Kae ʻOua ke Tau Toe Fakataha Mai
Fai ʻe Palesiteni Thomas S. Monson
Fakatauange te tau fakalaulauloto kotoa ki he ngaahi moʻoni kuo tau fanongoá, pea ʻofa te nau tokoniʻi kitautolu ke tau hoko ko ha kau ākonga loto-toʻa ange.
Siʻi kāinga ʻofeina, kuo tau aʻusia ha ongo ʻaho nāunauʻia ʻo ha ngaahi pōpoaki fakalaumālie. Kuo ongo ki hotau lotó mo fakaivia ʻetau tuí ʻi heʻetau ʻinasi ʻi he laumālie ʻo e ngaahi fakataha ʻo e konifelenisí. ʻOku tau fakafetaʻi ki heʻetau Tamai Hēvaní, ʻi heʻetau aʻu mai ki he fakaʻosí, ʻi Heʻene ngaahi tāpuaki kuo foaki mai kiate kitautolú.
Kuo langaki hake mo ueʻi fakalaumālie kitautolu ʻe he hiva mālie kuo fakahoko he lolotonga ʻo e ngaahi fakatahá. Kuo tau ofi ange ki he langí ʻi he ngaahi lotu ne faí.
Tuku muʻa ke u fai atu ha fakamālō loto houngaʻia ʻa e Siasí fakakātoa ki he Kau Taki ne tukuange ʻi he konifelenisi ko ʻení. Te tau ʻofa kiate kinautolu. Ne lahi fau ʻenau tokoni ki he ngāue ʻa e ʻEikí pea ʻe ongoʻi ia ʻi he ngaahi toʻu tangata ka hokó.
ʻOfa te tau foki ki hotau ʻapí mo ha tukupā ʻi hotau lotó ke toe kiʻi lelei ange mei hotau tuʻunga he kuo hilí. Fakatauange te tau toe kiʻi angaʻofa lahi ange mo faʻa fakakaukau ange. ʻOfa te tau ala atu ʻo faʻa tokoni, ʻo ʻikai ngata pē ʻi hotau kāingalotú ka kiate kinautolu foki ʻoku ʻikai ke tau Siasí. ʻI heʻetau feohi mo kinautolú, ʻofa ke tau fakaʻapaʻapaʻi kinautolu.
ʻOku ʻi ai siʻa niʻihi ʻoku fefaʻuhi fakaʻaho mo e faingataʻá. Tau tokanga muʻa kiate kinautolu, pea tokoni. ʻE tāpuekina kitautolu ʻi heʻetau fetauhiʻakí.
Fakatauange te tau manatuʻi ʻa e kau toulekeleká pea mo kinautolu ʻoku faingataʻaʻia ʻi ʻapí. ʻI heʻetau tuku taimi ke ʻaʻahi kiate kinautolú, te nau ʻilo leva ʻoku ʻofaʻi mo fakamahuʻingaʻi kinautolu. ʻOku ou fakatauange te tau muimui ʻi he fekau ke “tokoniʻi ʻa e vaivaí, hiki hake ʻa e ngaahi nima ʻoku tautau ki laló, pea fakamālohia ʻa e ngaahi tui ʻoku vaivaí.”
Fakatauange ke tau hoko ko ha kakai faitotonu mo anga fakaʻeiʻeiki, ʻo feinga maʻu pē ke fai ʻa e meʻa ʻoku totonú ʻi he taimi kotoa pē pea ʻi he tūkunga kotoa pē. ʻOfa ke tau hoko ko e kau muimui faivelenga ʻo Kalaisi, ʻi he sīpinga ʻo e māʻoniʻoní, ʻo hoko ai ko e “ngaahi maama ʻi he māmaní.”
Siʻi kāinga ʻofeina, ʻoku ou fakamālō atu ʻi hoʻomou faʻa lotua aú. ʻOku fakaivia mo langaki hake ai au ʻi heʻeku feinga ʻaki hoku lotó mo e iví kotoa ke fai e finangalo ʻo e ʻOtuá pea mo tauhi kiate Iá mo kimoutolu foki.
ʻI heʻetau tutuku mei he konifelenisí ni, ʻoku ou kole e ngaahi tāpuaki ʻo e langí ke ʻiate kimoutolu takitaha. ʻOfa ʻe foki lelei atu kimoutolu ʻoku mavahe mei ʻapí ʻoku tokamālie pē e meʻa kotoa. Fakatauange ke tau fakalaulauloto kotoa ki he ngaahi moʻoni kuo tau fanongoá, pea ʻofa te nau tokoniʻi kitautolu ke tau hoko ko ha kau ākonga loto-toʻa ange ʻi he tuʻunga ne tau ʻi ai he kamata ʻa e konifeleni ko ʻení.
ʻOku ou kolea e ngaahi tāpuaki ʻa e ʻEikí ke ʻiate kimoutolu, kae ʻoua ke tau toe fakataha mai ʻi ha māhina ʻe ono, pea ke ʻiate kitautolu kātoa foki ia, pea ʻoku ou fai ʻeni ʻi Hono huafa māʻoniʻoní—ko Sīsū Kalaisi ko hotau ʻEiki mo e Fakamoʻuí—ʻēmeni.