Ang Sambingay sa Magpupugas

Ni Elder Dallin H. Oaks

Sa Korum sa Napulog Duha ka mga Apostoles

Depende na sa matag usa kanato sa pagpahimutang sa atong mga prayoridad ug sa pagbuhat sa mga butang nga makahimo sa atong yuta nga maayo ug sa atong ani nga daghan.

Ang mga hilisgutan sa mga pakigpulong sa kinatibuk-ang komperensya gisangun—dili pinaagi sa mortal nga awtoridad apan pinaagi sa mga pag-aghat sa Espiritu. Daghang hilisgutan naghisgut sa mortal nga kabalaka nga atong giambitan. Apan ingon nga si Jesus wala magtudlo unsaon pagbuntog ang mortal nga mga hagit o politikanhong pagpanglupig sa Iyang panahon, Siya sa kasagaran modasig sa Iyang modernong mga sulugoon nga maghisgot kon unsay atong buhaton aron mausab ang atong kinabuhi sa pag-andam nga makabalik sa atong langitnong panimalay. Karong Pasko sa Pagkabanhaw gibati nako nga mohisgut kabahin sa bililhon ug walay katapusan nga pagtulun-an sa usa sa mga sambingay ni Jesus.

Ang sambingay sa magpupugas maoy usa sa gagmayng mga sambingay nga nareport diha sa tulo ka synoptic nga mga Ebanghelyo. Usa usab kini sa mas gagmayng mga sambingay nga gipasabut ni Jesus sa Iyang mga disipulo. Ang binhi nga gisabod mao “ang pulong mahitungod sa gingharian” (Mateo 13:19), “ang pulong” (Marcos 4:14), o “ang pulong sa Dios” (Lucas 8:11)—ang mga pagtulun-an sa Agalon ug sa Iyang mga sulugoon.

Ang lain-laing mga yuta diin ang binhi gisabod nagrepresentar sa lain-laing mga paagi sa pagdawat ug pagsunod sa mga mortal niining mga pagtulun-an. Sa ingon ang binhi nga “nahulog sa daplin sa dalan” (Marcos 4:4) wala makaabut sa mortal nga yuta diin kini posible unta nga motubo. Kini sama sa mga pagtulun-an nga gipresentar ngadto sa usa ka kasingkasing nga gahi o dili andam. Dili na ko mosulti pa og dugang bahin niini. Ang akong mensahe dunay kalabutan kanato kinsa mipasalig nga mahimong sumusunod ni Kristo. Unsay atong buhaton sa mga pagtulun-an sa Manluluwas samtang padayon kitang nagpakabuhi?

Ang sambingay mahitungod sa magpupugas nagpasidaan nato sa mga kahimtang ug mga kinaiya nga makapugong ni bisan kinsa nga nakadawat sa binhi sa mensahe sa ebanghelyo nga makahatag og maayong ani.

I. Kabatoan, Walay Gamut

Ang ubang binhi “nga diha mahulog sa kabatoan, diin dili daghan ang yuta; ug kini migitib dayon, sanglit kini wala may giladmon diha sa yuta: ug unya sa pagsubang sa adlaw, kini nalawos; ug kay wala may gamut, kini nalaya” (Marcos 4:5–6).

Si Jesus mipasabut nga kini naghulagway niadtong “[kinsa], sa pagkadungog nila sa pulong, kini diha-diha ilang pagadawaton uban sa kalipay,” apan tungod kay sila “walay gamut diha sa ilang kaugalingon, … inig-abut sa kasakitan o pagpanglutos tungod sa pulong, sila mobiya dayon gikan sa pagtuo” (Marcos 4:16–17).

Unsa may hinungdan nga ang mga tigpaminaw “walay gamut diha sa ilang kaugalingon”? Kini ang kahimtang sa bag-ong mga miyembro nga makabig lamang sa mga misyonaryo o sa daghang makadani nga butang sa Simbahan o sa daghang dagko nga mga resulta sa pagkamiyembro sa Simbahan. Kon wala magamut diha sa pulong, sila dali nga mapukan ug mawala kon adunay oposisyon. Apan bisan kadtong nagdako sa Simbahan—dugay na nga mga miyembro—mahimong ingon niana diin sila walay gamut diha sa ilang kaugalingon. Nakaila ko og pipila niini—mga miyembro nga walay lig-on ug malungtarong pagkakabig sa ebanghelyo ni Jesukristo. Kon kita wala makagamut diha sa mga pagtulun-an sa ebanghelyo ug kanunayng magsunod sa mga pagtulun-an niini, bisan kinsa kanato makabaton og tig-a nga kasingkasing, nga kabatoan alang sa espirituhanong mga binhi.

