O Ira na iLiuliu Levu Duadua Sai Ira na Dauvakamumuri Levu Duadua
Ena yaco mai na gauna ena vaka me butobuto kina na salatu eliu, ia muria tikoga na iVakabula. Sa kila o Koya na sala; vakaidina, sa i Koya na sala.
Niu se qai yabaki 12, a kauti au o tamaqu ki na vakasasa manumanu ena ulunivanua. Keirau a yadra ena 3:00 ena mataka, usana na neirau ose ka curuma yani na ulunivanua veikau ena butobuto levu. Me vaka niu dau taleitaka na vakasasa vata kei tamaqu, ena gauna oya au a via tavariri vakalailai. Au a sega mada ni se lakova na ulunivanua oqo eliu, kau sega ni raica rawa na sala—kau sega ni raica dina saraga e dua tale na ka! Na ka ga au rawa ni raica oya na cina livaliva lailai a taura voli o tamaqu ka buwawa voli na kena cinava na veivuni paini mai liu. Vakacava ke a sisi ka lutu na noqu ose—e rawa li ni raica o koya na vanua e lako tiko kina? Ia a vakacegui au na vakanananu oqo: “Sa kila o tamaqu na vanua e lako tiko kina. Kevaka au muri koya, ena daumaka na veika kece.”
Ka sa daumaka na veika kece. Kena itinitini a basika mai na siga, ka keirau marautaka vata vakavinaka. Ni keirau sa tekivu lesu i vale, a dusia o tamaqu e dua na ulunivanua balavu totoka, ka vakatakilai tani mai na kena vo. “Oya o Windy Ridge,” a kaya o koya. “Oya na vanua ni vakasasa manumanu vinaka.” Vakasauri, na noqu vinakata meu na lesu tale mai ka kaba ki Windy Ridge ena dua na siga.
Ena veiyabaki ka tarava, au na rogoci tamaqu ni talanoataki Windy Ridge vakavuqa, ia keirau a sega ni lesu tale—me yacova e dua na siga, ni oti e 20 na yabaki, au a qiriti tamaqu ka kaya, “Daru lako ki Windy.” Keirau a usana tale na neirau ose ka gole yani ki na ulunivanua. Au sa kenadau tu oqo ni vodo ose ena 30 vakacaca ni noqu yabaki, ia au kurabui niu se vakila voli na tavariri vata ga au a vakila niu se yabaki 12. Ia a kila o tamaqu na sala, kau sa muri koya.
Kena itinitini keirau a yacova na ulu i Windy. Sa totoka ni da rai tu mai kina, ka sa gagadre vakalevu na yaloqu meu na lesu tale mai—sega ni baleti au ena gauna oqo ia me baleta na watiqu kei ira na luvequ. Au vinakata mera sotava na ka au a sotava.
Ena veiyabaki ka tarava, a noqu e vuqa na madigi meu liutaki ira na luvequ tagane kei na cauravou tale e so ki na ulunivanua, me vaka a liutaki au o tamaqu. Na veika e sotavi oqo a vakauqeti au meu vakasamataka na cava na veiliutaki—kei na cava na dauvakamumuri.
Jisu Karisito, na iLiuliu Levu Duadua kei na Dauvakamumuri Levu Duadua
Kevaka meu a tarogi iko, “O cei na iliuliu levu duadua ka a bula?”—na cava o na kaya? Na isau, vakaidina, sa i Jisu Karisito. Sa biuta tu o koya na ivakaraitaki vinaka duadua ni ivakarau ni veiliutaki e kilai rawa.
Ia vakacava keu a tarogi iko, “O cei na dauvakamumuri levu duadua ka a bula?”—ena sega li ni kena isau tale o Jisu Karisito? Sai koya na iliuliu levu duadua baleta ni sa dauvakamumuri levu duadua—e vakamuri Tamana vakavinaka sara, ena veika kecega.
Sa vakatavulica o vuravura ni sa dodonu mera qaqa na iliuliu; sa vakatavulica na Turaga ni sa dodonu mera yalomalumalumu. Era rawata na iliuliu vakavuravura na nodra kaukauwa kei na veivakayarayarataki mai na nodra taledi, kila matai, kei na iyau. O ira na iliuliu va-Karisito era rawata na nodra kaukauwa kei na veivakayarayarataki ena “veivakauqeti, na vosota vakadede, na yalomalua kei na yalomalumalumu, kei na loloma e sega ni veivakaisini.”
