Te mata ite e te tari’a faaroo
Na Elder Kim B. Clark
No te Hitu Ahuru
Ia hi’o tatou i te Mesia, e e hi’o ma to tatou mata e e faaroo ma to tatou tari’a, e haamaita’i te Varua Maitai ia tatou ia ite i te Fatu o Iesu Mesia ia ohipa i roto i to tatou oraraa.
I roto i Ta’na tau ohiparaa i te tahuti nei, ua rave Iesu e rave rahi mau semeio o te faaoraraa e ua haapii na roto i te mana e te puai i parau ai te papa’iraa mo’a e, « Parare atura to’na roo e ati roa a’era Suria… e tiaa rahi tei pee mai ia’na ».1
Te tahi o tei ite Ia’na i te faaoraraa e i te faarooraa Ia’na i te haapiiraa, ua pato’i Ia’na. Te tahi atu, ua pee Ia’na no te hoê noa tau, aita râ i pee faahou maira Ia’na.2 Te Fatu o Iesu Mesia tei ti’a mai i mua ia ratou, aita râ ratou i ite o vai mau Oia. E matapo to ratou, e ua ma’iti ia faaatea atu. No ratou, ua parau Iesu :
« I haere a’enei au i o’u ihora, e aore to’u ihora taata i ite mai ia’u ».3
« Ua turi to ratou tari’a, ua tapiri ratou i to ratou mata ».4
Tera râ, e rave rahi mau tane e mau vahine, tae noa’tu i To’na mau Aposetolo haapa’o maita’i, o tei haapû i to ratou oraraa i ni’a Ia’na. Noa’tu e te aro nei ratou i te mau faaoaoaraa no teie nei ao, e te tapitapi i Ta’na i haapii, o oia ato’a ma te mata’u, ua ti’aturi ratou Ia’na, ua here Ia’na, e ua pee atu Ia’na.
No ratou, ua parau Iesu : « Ua maita’i râ to outou mau mata, te hi’o nei hoi ïa, e to outou mau tari’a, te faaroo nei hoi ïa ».5
Na mua a’e i To’na mauiui i Getesemane e i Golagota, ua horo’a Iesu i Ta’na mau pipi i teie fafauraa faahiahia : « O te faaroo mai Ia’u ra e rave ato’a oia i teie nei mau ohipa ta’u e rave nei, e e rahi atu â ta’na e rave i teie, no te mea te haere nei au i ta’u Metua ra ».6
Ua faatupu Iesu i te reira fafauraa : ua haamata i te mahana o te Penetekose, ua haamaita’ihia te mau pipi i te bapetizoraa auahi e i te Varua Maitai.7 Na roto i te faaroo i te Mesia, te tatarahapa e te haapa’oraa, ua riro te Varua Maitai ei hoa no ratou, ua faahuruê i to ratou aau, e ua haamaita’i ia ratou e te hoê iteraa tamau i te parau mau.
Ua faaitoito teie mau horo’a e teie mau haamaita’iraa i te mau pipi a te Fatu. Noa’tu e, e mea fifi e te arepurepu te mau taime i orahia mai e ratou, ua farii ratou i te horo’a pae varua o te mata ite e te tari’a faaroo. Na roto i te mana o te Varua Maitai, ua haamata ihora ratou i te ite i te huru mau o te mau mea e vai nei, te Fatu o Iesu Mesia ihoa râ, e Ta’na ohipa i rotopu ia ratou.8 Ua haamaramarama te Varua Maitai i to ratou iteraa, e ua faaroo a’era ratou i te reo o te Atua ma te maramarama a’e. Ua ô hohonu te evanelia a Iesu Mesia i roto i to ratou aau.9 Ua faaea ratou ma te aueue ore e te haapa’o.10 Ua poro ratou i te evanelia ma te mata’u ore e te puai e ua patu i te basileia o te Atua.11 Ua roaa te oaoa ia ratou i roto i te Fatu ra o Mesia.
