Kotak Eddo ko Aer ilo Ejjelo̧k Pen

Jān Elder David A. Bednar

Jen Doulul eo an Jon̄oulruo Rijilōk ro

Eddo ko rejenoļo̧k ilo mour ko ad kajjojo rejipan̄ kōj pedped ioon wānōk, tiriam̧o, im jouj eo an Messaia Ekwojarjar.

Ewōr juon m̧ōtta ejitenbōro eo, ilo iiō ko m̧okta in mour in pālele eo an, kar jek ippān ke eaikuji juon wa tūrak emān neen. Lio pāleen ekar jeļā bwe ejjab aikuji ak ekōņaan wa kāāl. Juon bwebwenato in kōm̧m̧an kōjak ikōtaan ripālele rein kar unoojdikdik n̄an er n̄an kejokļo̧kjeņ kōn em̧m̧an im nana ko n̄an wiaik tūrak 4 Wheel Drive.

‟Jitenbōro, jaikuji juon tūrak 4 Wheel Drive.”

Eaar kajjitōk, ‟Etke kwoj ļōmņak jaikuji juon tūrak kāāl?”

Ekar uwaake kōn ta eo eaar ļōmņak ar uwaak eo ejjejet: ‟Ta n̄e jaikuj milik n̄an ajri ro nejid ilo juon taipoon enana, im wāween eo de eo imaron̄ etal n̄an im̧ōn wia ej kōn juon tūrak?”

Lio pāleen ekar uwaak kōn ettōn̄dikdik, ‟Eļan̄n̄e jenaaj wiaik juon tūrak kāāl, enej ejjeļo̧k ad jāān n̄an milik—kōn menin etke inepata kōn etal n̄an im̧ōn wia eo ilo iien idin̄!”

Elōn̄ awa remootļo̧k n̄an ko̧o̧njel ippān doon im lukkuun ļōmņak n̄an wiaik tūrak eo. Ejjab to ālikin aer kar wiaik wa kāāl eo, eo m̧ōtta ekar kōņaan kwaļo̧k jon̄an an ļap tokjen tūrak eo im kam̧oole kōttōpar ko an n̄an kōņaan wiaik. Kōn menin ekar ļōmņak emaron̄ jōk im kajjidikdik jet alal in kōmat n̄an m̧weo m̧weier. Ekar iien autumn ilo iiō eo, im sno em̧ōj kadede aer wōtlo̧k ilo toļ ko ijo eaar kōņaan kappok alal ie. Ilo an kar kattōr e wa eo tōrerein toļ eo, sno ko em̧ōj aer lukkuun jino mijel im mijel ļo̧k. Eo m̧ōtta eaar kūle bwe ekauwōtata n̄an kattōre wa eo ioon iaļ ko rejjūr, bōtaab kōn eļap leke ilo tūrak kāāl eo, eaar wōnm̧aanļo̧k wōt.

Kaburom̧ōjm̧ōj, eo m̧ōtta ekar mootļo̧k ilo iaļ eo e sno. Ilo an kar kōjeer tūrak eo jen iaļ eo n̄an ijo eaar kōņaan jekjek alal ie, eaar pen. Aolepen wiil ko emen ilo tūrak kāāl eo raar in̄in̄ ilo sno. Eaar m̧ōkaj an kūle bwe ejjab jeļā ta n̄an kōm̧m̧ane n̄an kanōk tok e make jen wāween in ekauwōtata. Ekar jook im inepata.

Eo m̧ōtta eaar ļōmņak, ‟Ekwe, iban baj jijet wōt ijin.” Eaar diwōjļo̧k jen wa eo im jino jekjek alal. Eaar kobrak tulik in tūrak eo kōn jon̄an eddo eo. Innām eo m̧ōtta eaar ļōmņak bwe emaron̄ kajion̄ kattōr e wa eo jen sno ko bar juon alen. Ke Ej kōjo̧ injin eo im jino kattōr, jidik wōt an wōnm̧aan ļo̧k. Kadikdiki wa eo jen sno ko im kōro̧o̧l ļo̧k n̄an lowaan iaļ eo. Āliktata eaar rōļo̧k n̄an jepļaak n̄an m̧weo, juon em̧m̧aan elem̧ōņōņō im ettā.

