No te aha te Ekalesia

Na Elder D. Todd Christofferson

No te Pupu no te Tino Ahuru Ma Piti Aposetolo

E mea faufaa ia faaea rii no te feruri e, eaha Iesu Mesia i faaoti ai e faaohipa i te hoê ekalesia, Ta’na Ekalesia no te faatere i Ta’na e ta To’na Metua ohipa.

I roto i to’u oraraa, ua riro te mau amuiraa rahi a te Ekalesia ei ohipa oaoa rahi no’u i te pae varua, e ua riro ato’a te Ekalesia ei vahi no te ite i te Fatu. Ua ite au e, te vai ra te tahi mau taata o te faariro nei ia ratou ei feia faaroo e aore râ, ei feia ite i te pae varua, tera râ, te pato’i nei ratou ia amui atu i te hoê ekalesia e aore râ, ia farii i te hoê faanahoraa mai te reira te huru. No ratou, te parau no te ohipa faaroo, tei roto noa ïa i te taata iho. Tera râ, ua riro te Ekalesia ei ohipa tei haamauhia e te taata i ni’a Ia’na tatou i faatumu ai i to tatou pae varua—o Iesu Mesia. E mea faufaa ia faaea rii no te feruri e, eaha Oia i faaoti ai e faaohipa i te hoê ekalesia, Ta’na Ekalesia, te Ekalesia a Iesu Mesia i te mau Mahana Hopea nei, no te faatere i Ta’na e ta To’na Metua ohipa « te faatupuraa i te tahuti ore e te ora mure ore o te taata nei ».¹

Haamata mai na ni’a ia Adamu, ua porohia te evanelia a Iesu Mesia, e te mau oro’a faufaa no te faaoraraa, mai te bapetizoraa, ua ravehia ïa na roto i te autahu’araa faanahoraa utuafare.² E ia tupu a’era te oraraa sotaiete i te rahi, hau atu i te amuiraa utuafare, ua pii ato’a te Atua i te tahi atu mau peropheta, te mau ve’a e te mau orometua. I te anotau o Mose te tai’o ra tatou i te parau no te hoê faanahoraa rahi a’e, tei roto ato’a te mau peresibutero, te mau tahu’a e te mau haavâ. I roto i te aamu o te Buka a Moromona, ua haamau Alama i te hoê ekalesia tei roto te tahu’a e te mau haapii.

I muri iho, i te afa ti’a o te tau, ua faanahonaho Iesu i Ta’na ohipa ia nehenehe te evanelia ia haamauhia i roto i te mau fenua e rave rahi e i roto i te mau taata rau. Taua faanahonahoraa ra, ua niuhia te Ekalesia a Iesu Mesia i ni’a i « te mau aposetolo e te mau peropheta, e o Iesu Mesia iho te tihi rahi ».³ Tei roto ato’a te tahi atu mau ti’a faatere mai te mau hitu ahuru, te mau peresibutero, te mau episekopo, te mau tahua, te mau haapii, e te mau diakono. Ua na reira ato’a Iesu i te faati’a i te Ekalesia i te pae tooa o te râ i muri a’e i To’na Ti’a-faahou-raa.

I muri a’e i te taivaraa e i te haamouraa te Ekalesia Ta’na i haamau i ni’a i te fenua nei, ua faati’a faahou â te Fatu i te Ekalesia a Iesu Mesia na roto i te Peropheta Iosepha Semita. Ua vai noa te opuaraa matamua ; oia ho’i te pororaa i te parau apî o te evanelia a Iesu Mesia e te faatereraa i te mau oro’a no te faaoraraa— oia hoi, no te arata’i mai i te taata i te Mesia ra.⁴ E i teie nei, na roto i te faanahonahoraa o teie Ekalesia i faaho’i-faahou-hia mai, e nehenehe te fafauraa o te faaoraraa e fariihia, tae roa’tu i te mau varua o tei pohe tei ite rii e aore râ tei ore roa i ite i te parau no te aroha o te Faaora i roto i to ratou oraraa tahuti nei.

