Aan te Kateitei ni Koaua
Iroun Bishop Dean M. Davies
Kauoman ni Kauntira n te Bitiobiriki n Tararua
Ti bia butimwaea ana kakao te Tia Kamaiu n roko Nakoina. Ti a katea maiura iaon aan te kateitei ae mano man koaua.
N Okitobwa 17, 1989, n au tai ni buti nakon mweengau imwiin te mwakuri, I a bon kaania te taura n tei n toman te kawai i Market ao Beale Streets i San Francisco, California. N te tai anne I namakina te ka n ruru ao n iangoia, “I iai au rabwa ae akea angina.” Ngke te ka e reitinako n ruru, I noora te bwati ae e kaan ma ngai ao n iangoia, “Te bati anne e a tibwa okinakoai!” Imwiina te ka e ruru riki man ruru riki, ao I iangoia, “A akea angin au rabwa ake aua!” Ma tiaki raabwa aika akea angiia ke te bwati—bon mwaingingin te aba ae korakora! Ngke I a tei n te taura ae uraura, iai tibutibun te kawai n ai aron te naon taari ni minomino rikaaki ni kawain Market. I moau te kateitei ae rietata ae te aobiti e bon tiotio man iterana nakon iterana, ao buriki a moanna ni bwaka man kateitei aika maan nakon maingiu ngkai te aonaaba e reitinako ni mwaingiing.
Te mwaingiing ae arna Loma Prieta are e orea te Aono ae San Francisco Bay n te aoa 5:04 p.m. ao ni katikuiia ae e mwaiti n aron 12,000 aomata aika akea mweengaia.
Te mwaingiinga n te aba e karika uruaki ae korakora n te Aono ae te San Francisco Bay, angiia a rangi n namakinaki iaon taano aika aki matoamatoa i San Francisco ao Oakland. I San Francisco, te Mwakoro ae Marina e a tia ni kateaki n te tabo are e kanoaki n renganan te tano, bwareka, mwangen kateitei, ao tabeua riki bwaai aika rawata kanoaia n ranin aontano. Tabeua mai ibuakon ake a kanoaki bon man mangen kateitei ake a uruaki n te maiei i San Francisco Bay imwiin te mwainging n te ririki 1906 i San Francisco.”1
Inanon tao 1915, kateitei aika abwatemente a kateaki iaon te tabo ae kanoaki aio. N te maieie are n 1989, te bokaboka, te tano, ao mangen kateitei a bitaki nakon te bwai ae ran n aron te maati ni karika bwakan te kateitei. Kateitei a aki kateaki iaon aan kateitei aika koaua.
Te mwaieie i Loma Prieta e rootia aika bati ni maiuia, n ikotaki ma ngai. N iangoan raoi bwaai ake a riki n te bong anne e kamatoa riki inanon au iango ao inanou bwa ti aonga n tokanikai ni kaitarai kairiiri, mwaiei, ao kaangaangan te maiu, ti riai ni kateitei iaon aan kateitei aika koaua.
Aia burabeti Nibwaite ae Ereman e anga te kamataata ae akea kairuana nakon kakawakin katean maiuira iaon aan te kateitei ae koaua, aan Iesu Kristo: “Ao ngkanne, natiu mwaane, uringnga, uringnga bwa bon iaon te bwa are ara Tia Kaboomwi, are Kristo, natin te Atua, are kam na riai ni katea iai aami; bwa ngkana te riaboro e kanakoa te ang mairouna ae korakora, eng ana kanoa ibuakon te ukeuke n anti, eng, ngkana ni kabane te atibu ae bwaka mai karawa ao te angibuaka ae korakora a bwaka mai karawa ao te angibuaka ae korakora a bwaka iaomi, bon akea korakoraia iaomi ni katiki ngkami nakon marawan te nanokawaki ao te maraia ae aki totoki, ibukin te are ko kateaki iaona, are bon aan te kateitei are ngkana aomata a kateitei iaona ao aki kona ni bwaka” (Ereman 5:12)
Inanon karikirakean tembora aika boou ni boong aikai, e iangoaki raoi tamneina, kateana, ao kamanenaan bwaai ni kateitei. Tuoan raoi te tano ao bwaai riki ake a karika te tabo anne a karaoaki iaon te tabo are e na kateaki iai te tembora. Kamatebwaian te ang, karau, ao bitaki n te ueta ibukin te aono a iangoaki bwa e aonga te tembora are e a tia e kona ni kaitarai tiaki tii te angibuaka ao te kiraimete are e kabuta nakon te aono anne, ma te tembora e koreaki tamneina ao ni kateaki n te aro ae e na kaitara maiei ae e aki kantaningaki, taiboon, ieka, ao tabeua riki kangaanga aika a ririki ake a kona n riki. N tembora aika bati, timanti ke biiti aika unikaki nako naano inanon te tano n angkana aan te tembora.
