Praes—mo Ol Blesing—blong Fasin blong Stap Olsem Wan Disaepol
Stap strong. Stap fetful blong laef folem gospel, iven sapos ol narawan raon long yu oli no laef folem gospel nating.
Presiden Monson, mifala i lavem yu. Yu bin givim hat blong yu mo helt blong yu i go long evri koling we Lod i bin givim long yu, speseli tabu ofis we yu holem naoia. Ful Jos i talem tangkyu long yu from seves blong yu we i stap oltaem mo from evri samting we yu stap givim i go long wok we i neva stop.
Wetem respek mo blong leftemap tingting blong evriwan we bae i nidim blong stap strong mo no muvmuv long ol las dei ia, mi talem long yufala speseli ol yut blong Jos, se sapos yu no mekem finis, wan dei, bae yu luk se oli singaotem yu blong difendem bilif blong yu, o maet bae yu gotru sam abius yuwan, from nomo yu yu wan memba blong Jos blong Jisas Kraes blong Ol Lata-dei Sent. Ol taem olsem i nidim strong paoa long tingting mo kaen fasin we i kam long yu.
Eksampol. Wan sista misinari i bin raet long mi i no long taem: “Kompanion blong mi mo mi i bin luk wan man i stap sidaon long wan jea long taon mo i stap kakae lanj blong hem. Taem mifala i stap kam kolosap, hem i lukluk i kam antap mo luk ol misinari nem tag blong mifala. Wetem wan nogud lukluk long ae blong hem, hem i stanap kwik mo leftemap han blong hem blong kilim mi. Mi bendaon long stret taem, nomo blong hem i spet long kakae blong hem long mi mo stat blong swea mo talem ol nogud samting long mifala. Mifala i wokbaot nomo i go mo no talem wan samting. Mi traem blong wapemaot kakae long fes blong mi, nomo blong filim wan hip blong poteto i fas biaen long hed blong mi. Samtaem i had blong stap olsem wan misinari, from long taem ia, mi bin wantem gobak, mo holemtaet smol man ia, mo talem, ‘ESKIUS MI!’ Be mi no save.”
Long misinari we i stap givim evri samting blong hem, mi talem, dia pikinini, long fasin blong yuwan blong stap putum tingting blong yu daon, yu bin tekem step i go insaed long sekol blong ol woman mo man we oli defren, we oli bin, olsem wan profet blong Buk blong Momon i talem, “[bin] tingbaot ded [blong Kraes], mo [bin] safa blong karem kros blong hem mo blong tekem sem blong wol”1
I tru, brata blong Jekob, Nifaei bin raetem abaot Jisas: “Mo wol, from ol rabis fasin blong olgeta, bae oli jajem hem se hem i wan samting blong nating; from samting ia oli wipim hem, mo hem i letem samting ia; mo oli kilim hem, mo hem i letem samting ia. Yes, oli spet long hem, mo hem i letem samting ia, from bigfala lav mo kaen blong hem, mo fasin blong go tru long ol hadtaem wetem longfala tingting, blong hem i go long ol pikinini blong ol man.”2
Semmak olsem eksperiens blong Sevya, i bin gat wan longfala histri blong fasin blong no agri mo ol profet mo aposol we oli bin mekem ol sakrifaes we i soa tumas, ol misinari mo ol memba long evri jeneresen—evriwan we i bin traem blong givim ona long koling blong God blong helpem famli blong man i go long “wan wei we i moa gud.”3
“Be mi mi no save gohed moa [long olgeta]?” man we i raetem buk blong Hibru i askem.
“[Olgeta] we … Oli blokem ol laeon, blong oli no kam kakae olgeta,
“Mo oli kilimdaon bigfala faea we i laet strong, mo oli ronwe long ol man we oli wantem kilim olgeta long naef blong faet, … oli strong long taem blong faet, oli stap winim ol soldia …
“[Bin luk] hem i mekem ol pikinini blong olgeta oli laef bakegen long ded [taem] ol enemi blong olgeta oli stap mekem olgeta oli harem nogud tumas long bodi blong olgeta, …
“Mo … sam long olgeta, ol man oli laf nogud long olgeta, mo oli wipim olgeta, … fasem olgeta long jen, oli putum olgeta long kalabus:
“Ol man oli stonem olgeta long ston gogo oli ded, … ol man oli tekem naef blong faet, oli katem bodi blong olgeta long tu haf, blong kilim olgeta. Mo sam long olgeta, ol man oli kilim olgeta long naef blong faet: … oli stap wokabaot, we oli no gat klos, oli putum ol skin blong sipsip mo nani nomo; oli pua tumas, mo oltaem ol man oli stap spolem olgeta, [mo] oli stap mekem i nogud tumas long olgeta;
“([Olgeta] oli gudfala man tumas, wol ya i no naf blong oli stap long hem:) … oli stap mekem ples blong olgeta olbaot nomo, long draeples, mo long hil, mo long hol blong ston, mo long hol long graon.”4
I mas tru se ol enjel blong heven oli bin krae taem oli stap raetem daon praes blong blong fasin blong stap olsem wan disaepol long wan wol we i no laekem ol komanmen blong God. Sevya Hemwan, wota blong ae blong Hem i bin ron from olgeta we, blong plante handred blong yia, oli no bin akseptem olgeta mo oli bin kilimded olgeta taem oli bin stap wok blong Hem. Mo naoia oli no akseptem Hem mo stap rere blong kilimded Hem.