Nahea Ta’na Ekalesia i te faatupu i te mau opuaraa a te Fatu ? E mea faufaa ia ite e, te opuaraa tumu a te Atua o to tatou ïa haereraa i mua. To’na hinaaro maori râ, ia haere noa tatou « mai te aroha i te aroha, e tae noa’tu i te taime oia i farii ai i te îraa »⁵ o te mau mea ato’a Ta’na e nehenehe e horo’a. Eita ïa e titau-noa-hia ia riro noa ei taata maita’i e aore râ, ei taata varua maita’i. E titauhia râ te faaroo ia Iesu Mesia, te tatarahapa, te bapetizoraa i te pape e te Varua, e te tape’araa i roto i te faaroo e tae noa’tu i te hopea.⁶ Eita ta te hoê taata e nehenehe e rave hope roa i to’na noa pae, no reira te tumu rahi ua haamau te Fatu i te hoê ekalesia, o te faatupuraa ïa i te autahiraa o te Feia Mo’a o te paturu i te tahi e te tahi i roto i te « e’a titi’aifaro e te pirihao e tae roa’tu ai i te ora mure ore ra ».⁷

« E ua haapa’o [te Mesia] i te tahi pae ei aposetolo ; e te tahi pae ei peropheta ; e te tahi pae ei haapii evanelia ; e te tahi pae ei tia’i e ei orometua ;

« … Ei faaau i te feia mo’a i te ohipa ra e orometua, ia tupu i te maita’i te tino o te Mesia ra :

« Ia riro tatou ato’a nei ei taata paari, i te faaroo hoê e te ite hoê i te Tamaiti a te Atua, ia taea te faito ra i te î o te Mesia i te rahi ».⁸

O Iesu Mesia « te tumu e te faaotiraa o to [tatou] faaroo ».⁹ Te tahoêraa ia tatou iho i te tino o te Mesia—te Ekalesia—o te hoê ïa tuhaa faufaa o te raveraa i To’na i’oa i ni’a iho ia tatou.¹⁰ Ua parauhia mai ia tatou e, i roto i te Ekalesia i mutaa iho ra, « ua amui pinepine ratou, ia haapae i te maa, e ia pure, e ia parau te tahi i te tahi i te maita’i o to ratou mau varua »¹¹ « e ia faaroo i te parau a te Fatu ».¹² Mai te reira ato’a te Ekalesia i teie mahana. Ma te hoê i roto i te faaroo, te haapii nei e te faaitoito nei tatou te tahi e te tahi e te tautoo nei ia fatata’tu i te îraa o te faito o te ti’araa pipi, « te faito i te î o te Mesia i te rahi ». Te tutava nei tatou ia tauturu te tahi i te tahi « te ite hoê i te Tamaiti a te Atua »,¹³ e tae roa i te mahana « e ore ho’i ratou e haapii faahou o te taata o to’na iho taata tupu… i te na ô raa’tu e, Ia ite ho’i outou ia Iehova ; e ite paato’a ho’i ratou ia’u, o tei haehaa e o tei rahi, te parau maira Iehova ».¹⁴

I roto i te Ekalesia aita tatou e haapii noa nei i te haapiiraa tumu hanahana ; te ite ato’a nei râ tatou i to’na faaohiparaa. Mai te tino o te Mesia, te utuutu nei te mau melo o te Ekalesia te tahi i te tahi i roto i te oraraa i te mau mahana ato’a. E feia hara ana’e tatou paato’a ; te faaino nei tatou e te faainohia mai nei tatou. Pinepine tatou i te tamatamata te tahi i te tahi na roto i to tatou iho mau peu taa ê. I roto i te tino o te Mesia, titauhia ia tatou ia rave hau atu i te haapii noa mai i te ture e i te mau parau teitei, e ia farii i to outou iho iteraa, na roto i te oraraa « i piha’i iho te tahi i te tahi na roto i te here ».¹⁵

E ere teie faaroo no ni’a noa i te taata iho ; ua titauhia râ ia tatou ia tavini. Tatou te mata, te rima, te upoo, te avae e te tahi atu mau melo o te tino, e tae noa’tu i « tera mau melo … mai te mea ra e, e mea huru paruparu ratou, e mea faufaa ato’a ratou ».¹⁶ Titauhia teie mau piiraa e titauhia ia tavini tatou.