Eddo ko Ad Kajjojo

Ij jar kōn jipan̄ an Jetōb Kwojarjar ilo Aō kōmjāje kōn katak ko me maron̄ ekkatak kaki jān bwebwenato in kōn eo m̧ōtta, tūrak eo, im alal. Jon̄an eddo in alal ko me ar maron̄ kōm̧m̧an bwe en eļļā jen sno, n̄an bar ro̧o̧lo̧k n̄an iaļ eo, im n̄an wōnm̧aan ļo̧k. Eddo eo ar kōm̧m̧an bwe en maron̄ jepļaak n̄an baam̧le eo an im m̧weo imōn.

Kōj kajjojo jej barāinwōt ineek juon eddo. Eddo ko ad ekoba kōņaan ko, iien ko raorōk, jerbal ko im jeram̧m̧ōn ko, lōkapokpok im kōjeram̧mōn ko, kejokļo̧kjeņ im jon̄ak ko. Ruo kajjitōk in tōl ko remaron̄ lukkuun jipan̄ n̄e jej kajion̄ im niknik jar rej etale eddo eo ad. ‟Eddo eo ij ineeke ej ke kwaļo̧k kajoor an jetōb me enaaj kōm̧m̧an bwe in wōnm̧aan ļo̧k kōn tōmak ilo Kraist ilo iaļ eo eaidik im kōjekdo̧o̧n pen? Eddo eo ij ineeke ej ke ejaak kajoor an jetōb bwe In maron̄ jepļaak n̄an Jemedwōj Ilan̄?”

Jet iien jej bōd im tōmak bwe lem̧ōņōņō ejjab kitbuuj ineek juon eddo. Ak ineek juon eddo ej m̧ōttan eo ekkar im eaorōk an karōk in m̧ōņōņō. Kōnke eddo ko ad raikuj kwaļo̧k kajoor an jetōb, jej aikuj mejmej karuo n̄an jab kobaik āinwōt m̧ōttan mour ko ad kōnke elōn̄ men ko rem̧m̧an ak rōjekkar me jej juļo̧k im kowaani men ko eļaptata tokjāer.

Kōkajoor ļo̧k Kajoor an Pinmuur

Rilomo̧o̧r eaar ba:

‟Kom̧win itok n̄an ippa, kom̧ otemjej rej jerbal im ban, im Inaaj kakkijeik kom̧.

‟Kom̧win bōk aō ine im likūti i aerami, im katak Ippa; bwe Ij ineem̧m̧an im ettā būruō, im kom̧ naaj lo an ami kakkije.

‟Bwe Ij ineem̧m̧an im ettā būruō, im kom̧ naaj lo an ami kakkije.” (Matu 11:28–30)

Juon yoke ej juon alal epen, ekka kijon̄ kōjerbale ikōtaan ruo kau ak bar jet menin mour me ej kōm̧m̧an bwe ren kanōke ippān doon juon ine eddo. Juon yoke ej likūt menin mour ko turājet jān iturājet eo juon bwe ren maron̄ em̧m̧akūt ippān doon n̄an kadedeļo̧k juon jerbal.

Kejokļo̧kjeņ mōk kōn kūr eo ejenolo̧k an Irooj n̄an ‟bōk aō ine im likūti i aerami.” Kōm̧m̧an im kōjparok bujen ko rekwojarjar rej kakobaik kōj n̄an im likoj kōj ippān Irooj Jisōs Kraist. Aorōktata, karuwaineneik kōj wōj n̄an pedped wōt ilo E im jerbal ippān doon ilo jetōb Ippān, men̄e kijejeto ko ad rem̧m̧antata rejjab jon̄aer wōt juon im jab maron̄ keidi n̄an E. Ilo ād leke E im iuun m̧aan ļo̧k eddo eo ad Ippān ilo iiaļ in an wapanpan, ilo m̧ool An ine em̧m̧an im men eo Ej ineke emera.

