2010–2019
Kwaļo̧k Am Tōmak
Eprōļ 2014
14:56

Kwaļo̧k Am Tōmak

Jān Elder Russell M. Nelson

Jen Doulul eo an Jon̄oulruo Rijilōk ro

Jen raan n̄an raan, ilo iaļ in am ļo̧k n̄an indeeo eo ejjeļo̧k jem̧ļo̧kin, kōļapļo̧k am tōmak. En waļo̧k am tōmak! Kwaļo̧k am tōmak!

Ro jeiū im jatū rejitenbōro, kōm̧ij kwaļo̧k iakwe eo em̧wilaļ im kam̧m̧olol kom̧. Kōm̧ij m̧ōņōņō kōn ijjitōn̄ ko am n̄an jerbal ippāmi.

Ilo kar juon tireep jem̧aan ļo̧k, baiļōt eo eaar karon̄ tok kōm bwe kōm̧ maron̄ ioon aaer ilo iaļ eo am̧ im bwe aolep bajinjea ro reaikuj kōņaak jitpeeļ ko aer. Ke ej dedeļo̧k an̄jiwiwi in mejatoto eo eaar waļo̧k. Eaar lukkuun in nana. Ilo kōtaan eo im jet kōta ilikū, juon kōrā eo elukkuun mijak. Ilo kajjojo iien an kaj baļuun eo, ej lukkuun lam̧ōj. Likao eo pāleen eaar kajieon̄ in kaenōm̧m̧an e ak eaar jab inem̧m̧an. Elam̧ōjm̧ōj ko an raar wōnm̧aanļo̧k wōt m̧ae iien eo kōm̧ ar etal jen eria eo ijo me kōm̧ ar ioon an̄jiwiwi in mejatoto eo im kar jo̧k ļo̧k ilo aenōm̧m̧an. Ilo tōre eo eaar mijak, Iaar būrom̧ōj kake. Kōnke tōmak eo eaar kalibubuik mijak, iaar kōņaan bwe in kōkajoor ļo̧k tōmak eo an.

Tok ālik, ke bajinjea ro raar em̧akūt jen baļuun eo, likao eo ippān kōrā in eaar kōnono ippa. Eaar ba, “Jolo̧k bōd bwe kōrā in ippa eaar lukkuun mijak. Wāween de eo imaron̄ kaenōm̧m̧an e ej jiron̄ ļo̧k e bwe ‘Elder Nelson ej epād ilo baļuun in, kōn menin kwōn jab inepata.’’’

Iaar jab jeļā bwe ilo aō pād ilo baļuun eo emaron̄ kar leļo̧k n̄an e jabdewōt ineōm̧m̧an, ak imaron̄ ba bwe juon iaan m̧ool ko kōn mour wabanban in ej bwe tōmak eo ad naaj maron̄ idajon̄jon̄ im mālijon̄. Jet iien idajon̄jon̄ ko rej waļo̧k ilo ad ioon ta eo ej waļo̧k ilo en̄jake ko me rejelet mej. N̄an mijak in an kōrā in, juon kauwōtata ilo baļuun in eaar kwaļo̧k juon iaan iien ko me m̧ool jemaron̄ jeļm̧aeki kōn kajoor in tōmak eo ad.

Ilo ad kōnono kōn tōmak―tōmak eo me emaron̄ kōm̧akūt to̧l ko―jejjab kōnono kōn tōmak eo elikieo ak tōmak eo ilo Irooj Jisōs Kraist. Tōmak ilo Irooj Jisōs Kraist emaron̄ kajoor ļo̧k n̄e jej ekkatak kōn E im mour ekkar n̄an tōmak in ad. Katak eo an Jisōs Kraist eaar kōm̧m̧an in Irooj n̄an jipan̄ kōj kōļapļo̧k ad tōmak. Ilo tōre in, mekarta, naan in tōmak emaron̄ in oktak meļeļein ippān armej ro jet.