Ang espirituhanong pagkaon gikinahanglan alang sa espirituhanong pagkabuhi, ilabi na sa kalibutan nga nagpalayo sa pagtuo sa Dios ug sa unsay husto ug sayop. Sa panahon nga gidominar sa Internet, nga naghatag og mga mensahe nga makadaut sa pagtuo, kinahanglang magpaduol sa espirituhanong kamatuoran aron malig-on ang atong pagtuo ug makagamut kita sa ebanghelyo.

Mga kabatan-onan, kon kana nga pagtulun-an daw malukpanon [general] kaayo, ania ang piho nga ehemplo. Kon ang sakrament gipaambit ug kamo nag-text o naghinunghungay o nagdula og mga video game o nagbuhat og bisan unsa nga makapugong nga madawat ninyo ang espirituhanong pagkaon, inyong gipahuyang ang inyong espirituhanong mga gamut ug nagpadulong ngadto sa kabatoan. Inyong gihimo ang inyong kaugalingon nga posible nga malaya kon kamo makasinati og pagkabulag, panghulga, o pagbiay-biay. Ug kana mahitabo usab sa mga hamtong.

Laing potensyal nga makadaut sa espirituhanong mga gamut—gipaspasan pa sa kasamtangang teknolohiya—mao ang pagtan-aw sa gamay rang bahin sa ebanghelyo o sa Simbahan. Kining limitadong panan-aw nagtutok sa partikular nga doktrina o naandang gibuhat o gihunahuna nga kakulangan sa usa ka lider ug mibaliwala sa daghang aspeto sa plano sa ebanghelyo ug sa mga bunga sa ani niini sa personal ug sa daghan. Si Presidente Gordon B. Hinckley mihatag og klaro nga paghulagway sa usa ka aspeto niining pagtan-aw sa gamay rang bahin. Iyang gisultihan ang mga mitambong didto sa BYU kalabut sa politikanhong mga tigkomento nga “nagdilaab sa kasuko” sa bag-ong balita nianang higayuna. “Hanas kaayo silang misulti og masuk-anon ug makapainsulto nga mga butang. … Sigurado,” siya mitapos, “kini mao ang panahon ug dapit sa pagsulti og makapainsulto nga butang.” Sa laing bahin, aron siguradong makagamut sa ebanghelyo, kita kinahanglang dili magpasulabi ug dili mosaway sa uban ug kanunayng magtinguha alang sa mas lapad nga panglantaw sa talagsaong buhat sa Dios.

II. Mga Sampinit: Ang Kabalaka Dinhi sa Kalibutan ug ang Kalipay tungod sa mga Bahandi

Si Jesus mitudlo nga “may ubang mga binhi nga diha mahulog sa kasampinitan, ug ang mga sampinit mitubo, ug milumos niini, ug wala kini makapamunga” (Marcos 4:7). Siya mipasabut nga kini “sila mao kadtong makadungog sa pulong, apan ang kabalaka dinhi sa kalibutan, ug ang kalipay tungod sa mga bahandi, ug ang kaibog alang sa ubang mga butang mosulod, ug magalumos sa pulong, ug kini dili makapamunga” (Marcos 4:18–19). Kini sigurado nga usa ka pasidaan nga angayang patalinghugan natong tanan.