N ai aroia taan korotamnei ao kateitei n ara tai, Tamara are i Karawa ae tangira man akoi ao Natina a tia ni katauraoa taian babaire, bwai ni mwakuri, ao tabeua bwaai ibukira ni kamanenai bwa ti aonga ni katei ao ni boutoka maiuira ni koaua ao n aki kamwaingingaki. Te babaire bon te babaire ni kamaiu, te babaire ni kakukurei ae korakora. Te babaire e katangaina ibukira te tamnei ae mataata ao n oota ibukin moanakina ao tokina, ao mwaneka aika kakawaki, n ikotaki ma otenanti, aika kakawaki ibukiia natin te Tama bwa aonga ni kona n oki Nakoina ao ni maeka ma Ngaia n aki totoki.
Te onimaki, rairannano, bwabetito, ana bwai n tituaraoi te Tamnei ae Raoiroi, ao te teimatoa ni karokoa te toki bon mwakoron “babaire ibukin kateitei” n te maiu. A buoka ni katei koaua aika kakawaki are a na angkana maiuira nakon ana Mwakuri ni Kamaiu Kristo. Teiia ao boutoka aikai bon bwaai ake a na boutoka maiun teaomata. Imwiina, n aron ae te babaire n tamnei ibukin te tembora iai kabwarabwarakiia aika mataata are a anga te kaetieti ae mataata ibukin ae ni kanga ni karaoa ao ni booti bwaina aika kakaawaki, te tataro, warekan booki aika tabu, kanakin te toa, ao ni karekei otenanti n te nakoanibonga aika kakaawaki n te nakoanibonga ao n riki bwa “kabwarabwarakiia aika mataata” te buoka anne e booti ao n reitiia ni kabaeia rabwatan te maiu.
Te baeranti ni kammwakuran bwaai ni kamataata aikai e bon kakaawaki. N te katooto, n te mwakuri ni karaoan te timanti, mwaitin raoi te tano, te atama, timanti, ao te ran a kamanenaki bwa e aonga n reke te korakora ae te kabanea mai ieta. Te mwaiti ae e aki eti ke katukan teuana bwaina e na karika te timanti ae e aki matoatoa ao n aki kona ni karaoa ana mwakuri ae kakaawaki.
N aiarona naba, ngkana tiaki katauraoi ibukin te baeranti ae riai inanon maiura n ara tataro ibon iroura ni katoabong ao ni karekea te kukurei man booki aika tabu, te kakorakoraki ni katoawiiki man kanakin te toa, ao ni irirakin te otenanti n te nakoanibonga n aron otenanti n te tembora, ngaira naba ti na reke n te kabuanibwai inanon ara korakora n teira n te tamnei.
Bwauro, n te reta nakoia I-Ebeto, e ataongnga n te aro aio ma te karinerine nakon kainnanoia ibukin te rikirake ae baeranti man reitaki n te bootaki ibukin anuara ma tamneira: “Are e bane ni kaboraoaki te kateitei i Rouna, ao e rikirake bwa te maneaba ae tabu inanon te Uea” (I-Ebeto 2:21).
Te tataro bon teuana aan te kateitei ibukin koaua man ara onimaki ao anuara ae moan te kabanea ni bebete ao ni kakawaki. Man kawain te tataro ti a kona ni kaota ara kakaitau, tangira, ao ara kakaonimaki nakon te Atua. Man kawain ni kaboa mwiina ti karekea te korakora ni te tataro ti kona n anga ara kantaninga Nakoina ao n iiri kainibaire ni maiura nakon Ana reirei.. Te tataro bon te kawai ae ti kona n iiria ni kakaea Ana mwakuri n rooti maiura, ao kaotioti.
Aramwa e anga reirei: “Reitaki ma te Uea n am waaki ni kabane, ao e na kairiko nakon ae raoiroi; eng, ngkana ko wene n te bong wene inanon te Uea, bwa e na tararuaiko n am tai ni matu; ao ngkana ko teirake n te ingabong taraia bwa e na onrake nanom ni karabwarabwa nakon te Atua; ao ngkana ko karaoi bwaai aikai, ko na tabekaki rake n te kabanea ni bong” (Aramwa 37:37).
Tibwauan ara iango, namakin, ao ake ti tangiri ma te Atua rinanon te tataro ae koaua man namakinaki n te nano e riai n riki nakoira n tatabemaniira nako bwa e kakaawaki ao n aiaron te ikeike ao te amarake.