Naan in tōmak ej meļeļein “bar kapene” ak “bar (dāpdāp)” ippān Anij.1 Kajjitōk eo jemaron̄ kajjitōkin kōj make ej, jej ke lukkuun dāpdāp ippān Anij bwe ad tōmak en waļo̧k? Ak jej ke bar dāpdāp ippān bar jet men? N̄an waanjon̄ok, Iaar ron̄ ekōnono ko ilo jibbon̄ in M̧ande eo kōn (ikkure ko rōkōpalpal tata) me eaar bōk jikin ilo Jabōt eo lo̧k. Jet iaan (rialooj ro), eļan̄n̄e men eo relukkuun itok-lim̧oin kake eo eiokļo̧k ikkure.

Jemaron̄ kajjitōkin kōj make, ewi ad tōmak? Epād ke ilo juon tiim? Epād ke ilo etan tiim eo? Epād ke ilo juon eo ebuñbuñ? Barāinwōt ilo tiim ko rem̧ōkade tata remaron̄ likjab. Eo ebuñbuñ emaron̄ in jako. Ewōr wōt Juon me tōmak eo am ej aolep iien jokne ippān, im ej ilo Irooj Jisōs Kraist. Im kwoj aikuj kwaļo̧k am tōmak!

Anij eaar kwaļo̧k ilo jinoin ilo Kien ko An Joun̄oul, “En ejjeļo̧k bar anij raņ ippam̧ ijello̧kū.”2 Irooj eaar barāinwōt ba, reitok n̄an eō ilo aolep ļōmņak, jab pere, jab mijak. 3 Aaet ekanooj lōn̄ armej ro rej kalimjek wōt pelan in akaun ko aer ñan inem̧m̧an ak n̄an ļoor waanjon̄ok an armej.

Taktō ro retijem̧ļo̧k, rūkaki ro retijem̧ļo̧k ilo jikin jeļāļo̧kjeņ ko, im rikien ro ekkā aer lukūt juon idajon̄jon̄ in tōmak. Ilo jibadbad ko aer, tōmak eo aer enaaj ke alikar ke ak nojak? Raar ke dāpdāp ippān Anij ke ak armej?

Eaar wōr juon aō menin mallejoñ jem̧aanļo̧k ke juon iaan taktō ro m̧ōtta eaar m̧ōņe eō n̄an kōjeno̧ļo̧k jeļāļo̧kjeņ eo aō jān tōmak eo aō. Eaar kwaļo̧k bwe in jabkobaik men kein ruo. Ekōjkan aō kōm̧m̧ane? M̧ool ej m̧ool! Ej ejjab jeno̧ļo̧k, im jabdewōt m̧ōttan eo an ejamin aikuj jōnolok.

Men̄e m̧ool ej ewaļo̧k jān juon kein kakōlkōl eo etinkwadrik ak kōn revelesōn, aolep m̧ool rej itok jān Anij. Aolep m̧ool rej m̧ōttan ko̧jpeļ eo an Jisōs Kraist.4 Aaet, kar ba bwe in no̧o̧j tōmak eo aō. Iaar jab eoron̄ kajjitōk eo an eo m̧ōtta. Iaar kwaļo̧k aō tōmak!

Ilo aolep kijejeto ko retijem̧ļo̧k, jon̄ak ko reppen an m̧ool rej aikuj bōk jikier. Rikatak ro rej kaorōk anemkwoj eo aer. Bōtaab aolep anemkwoj eban waļo̧k eļan̄n̄e m̧ōttan eo juon an jeļāļo̧kjeņ ej kiene n̄an jab kōjerbale jen tōl an armej.