Mamulong ko og una bahin sa kalipay tungod sa mga bahandi. Bisan asa kita sa atong espirituhanong panaw—bisan unsa pa ang kahimtang sa atong pagkakabig—kitang tanan matintal niini. Kon ang mga kinaiya ug mga prayoridad nakatutok sa pag-angkon, paggamit, o pagpanag-iya og kabtangan, ato kanang gitawag og materyalismo. Daghan na kaayo ang nasulti ug nasulat bahin sa materyalismo nga gamay na lang ang angayang idugang niini. Kadtong nagtinguha sa gitawag og bahandi nga daw gisimba na nila kini nag-antus sa pagkamaliputon sa bahandi. Ang pagpanag-iya og katigayunan o dakong kinitaan dili timailhan sa pagdapig sa langit, ug ang pagkawala niini dili ebidensya sa dili pagdapig sa langit. Dihang gisultihan ni Jesus ang usa ka matinud-anong sumusunod nga makapanunod siya sa kinabuhing dayon kon iya lamang ihatag ang tanan nga anaa niya ngadto sa mga kabus (tan-awa sa Marcos 10:17–24), wala Niya ilha ang kadautan sa pagpanag-iya og mga bahandi apan ang kadautan sa kinaiya nianang sumusunod ngadto niini. Sama sa nahibaloan natong tanan, si Jesus midayeg sa maayong Samarianhon kinsa migamit sa samang salapi aron moserbisyo sa iyang isigkatawo nga gigamit ni Judas sa pagluib sa Manluluwas. Ang gamut sa tanang pagkadautan dili ang salapi apan ang pagkamahigugmaon sa salapi (tan-awa sa 1 Timoteo 6:10).

Ang Basahon ni Mormon naghisgut sa usa ka panahon sa dihang ang Simbahan sa Dios “misugod sa pagkapakyas sa iyang pag-uswag” (Alma 4:10) tungod kay “ang mga katawhan sa simbahan misugod sa … pagpahimutang sa ilang mga kasingkasing diha sa mga katigayunan ug diha sa kawang nga mga butang sa kalibutan” (Alma 4:8). Bisan kinsa nga adunay kaabunda sa materyal nga mga butang anaa sa peligro nga espirituhanong “madani” sa mga bahandi ug ubang mga butang sa kalibutan. Tukma kana nga pasiuna sa sunod nga mga pagtulun-an sa Manluluwas.

Ang labing maliputon nga mga sampinit nga mopugong sa epekto sa pulong sa ebanghelyo sa atong kinabuhi mao ang kalibutanong mga pwersa nga gitawag ni Jesus nga “mga kabalaka ug mga bahandi ug mga kalipayan sa kinabuhi” (Lucas 8:14). Daghan ra kaayo kini aron isaysay. Ang pipila ka mga ehemplo igo na.

Sa usa ka higayon si Jesus mibadlong sa Iyang pangulo nga Apostol, miingon kang Pedro, “Maoy usa ka babag ikaw alang kanako: kay ang imong gikabanaan dili ang mga butang sa Dios, kondili ang mga butang sa mga tawo” (Mateo 16:23; tan-awa usab sa D&P 3:6–7; 58:39). Ang pagbanaan sa mga butang sa mga tawo nagpasabut nga pag-una sa mga kabalaka dinhi sa kalibutan kay sa mga butang sa Dios diha sa atong mga aksyon, mga prayoridad, ug sa atong paghunahuna.

Mitahan kita sa “mga kalipayan sa kinabuhi” (1) kon kita maadik, nga mopaluya sa bililhong gasa sa Dios nga kabubut-on; (2) kon kita malingla sa ginagmayng pagbalda, nga mopalayo nato sa mga butang nga mahinungdanon sa kahangturan; ug (3) kon kita dunay mentalidad nga kinahanglan kitang makaangkon [entitlement], nga mopaluya sa personal nga paglambo nga mopasarang nato alang sa mahangturong kapalaran.

Mabuntog kita sa “mga kabalaka … dinhi sa kinabuhi” kon kita maparalisar tungod sa kabalaka sa umaabut, nga mopugong sa atong pagpadayon diha sa pagtuo, pagsalig sa Dios ug sa Iyang mga saad. Baynte singko ka tuig na ang milabay ang akong tinahud nga magtutudlo sa BYU nga si Hugh W. Nibley namulong bahin sa mga peligro sa pagtahan ngadto sa mga kabalaka dinhi sa kalibutan. Gipangutana siya sa usa ka interbyu kon ang mga kahimtang sa kalibutan ug ang atong katungdanan sa pagpakatap sa ebanghelyo mihimo niining angayan sa pagtinguha sa pipila ka paagi nga “mousab sa unsay gihimo nato sa Simbahan aron mohaum sa unsay gibuhat sa kalibutan.”

Ang iyang tubag: “Mao na kana ang tibuok istorya sa Simbahan, dili ba? Kinahanglan kang andam nga mopasilo dinhi, kinahanglan kang andam nga morisgo. Diha mosulod ang pagtuo. … Ang atong pasalig [commitment] angayan gayud nga sulayan, lisud, dili praktikal sa pamaagi niining kalibutana.”

