Taan Boutoka te Katanoata n te Utu
Iroun Bonnie L. Oscarson
Beretitenti ni Kabuta Ibukiia Kairake n Ataeinnaine
Ti na buokia ni katea abanuean te Atua n ninikoria n teirake ao n riki bwa taan kamanoa te mare, te nakoa ni karo, ao te mweenga.
Bon te tai ao te kakimwareirei n riki bwa kaain mwakoron te bootaki n ataeinnaine ao n aine ae tamaroa aei. Ti rang ni kakabwaiakaki ngaira aine n reitaki ni kabane n te tairiki aei n te nano ae ti teuana ao n te tangira.
I a tibwa wareka karakinan Marie Madeline Cardon, are, ngaia ma ana utu, a karekea rongorongon ana euangkerio Iesu Kristo ae kaokaki man te moan ni wewete n te mwakuri ni mitinare ni beku i Italy n 1850. Bon te ataeinnaine ae 17 ke 18 ana ririki ngke a bwabetitoaki. N te Tabati, ngke a karaoa aia taromauri kaain te utu inanon mwengaia ieta n te Alps i Italy meang, mwaane aika taan iowaawa aika un, n ikotaki ma tabeman mitinare n te tabo, a katobibia te auti ao ni moana tatakaruaia, kakaewenako, ao n tangiriia mitinare bwa ana kaotinakoaki. I taku bwa aki ingainga nanoia ni kan reireinaki n te euangkerio—a tangira kaikoakan te rabwata. Bon Marie are e otinako man te auti ni kaitaraia taan iowawa.
A reitaanako aia kakaewenako ao a tangiriia mitinare bwa ana kaotinakoaki. E tabekaarake ana Baibara Marie ni baina ao e tuangiia bwa ana nako. E tuangiia bwa a mena mitinare iaan ana tararua ao aki kona ni kaikoaka teuana iran atuia. E kakauongo nakon oin ana taeka: “A bane ni kubanako. … E mena te Atua irariku. E katikui taeka aikai ni wiiu, ke n na aki kona n taetae nakoia. A bane n rau, ni waekoa. Te kurubu ni mwaane ae korakora ni kakamaaku anne a tei n akea te bwai ae ana kona ni karaoia imatan te ataeinnaine ae akea korakorana, e ruru, ao n aki kona ni maaku.” Te minita e tuangiia taan iowaawa bwa ana nako, are a karaoia ma te karaurau ni maama, ni maaku, ao n rau. Te nanai ae uarereke a kabanea aia bowi ma te rau.1
Ko aki kona n ti iangoa te ataeinnaine ae ninikoria anne, ti tebo ana ririki ma angiia mai ibuakomi, n tei imataia taan iowaawa ao n tei ibukin ana koaua ae boou ma te ninikoria ao te onimaki?
Mwaneu, tabeman mai ibuakora ti na aki kaitara ma taan iowaawa aika un, ma iai te buaka ae waaki ngkai n te aonaaba are a buakanaki iai ara reirei aika rang kakawaki ao ni mataata raoi. I taetae n ae onoti riki iaon reirein te utu. Tabun te mweenga aio kaantaninga aika kakawaki n te mweenga a titiraki iaona, a kabuakaka, ao ni kaitaraaki ni kawai aika mwaiti.
Ngke Beretitenti Gordon B. Hinckley e moanna ni wareka “Te Utu: Te Katanoata nakon te Aonaaba” 20 te ririki n nako n te ririki aei, ti rangin ni kakaitau ibukin ao ni kamoamoa itiakin, mataatan, ao koauan te katanoata ae kaokaki rinanon te kaotioti aei. Tiaki rang n ota raoi n te tai anne bwa a na mwaitira ae ti na kainnanoi taian katanoata inanon te aonaaba n te bong aei bwa kainibaire are ti kona ni butimwai reirei aika boou n te aonaaba aika roko man rongorongo, te intanete, taan reirei TV ao taian birim, ao taan kairiri. Te katanoata iaon te utu e a tia n riki bwa ara kainibaire ibukin taraakin aroaron ara koaua n maiura n te aonaaba, ao I kakoaua bwa reirei a waaki nako inanon te rongorongo aei ake a bon koaua n te bong aei n aron are ngke ti moan anganaki mairouia ana burabeti te Atua tao 20 te ririki n nako.
I kona n taekina te bwai ae mataata? Te maiu aei e waaki raoi nakon are e a tia ni baireaki ibukin temanna, ao ti bane n ataia bwa tiaki aine ni kabane aika ataia bwa tera ae kabwarabwaraki n te katanoata nakon te aonaaba. E teimatoa ni kakawaki atakin ao reiakinan ana baeten te Uea ao ni kekeiaki ni kakoroa bukin te baeten anne nakon ara kabanea ni kona.