M̧ool eo an jetōb eban jo̧o̧l―eļap tata kien ko rekwojarjar. Pokake kien ko rekwojarjar ej bōktok kōjeram̧m̧an ko, aolep iien! Rubwe kien ko rekwojarjar ej bōk tok būrom̧ōj, aolep iien!5

Elōn̄ būrabōļōm̧ ko ioon laļ in kōnke armej ro ie rejjab wāppen. Kōttōbar im kōņaan ko aer rem̧wiir kōn aer tōmak ak ejjabwe. Elōn̄ rej likūt men ko aer raorōk mokta jen Anij. Jet idajon̄jon̄ kōn aorōk eo an tōmak ilo mour in raan kein. Ilo kajjojo tōre, rainin ewōr armej ro me rej kajirere ak jum̧ae anemkwoj eo an kabun̄. Jet rej jekpen nae kabun̄ kōn elōn̄ nañinmej ko ilo laļ in. Ilo m̧ool, ewōr tōre ko n̄e nana ej bōk jikin n̄an kōjerbal kabun̄ ilo elōn̄ wun. Bōtaab kabun̄ eo erreeo an Irooj, eo ej kajieon̄ in erom juon rikaļooran eo em̧ool an Jisōs Kraist, ilo juon iaļen mour im juon kallim̧ur kajjojo iien me naaj kwaļo̧k tōl eo ekwojarjar. Ilo am kōkajoor ļo̧k kabun̄ eo am, kwoj kōkajoor ļo̧k tōmak eo am. Kwoj kwaļo̧k am tōmak.

Irooj ejeļā bwe ajri ro Nejin renaaj aikuj jeļā wāween pukot E. Eaar ba bwe kōjam̧ eo eaidik im iaļ eo eaidik ej tōl ļo̧k n̄an mour indeeo … , im eiet ro rej loe.6

Jeje ko Rekwojarjar rej letok juon iaan wāween ko rem̧m̧an tata n̄an pukot im pād wōt ilo iaļ in. Jeļāļo̧kjeņ ko jen jeje ko rekwojarjar rej barāinwōt letok kōjparok. N̄an waanjon̄ok, ilo bwebwenato, nan̄inmej āinwōt “ajri ro rej lo̧tak kōn piba” ejelet mour ko an elōn̄ m̧am̧a ro im nin̄nin̄ ko ejjeļo̧k aer bōd. Aaet, ilo Kallim̧ur M̧okta ewōr ie pedped ko rejim̧we n̄an loloorjake ro rinan̄inmej, kar jeje elōn̄ ļo̧k jen 3,000 iiō ko rem̧ootļo̧k!7 Elōn̄ armej rej jako kōnke jeļāļo̧kjeņ eo an armej eaar likjab n̄an ron̄jake naan eo an Irooj!

Ro jeiū im jatū, ta eo ejako ilo mour ko ad eļan̄n̄e jej “ekkatak, [ak] jejjab maron̄ itok n̄an jeļāļo̧kjeņ eo an m̧ool in”?8 Jemaron̄ bōk eļap jeļāļo̧kjeņ jān jeje ko rekwojarjar im bōk im̧we kōn jar ilo tōmak.

Kōm̧m̧ane menin enaaj jipan̄ kōj ilo ad kōm̧m̧ani kālet ko kajjojo iien. Eļaptata n̄e kien ko an armej rej kōm̧m̧an im kiel, kien ko an Anij rej aikuj in ad jon̄ok. N̄e elap iakwelel, jej aikuj pukot m̧okta tōl an Anij.

Jej aikuj “keidi tok aolep jeje ko rekwōjarjar ñan kōj, … n̄an ad maron̄ jeram̧m̧an im jeļā.” 9 Ewōr kauwōtata ko repaak n̄e jej kajieon̄ in kōjeno̧ļo̧k kōj make kōn en̄jake ko āinwōt “mour eo aō make” ak bōlen “m̧wil eo aō em̧m̧an tata.” N̄e juon ej kajieon̄ in kōmake mour eo an ilo wāween jeno̧ļo̧k ko, juon epan tōbar m̧ool in eddōk ļo̧k eo ñan e make,—ejamin erom̧ lukkuun m̧ooleo an make.

