Talitali Lelei Kimoutoluki he Konifelenisí
ʻOku tau… faaitaha heʻetau tuí mo ʻetau fakaʻamu ke fakafanongo mo ako mei he ngaahi pōpoaki ʻe fakahoko maí.
Siʻi kāinga ʻofeina, ʻoku ou fiefia moʻoni ke talitali lelei kimoutolu ki he konifelenisi fakaemāmani lahi ko ʻeni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku tau fakataha mai ko ha fāmili maʻongoʻonga ʻe toko 15 miliona tupu ʻoku tau faaitaha heʻetau tuí mo ʻetau fakaʻamu ke fakafanongo mo ako mei he ngaahi pōpoaki ʻe fakahoko maí.
Meʻa vave ko e fakalaka e māhina ʻe ono kuohilí ʻo hangē pē ko e laka taʻetūkua atu kimuʻa e ngāue ʻa e Siasí. ʻI he māhina ʻe taha mo e konga kuohilí ne u maʻu ai ha faingamālie ke fakatapui ʻa e Temipale Kilipati ʻAlesoná, ko ha fale fakaʻofoʻofa ia. ʻI he efiafi kimuʻa he fakatapuí, naʻe fakahoko ai ha faiva fakafonua ʻi he Paʻake Discovery ne ofi mai pē ki ai. Naʻe fakahoko ʻe ha toʻu tupu ʻe toko taha mano ua afe ha polokalama miniti ʻe 90. Naʻe makehe ʻaupito ʻa e tauʻolungá, hivá mo e fakaʻaliʻali hivá.
Ne tō foki ha laʻalaʻā lahi he feituʻú ni pea ʻoku ou tui ne laulau uike hono lotua ʻo kolea ha ʻuha. Meʻapango ne tō mai ia kimuʻa pea fakahoko ʻa e faivá pea ʻuha ai pē he lolotonga e faivá! Neongo naʻe pīponu mo mokosia e toʻu tupú he ʻuhá mo e ʻea mokomokó, ka ne mau ongoʻi kotoa pē ʻa e Laumālie ʻo e ʻEikí. Ko e kaveinga ʻo e polokalamá ko e, “Tauhi Maʻu ʻa e Tuí,”—fakakaukau loto angé ki ai: “Tauhi Maʻu ʻa e Tuí”—naʻe fakaholomamata moʻoni hono fakahoko ʻe ha kau talavou mo ha kau finemui fofonga malimali mo loto vekeveke. Neongo e momokó mo e ʻuhá ka naʻe fonu ia ʻi he tuí mo ha ngaahi aʻusia fakalaumālié ʻe makakoloaʻaki ʻe he toʻu tupú ni pea nau fakamatalaʻi ia ki heʻenau fānaú mo e makapuná ʻi he ngaahi taʻu ka hoko maí.
Ne fakatapui ʻa e Tempale Kilipati ʻAlesoná he ʻaho hono hokó. Naʻe hoko ia ko e temipale hono 142 ʻo e Siasí ʻoku lolotonga ngāué. Ne ʻikai ʻuha ia ʻo hangē ko e ʻanoihá ka naʻe tafitonga mo fakaʻofoʻofa e ʻahó ia. Naʻe fakalaumālie moʻoni e ngaahi fakatahaʻangá. Ne u lava atu ki ai mo Palesiteni Henelī B. ʻAealingi, ʻEletā mo Sisitā Teti R. Kalesita, ʻEletā mo Sisitā Viliami R. Uoka, pea mo ʻEletā mo Sisitā Keni F. Lisiate.
ʻE fakatapui ʻi Mē ʻa e Temipale Footi Lotateilá. ʻOku ʻi ai mo ha ngaahi temipale kehe ʻe ʻosi pea fakatapui he konga kimui ʻo e taʻu ní. ʻI he 2015, ʻoku mau ʻamanaki ʻe ʻosi mo fakatapui ai ha ngaahi tempale foʻou he funga ʻo e māmaní. ʻE kei hokohoko atu pē ʻeni. ʻI he taimi ʻe ʻosi ai e ngaahi temipale kuo fanongonongo kimuʻá, ʻe aʻu ai e temipale ʻoku lolotonga ngāue he māmaní ki he 170.
Neongo ʻoku lolotonga tukutaha ʻetau tokangá ki hono fakakakato e ngaahi temipale kuo ʻosi fanongonongó pea he ʻikai toe fanongonongo ha temipale foʻou ia he kahaʻu vavé ni maí ka te mau kei hokohoko atu pē he ngāue ke fakapapauʻi e ngaahi fie maʻú mo kumi ha tuʻuʻanga ki he ngaahi temipale ke langá. ʻE toki fanongonongo atu leva ia he ngaahi konifelenisi lahi ka hoko maí. Ko ha kakai langa temipale kitautolu ʻoku tau ō maʻu pē ki he temipalé.
ʻE kāinga, ʻoku tau vēkeveke ke fanongo ki he ngaahi pōpoaki ʻe ʻomi he ʻahó ni mo ʻapongipongí. Kuo kolea ʻe he niʻihi te nau fai ha leá, ha tokoni mo ha fakahinohino fakalangi ʻi heʻenau teuteu ʻenau pōpoakí.
ʻOfa ke nofoʻia kitautolu ʻe he Laumālie ʻo e ʻEikí pea ke ne langaki hake mo ueʻi fakalaumālie kitautolu ʻi heʻetau fakafanongo mo akó. ʻI he huafa ʻo Sīsū Kalaisí, ko hotau Fakamoʻuí, ʻēmeni.