Ren Kinamwe non Imw

Seni Elter Richard G. Scott

Seni ewe Mwichen Engon me Ruemon Aposel

Eu efeioch mi napanap sia tongeni awora ngeni fonufan mi ewe manamanen eu imw minne Kraist a nom nukunapan me a akkafanafan ewe kapas allim, pwon mi anneasochis, me tong a nom.

Mi wor chommong mongungu seni fonufan ra erenikich pwe sipwe manau non napanap muttir. Mi wor chommong met sipwe fori me apwonueta. Nge, mi namwot epwe wor eu nenien kinamwe ren emon me emon kich, eu neni sia tongeni asoso me sofosefannikich, me ammonakicheta ren fansoun mwach.

Amo ita ena nenien kinamwe a nom non imwach, minne sia fori mettoch meinisin mi tufich pwe ewe Samon Jises Kraist a nom nukunapan ach ekiek.

Non ekkoch imw a wor emon sam mi emon chon pristut mi nimenimoch fiti emon in mi nukuchar me ir me ruemon ra emwen fan wenechar. Mi sokkofesen non chommong imw. Ese nifinifin nonnomum, ka tongeni fori pwe ewe Samon Jises Kraist a nom nukunapan imwom me manauom, pun ennetin kinamwe non ei manau mi seni I.

Kopwe tumunuoch pwe mettoch meinisni ka finata, ina mo non pekin ngun are inis, mi anongonong won met ewe Chon Amanau a mochen kopwe fori. Nupwen A nom nukunapan imwom, mi wor kinamwe. Mi wor eu memmefen pwon mi aureno ewe imw, me meinisin ra mefi pwe nom non ewe imw.

Apwonuetan ei aurour ese chok wisen sam me in, ina mo wiser ne emweni. Semirit ra tongeni wisen aochu angangen awena ewe imw pwe Kraist a nom nukunapan. Mi auchea pwe sam me in repwe aiti semirit ne esinna ifa usun ar kewe foffor a kuu emon me emon a nonnom non ewe imw. Semirit ra mefiniwinin ren ar kewe foffor, ika mi och are ngaw, ra mamarita pwe repwe chon ewe muun Kot mi nukuchar.

Ai nuku pwe kopwe tongeni esisinnata ekkewe nongonong ra atufichi ewe Chon Amanau epwe nom nukunapan imwom. Aurour seni soufos ne iotekin famini me pwisin iotek iteitan ran, fiti kaeo pukfel, me pwinin famini iteitan wik mi ekkewe nongonong mi aucheanap ne kouta eu imw minne Kraist a nom nukunapan. Ika ese fis ekkei foffor epwe weires ne kuna ewe kinamwe me asoso seni fonufan minne mi namwot.

Kopwe anneasochisi afanafan seni soufos minne Kraist a mochen pwe kopwe fori. Kosap pwotano om pwapwa non fansoun mwach me ren om anneasonapa nongonongen kapas allim. Kopwe chechemeni: kukkun mettoch ra emwen ngeni watte mettoch. Tipis mi kukkun mi tongeni emwen ngeni tipis watte. Pwan auchea, fofforoch mi fifis, me mi mecheres ra emwen ngeni eu manauen chommong feioch.

Ami kana semirit non Kinter, ami anuon me fopun, me ami kana misineri mi nukuchar oua angang me forochu chommong mettoch nap seni mi tufich nupwen ngang ua ierimi. Non manau me mwen ei oua pwar pwe ami me nukunuk, anneasochis, me nimenimoch. Ikkewe oua angang weires ne kakaeo me awatteno ami angoch pwe oupwe monnota ngeni ei manau ren pwara, sufon, me fefeita.