Kining prayoridad sa ebanghelyo gimatud-an sa BYU campus pipila lang ka bulan ang milabay pinaagi sa usa ka tinahud nga lider sa Katoliko, si Charles J. Chaput, ang arsobispo sa Philadelphia. Namulong bahin sa “mga problema nga giambitan sa mga komunidad sa mga LDS ug Katoliko,” sama sa “bahin sa kaminyoon ug pamilya, sa kinaiyahan sa atong sekswalidad, sa kabalaan sa kinabuhi sa tawo, ug sa kadinalian sa kagawasan sa relihiyon,” siya miingon niini:

“Gusto nakong ipasabut og usab ang kaimportante sa pagsunod gayud sa unsay atong giangkon nga gituohan. Kinahanglan kana nga himoong prayoridad—dili lang diha sa atong kinabuhi sa personal ug sa pamilya apan diha sa atong mga simbahan, politikanhong mga pagpili, mga pakigsabut sa negosyo, pagtagad sa mga kabus; sa laing pagkasulti, sa tanan natong gibuhat.”

“Ingon ani kon nganong importante kana,” siya mipadayon. “Pagkat-on gikan sa kasinatian sa Katoliko. Kaming mga Katoliko nagtuo nga ang among katuyoan mao ang mahimong igpapatubo [leaven] sa katilingban. Apan dunay pino nga linya tali sa pagkahimong igpapatubo diha sa katilingban, ug pagkahimong bahin sa katilingban.”

Ang pasidaan sa Manluluwas batok sa mga kabalaka dinhi sa kalibutan nga mopugong sa pulong sa Dios sa atong kinabuhi sigurado nga mohagit nato nga motutok sa atong mga prayoridad—nagpahimutang sa atong kasingkasing—diha sa mga sugo sa Dios ug sa pagpangulo sa Iyang Simbahan.

Ang mga ehemplo sa Manluluwas makapahunahuna nato niini nga sambingay isip ang sambingay sa mga yuta. Ang kahaum sa yuta nagdepende sa kasingkasing sa matag usa kanato nga napaduol sa binhi sa ebanghelyo. Sa paghunahuna sa kaandam sa tawo sa espirituhanong pagtudlo, ang pipila ka kasingkasing gahi ug dili andam, ang uban tig-a kay wala kini gamita, ug ang uban napahimutang diha sa mga butang sa kalibutan.

III. Diha Mahulog sa Maayong Yuta ug Kini Namunga

Ang sambingay sa magpupugas natapos sa paghulagway sa Manluluwas sa binhi nga “diha mahulog sa maayong yuta ug kini namunga” sa nagkadaiyang gidaghanon (Mateo 13:8). Unsaon nato pag-andam sa atong kaugalingon nga mahimong ingon niana nga maayong yuta ug makabaton nianang maayong ani?

Si Jesus mipasabut nga “niadtong diha sa maayong yuta, kini mao kadto sila nga sa ilang pagkadungog sa pulong mosagup niini diha sa maminatud-on ug maayong kasingkasing, ug magapamunga uban sa pailub” (Lucas 8:15). Kita adunay binhi sa pulong sa ebanghelyo. Depende na sa matag usa kanato sa pagpahimutang sa atong mga prayoridad ug sa pagbuhat sa mga butang nga makahimo sa atong yuta nga maayo ug sa atong ani nga daghan. Kinahanglan kitang magtinguha nga lig-ong makagamut ug makabig sa ebanghelyo ni Jesukristo (tan-awa sa Mga Taga-Colosas 2:6–7). Atong makab-ot kining pagkakabig pinaagi sa pag-ampo, pagbasa sa kasulatan, pagserbisyo, ug regular nga pag-ambit sa sakrament aron kanunay nga makabaton sa Iyang Espiritu uban kanato. Kinahanglan usab kitang magtinguha nianang dakong kausaban sa kasingkasing (tan-awa sa Alma 5:12–14) nga mohulip sa dautang mga tinguha ug hinakog nga mga kabalaka sa gugma sa Dios ug sa tinguha nga moserbisyo Kaniya ug sa Iyang mga anak.

Ako mopamatuod sa kamatuoran niining mga butanga, ug sa atong Manluluwas, nga si Jesukristo, kansang mga pagtulun-an nagtudlo sa dalan ug kansang Pag-ula mihimo niining tanan nga posible, sa pangalan ni Jesukristo, amen.