Pagpili nga Motuo
Ni Elder L. Whitney Clayton
Sa Kapangulohan sa Seventy
Ang Manluluwas mihatag sa Iyang ebanghelyo isip kahayag sa paggiya niadtong nagpili nga motuo ug mosunod Kaniya.
Niadtong milabayng Enero, ang siyete anyos nga si Sailor Gutzler ug iyang pamilya misakay gikan sa Florida padulong sa Illinois sa pribadong eroplano. Ang amahan ni Sailor mao ang piloto. Sa pagsawop lang gyud sa adlaw, nagkaproblema ang makina sa eroplano ug nahagsa sa ngiob nga bungtod sa Kentucky, nabalintuwad sa lubak-lubak kaayo nga luna. Ang tanan namatay sa aksidente gawas kang Sailor. Ang iyang pulso nabali. Nagkasamad-samad siya ug nawala ang iyang sapatos. Ang temperatura naa sa 38 degrees Fahrenheit (3 degrees Celsius)—bugnaw, ulanon nga gabii sa tingtugnaw sa Kentucky—ug si Sailor nagsul-ob lang og short, T-shirt, ug usa ka medyas.
Nagpanawag siya sa iyang mama ug papa, apan walay mitubag. Nagmaisugon gayud, siya milakaw nga nagtiniil sa kabaryohan nga nagpakitabang, miubog sa mga sapa, milabang sa mga kanal, ug wala mahadlok sa paglakaw tadlas sa mga tunukon nga kabugangan. Gikan sa ibabaw sa gamayng bungtod, si Sailor nakakita og suga nga naghayag sa layo, mga usa ka milya ang gilay-on. Nagkadagma-dagma sa kangitngit ug sa kalibunan padulong sa naghayag nga suga, siya nakaabut gyud sa panimalay sa buotan nga tawo nga dili niya kaila nga miatiman kaniya. Si Sailor naluwas. Siya dayon gidala sa ospital ug giasikaso aron maayo.
Si Sailor naluwas tungod kay siya nakakita og kahayag sa layo ug naningkamot nga makaabut didto—bisan pa sa mga kalibunan sa kabaryohan, sa grabing trahedya nga iyang giatubang, ug sa mga samad nga iyang naangkon. Lisud hunahunaon kon unsay gibuhat ni Sailor niadtong gabhiuna. Apan sigon sa atong nahibaloan nga iyang nakita nga ang kahayag sa layo nga balay makahatag og tsansa nga maluwas. Adunay paglaum. Siya nagmaisugon nga bisan unsa pa ka lisud sa iyang kahimtang, siya makakaplag og kaluwasan gumikan niana nga kahayag.
Pipila lang kanato makalahutay sa samang makalilisang nga kasinatian ni Sailor. Apan kitang tanan, sa usa ka higayon o sa lain, mosinati og grabeng espiritwal ug emosyonal nga mga kalisdanan sa panaw. Nianang mga panahona, bisan unsa pa ka lisud o daw wala nay paglaum, kon ato kining pangitaon, kanunay nga anaa ang espirituhanong kahayag nga nagbanwag kanato, naghatag kanato og paglaum nga maluwas ug mahupay. Kana nga nagsilaw nga kahayag naggikan sa Manluluwas sa tanang katawhan, kinsa mao ang Kahayag sa Kalibutan.
Ang paghunahuna og espiritwal nga kahayag lahi kaysa makakita sa pisikal nga kahayag. Ang pag-ila sa espirituhanong kahayag sa Manluluwas nagsugod sa atong kaandam nga motuo. Sa sinugdanan ang Dios nagmando nga kita magtinguha nga motuo. “Kon kamo mopukaw ug modasig sa inyong mga galamhan … ug pagbansay sa usa ka tipik sa hugot nga pagtuo,” si propetang Alma nagtudlo, “oo, bisan kamo kutob ra sa pagtinguha sa pagtuo, tugoti kini nga tinguha nga molihok diha kaninyo, gani hangtud kamo motuo sa paagi nga kamo makahatag og luna alang sa usa ka bahin sa mga pulong [sa Manluluwas].”
Ang panawagan ni Alma kanato nga motuo ug “[mohatag] og luna” sa pulong sa Manluluwas sa atong kasingkasing nagpahinumdom nga ang hugot nga pagtuo nagkinahanglan og personal nga pagpili ug paglihok. Kita “mopukaw ug modasig sa [atong] mga galamhan.” Kita mangayo sa dili pa kini ihatag; kita mangita sa dili pa nato makit-an; ug manuktok sa dili pa kita ablihan. Dayon kita gihatagan niining saad: “Kay ang matag usa nga mangayo, makadawat; ug siya nga mangita, makakaplag; ug ngadto kaniya nga motuktok, pagaablihan.”