Ese fansoun nom ka feito ngeni ei manau ren meinisin ekkena angoch me tufich. Nge mi ennetin wor feingaw a pwennuk. Om fefeita me tufich epwe tongeni kisikisino are tano ika ka fangeno ngeni tipis. Iwe nge, Setan ese pochokun ngeni ewe Chon Amanau. Mi fen kefinita manauen Setan. A sinei pwe a kuf ren, nge a mochen pwe chommong aramas repwe fiti i. Epwe achocho ne ataieno om angoch me ren an apwareno om apwangapwang. Kopwe nom won epekin ewe Samon, me kopwe winneni iteitan fansoun meinisin.

Ka manau won eu fonufan minne ochun technology a muttir fefeita. A weires fan iten ai tappin aramas ne fiti meinisin ekkewe mettoch mi tufich. Anongonong won ifa usun technology mi aea, ekkei mettoch mi tongeni pisekin feioch are feingaw. Nupwen technology mi weweoch me aea ren popun mi wenewen, ese namwot pwe technology epwe efingawa nge epwe efeiochu foffos non pekin ngun.

Ren awewe, chommong seni kich sia aea eu piseken technology a kuch non pwekitin ufach. Ese chommong fansoun ese fitikich; meni sia aea fan chommong iteitan ran. Iwe nge, ekkei pisek ra tongeni eu pisekin fofforungaw me fansoun a nus mwan. Nge, ren akkachocho, ei technology a tongeni eu pisekin eppet seni ngawen ei fonufan.

Io a ekieki me nom pwe meinisin ekkewe pukfel me fitu ierin mwichenapen mwichefen epwe kuch non pwekitom? Ar chok nom non pwekitom esap tumunuk, nge om kaeo, ekipwichir, me ausening ngenir non fansoun mosonoson iteitan ran epwe aochu pwarata me ren ewe Ngun mi Fel.

Kopwe mirit non om aea technology. Kopwe esisinnata ekkoch wokisin mi auchea won noum we fon me kopwe nenengenir iteitan. Ika ami serafo oupwe nenengeni eu wokisin ukukun fansoun oua tinano text message, epwene ekkis fansoun me kopwe chechemeni fitu puku wokisin. Ekkena wokisin ra eu nenien angei pwarata me emwen me ren ewe Ngun mi Fel non fansoun mi namwot.

Ach fori mettoch meinisin mi tufich ne tingorei ewe Ngun mi Fel mi pwetete me emwen, non manauach mi aucheanap non ach fori pwe ewe Chon Amanau a nom nukunapan imwach. Anneasochisi emwen a pwan apochokunakicheno.

Kinamwe watte epwe toruk nupwen ka akkachocho ne anneasochis ren ekkewe ir ra nom pwennuk. Chommong aramas ra mefi pwe ar angoch ese auchea nge ra efeiochu manauen chommong aramas ren netipetekison. Maicha mi ewe popunapen ngaw mi watte. Ewe nesson usun ei mettoch mi ngaw mi nom non porausen manauen ewe Chon Amanau. A aiti kich ifa usun sisap maicha ren ach angang ngeni ekkoch.

Ua kaeo eu nongonong mi fis fan chommong non manauei minne ua nenengeni pwe ennetin eu annuk. A awewe ifa usun anneasochis me angang ra wewe ngeni ewe manamanen Kot. Nupwen sia anneasochisi ekkewe annukun ewe Samon me angang ngeni Noun kewe nge sise maicha, manaman seni Kot mi niwinin—manaman ne fori nap seni met sia tongeni pwisin fori. Ach ekieki, ach angoch, ach tufich ra watteno pokiten sia angei pochokun me manaman seni ewe Samon. An manaman mi eu kinikinin fori eu imw mi uren kinamwe.

Nupwen ewe Chon Amanau a nom nukunapan imwom, epwe winiti eu nenien asoso fan iten om famini me chienom kewe ra manau weires. Repwe mochen fiti ewe kinamwe ra mefi ikkewe. Kopwe etiwaochu ekkena chiechi non imwom. Repwe mamarita non ena neni minne Kraist a nom nukunapan. Kopwe chiechi ngeni chienen noum kewe. Kopwe eu nenien appiru mi nimenimoch ngenir.