“O, ol man Jerusalem, ol man Jerusalem,” Jisas i singaot, “Yufala i stap kilim ol profet oli ded, mo yufala i stonem ol man blong karem tok blong God oli ded. Plante taem mi wantem putum han blong mi i goraon long yufala, olsem we faol i pulum ol pikinini blong hem oli kam haed andanit long wing blong hem, be yufala i no glad!
“Yufala i luk. God i lego yufala finis, ples blong yufala i emti i stap.”5
Mo i gat wan impoten mesej blong evri yang man mo woman long Jos ia. Maet yu stap askem yuwan sapos i gud inaf blong gat strong paoa long tingting blong stanap from ol gud fasin long saed blong seks long ol hae skul, o blong go long wan misin nomo blong harem se oli tokbaot nogud ol bilif blong yu, o blong traehad agensem plante samting long sosaeti, we samtaem, i daonem fasin blong gat wan laef we i stanap long relijin. Yes, hem i oraet nomo, from nara wei hem i blong gat “ol haos” blong yumi i “emti”—emti man mo woman, emti famli, emti neiba, mo ol emti kantri.
I mekem yumi gat had wok ia blong olgeta we oli kolem olgeta blong tijim mesej blong Kraes. Antap long tijing, stap leftemap tingting, mo blong mekem ol man i glad long (hem ia hem i naesfala pat blong blong Fasin blong Stap Olsem Wan Disaepol), long wan wan taem ol semmak mesenja ia oli singaotem olgeta blong wari, blong tok, mo samtaem blong krae nomo (hem ia hem i pat we i so moa blong blong Fasin blong Stap Olsem Wan Disaepol) Oli save gud se rod we i stap lid i go long graon blong promes “we i ronaot wetem melek mo hani”6 ol kaekae we i nid blong gat, i ron long rod blong Maonten Sinae, we i ronaot wetem ol “mekem” mo ol “no mekem.”7
Sore tumas, ol mesenja we oli givim ol tabu komanmen oli nomo popula tedei olsem long taem blong bifo, semmak olsem tufala sista misinari we oli spet poteto long tufala oli bin testifae abaot. Fasin blong no laekem o mekem nogud hem i wan toktok we i no naes, be i gat olgeta tedei we bae oli talem wetem Ahab we i kam nogud, “Mi mi no laekem [profet Mikaea]; from we neva hem i talemaot wan samting we i gud long saed blong mi. Oltaem nomo, ol samting [hem i profesae] oli nogud olgeta.”8 Fasin ia blong no laekem o mekem nogud long ones fasin blong wan profet, i bin mekem Abinadae i pem praes ia wetem laef blong hem. Olsem we hem i bin talem long King Noa: “From mi talem trutok ia long yufala, nao yufala i kros long mi. … Mo bakegen from mi bin talemaot toktok blong God yufala i bin jajem mi se mi mi krangke”9 o, yumi save talem se, mi wan man we i no skul, wan man blong kontrol, no wantem save long bilif blong ol nara man, no kaen, nogat tumas save mo andastaning, tingting aotsaed evriwan, mo olfala tumas.
I olsem we Lod Hemwan i bin talem wetem bigfala sore i go long profet Aesea:
“Oltaem … oli no wantem lesin long ol tok we mi mi stap talem blong tijim olgeta:
“Oltaem, oli stap tok long ol profet blong blokem olgeta. Oli stap talem se,I nogud yufala i stap luk ol visen ya we Hae God i soemaot tingting blong Hem long yufala, nao yufala i stap talemaot ol stret fasin long mifala. I moa gud yufala i stap talemaot ol tok we mifala i wantem harem, mo yufala i stap tokbaot ol tingting blong yufala we i blong giaman nomo:
“Oltaem, long fes blong mifala, yufala i stap tokbaot God ya we i God blong yumi, se hem i tabu, fasin blong Hem i stret. Yufala i mas gowe long rod ya. yufala i mas finis long fasin ya.”10
Sore tumas, ol yangfala fren blong mi, hem i wan fasin blong taem blong yumi se, sapos ol man oli wantem eni kaen god, oli wantem olgeta blong oli ol god we oli no askem tumas, ol god we oli fil gud, ol god we oli isi we bae oli no save muvmuvum bot blong yumi o mekem yumi pul long bot, ol god we bae oli holem hed blong yumi, mekem yumi laf smosmol, afta talem long yumi blong go ronron mo pikimap ol flaoa.11
!Tokbaot taem man i mekem God folem pikja blong hem! Samtaem—mo hemia hem i wanem we i defren bigwan—ol man ia oli prea long nem blong Jisas olsem Hem nao i wan long God ia we “oli fil gud” raon long hem. ?Tru? Hem we i bin talem blong no brekem ol komanmen, mo tu, blong nomo tingting blong brekem olgeta. Mo sapos yumi stap tingting blong brekem olgeta, yumi brekem finis insaed long hat blong yumi. ?I saon olsem wan doktrin we “i fil gud,” i saon gud long sora mo i popula daon long vilej blong ol man oli harem i gud?