E rave rahi to tatou mau tuatiraa e teie mau tane e mau vahine parau ti’a i te ‘afa ti’a o te mau tau. Te ora nei tatou i te hoê taime, te rave nei te Fatu o Iesu Mesia i te mau semeio i rotopu ia tatou—mai te faaoraraa i te ma’i, te tamâraa i ta tatou mau hara, te fafariuraa i to tatou mau aau, e te iritiraa i te faaoraraa no te mau tamarii a te Atua i na pae e piti o te paruru. I teie anotau to tatou, te vai ato’a ra to tatou mau peropheta e te mau aposetolo, te mana o te Autahu’araa, te mau mea a te Varua, e te mau haamaita’iraa hanahana o te mau oro’a o te faaoraraa.
E tau ri’ari’a mau teie to tatou—e taime no te ino rahi e te faahemaraa, e taime no te ano’ino’iraa e te arepurepu. I roto i teie tau ati rahi, ua pii te peropheta a te Fatu i ni’a i te fenua nei, Thomas S. Monson, ia haere e faaora i tei paruparu i te pae varua,12 ia ti’a ma te itoito no te faaite i te parau mau,13 e no te patu i te basileia o te Atua.14 Noa’tu te faito o to tatou pae varua aore ra to tatou faaroo aore ra to tatou haapa’o i teie taime, eita e nava’i no te ohipa e vai nei i mua. E mea titauhia i te mori pae varua e te puai hau atu i te rahi. E titauhia i te mau mata no te ite papû maita’i i te Faaora e ohipa nei i roto i to tatou oraraa e te mau tari’a no te faaroo hohonu atu i To’na reo i roto i to tatou aau.
E tae mai teie haamaita’iraa faahiahia mai te mea e, e iriti tatou i to tatou aau e e farii,15 e e farii mau, i te Fatu o Iesu Mesia, Ta’na haapiiraa, e Ta’na Ekalesia i roto i to tatou oraraa. Aita e titauhia ia tatou ia maita’i hope roa, area râ, e titauhia ia tatou ia maita’i e ia maita’i a’e. Titauhia ia tatou ia faaitoito i te ora i te mau parau mau ohie e te maramarama o te evanelia. Mai te mea e rave tatou i ni’a ia tatou i te i’oa o te Mesia, ia ohipa ma te faaroo Ia’na no te tatarahapa i ta tatou mau hara, e haapa’o i Ta’na mau faaueraa, e e haamana’o â ia’na, e farii tatou i te Varua Maitai ei apiti no tatou na roto i te aroha e te here mau o Iesu Mesia.
E afa’i mai te haapa’o i te Varua i roto i to tatou aau. I roto i to tatou mau utuafare, e pure tatou ma te faaroo, e imi i te parau i papa’ihia ra, e e haamo’a i te mahana Sabati. I roto i to tatou mau fare pure, te rave nei tatou i te oro’a e te rave nei i te mau fafauraa mo’a i to tatou Metua i te Ao ra na roto i te i’oa o te Mesia. I roto i te mau hiero, e rave tatou i te mau oro’a mo’a no te mau taea’e e te mau tuahine i te tahi atu pae o te paruru. I roto i to tatou mau utufare e i to tatou mau piiraa no ô mai i te Fatu ra, e toro tatou i to tatou mau rima ia vetahi ê, e amo i ta ratou mau hopoi’a e e ani manihini atu ia ratou ia haere mai i te Mesia.
Te mau taea’e e te mau tuahine, ua ite au e, mai te mea e rave tatou i teie mau ohipa, e farii tatou i te Varua Maitai ! E haere to tatou pae varua i ni’a, e e farii tatou i te iteraa na roto i te Varua Maitai, e riro atu ai ei apiti no tatou. Ia hi’o tatou i te Mesia, e e hi’o ma to tatou mata e e faaroo ma to tatou tari’a, e haamaita’i te Varua Maitai ia tatou ia ite i te Fatu o Iesu Mesia ia ohipa i roto i to tatou oraraa, ia haapuai i to tatou faaroo Ia’na ma te papû e te faaiteraa. E ite maita’i atu tatou i te taato’araa o to tatou mau taea’e e te mau tuahine mai ta te Atua e ite ra ia ratou paato’a, ma te here e te aroha mau. E faaroo tatou i te reo o te Faaora i roto i te papa’iraa mo’a, ma te muhumuhu a te Varua, e i roto i te mau parau a te mau peropheta ora.16 E ite tatou i te mana o te Atua i ni’a i Ta’na peropheta e i te taato’araa o te mau feia faatere o Ta’na Ekalesia mau e te ora, e e ite tatou ma te papû e, na te Atua teie ohipa mo’a.17 E ite e e taa tatou iho e to te ao e haati nei ia tatou, i te huru raveraa a te Faaroa. E noa’a ia tatou i te mea ta te aposetolo Paulo i parau ra e « te aau o te Mesia ».18 E farii tatou i te mata ite e te tari’a faaroo, e e patu tatou i te basileia o te Atua.
