Au Vakabauta Li?
Kevaka era dina na veika oqo, sa tu vei keda na itukutuku ni vakanuinui kei na veivuke cecere duadua e se qai bau kila ko vuravura.
Ena ika 30 ni Maji, ena dua ga na yabaki sa oti, a curu ki valenibula o Ethan Carnesecca lailai yabaki rua, mai American Fork e Utah, ena niumonia ka levu na wai ena nona yatevuso. Ena rua na siga ka tarava sa ca vakalevu sara na kena ituvaki ka gadrevi me vukataki ena elikoputa ki na nodra Valenibula na Gone ena Lalai e Salt Lake City. A vakadonui me vodo ena idabedabe e liu na tinana lomaleqa, o Michele, ka me tokani luvena tagane yani. A soli vua e dua na irogorogo kei na gusunivosa me rawa kina ni veitaratara kei ira tale eso ena elikoputa. E rawa ni rogoci ira na dauveiqaravi vakavuniwai ena nodra cakacaka tiko vua na luvena tauvimate, me vaka ni nasi, e veirauti na ka e kila me kila kina ni sa dua na leqa levu e tiko vei Ethan.
Ena gauna bibi oya, a raica o Michele ni ra sa vuka baleta na Valetabu e Draper Utah. A raikosova na buca mai macawa ka rawa ni raica talega na Valetabu na Jordan River, kei na Valetabu na Oquirrh Mountain, vakakina na Valetabu e Salt Lake tu mai vakayawa. Qai votu mai nona vakasama: “O vakabauta se sega?”
A tukuna kina vaqo me baleta na veika a sotava oya:
“Au sa vulica me baleta na veivakalougatataki ni valetabu vakakina na ‘tawamudu ni matavuvale’ ena Lalai kei na Goneyalewa. Au wasea na itukutuku ni matavuvale vei ira na tamata vinaka mai Mexico ena noqu kaulotu. Au a vauci vua na noqu itokani tawamudu me baleta na gauna oqo kei na veigauna tawamudu ena valetabu. Au dau vakavulica na lesoni me baleta na matavuvale niu veiliutaki ena Goneyalewa, kau dau wasea na italanoa me baleta na matavuvale tawamudu vei iratou na luvequ ena lotu vakamatavuvale. AU A SA KILA tu, ia, AU A VAKABAUTA li? E vaka ga na totolo ni kena basika na taro e yaloqu na yaco mai ni kena isau: e vakadeitaka ki yaloqu kei na noqu vakasama na Yalotabu na isaunitaro au a sa kila oti tu—AU A vakabauta!
“Ena gauna vata oqori au sovaraka kina na yaloqu ena masu vua na Tamaqu Vakalomalagi, ka vakavinavinakataka vua na kila kei na vakabauta e tu vei au ni tawamudu na matavuvale. Au vakavinavinaka Vua ena vuku ni Luvena, o Jisu Karisito, ka rawa kina na veika kecega oqo. Au vakavinavinaka Vua me baleta na luvequ, kau tukuna vei Tamaqu Vakalomalagi kevaka e gadreva me kauta yani na luvequ tagane lailai ki na Nona itikotiko vakalomalagi, sa DONU. E taucoko na noqu vakabauta na Tamaqu Vakalomalagi, kau kila niu na raici Ethan tale. Au vakavinavinaka vakalevu ni, ena dua na gauna dredre, sa tu vei au na kila ka KEI na vakabauta ni dina na kosipeli. Au kunea na vakacegu.”
A vica vata na macawa nona tiko e valenibula o Ethan ka qaravi tiko kina vakavuniwai mai vei ira na kenadau. Na nodra masu, lolo, kei na vakabauta na nona daulomani, cokovata kei na veiqaravi oya, a rawa kina me biuta na valenibula ka lesu ki vale me laki tiko vata kei iratou nona matavuvale. Sa bulabula vinaka tu nikua o koya.
Na gauna bibi oya vei Michele sa vakadeitaka vua ni veika sa vakavulici tu mai kina ena nona bula taucoko e sega ni vosa walega; era ka dina.
Ena so beka na gauna sa rui matau vakasivia vei keda na veivakalougatataki e soli tiko vei keda ni da lewena na Lotu i Jisu Karisito ni Yalododonu Edaidai ka da sega kina ni kila vakavinaka sara na cakamana kei na vakaturaga ni bula vakatisaipeli ena nona Lotu dina na Turaga? Eda sa dau coko beka ni da vakawalena na isolisoli cecere duadua e rawa ni soli vei keda ena bula oqo? E vakavuvulitaka na iVakabula sara ga vakataki Koya, “Kevaka ko sa muria na noqu ivunau ka vosota me yacova na ivakataotioti, ko na rawata na bula tawamudu, oqo na isolisoli uasivi duadua ni Kalou.”