Ngaira n tatabemaniira nako ti na kekeiaki ni kakoroa bukin te babaire anne, ao ngaira n tatabemaniira nako a bane n titebo aron kakawakira iroun te Uea. Ti riai n uringnga bwa Tamara are i Karawa ae tangira e atai baika ti tangiri ao E na kakoroi bukin Ana berita ae na akea te bwai ae na tauaki maiuraoia naake a kakaonimaki ni kawakin aia berita. Iai ana mition ao ana babaire Tamara are i Karawa ibukira n tatabemaniira nako, ma iai naba oin Ana babaire. Teuana te kakaewenako ae rangin ni matoatoa n te maiu ae mamate aei bon karekean te onimaki n ana tai te Uea. Bon te iango ae tamaroa ni katea te babaire riki teuana n am iango, are e na buokiira bwa taan kawakin berita, taan ibuobuoki, ao aine aika raraoi aika a katea abanuean te Atua n aki tabe bwa bwaai ake ti a tia ni bairei ni maiura a koro bukiia ke aki. Ti na riai n reireiniia natira aine bwa ana kekeiaki ni kaitarai kangaanga ma ana babaire ibukin bwaai aika aki kaantaningaaki.
Ni kauringaan ana ka 20 n ririki te katanoata nakon te aonaaba, I tangiria ni kanakoa te kakaewenako ibukira ngaira ainen te Ekaretia ni kabane bwa ti na riki bwa taan kamanoa “Te Utu: Te Katanoata nakon te Aonaaba.” N aron nanon Marie Madeline Cardon ae korakora ni kamanoia mitinare ao ana koaua ae boou ae e a tibwa kunea, ti riai ni kamanoa ana reirei te Uea aika kaokaki ni kabwarabwara te mare, utu, tabeia mai ieta mwaane ao aine, ao kakawakin te mweenga bwa taabo aika tabu—e ngae ngke e takarua te aonaaba nakon taningara bwa reirei aikai a bane taia, tianaki, ke aki bwainaki. Aomata n tatabemaniia nako, e aki kakawaki bwa tera ae a rinanona n aia mare ke mwaitiia natiia, a kona n riki bwa taan katana ana babaire te Uea are e kabwarabwaraaki n ana katanoata te utu. Ngkana ana babaire te Uea, e riai naba n riki bwa ara babaire!
Iai teniua koaua ake a reiakinaki n te katanoata nakon te aonaaba ake I taku bwa a rangin kainnanoi taan kamanoa aika a teimatoa n nene. Te moan bon te mare imarenan te mwaane ao te aine. Ti reireinaki inanon booki aika tabu, “Ma akea naba te mwaane ngkana akea te aine, i nanon te Uea.”2 Ibukin temanna bwa e na karekea bwaninin ana kakabwaia te nakoanibonga, e riai n iai te bumwaane ao te buaine aika a kabaeaki n ana auti te Uea, ana uaia ni mwakuri n te raoiroi ao n teimatoa ni kakaonimaki nakon aia berita. Aio bon ana baire te Uea ibukin Natina, ao akea mwatin te marooro ma te botanaomata ke te kabuakaka ae na bita te bwai ae e a tia te Uea n taekinna. Ti riai n teimatoa n riki bwa katooto ni maare aika raoiroi, ukoukora te kakabwaia anne inanon maiuira, ao karekea te onimaki ngkana e waeremwe n roko. Ti a bane n riki bwa taan kamanoi taian mare n te kawai are e a tia ni kabwarabwaraaki iroun te Uea ngkai kam teimatoa ni kaota te tangira ao te nanoanga ibukiia naake a kaokoro aia iango.
Te reirei are imwiina are e kainnanoa bwanaara ni kamanomano e karinea taben te tina ao te karo mai eta. A ingainga nanora n reireiniia ara ataei bwa ana kantaninga ae rietaata n te maiu aei. Ti tangiria ni kakoaua bwa natira aine a ataia ae iai aia konabwai ni kakoroa ao n riki nakon are a iangoia. Ara kantaninga bwa a na tangira te reirei, a na karekei aia reirei, ana tarena, ao tao n riki bwa Marie Curie ke Eliza R. Snow te kauoman.
Ti reireiniia naba natira mwaane ao aine ae akea te karietataaki ae karineaki riki, akea riki te nakoa ae rietaata riki, ao akea te nakoa ae kakawaki riki n te maiu aei irarikin are te tina ke te karo? N na kantaningaia bwa ngkana ti kaungaia ara ataei bwa ana karaoa aia kabanea n tamaroa n te maiu aei ti reireiniia naba bwa ana karinei naba tabeia tiina ao kaaro ake a karaoi n ana babaire Tamara are i Karawa.