Kapo eo ebun̄bun̄ im emaron̄ kōmōkaj lōmnak an armej ilōñin naan eo an Anij. Naan in kadeleel an rikien ro im wāween kadeleel kōn kein wia kake ko elap aer kitbuuj kōļmenļo̧kjeņ an armej ilo jikin ākweleel ko ñan jōk na lemen kōttōbar ko aer. Tōprak eo ej letok elap meļeļe ko aikuji. Ak rejjab maroñ kōjerbali āinwōt menin kam̧ool n̄an kōmeļeļeik jab pokake n̄an kien ko an Anij! Meñe bōlen “kajjojo rej kōm̧m̧ane” bōd ejjamin jim̧we. Nana, bōd, im marok ejamin m̧ool, men̄e emaron̄ bun̄bun̄. Juon eoon in kakkōļ eo kwaļo̧k āindein: “Jerata n̄an ro rej ņa etan nana em̧m̧an, im emman nana; im; rej likūt marok n̄an meram, im meram āinwōt marok.”10

Ālkin Pata eo an Laļ in Kein Kajuon, juon al ebun̄bun̄. Ilo lōn̄aj m̧wil nana, eaar kōm̧m̧an bwe 50 milien armej ro reban bōd. Ak ilo m̧ool, 50 milien in armej rein remaron̄ bōd―lukkuun bōd. M̧wil nana ej m̧wil nana wōt im̧aan mejān Anij, eo me juon raan naaj ekajete aolep kōm̧m̧an ko im kōņaan ko ad.11

Keidi mijak im jab tōmak elukkuun kajoor ilo tōre in ad ilo tōmak im peran eo an leddik eo nejū ejitenbōro Emily, eo me kiiō ej pād ilo turājet eo juon. Ilo an mour wabanban in ilo̧k jen ānbwiin eo an eobrak kōn nan̄inmej in kānjer, emaron̄ kar kōnono. Ak kōn etōn̄dikdik ilo mejen, eaar ba n̄an eō, “Baba, jab inepata kōn eō. Ijeļā inaaj inem̧m̧an!” Tōmak eo an Emily eaar waļo̧k―eromaak an waļo̧k―ilo iien iakwe, iien eo wōt n̄e jej lukkuun aikuji.

M̧am̧a in edik im eaiboojoj eo ewōr lalem nejin eaar obrak kōn tōmak ilo Jemedwōj Ilan̄, ilo karōk eo An, im mour indeeo an baam̧le eo an. Eaar lukkuun dāpdāp wōt n̄an Anij. Eaar lukkuun tiljek n̄an bujen ko eaar kōm̧m̧ani ippān Irooj im ippān ļeo pāleen. Ej iakwe ajri ro nejin ilo aenōm̧m̧an, meñe ej pād etto ļo̧k jān er. Eaar tiljek kōn ilju im jekļak eo an, im barāinwōt aer, kōnke eaar wōr an tōmak ilo Jemedwōj Ilan̄ im Nejin.

Ilo 1986, Būreejtōn Thomas S. Monson eaar ba: “Aaet jenaaj jeļm̧ae mijak, roñ naan in kabwebwe ko. Jen bōk peran n̄an jum̧ae ta eo aolep armej rej tōmak ie, peran n̄an jurake pedped ko ad. Peran, ilo jab errā ilo juon men, ej bōk tok etōn̄dikdik an Anij. … Keememej bwe ewōr an aolep armej mijak, bōtaab ro rej ioon mijak ko aer kōn [tōmak] ewōr peran barāinwōt.”12

Kapilōk eo an Būreejtōn Monson ewōr tokjeņ ! Kōn menin ij akweļap n̄an kom̧, ro jeiū im jatū rejitenbōro: Jen raan n̄an raan, ilo iaļ eo am ļo̧k n̄an indeeo eo ejjeļo̧k jem̧ļo̧kin, kōļapļo̧k am tōmak. Kwaļo̧k ami tōmak! Kwaļo̧k am tōmak eo am! 13

Ij jar bwe kom̧ naaj lukkuun dāpdāp wōt ippān Anij, bwe m̧ool ko An indeeo naaj dim ilo būruwōm̧i n̄an indeeo. Im ij jar bwe, ilo aolepen mour eo am, kwonaaj kwaļo̧k am tōmak! Ilo etan Jisōs Kraist, amen.