Walay mas kinasingkasing nga hangyo kaysa gibuhat Mismo sa Manluluwas panahon sa Iyang yutan-ong pangalagad, dihang mihangyo Siya sa mga dili tumotuo:
“Kon ang akong gipamuhat dili man mga buhat sa akong Amahan, nan, ayaw kamo pagatuo kanako.
“Apan kon mao man kini, nan, bisan kon dili kamo motuo kanako, tuohi ninyo ang mga buhat: aron kamo mahibalo ug makasabut nga ang Amahan ania kanako ug ako anaa sa Amahan.”
Kada adlaw kitang tanan nag-atubang og pagsulay. Kini ang pagsulay sa atong kinabuhi: kita mopili ba nga motuo Kaniya ug motugot sa kahayag sa Iyang ebanghelyo nga maanaa nato, o modumili ba kita nga motuo ug moinsister nga mag-inusarang mobiyahe sa kangitngit? Ang Manluluwas mihatag sa Iyang ebanghelyo isip kahayag sa paggiya niadtong nagpili nga motuo ug mosunod Kaniya.
Human sa pagkahagsa, si Sailor may kapilian. Siya mahimong mopili nga magpabilin sa eroplano diha sa kangitngit, mag-inusara ug mahadlok. Apan taas pa ang kagabhion, ug nagkaanam og kabugnaw. Siya mipili nga mobuhat og lain. Si Sailor mikatkat sa bungtod, ug didto siya nakakita og kahayag.
Hinay-hinay, naningkamot siya nga maduol sa kahayag, kini nagkasanag. Gihapon, may mga higayon nga dili niya kini makita. Tingali dili kini makita dihang siya anaa sa pangpang o nasalipdan sa mga kahoy o kasagbutan, apan siya nagpadayon. Sa matag higayon nga makita niya ang kahayag, si Sailor adunay ebidensya nga siya anaa sa hustong dalan. Wala siya hingpit masayud kon unsa kadto nga kahayag, apan iya kining giadto basi sa iyang nahibaloan, misalig ug naglaum nga makita niya pag-usab kon siya magpadayon sa hustong direksyon. Sa pagbuhat niini, mahimo niyang maluwas ang iyang kinabuhi.
Atong kinabuhi mahimong sama usab niana. May mga panahon nga kita nasakitan, gikapoy, ug kon ang atong kinabuhi ingon og lisud kaayo. May mga panahon nga dili kita makakita og kahayag sa kalangitan, ug kita gusto nang moundang. Kon kita andam nga motuo, nagtinguha nga motuo, nagpili nga motuo, dayon ang pagtulun-an ug ehemplo sa Manluluwas mogiya kanato sa dalan.
Pagpili nga Motuo
Sama sa gituohan ni Sailor nga siya makakaplag og kaluwasan nianang layo nga kahayag, kita mopili usab sa pag-abli sa atong kasingkasing sa sagradong reyalidad sa Manluluwas—sa Iyang mahangturong kahayag ug makaalim nga kalooy. Ang mga propeta sa kasaysayan nagdasig kanato ug gani naghangyo kanato nga motuo ni Kristo. Ang ilang pagdasig nagpakita sa sukaranang kamatuoran: Dili kita pugson sa Dios nga motuo. Hinoon Siya nagdapit nato nga motuo pinaagi sa pagpadala og buhing mga propeta ug mga apostoles sa pagtudlo nato, pinaagi sa mga kasulatan, ug pag-agni nato pinaagi sa Iyang Espiritu. Kita gyud ang angay mopili nga mohangup niana nga espirituhanong mga pagdapit, mopili gamit atong balatian sa espirituhanong kahayag diin Siya nagtawag kanato. Ang desisyon nga motuo mao ang pinakaimportanting pagpili nga atong himoon. Kini naghulma sa tanan natong desisyon.
Ang Dios dili mamugos nato nga motuo sama nga Siya dili mamugos nato nga mosunod sa mga kasugoan, bisan sa kahingpit sa Iyang tinguha sa pagpanalangin nato. Apan ang Iyang panawagan nga motuo Kaniya—pagbansay nianang tipik sa pagtuo ug mohatag og luna sa Iyang mga pulong—magamit gihapon karon. Sama sa giingon sa Manluluwas, “Ako magpamatuod nga ang Amahan nagsugo sa tanang mga tawo, bisan diin nga dapit, sa paghinulsol ug pagtuo kanako.”