Natira te aine ae te kabanea ni uarereke, Abby, e noora te tai ae onoti n tei bwa te tia kamanoa taben te tina. N te bong teuana e karekea te kaetieti man aia reirei natina bwa ana karaoa te kamataata n te Career Day (Bong ni Kamwakuri) n te reirei. A kaoaki kaaro bwa ana kanakoi aia reta ni bubuti ngkana a tangiria n roko n te reirei n reireiniia ataei ibukin aia mwakuri, ao Abby e korakora nanona ni kan korea ana reta bwa e na taetae iaon te nakoantina. E aki karekea boon ana reta man te reirei, ao ngke e nang roko tain te Career Day, e tareboniia te reirei, n ana iango ae a tia ni kabua ana reta. Taan babaire a kakaea ana kiraati ae na taetae nakoia ao a kuneia uoman taan reirei aika a kukurei bwa e na roko Abby n taetae nakoia kaain aia kiraati ni banen te Career Day.
N ana anga reirei ae kaunga nakoia ataei, e reireiniia Abby, irarikin bwaai riki tabeua, bwa ngkai ngaia te tina e riai n riki bwa te tia rabakau iaon bwainaoraki, rabakaun te iango, te aro, anga reirei, anene, rabakau ni koroboki ao ni wareware, korotamnei, te mwane, katamaroa, koroira, te tebo, takakaro, te kuuka, ao a mwaiti riki. A rangi n anaaki nanoia ataei. E kabanea man tuangakiia ataei bwa ana uringiia tinaia man korean te taeka ni karabwarabwa ni kaota aia kakaitau ibukin aia mwakuri n ibuobuoki n tangira aika mwaiti ae a karekea ni katoabong. E namakinna Abby bwa a noora tinaia ataei ma te taratara ae boou ngaia ae te riki n tina ke ni karo bon te bwai ae korakora bonganana. E bubuti bwa e na tibwauaia riki n te ririki aei n tain te Career Day ao e kaoaki bwa e na anga reirei nakon onoua kiraati.
E a tia Abby n taekina ana atatai: “I namakinna bwa e kona ni bebete n te maiu aei ibukin te ataei ni karekea te iango ae te riki ni karo bon te kauoua ni mwakuri ke n tabetai te bwai ae riai karaoana. I tangiriia ataei n tatabemaniia nako bwa ana namakinna ae a moanibwai kakawakiia nakoia aia karo, ao tao n tuangiia aron kakawakin te riki ni karo irou e na buokiia bwa a na atai bwaai ni kabane aika a karaoi aia karo ibukiia ao bukin tera.”
Ara burabeti ae tangiraki, Beretitenti Thomas S. Monson, bon te banna ni katooto ae moan te tamaroa ni karineaia aine ao te riki n tina, riki bon oin tinana. Ni kaineti ma tinara n te maiu aei, e a tia n taekinna: “Ti bia ngaira n tatabemanira nako ni moanibwaia te koaua aei; temanna e aki kona ni mwaninga taekan tinana ao n uringa te Atua. Temanna e aki kona n uringa te tina ao ni mwaninga taekan te Atua. Bukin tera? Bukina bwa aomata aika tabu aikai, te Atua ao tinara [iaon te aba], raao n te karikibwai, n te tangira, n te angakarea, n te mwakuri n ibuobuoki, a bane n teuana.”3
Te kabanea n reirei ae ti kainnanoia n tei ao ni kamanoira bon te mweenga ae tabu. Ti riai n ana te taeka are n tabetai e taekinaki ma te bwainingare ao ni karietataa. Bon te taeka te tia karaoa te mweenga. Ngaira ni kabane—aine, mwaane, kairake, ao ataei, e tuai iein ke e a tia n iein—e kona ni mwakuri bwa te tia ibuobuoki n te mweenga. Ti riai ni “karaoa mweengara” bwa te tabo ae barongaaki, ni katantan, tabu, ao ni kamanomano. E riai mwengara n riki bwa taabo are e kona n namakinaki iai Tamnein te Uea n ae rangi ni korakora ao te tabo are booki aika tabu ao te euangkerio a kamatebwaiakaki, reiakinaki, ao a maiuakinaki. Tera te kaokoro ae e na karikia n te aonaaba ngkana a noria aomata i bon irouia bwa taan karaoi mweenga aika raraoi. Ti a bane ni katana te mweenga bwa te tabo ae te kauoua ti nakon te tembora n ae tabu.
Aine, I rangi ni kakaitau n riki bwa te aine ni boong aika kaitira. Iai taai ao ara kona are akea irouia kaain te roro irouia aine ae e a tia n reke irouia n te aonaaba aei. Ti na buokia ni katea abanuean te Atua n ninikoria n teirake ao n riki bwa taan kamanoa te mare, te nakoa ni karo, ao te mweenga. Te Uea e kainnanoira bwa ti na ninikoria, matoatoa, taani buaka aika aki kona ni kamwaingaki ake a na katana Ana babaire ao n reireia Ana koaua nakoia roro aika a na roko.
I kaota au koaua bwa e maiu Tamara are i Karawa ao e tangiriira n tatabemaniira. Natina, Iesu Kristo, bon ara Tia Kamaiu ao te Tia Kabooira. I katuka au kakoaua aei iroumi n aran Iesu Kristo, amen.