Eu feioch nap seni chommong sia tongeni fang ngeni ewe fonufan mi ewe manamanen eu imw minne Kraist a nom nukunapan minne ewe kapas allim a aiti, annuk ra anneasochis, me a watte tong.

Fitu ier mi nom, mwirin aua churi eu misin, punuei, Jeanene, a ereniei usun emon elter a churi. Jeanene a eisini usun an famini. A mairu nupwen a pwonueni pwe ese wor an famini. A awewe pwe nupwen a uputiw, inan we a fangeno ngeni ewe kovomen pwe repwe mamarita. A feino seni eu imw ngeni pwan eu nupwen a emon semirit. A feioch nupwen a emon serafo pwe a kuna ewe kapas allim. An we wart ra anisi pwe epwe tufichin fori angangen misineri.

Mwirin Jeanene a eisini punuen ewe presentein misin usun ei elter. A kaeo pwe ekkoch maram me mwen ei elter a nom non imwer fan ekkoch ran pokiten a samau. Non ena fansoun a fiti ren pwinin famini. Me mwen a niwinsefan ngeni an angang, a eisini ewe presetenin misin ika a tongeni aea ru ika unungat ran non imwer nesoponon an misin. A mochen kuna fetanin eu famini minne Kraist a nom nukunaper. A mochen pwe an famini epwe ussur chok.

Kopwe akkachocho pwe imwom epwe usun chok. Kopwe eitau poum ngeni ekkewe ir ra manau weires. Kopwe emon chiechi mi ennet. Ei sokkun chiechi a anisi ekkoch ne engino me manauach a pwan pwapwa. Esap eu pisekin pwisin fefeita nge epwe eu pisekin auchea minne kopwe kinisou ren me kopwe awora ngeni ekkoch. Kopwe etiwa ekkoch aramas non imwom minne mi namwot repwe pochokununo ren ar nom non imwom.

Ekkoch chok ai ekiek fan iten ami mi tongei emon chon famini minne ese fini met mi och. A tongeni sotuni ach tipetekison me tipe nikitu. Mi namwot sipwe epinukunuku ewe Samon me An kunok pwe ach iotek me angang epwe fisioch. Sia fori mettoch meinisin mi tufich ne angang ngeni, efeiochu, me etiwa netipen Kot non mettoch meinisin. Sia anganga ach nuku me sia chechemeni pwe mi wor ekkoch mettoch a nom non poun ewe Samon. A tingoreikich pwe sipwe isettiw ach weires won Pechan kewe. Ren nuku sia tongeni sinei pwe ena emon sia tongeni ese nikitano nge a nom fan mesen ach Chon Amanau mi tong.

Kopwe esinna ochun ekkoch aramas, nge esap ngawer. Non ekkoch fansoun mi namwot pwe tipis epwe tonano, nge kopwe nenengeni ochun pwisin ir.

Nupwen ka mefi pwe mi chok wor ekkis epinukunuk, esap chok ekkis nge a fakkun watte, usun eu pisekin tumunu ne apochokunok. Epwe awora kinamwe ngonuk pwe kosap chuen niuokus. Kopwe achocho ne manau nimenimoch me kopwe epinukunuku ewe Samon.

Ese namwot pwe sipwe noninen ika sise tongeni fori mettoch meinisin ewe Samon a auroura kich ne fori. A poraus usun eu fansoun me atun mettoch meinisin. Ren pwonuen ennetin ach iotek ren emwen, Epwe emwenikich non met sipwe anganga won non iteitan kinikinin manauach. Sia tongeni kaeo, mamarita, me winiti usun chok I ekkis me ekkis.

Ua kapasen pwarata pwe manauen anneasochis, minne ewe kapas allimen Jises Kraist a popunen, a wora pwonen kinamwe me asoso non imwach. Epwe chuen wor chommong osukosuk are netipechou, nge non fansoun weires, sia tongeni apwapwaiti kinamwe me pwapwa non manauach. Ua pwarata pwe ewe Achasefanin Jises Kraist mi ewe nenien kinamwe, non iten Jises Kraist, amen.