Kōj jejjab im jejjamin aikuj make iaad. Jemaron̄ wōnm̧aan ļo̧k ilo mour ko ad aolep raan kōn jipan̄ jen lan̄. Kōn Pinmuur eo an Rilo̧mo̧or jemaron̄ bōk kakkōt im kajoor eo me eļapļo̧k jen ad nej kar kōn kōjmake. (“Lord, I Would Follow Thee,” Hymns, no. 220). Ilo an Irooj kar kwaļo̧k, bwe jej aikuj wōnm̧aan ļo̧k im mour kōn mour ko ad im bwe jej aikuj lan̄lōn̄ kōnke Ej pād ippad, men̄e n̄an jem̧ļo̧kin mour ko ad (D&C 100:12).

Kōlmenļo̧kjeņ kōn waanjon̄ok eo ilo Bok in Mormon eo Amulon eaar kakkure Alma im armej ro an. Ainikien Irooj eaar itok n̄an Rikaloor rein ilo lōkapokpok ko aer. ‟Kom̧in kotak bōrami im kom̧in inem̧m̧an, bwe Ijeļā kōn bujen eo kom̧ ar kōm̧m̧ane n̄an Eō, im Inaaj bujen ippān armej ro Aō im kōtļo̧k er jān kōm̧akoko.” (Mosaia 24:13)

Keememej bwe bujen ko relukkuun aorōk n̄an kalim̧m̧ur ko kōm̧m̧ani. Bujen ko būki im kauteiji kōn m̧ool im kain̄i ko kōm̧m̧ani kōn mālim eo ejim̧we an priesthood rekkar n̄an bōk aolep kōjeram̧m̧ōn ko kar kōm̧m̧ani bwe ren pād kōn Pinmuur eo an Jisōs Kraist. Kōnke ilo kain̄i ko an priesthood, kajoor in kwojarjar ej rie n̄an em̧m̧aan im kōrā ro ilo mour wapanpan, ekoba kōjeram̧m̧an ko an Pinmuur eo (lale D&C 84:20–21).

Keememej naan eo an Rilo̧mo̧or ‟Bwe Aō ine ej em̧m̧an, im men eo Ij ineke emera” (Matu 11:30) ilo ad kejokļo̧kjeņ kōn eoon eo tokālik ilo bwebwenato in Alma im armej ro an.

‟Im Inaaj bārainwōt kōmeraik eddo ko kar likūt ioon aerami, bwe em̧ool kom̧ make kom̧in jab en̄jaki ioon ālkimi.” (Mosaia 24:14)

Elōn̄ iaad remaron̄ kōtmāne bwe eoon in ej elmakot bwe juon eddo ejidimkij im emōkaj an nej jako ļo̧k. Eoon eo tokālik, ijowōtke, ej kōmeļeļik wāween an eddo eo jako.

‟Im ālkin men kein, eddo ko kar likūt ioon Alma im ro jein im jatin kar kōm̧m̧an bwe ren mera; aaet, Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itoklimo im kōn inem̧m̧an n̄an aolep ankilaan Irooj.” (Mosaia 24:15; meļeļe kobaiktok)

Apan̄ im men ko reppen rejjab m̧ōkaj aer jako jen armej. Ak Alma im rikaloor ro an raar kajoorļo̧k, im ļapļo̧k in aer kakkōt ar kōm̧m̧an bwe eddo ko ren meraļo̧k. Armej rein rem̧m̧an rekar bōk kajoor kōn Pinmuur eo n̄an jerbal āinwōt ritok ilo etan (lale D&C 58:26–29)) im kōļapļok aer kōņaan ilo jōkjōk ko aer. Im ‟ilo kajoor ōn Irooj” (Naan ko an Mormon 1:14; Mosaia 9:17; 10:10; Alma 20:4), Alma im armej ro an kar kōjparok er n̄an ānen Zarahemla.