Kakeememej ko

  1. N̄e juon nin̄nin̄ ej lo̧tak tok, Ko̧ eo ej ekkejel wōt im kakopaik ruo men ko ippān doon ko̧ ej lukkuun dāpdāp―juon dāpdāp eo epolel. Naan in kabun̄ ej itok jān Latin, “pād wōt ak “dāpdāp wōt” im āinwōt, meļeļe, “n̄an dāpdāp” ak “n̄an dim.” Aaet, jej meļeļe kōn kabun̄ bwe ej “dāpij ritōmak ro n̄an Anij.”

  2. Exodus 20:3. Ilo kakobaba, Irooj eaar ba, “Ukwelo̧k, im oktak jān ekjab ko ami, im kom̧win jaļļo̧k … jān aolep men in kajjōjō ko ami” (Ezekiel 14:6).

  3. Doctrine and Covenants 6:36.

  4. Lale Spencer W. Kimball, The Teachings of Spencer W. Kimball, ed. Edward L. Kimball (1982), 391.

  5. Lale Mosaia 2:41; Doctrine and Covenants 58:30–33; 82:10. Pedped in ej m̧ool n̄an aolep, bwe “Anij e jab lōmņak kōn okōtan armej” (Jerbal 10:34; barāinwōt lale Moronai 8:12).

  6. Lale Doctrine and Covenants 132:22.

  7. Lale Livitikōs 15:13.

  8. 2 Timote 3:7.

  9. 1 Nipai 19:23.

  10. Aiseia 5:20.

  11. Jeje ko Rekwojarjar rej kwaļo̧k: “Itok n̄an Irooj, ri Kwojarjar eo. Kememej bwe iaļ ko An rejim̧we. Lo, iaļ eo an armej eaidik, ak ej erļo̧k im̧aan juon iaļ eo ejim̧we im̧aan e, im rilale kōjām eo ej ri Kwojarjar Eo in Israel; im E jab kōjerbal jabdewōt ri karejeran ijo; im ejjeļo̧k bar juon iaļ eļan̄n̄e jab ilo kōjam̧ eo; bwe E ban po ilo kapo, bwe Irooj Anij ej etan” (2 Nipai 9:41).

  12. Thomas S. Monson, “Courage Counts,” Ensign, Nov. 1986, 41. Ilo juon iien, Būreejtōn Monson eaar kwaļo̧k naan in eim̧we: “N̄an mour jokne, jej aikuj kōmaat ad n̄an dipļo̧ke inepata kōn peran, illu kōn m̧ōņōņō, im utiej kōn ettā. … Jej ļaddik ro im jiron̄ ro nejin Anij eo emour, ilo kōm̧anm̧an eo jaar kōm̧anm̧an kake. … Jejjab maron̄ dāpij naan in n̄e jejjab idajon̄jon̄ e juon jeļā eo ealikar kōn kajoor im maron̄, eo ej kajoor n̄an mour kōn kien ko an Anij, maron̄ eo n̄an jum̧ae kapo ko an Satan” (“Yellow Canaries with Gray on Their Wings,” Ensign, July 1973, 43).

  13. “Karmejete kom̧ make jān aolep men ko rejjab em̧m̧an” (Moronai 10:32).Jab mijak armej ijelo̧kin Anij (lale Doctrine and Covenants 3:7; 59:5).