Hoê o te mau tane i roto i ta’u paroisa ua paari oia ma te ore te metua e paturu ia’na, e te pato’i ato’a ra i te mau ohipa ta’na e rave i roto i te Ekalesia. Teie ta’na parau i roto i te hoê pureraa oro’a : « Aita e nehenehe i to’u metua tane ia ite e, no te aha te taata e haere ai i te pureraa, inaha, e nehenehe hoi ta ratou e haere e faahee, tera râ, e mea au roa na’u ia haere i te pureraa. I roto i te Ekalesia, tei roto tatou paato’a i te hoê â tere, e ua faauruhia vau i taua tere ra na te feia apî puai, te mau tamarii viivii ore, e te mau mea ta’u e ite nei e e haapii mai nei na roto mai i te tahi atu mau taata paari. Ua haapuaihia vau na roto i te amuitahiraa e te oaoa nei au i te oraraa i te evanelia ».

Te faatupu nei te mau paroisa e te mau amaa o te Ekalesia i te hoê putuputuraa hepetoma no te haamaharaa e no te faaapîraa, e taime e e vahi no te vaiiho i te ao i muri—te Sabati. E mahana ïa no te « oaoa oe ia Iehova i reira »,¹⁷ no te farii i te faaoraraa pae varua e tae mai na roto i te oro’a mo’a, e no te farii i te faaapîraa i te fafauraa o To’na Varua ia vai i piha’i iho ia tatou.¹⁸

Hoê o te mau haamaita’iraa rahi roa a’e o te riroraa ei tuhaa no te tino o te Mesia, noa’tu e, e ere te haamaita’iraa i taua taime ra, o te faahaparaahia ïa no te hara e no te hape. Te vai ra tera hinaaro i roto ia tatou ia faati’ati’a e ia faatano i ta tatou mau hapa, e i te tahi taime, aita tatou i ite e, eaha te vahi e haamaita’i e aore râ, nahea ia haamaita’i. Mai te mea e, aita e feia e nehenehe e faahapa ia tatou « i te tahi mau taime na roto i te parau papû roa, ia faaûrûhia râ e te Varua Maitai »,¹⁹ e riro ïa tatou i te ere i te itoito no te taui e no te pee maita’i atu i te Fatu. No te taata iho te tatarahapa, tera râ, i ni’a i taua e’a mauiui ra i te tahi taime, te vai ra ïa te faahoaraa i roto i te Ekalesia.²⁰

I roto i teie aparauraa no ni’a i te Ekalesia ei tino no te Mesia, e mea ti’a ia tatou ia haamana’o noa i na mea e piti. A tahi, eiaha tatou e rohi no te faafariu i ni’a i te Ekalesia, i ni’a râ i te Mesia e Ta’na evanelia, na te Ekalesia râ e faaohie i te reira faafariuraa.²¹ E mea maita’i a’e te faahitiraa a te Buka a Moromona i te na ôraa e, « e ua faafariuhia mai ratou i te Fatu, e ua amuihia i te ekalesia a te Mesia. »²² A piti, e mea ti’a ia tatou ia haamana’o e, i te omuaraa ra, te Ekalesia, te utuafare ïa, e i teie mahana, ei na faanahoraa taa’e te tahi e te tahi, te tavini nei e te faaitoito nei te utuafare e te Ekalesia i te tahi e te tahi. Eita te tahi e mono i te tahi, e eita roa’tu e nehenehe i te Ekalesia ia mono i te mau metua, noa’tu i te maita’i roa. E haapiihia te evanelia e e rave te Ekalesia i te mau oro’a no te autahu’araa ia ti’a i te mau utuafare ia farii i te ora mure ore.