Eda vakabauta ni Lotu oqo e sega walega ni dua na vanua vinaka me da lako kina ena Sigatabu ka vulica me da tamata vinaka. E sega ni dua walega na kalavo ni veimaliwai Vakarisito me da laki veitokani kina kei ira na tamata vinaka nodra ivakatagedegede ni bula savasava. E sega ni so walega na vakasama vivinaka e rawa ni ra vakavuvulitaka na itubutubu vei ira na luvedra mai vale me rawa kina ni ra tamata nuitaki, ka itovo vinaka. Na Lotu i Jisu Karisito ni Yalododonu Edaidai e tawayalani na kena levu cake mai na veika kecega oqo.
Vakasamataka mada me dua ga na miniti me baleta na veika bibi eda kaya baleta noda lotu. Eda vakabauta ni Lotu vata ga a tauyavutaka o Jisu Karisito ni tiko e vuravura sa vakalesui tale mai vua e dua na parofita a kaciva na Kalou ena noda gauna ka tu vei ira na noda iliuliu na kaukauwa kei na lewa vata ga a tu vei ira na iapositolo ni gauna makawa me ra cakacaka ena yaca ni Kalou. E vakatokai me matabete ni Kalou. Eda kaya ni, mai na lewa sa vakalesui mai, eda rawa ni ciqoma kina na cakacaka vakalotu ni veivakabulai me vaka na papitaiso ka marautaka na isolisoli veivakasavasavataki ka veivakataucokotaki ni Yalo Tabu me tiko vata kei keda ena veigauna kece. Era tu na iapositolo kei na parofita era liutaka tiko na Lotu oqo ena idola vakamatabete, ka da vakabauta ni vosa tiko na Kalou vei ira na Luvena mai vei ira na parofita oqo.
Eda vakabauta talega ni kaukauwa ni matabete oqo ena rawa kina me da veiyalayalati ka ciqoma na cakacaka vakalotu ena veivaletabu savasava me rawa kina vei keda ena dua na siga me da lesu tale ki na iserau ni Kalou ka bula vata Kaya me tawamudu. Eda kaya talega ni, mai na kaukauwa oqori, sa rawa kina ni vauci vata na matavuvale me tawamudu ena nodra curuma na veiwatini na veiyalayalati vou ka tawamudu ni vakamau ena veivale tabu oqo ka da vakabauta ni ra sa vale dina sara ni Kalou. Eda vakabauta ni rawa talega ni da ciqoma na veicakacaka vakalotu oqo sega walega ena vukuda ia ena vukudra talega na tubuda era a tiko e vuravura ka sega ni donumaki ira na madigi me ra vakaitavi ena veicakacaka vakalotu yaga ni veivakabulai oqo. Eda vakabauta ni rawa ni da qarava na veicakacaka vakalotu oqo ena vukudra na tubuda ena veisosomitaki ena veivaletabu vata oqo.
Eda vakabauta ni, mai vua e dua na parofita kei na kaukauwa ni Kalou, eda sa ciqoma kina eso tale na ikuri ni ivolanikalou, ka vakuria na ivakadinadina ni iVolatabu me tukuna ni o Jisu Karisito sa iVakabula kei vuravura.
Eda kaya ni Lotu i Jisu Karisito ni Yalododonu Edaidai e matanitu ni Kalou e vuravura ka Lotu dina duadua ga. E vakatokai Na Lotu i Jisu Karisito baleta ni tu e uluna ko Koya; oqo na Nona Lotu, ka rawa na veika kece oqo ena vuku ni Nona isoro ni veivakaduavatataki.
Eda vakabauta ni ivakatakilakila duatani oqo e sega tale ni dua na vanua se isoqosoqo e rawa ni kune kina e vuravura. E dina ni ra vinaka ka yalodina na vakabauta kei na lotu tale eso, e sega ni dua vei ira e tu kina na lewa me qarava na veicakacaka vakalotu ni veivakabulai sa vakarautaki tu ena Lotu i Jisu Karisito ni Yalododonu Edaidai.
Eda sa kila tu na veika oqo, ia eda vakabauta li? Kevaka era dina na veika oqo, sa tu vei keda na itukutuku ni vakanuinui kei na veivuke cecere duadua e se qai bau kila ko vuravura. Na kena vakabauti sa ka e tawamudu na kena bibi vei keda kei ira eda lomana.