Mo ?olsem wanem long olgeta we oli wantem nomo blong stanap longwe mo luk sin o tajem sin? Jisas i talem stret, sapos ae blong yu i mekem yu harem nogud, stikim aot. Sapos ol han blong yu i mekem yu harem nogud, katem aot.12 “Mi mi no kam blong [putum] pis nomo, mi kam blong mekem ol man oli seraot tu, oli faet,”13 Hem i bin tok long olgeta we oli ting se Hem i stap toktok kaen nomo oltaem. I no wan sapraes se afta long ol prijing blong Hem, ol lokol komuniti “oli askem strong long Jisas blong Hem i mas aot long ples blong olgeta.”14 I no wan sapraes se afta long ol merikel, ol man oli talem se paoa blong Hem i no blong God, bei blong devel.15 I klia se kwestin stika long bampa blong trak “?Wanem nao bae Jisas i mekem?” bae i no givim wan ansa we i gud tumas.
Long taem we i gat fulap paoa long seves blong Hem long wol ya, Jisas i talem, “Yufala i mas lavlavem yufala, olsem we mi lavem yufala.”16 Blong mekem sua se oli andastanem stret wanem kaen lav Hem i tokbaot, Hem i talem, “Sipos yufala i lavem mi, bambae yufala i save obei long ol tok blong mi”17 mo “yufala … nating we i wan tok blong hem i daon moa long ol narafala tok blong Hem, be yufala i no mas brekem, o yufala i no mas tijim ol narafala man, man we i mekem fasin ya bambae … i daon moa long ol narafala man long niufala wol ya we God i king long hem.”18 Lav olsem blong Kraes i nid we i moa bigwan we yumi gat long wol ia, from stret mo gud fasin, evri taem i mas go wetem lav. I mekem se sapos lav i kam stamba toktok ya, olsem we i mas stap, nao tru long toktok blong Hem we lav i tokbaot hem, yumi mas lego ol sin mo eni saen blong sin long ol narawan. Jisas i andastanem gud wanem fulap man long kalja blong yumi long tedei i stap fogetem: se i gat wan impoten samting i defren bitwin komanmen ia blong fogivim sin (we Hem i gat paoa ia blong mekem) mo ol toktok we i mekem ol samting ia we i no stret blong i kam stret (we Hem i neva mekem).
Ol fren, speseli ol yang fren blong mi, gat strong paoa long tingting. Klin lav olsem hemia blong Kraes, we i ronaot long tru fasin blong stap stret mo gud, i save jenisim wol. Mi testifae se gospel blong Jisas Kraes i tru mo i stap laef, i stap long wol ia mo yufala i ol memba blong tru Jos ia we i stap laef, mo yufala i stap traem blong serem. Mi mi witnes long gospel ia mo Jos ia, wetem wan witnes blong ol prishud ki ia we i bin kambak long wol ia bakegen we i openem paoa mo i save mekem ol odinens blong sevem man i hapen. Mi sua moa se ol ki ia oli bin kambak long wol ia bakegen mo ol odinens oli stap bakegen tru long Jos blong Jisas Kraes blong Ol Lata-dei Sent, bitim we mi sua se mi stap stanap long fored blong yu long pulpit ya mo yu yu stap long fored blong mi long konfrens ia.
Stap strong. Stap fetful blong laef folem gospel, iven sapos ol narawan raon long yu oli no laef folem gospel nating. Difendem bilif blong yu wetem fasin we i kaen mo wetem lav mo sore, be yu difendem olgeta bilif blong yu. Wan longfala histri blong ol voes we oli gat insperesen, wetem sam we bae yu harem long konfrens ia mo voes we yu jes harem tru long man ia, we i Presiden Thomas S. Monson, we i stap poenem yu i go long rod blong Kristin fasin blong stap olsem wan disaepol. Hem i wan stret rod, mo hem i wan rod we i no isi tumas long sam poen, be i save fulap long ol kaenkaen filing mo yu save win blong travel long hem, “wetem strong bilif long Kraes,… wetem wan stret mo klin hop, mo wan lav blong God mo blong evri man.”19 Taem yu stap folem rod ya wetem fulap strong paoa long tingting, bae yu bildimap wan fet we i no save seksek, bae yu stap sef agensem ol strong win we bae i blo, iven ol spia blong wael win, mo bae yu filim paoa olsem strong ston blong Ridima blong yumi, Hem ia we, sapos yu bildimap fasin blong yu blong stap olsem wan disaepol, bae yu no save foldaon.20 Long tabu nem blong Jisas Kraes, amen.