Ejjab Pinmuur eo wōt an Jisōs Kraist me kar eļļā ļo̧k kake jen jelōt ko an Wōtlo̧k eo an Adam im kapidodoik n̄an ad kajjojo jeorļo̧k jerawiwi im bōd ko ad, ak Pinmuur eo An eaar barāinwōt kōm̧m̧an bwe jen kōm̧m̧an em̧m̧an im erom em̧m̧an ilo wāween ko me reļe jen jon̄an kakkōt ko ad ilo mour wapanpan. Elōn̄ wōt iaad rejeļā bwe eļan̄n̄e jej kōm̧m̧ani men ko rebōd im aikuj jipan̄ n̄an eļļāļo̧k jen jelōt ko an jerawiwi ilo mour ko ad, Rilo̧mo̧or eaar kapidodoik n̄an kōj n̄an erreo kōn kajoor in Pinmuur eo An. Bōtaab jej ke barāinwōt meļeļe bwe Pinmuur eo ej n̄an em̧m̧aan im kōrā ro retōmak ro rej pokake, mour wānōk, im kōjparok kien ko im ro rej kajion̄ n̄an erom em̧m̧an im jerbal kōn eļapļo̧k tōmak? Ij bwilōn̄ eļan̄n̄e jej lukkuun kūle kajoor in letok kōn Pinmuur eo ilo mour ko ad, im jab bōd im tōmak bwe jej aikuj ineek eddo ko ad kōn kōjmake—kōn kijejeto ko ad make, kajoor im pokake im kōn jon̄an kakkōt ko ad.

Ej juon men n̄an jeļā bwe Jisōs Kraist eaar itok n̄an laļin n̄an mejkōn kōj. Ak jej aikuj barāinwōt jeļā n̄an kūle bwe Irooj ekōņaan, kōn Pinmuur eo an im kōn kajoor an Jetōb Kwojarjar, n̄anletok mour n̄an kōj—ejjab wōt n̄an tōl ak barāinwōt n̄an kōkajoor ļo̧k im kemour kōj.

Rilo̧mo̧or Ej Jipan̄ Armej ro An

Alma eaar kōmeļeļik etke im ekōjkan an Rilo̧mo̧or eo maron̄ jipan̄ kōj:

‟Im Enaaj ilo̧k, en̄taan kōn metak ko im kaen̄tanaan ko im kapo ko otemjeļo̧k, im menin bwe naan eo en maron̄ kūrm̧ool eo kar ba Enaaj bōk ioon metak ko im nan̄inmej ko an armej ro An.

‟Im Enaaj bōk ioon mej, bwe E en maron̄ kōtļo̧k tok to rej lukwōj armej ro An; im Enaaj bōk Ioon m̧ōjņo̧ ko aer, bwe buruōn ren maron̄ obrak kōn tiriam̧o, ekkar n̄an kanniōk, bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer.” (Alma 7:11–12)

Mekarta, Rilo̧mo̧or ekar en̄taan ejjab kōn jerawiwi im m̧ōjņo̧ ko wōt ad—ak barāinwōt kōn metak im en̄taan ko ad ilo kanniōk, m̧ōjņo̧ im jeban ko ad, mijak im jajeļo̧kjeņ ko ad, jook im ebbweer ko ad, ajļo̧k im bōd ko ad, illu im inepata ko ad, em̧m̧an im nana ko jej ioon, im inepata ko rej kakkure ad mour.

Ejjeļo̧k metak ilo kanniōk, kinej ilo jetōb, būrom̧ōj im liāājļōļ, apan̄ im aikuj kwe im n̄a kōjro ej ioon ilo mour in wapanpan me Rilo̧mo̧or ekar jab en̄jake m̧o̧kta. Ilo jidik iien m̧ōjņo̧ jemaron̄ jan̄, ‟Ejjeļo̧k juon ejeļā ta in āinwōt. Ejjeļo̧k juon emeļeļe.” Ak Nejin Anij ejeļā im emeļeļe kaki, kōnke Eaar en̄jake im kar ineek eddo ko ad kajjojo. Im kōn katok eo eļap im ejjeļo̧k jem̧ļokin (lale Alma34:14), ewōr An tiriam̧o im emaron̄ kōdepakpak ļo̧k pein An tiriam̧o. E emaron̄ jipadōkļo̧k, jibwe, jipan̄e, kemouri, im kōkajoorļo̧k kōj n̄an ad maron̄ erom eļapļo̧k jen jon̄an eo ad im jipan̄ kōj n̄an kōm̧m̧ane ta eo jejjab maron̄ kōm̧m̧ane n̄an kōjmake, ak kōn ad make kajoor. Lukkuun, An ine ej em̧m̧an, im men eo Ej ineke emera.