Te vai ra te piti o te tumu rahi e rave ai te Faaora i te ohipa na roto i te ekalesia, Ta’na Ekalesia, oia hoi, no te faatupu i te mau mea titauhia, o te ore e nehenehe i te taata e aore râ, te mau pupu na’ina’i ia rave. Hoê hi’oraa papû oia hoi, te arairaa i te parau no te veve. Oia mau, tatou te taata e te mau utuafare, te haapa’o nei tatou i te mau hinaaro pae tino o vetahi ê, « i te horo’araa te tahi i te tahi i to te tino nei e ta te Varua ato’a ho’i mai tei au i to ratou veve e ta ratou vai-tao’a-ore-raa ra ».²³ Tera, mai te mea e, e amui to te Ekalesia taato’a, e rahi atu ïa te aravihi no te aupuru i tei veve e tei nava’i ore no te pahono i te mau hinaaro rahi atu, e riro mau te faarava’iraa ia’na iho, tei tia’i-noa-hia, ei mea papû no te taata e rave rahi.²⁴ Taa’e noa’tu i te reira, e puai to te Ekalesia, ta’na mau Sotaiete Tauturu, e ta’na mau pupu autahu’araa, no te tauturu i te mau taata e rave rahi i te mau vahi e rave rahi tei roohia i te mau ati o te natura, te tama’i e te hamani-ino-raa.

Ahiri aita teie mau tauturu a Ta’na Ekalesia, e ore ïa e tupu te fafauraa a te Faaora ia hopoi i te evanelia i to te ao taato’a.²⁵ Aita ïa e vai te mau taviri aposetolo, te mau fare, te faufaa moni, e te pûpûraa e te tusia a te mau misionare tauatini e tauasini tei titauhia no te faanuu â i te ohipa. A haamana’o na, « e [ti’a] i teie Evanelia o te Basileia ia porohia i to te ao ato’a nei, ei faaiteraa i te mau fenua ato’a, ei reira e tae mai ai te hopea ra ».²⁶

E nehenehe te Ekalesia e patu e e faaohipa i te mau hiero, te mau fare o te Fatu, i reira hoi e ravehia ai te mau oro’a e te mau fafauraa faufaa. Ua parau o Iosepha Semita e, te opuaraa a te Atua i roto i te haaputuputuraa i To’na mau taata i te mau tau ato’a, « o te paturaa ïa no te Fatu te hoê fare e nehenehe ai Ia’na ia heheu i To’na ra nunaa te mau oro’a no To’na fare e te mau hanahana no To’na basileia e ia haapii i te nunaa i te e’a no te ora; no te mea te vai nei te tahi mau oro’a e mau parau tumu, ia haapii e ia faaohipa-ana’e-hia ratou, o te ti’a ia ravehia i roto i te hoê vahi aore râ te hoê fare o tei patuhia no taua tumu ra ».²⁷

Mai te mea e, te ti’aturi nei te hoê taata e, e tae te mau purumu ato’a i te ra’i ra, e aore râ, aore hoê mea taa ê e titauhia no te faaoraraa, eita ïa oia e ite i te faufaa o te pororaa evanelia, e aore râ, o te mau oro’a e te mau fafauraa no te faaora i te feia ora e aore râ, i te feia pohe. Tera râ, eita tatou e paraparau noa no te tahuti ore, no te ora mure ore ato’a râ, e no te mau mea e faufaahia ai te haerea o te evanelia e te mau fafauraa o te evanelia. E e hinaaro te Faaora i te hoê Ekalesia no te mau tamarii ato’a a te Atua—te ora nei e tei pohe.

Te parau nei au e, te tumu hopea e faati’a ai te Fatu i Ta’na Ekalesia o te tumu hoê roa ïa—te Ekalesia, inaha, o te basileia ïa o te Atua i ni’a i te fenua nei.