E nehenehe te oraraa ia riro ei mea teimahâ, te arepurepu, te mauiui, e te haaparuparu. Te horo’a atu nei au i to’u iteraa e, na roto i te apiti a te Varua Maitai, e tapû te mori o te evanelia a Iesu Mesia i te arepurepu, te mauiui, e te mau tau fifi. Mai te mea, e haere mai oia na roto i te hoê maramarama faahiahia aore ra na roto i te hoê tereraa maru, e faatupu te mana pae varua hanahana i te here faaora e te faaea hau o te aau tatarahapa, te varua pêpê, ia mahuta i te mau poiri i roto i te maramarama o te parau mau ; e te faataaê atu i te teimahâ na roto i te ti’aturi i te Mesia. E ite tatou i te mau haamaita’iraa ia haere mai, e e ite tatou na roto i te haapapûraa o te Varua o te Fatu o Iesu Mesia o te rave ra i te ohipa i roto i to tatou oraraa. E « ati-roa-hia oia » to tatou mau teimaha « i te oaoa o [to tatou Faaora] ».19
Te hoê ohipa o tei tupu i ni’a i to’u metua vahine e to’u metua tane e rave rahi matahiti i teie nei o te faaite nei i te faufaa e te mana o te mata ite e te tari’a faaroo. I te matahiti 1982 ua piihia to’u na metua ia tavini i roto i te misioni no Philipino Davao. I to to’u metua vahine iritiraa i te vehi rata e a ite ai i te vahi i piihia raua ia tavini, ua tuo atura oia i to’u metua tane, « Aita ! E taniuniu oe ia ratou, e e faaite ia ratou e, aita ta taua e nehenehe e haere i te fenua Philipino. Ua ite ratou e aho pau to oe ». E ma’i aho pau to to’u metua tane e rave rahi matahiti te maoro, e ua haape’ape’a roa to’u metua vahine no’na.
E te tahi tau pô i muri mai, ua faaara to’u metua vahine i to’u metua tane i te hora 2 e te afa i te po’ipo’i. Ua parau oia, « Merlin, ua faaroo anei oe i tera reo ? »
« Aita, aita vau i faaroo noa a’e i te hoê reo ».
« Oia ïa, ua faaroo vau i te reira reo e toru taime i teie pô i te na ôraa e, « no te aha oe e haape’ape’a ai ? Aita oe i ite e, ua ite au e aho pau to’na ? Na’u e haapa’o ia’na, e na’u ato’a e haapa’o ia oe. A faaineine ia oe no te tavini i te fenua Philipino ».
Ua tavini to’u metua vahine e to’u metua tane i te fenua Philipino, e ua farii i te mau iteraa faahiahia mau. Te Varua Maitai to raua apiti, e ua haamaita’i e ua paruruhia raua. Aita roa’tu to’u metua tane i fifi noa a’e i to’na aho pau. Ua tavini oia ei tauturu hoê i roto i te peresideniraa misioni, e ua haapii atu o’na e to’u metua vahine e rave rahi hanere misionare e e rave rahi tauatini feia mo’a parau ti’a no te mau Mahana Hopea nei ei faaineineraa i te tupuraa te mau paroita e te mau titi i ni’a i te motu no Mindanao. Ua haamaita’ihia raua i te mata ite e te tari’a faaroo.
Te mau taea’e e te mau tuahine, te faaite papû nei au no Iesu Mesia. Te ora nei oia. O oia to tatou Faaora e te Taraehara. Ua ite au e, mai te mea e farii tatou Ia’na i roto i to tatou oraraa e e ora i te mau parau mau ohie e te maramarama o Ta’na evanelia, e fana’o tatou i te auhoaraa o te Varua Maitai. E horo’ahia mai te ô o te mata ite e te tari’a faaroo. Te na reira nei au i te faaite papû atu i te i’oa o Iesu Mesia, amene.