Juon Kūr, juon Kalim̧m̧ur, im juon Naan in Kam̧ool

Ij kūr kom̧ n̄an ekkatak, jar, im ļōmņak, im kajion̄ n̄an ekkatak eļapļo̧k kōn Pinmuur eo an Rilo̧mo̧o̧r ilo ami ineek eddo ko ami. Elōn̄ men ko kōn Pinmuur eo jejjab maron̄ kōllaajraki kōn kōlmenļo̧kjeņ ko ad. Bōtaab elōn̄ em̧m̧an ko kōn Pinmuur eo me jemaron̄ im aikuj n̄an meļeļe kaki.

N̄an eo m̧ōtta, eddo in alal ko eaar kwaļo̧k juon iiaļen kōjparok mour. Tūrak eo ejjeļo̧k kobban eban kar em̧m̧akūt ilo sno ko, men̄e epoļōmen kōn emen wiil ko. Jon̄an eo eddo ar ekkar n̄an kwaļo̧k iiaļ.

Ekar jon̄an eddo eo. Ekar jon̄an eddo eo ekar kwaļo̧k iiaļ me ar kōm̧m̧an bwe eo m̧ōtta en jab pen, n̄an bar ro̧o̧l n̄an lowaan iaļ eo, n̄an wōnm̧aanļo̧k, im n̄an bar jepļaak n̄an baam̧le eo an.

Eddo in ejenolo̧k ilo kajjojo mour ko ad ejipan̄ kōj n̄an pedped wōt ioon, tiriam̧okake, im jouj eo an Messaia Ekwojarjar (Lale2 Nipai 2:8). Ij kam̧ool im kalim̧m̧ur bwe Rilo̧mo̧or enaaj jipan̄ kōj ineek eddo ko ad (laleMosiah 24:15). Ilo ad ekkeijel wōt Ippān kōn bujen ko rekwojarjar im bōk kajoor in Pinmuur eo An ilo mour ko ad makmake, enej ļapļo̧k ad jar im pukōt kajoor eo n̄an ekkatak jān, ukōt, ak mōņōņō kōn jōkjōk ko ad ijjeļo̧kin jar kōn kōmmaanwa ko ad bwe ren oktak. Jenaaj erom rijerbal ilo etan ro rej jerbal im jab men bajjōk me rej jerbal ioon (lale 2 Nipai 2:14). Jenaaj jeram̧ōn kōn iaļen jetōb.

Kōj kajjojo jen kōm̧m̧an im erom em̧m̧an kōn Pinmuur eo an Rilo̧mo̧or. Rainin ej Eprōl 6. Jejjeļā kōn m̧adenļo̧k bwe rainin ej lulukkun jejjet raan in ļotak eo an Rilo̧mo̧o̧r. Eprōl 6 barāinwōt raan eo Kabun̄ eo an Jisōs Kraist im Armej ro Rekwojarjar ilo Raan ko Āliktata eaar ejaak. (lale D&C 20:1; Harold B. Lee, “Strengthen the Stakes of Zion,” Ensign, Juļae 1973, 2; Spencer W. Kimball, “Remarks and Dedication of the Fayette, New York, Buildings,” Ensign, Māe 1980, 54; Discourses of President Gordon B. Hinckley, Volume 1: 1995–1999 [2005], 409.). Ilo Jabōt in ekwojarjar im aorōk, Ij kwaļo̧k aō kam̧ool bwe Jisōs Kraist ej ad Ripinmuur. Ej mour im enaaj karreoik, kemour, tōl, im kōjparok, im kōkajoorļo̧k kōj. Kōn menin Ij kam̧ool ilo etan ekwojarjar Jisōs Kraist, amen.