I te faati’a-raa-hia te Ekalesia a Iesu Mesia i te mau Mahana Hopea nei i te mau matahiti 1830, ua parau atura te Fatu i te Peropheta Iosepha Semita, « A faateitei mai na i to outou mau upoo i ni’a e a oaoa, no te mea tei ia outou na te basileia, oia hoi, te mau taviri no te ekalesia i horo’ahia’i ».²⁸ Na roto i te mana o teie mau taviri, e paruru te mau ti’a faatere o te Ekalesia i te viivii ore o te haapiiraa tumu a te Faaora e i te huru ti’a mau o Ta’na mau oro’a faaora.²⁹ E tauturu ratou i te faaineineraa i te feia e hinaaro e farii i te reira, e hi’opo’a i te maita’i e i te ti’amâ o te feia e titau, e a rave ai i te reira.

Na roto i te mau taviri o te basileia, e nehenehe ta te mau tavini o te Fatu e ite i te parau mau e te haavare, e a parau faahou ai ma te mana rahi, « Te na reira mai ra te Fatu » ; Te vahi pe’ape’a râ, inaha, te inoino nei te tahi mau taata i te Ekalesia no te mea te hinaaro nei ratou e faataa i ta ratou iho parau mau, tera râ, to’na ti’araa mau, e haamaita’iraa faahiahia te fariiraa i te hoê « ite i te mau mea i to ratou huru mau [roa], mai te au i tei vai ê na, e mai te au hoi i te vai a muri atu »³⁰ mai te au i te hinaaro o te Fatu ia heheu mai i te reira.Te parururaa a te Ekalesia e te haaparareraa i te mau heheuraa a te Atua—te mau papa’iraa moa.

A tatara ai Daniela i te taoto a te Arii no Babulonia, o Nebukanesa, ma te faaite i te arii « i te mau mea e tupu i te mau mahana hopea ra »,³¹ na ô atura oia e, « e faatupu … te Atua o te ra’i ra i te hoê basileia, o te ore roa … e mou, e ore roa hoi e riro ia vetahi ê, e hope roa hoi taua mau basileia ra i te parari e e pau, e vai tera e a muri noa’tu ».³² Te Ekalesia nei taua basileia ra i te mau mahana hopea nei i tohuhia ra, aore i patuhia e te taata, faatupuhia râ na te Atua o te ra’i, e o te ohu nei mai te hoê ofa’i « i ootihia mai roto mai i te mou’a ra aore e rima » no te faaî i te fenua nei.³³

Ta’na fâ, o te faati’araa ïa ia Ziona no te faaineineraa i te ho’iraa mai e no te faatereraa mileniuma a Iesu Mesia. Na mua a’e i taua mahana ra, e ere ïa i te hoê basileia politita—mai ta te Faaora i parau ra, « E ere i to teie nei ao to’u basileia ».³⁴ O te pû râ o To’na mana i ni’a i te fenua nei, te faatere o Ta’na mau fafauraa mo’a, te tia’i o To’na mau hiero, te paruru e te pororaa o Ta’na parau mau, te vahi haaputuputuraa no Iseraela i haapurarahia, e « ei parururaa, e… ei vahi haapuraa no te vero, e i te riri ia niniihia’tu te reira ma te anoi ore i ni’a i te ao paato’a nei ».³⁵

E opani au na roto i te aniraa e te pure a te Peropheta :

« A ti’aoro atu i te Fatu, ia tere atu to’na ra basileia i ni’a i te fenua nei, ia ti’a i te mau taata ia farii i te reira, e ia vai faaineinehia no te mau mahana e tae mai ra, i roto i te reira e tae mai ai te Tamaiti a te taata i raro nei i roto i te ao ra, i faaahuhia i te anaanaraa o to’na ra hanahana, ia farerei mai i te basileia o te Atua o tei faatupuhia i ni’a i te fenua nei.

« No reira, ia tere atu te basileia o te Atua ra, ia ti’a i te basileia o te ao ra ia tae mai ra, ia ti’a ia oe, e te Atua, ia faahanahanahia i te ao ra mai to ni’a i te fenua nei, ia haavîhia’tu hoi to oe na mau enemi ; no te mea no oe hoi te hau, e te mana e te hanahana, e a muri e a muri noa’tu ».³⁶

Na roto i te i’oa o Iesu Mesia ra, amene.