Te kakae ni booki aika tabu ni katoabong e na kamatoa ara onimaki ao anuara. N aiaron ae ti kainnanoa te amwarake ni kamaiuia rabwatara aio, tamneira ao rabwatara a na kamarakeaki ao ni kakorakoraaki man kamatebwaian ana taeka Kristo n are kanoan aia koroboki burabeti. Nibwaai e anga reirei, “Kakukurei ngkami n ana taeka Kristo; bwa taraia, a na tuangko Kristo bwaai aika ko riai ni karaoi” (2 Nibwaai 32:3).
Ni warekan booki aika tabu e bon tamaroa, ni warekia n ti ngaia e bon aki tau ni karekea raoi taraan ana reirei te Tia Kamaiu. Te kakae, iangoakina raoi, ao ni kamwakura ana taeka te Kristo n aron are e reirei ni booki aika tabu e na karokoa te wanawana ao te rabakau ae riaon ara atatai n te maiu aio are e na kakorakora kabaeara ao ni katauraoa te tamnei ni karaoa ara kabanea ni kona n arora nako.
Teuana mai buakon te mwaneka ae te kabanea ni kakawaki are ti kona n taua ni kakorakora maiura ao n tiku ni matoatoa n reitaki nakon aan te Tia Kamaiu bon te tau ni kana te toa ni katoa wiiki. Te otenanti n te toa e anganiia ni kabane kaain te Ekaretia te tai n iangoi raoi maiui ni moantaai, n iangoa te mwakuri ke te aki mwakuri are e na kona ni kainnanoaki n rairan nanom, ao ni kana te bwerena ao te ran bwa kanikina aika tabu ni kauringan rabwatan ao raran Iesu Kristo, te kakoaua ibukin Ana Mwakuri ni Kamaiu. Ngkana ti karaoia ma te nano ae koaua ao n te nanorinano, ti kaboou berita aika tabu aika akea tokiia, ake a kaitiakaki ao ni katabuakaki, ao ni karekea te berita are bwa e aonga Tamneina ni memena irouia, n taainako. Te Tamnei e mwakuri ngkana aiaron aekakin te moota, te toma are e aki tii katabuakaki ma e karokoi bwaai ni kabane nakon ara ururing ao e kakoaua riki ao ni kakoaua riki ibukin Iesu Kristo. N tau ni kana te toa e kakorakora ara reitaki nakon aan te kateitei ae te bwa, are Iesu Krsito.
Inanon Ana mwakuri te Tia Kamaiu e anga reirei ma te tangira ao e kamataatai reirei, koaua, ao mwakuri aika a kakawaki are a na kateimatoa maiura ao ni kakorakora anuara. N tokin ana Kabwarabwara iaon te Maunga, E taekinna:
“Ma ngaia aei, bwa ane ongo au taeka aikai n tauu, ao e na atongaki bwa ai aron te aomata ae wanawana, are [katea] batana i aon te bwa—
“Ao e bwaka te karau, ao e roko te raanga, ao e kare te ang, ao a neakina te bata arei; ao e aki bwaka, bwa a kateaki bouana i aon te bwa.
“Ao ane e ongo au taeka aikai n aki tauu ao e na atongaki bwa ai aron ae baba, are katea batana i aon te bike—
“Ao e bwaka te karau, ao e roko te raanga, ao e kare te ang, ao a neakina te bata arei ; ao e bwaka: ao e kakaiaki bwakana” (3 Nibwaai 14:24–27; tara naba Mataio 7:24–27).
Taari ao mwaneu, akea mai buakora n ae na riai n ataakina ni katea mweengara, taabo ni mwakuri, ke baata n taromauri aika tabu i aon te tano, mwaangen kateitei aika uruaki, ke n akea babaire aika a riai ao bwaai ni kateitei. Ti bia butimwaea ana kakao te Tia Kamaiu n roko Nakoina.Ti akatei maiura iaon aan te kateitei ae mano man koaua.
I nanorinano ni kakoaua bwa man angkaan maiura nakon Iesu Kristo ao Ana Mwakuri ni Kamaiu ao irakin raoi Ana babaire ibukin kukureira, n ikotaki ma te tataro ni katoabong, kamatebwaian booki aika tabu ni katoabong, ao kanakin te toa ni katoa wiiki, ti na kakorakoraaki; ti na karekea te atatai n rikirakera ni koaua ao te rairaki ae akea tokina, ti na katauraoaki raoi riki ni kaaitarai angibuaka ao kangaangan te maiu; ti na rinanon te kimwareirei ao te kukurei are e beritanaki; ao ti na karekea te aki nanououa bwa maiura a tia ni kateaki iaon aan— aan te kateitei ni koaua are e na aki kona ni bwaka. N aran Iesu Kristo ae tabu, amen.