Me vakabauti, eda na gadreva me da kauta na kosipeli mai noda vakasama ki yaloda! E rawa me ka wale tu ga ni vakasama na bulataki ni kosipeli baleta ni namaki se baleta ni dua na ivakarau eda a susugi mai kina se sa matau ga vei keda. Eso se bera beka ni vakila na veika era a vakila na tamata nei Penijamini na Tui ni oti nona vunau veirawai: “Era sa qai kaci vata mai ka kaya: Io, keimami sa vakabauta na vosa kece ko ni sa tukuna; keimami sa vakadinata talega ni sa ka vakaidina sara, raica sa cakacaka yaco na Yalo ni Turaga sa Kaukauwa Sara, ki na yaloi keimami, ka keimami sa biuta tani na gagadre ca ka via kitaka tikoga na ivalavala dodonu.”
Eda gadreva kece me da segata me veisau na noda ivakarau me kakua tale ni da gadreva me da muria na sala vakavuravura ia me da vakamarautaka ga na Kalou. Na saumaki dina e dua na iwalewale ka taura toka e dua na gauna ka okati kina na lomasoli me cakacakataki na vakabauta. E yaco mai ni da vakasaqaqara ena ivolanikalou ka sega ena Initaneti. E yaco mai ni da sa talairawarawa ki na ivakaro ni Kalou. Ena yaco mai na saumaki ni da qaravi ira era tu wavoliti keda. E yaco mai ena masu vagumatua, lako vakawasoma ki valetabu, ka qarava ena yalodina na noda itavi e solia mai na Kalou. E gadrevi me na toso tikoga kei na sasaga e veisiga.
Au dau tarogi wasoma, “Na cava na bolebole levu duadua era sotava noda itabagone nikua?” Au sauma niu vakabauta na kena tiko voli ga na veivakayarayarataki ni “vale vakaitamera” ena nodra bula. Kevaka a volai vakatabakidua me baleta na noda gauna na iVola i Momani, e dina sara ni da na sega ni rawa ni calata na kena tautauvata vei keda kece na itukutuku ena tadra nei Liai ni vunikau ni bula kei na revurevu ni nodra idusi kei na veivakalialiai na tiko mai ena vale vakaitamera.
Na ka vakamosiyalo duadua vei au na kedra ivakamacala o ira era sa curubasikata rawa na butobuto loaloa ena sala dodonu ka rabailailai, era sa tatakube toka ena ititoko kaukamea, era sa yacova nodra iyacoyaco, ka tekivu tovolea na vua ni vunikau ni bula. Oti qai tukuna na ivolanikalou ni o ira na tamata vakaisulu totoka ena vale vakaitamera “era sa qai dusi ira mai ka vakalialiai ira era sa kania na vuanikau.
“Ia ena vuku ni nodra veivakalialiai era sa madua kina oira era sa kania oti na vuanikau ; era sa muria na sala tani ka ra sa lako sese kina.”
Na tikina oqo e vakamacalataki keda eda sa taura tu na kosipeli i Jisu Karisito ena noda bula. Se eda a sucu mai kina se da sa curubasikata rawa mai na butobuto loaloa me da kunea, eda sa tovolea, ka sa “talei duadua na vuana” ka rawa ni kauta mai vei keda na bula tawamudu, “na isolisoli levu duadua ni Kalou.” Eda gadreva walega me da kanamagiti tikoga ka kua ni rogoci ira era vakalialia na noda vakabauta se o ira era taleitaka me ra vakavuna na vakatitiqa se o ira era dau vakaraica na cala vei ira na iliuliu ni Lotu kei na ivunau. Oqo na digidigi eda dau cakava e veisiga—me da digitaka na vakabauta mai na vakatitiqa. Sa vakauqeti keda o Elder M. Russell Ballard “me da toka ena boto, vakayagataka nomu iqaloqalo, ka tautauri ena ligamu ruarua.”
Ni da lewena na Lotu dina ni Turaga, eda sa tiko rawa ena boto. Sa sega ni yaga me da laki vaqara tale ena vakasama vakavuravura na dina ka na solia vei keda na vakacegu, na veivuke, kei na idusidusi ena taqomaki keda mai na veivakatovolei ni bula—sa tu rawa vei keda! Me vaka ga na nona a rawa ni vakadikeva o tinai Ethan na vakabauta sa tu makawa tu vua ka rawa kina ni tukuna ena yalodei ena dua na gauna ni leqaleqa, “Au vakabauta dina,” e rawa ni vakakina vei keda!
Au vakadinadinataka kina ni noda lewena na matanitu ni Turaga sa dua na isolisoli sega ni tukuni rawa na kena yaga. Au vakadinadinataka ni veivakalougatataki kei na vakacegu sa vakarautaka tu na Turaga vei ira era talairawarawa ka yalodina e uasivia na ka kecega e rawa ni vakasamataka na vakasama vakatamata. Au laiva vei kemuni na ivakadinadina oqo ena yaca i Jisu Karisito, emeni.