallim̧ur eo kam̧ool bwe em̧ōj an itok n̄an e.
Kōn tōmak ej itok mālijon̄ an tōmak, ej bōk eļapļo̧k tōmak. Irooj eaar kaenōm̧m̧an Rikanaan Joseph Smith bōk ejja kallim̧ur eo Ej lewaj ilo mālijon̄ tōmak eo ami. Naan kein rej n̄an kōj aolep ke Irooj eaar jiron̄ Joseph n̄an pād wōt im jab mijak kōnke Anij ej pād ippam̧ indeeo im indeeo.28 Jān menin Ij kwaļo̧k aō kam̧ool ekwojarjar ilo etan Jisōs Kraist, amen.