Ang gituohan ug ang pagpamatuod ug ang hugot nga pagtuo aktibo nga mga baruganan. Dili kini basta lang moabut kanato. Ang gituohan usa ka butang nga atong gipili—lauman nato kini, lihukon nato kini, ug sakripisyuhan nato kini. Dili sulagma nga kita motuo sa Manluluwas ug sa Iyang ebanghelyo kay sa kita sulagmang nag-ampo o nagbayad sa ikapulo. Kita aktibong mopili nga motuo, sama nga kita mopili nga mosunod sa ubang mga sugo.
Gamita ang Inyong Gituohan
Si Sailor wala masayud sa sinugdanan kon ang iyang gibuhat samtang naningkamot mosalir ba gyud. Siya nawala ug naangol; ngitngit kadto ug bugnaw. Apan siya nagpalayo sa nahagsaan ug naningkamot nga maluwas, nagkamang ug nangapangos hangtud iyang nakita ang kahayag sa layo. Sa dihang iya kining nakita, siya naningkamot padulong niini, naghinumdom sa iyang nakita.
Kita usab kinahanglang molaum aron kita makakaplag og espirituhanong kahayag pinaagi sa paghangop sa gituohan imbis nga mopili sa pagduhaduha. Ang atong mga lihok mao ang ebidensya sa atong gituohan ug mahimong elemento sa atong hugot nga pagtuo. Kita nagpili nga motuo kon kita nag-ampo ug kon kita nagbasa sa kasulatan. Kita nagpili nga motuo kon kita nagpuasa, kon kita nagbalaan sa adlawng Igpapahulay, kon kita mosimba diha sa templo. Kita nagpili nga motuo kon kita nabunyagan ug kon kita moambit sa sakrament. Kita nagpili nga motuo kon kita naghinulsol ug nagtinguha og balaanong pagpasaylo ug makaayo nga gugma.
Ayaw Gayud Paghunong
Usahay ang paglambo sa espirituhanong mga butang mahimong hinay o maputol-putol. Usahay kita mobati nga nawad-an og pagsalig, nga kita masayop, o ang atong paningkamot nga makakaplag sa Manluluwas wala moepekto. Kon kamo mibati niini, palihug ayaw paghunong—ayaw gyud. Padayon nga motuo Kaniya ug sa Iyang ebanghelyo ug sa Simbahan. Ipahiuyon ang inyong mga lihok sa gituohan. Nianang mga higayuna kon moawop ang kahayag sa inyong pagtuo, himoa nga ang inyong paglaum alang sa gugma ug grasya sa Manluluwas, nga anaa sa Iyang ebanghelyo ug Simbahan, mobuntog sa inyong pagduha-duha. Mosaad ko nga Siya andam nga modawat ninyo. Moabut ang panahon nga inyong makita nga nahimo ninyo ang pinakamaayong pagpili. Ang inyong maisugong desisyon nga motuo Kaniya mopanalangin kaninyo sa walay sukod ug sa kahangturan.
Mga Panalangin sa Pagtuo
Akong gibati ang gugma sa Manluluwas sa akong kinabuhi. Ako Siyang gipangita panahon sa akong kalisud, ug Iya ko nga gitabangan uban sa Iyang makaayo nga kahayag. Usa sa dakong kalipay sa akong kinabuhi mao ang pagbiyahe uban sa akong asawa, nga si Kathy, aron makighimamat sa mga miyembro sa tibuok kalibutan. Kining talagsaong pakighimamat nagtudlo nako kabahin sa gugma sa Dios alang sa Iyang mga anak. Kini nagpakita nako sa mahangturong potensyal sa kalipay nga mahimong panalangin niadtong nagpili nga mosunod sa mga pagtulun-an ni Ginoong Jesukristo. Akong nakat-unan nga ang pagtuo Kaniya ug sa Iyang makaluwas nga gahum mao ang tinuod nga dalan sa “kalinaw niini nga kalibutan, ug kinabuhi nga dayon diha sa kalibutan nga umaabut.”
Mopamatuod ko nga si Jesukristo mao ang tinubdan sa kahayag ug paglaum natong tanan. Nag-ampo ko nga unta kitang tanan mopili sa pagtuo Kaniya. Sa pangalan ni Jesukristo, Amen.