Ena mata ni Kalou, na iliuliu levu duadua sai ira na dauvakamumuri levu duadua.
Meu wasea mada e rua na ka au a sotava mai na noqu veitaratara wale tikoga oqo kei ira na cauravou ena Lotu ka sa vakatavulici au ena veiliutaki kei na dauvakamumuri voli.
Eda Sa iLiuliu Taucoko
Keirau a tiko vakaveiwatini wale tikoga oqo ena dua na soqoni ni sakaramede ka tiko tani mai na neirau tabanalevu. Ni bera ni tekivu na soqoni, a torovi au mai e dua na cauravou ka kerea ke rawa niu veivuke ni veisoliaka na sakaramede. Au kaya, “Ena ka ni marau vei au.”
Au a dabe vata kei na so tale na dikoni ka taroga e dua ka dabe tikivi au toka, “Na cava na noqu ilesilesi?” A tukuna vei au o koya meu na tekivu veisoliaka ena mua ni valenilotu ena iwasewase eloma ka ni na tiko o koya ena yasana kadua ni wasewase vataga, ka cakacakataka vata na neirau sala ki liu.
Au kaya, “Au se sega ni cakava oqo ena dua na gauna balavu.”
A sauma o koya, “Sa donu. Ko na daumaka. Au a vaka talega oqori niu se qai tekivu.”
E muri na dikoni gone duadua ena kuoramu, ka a vakatikori ena vica na macawa eliu, a vosa ena soqoni ni sakaramede. Ni cava na soqoni era a wavoliti koya na vo ni dikoni mera vakacaucautaka e dua na nodra itokani lewe ni kuoramu.
Niu veisiko voli vata kei ira ena siga oya, au kidava rawa ni ra dau veitalevi ena veimacawa na lewe taucoko ni kuoramu ni Matabete i Eroni ena tabanalevu oya kivei ira na cauravou tale e so ka sureti ira mera mai tiki ni nodra kuoramu.
Era sa iliuliu levu taucoko na cauravou oqo. Ka kilai vakamatata ni tiko e so na Matabete i Melikiseteki wananavu, itubutubu, kei na so tale ka liutaki ira ena nodra itavi. O ira na qase cake veikauwaitaki vakaoqo era sega ni raici ira vakailoa na cauravou, ia ena ituvaki e rawa ni ra yacova. Ni ra vosa vei se baleti ira na cauravou, era sega ni vakaraitaka na nodra malumalumu. Ia, era vakatakila na ivakarau ni veiliutaki levu era sa matanataka voli.
Kemuni na cauravou, sai koya oqo na sala e raici kemuni kina na Turaga. Au sureti kemuni mo ni raici kemuni ena sala oqo. Ena yaco mai na gauna o ni na kacivi kina mo ni veiliutaki. Ena so tale na gauna, o na namaki mo vakamumuri. Ia na noqu itukutuku kivei kemuni nikua oya veitalia na nomu veikacivi, o na dau iliuliu tu ga, ka dua tu ga na dauvakamumuri. Na veiliutaki e sa dua na ivakaraitaki ni bula vakatisaipeli—e sa sala ni nodra vukei na tani mera lako vei Karisito, ka ra sa dau cakava na tisaipeli dina. Kevaka o sa sasaga voli mo dua na dauvakamumuri i Karisito, sa rawa ni o vukei ira na tani mera muri Koya ka yaco mo dua na iliuiliu.
Na nomu rawa ni veiliutaki e sega ni basika mai na dua na ivakarau veilasamaki, kila matai sasagataki, se taledi ni vosa voli ena matanalevu. E basika mai na nomu veidinadinati mo muri Jisu Karisito. E basika mai ena nomu gagadre mo dau, ena vosa nei Eparama, “vakasaqara ena yalodina.” Kevaka o rawa ni cakava oya—ke o sega madaga ni vinaka sara kina, ia o sa tovolea voli—o sa dua na iliuliu.
Na Veiqaravi Vakamatabete na Veiliutaki
Ena dua tale na gauna, au a sikova voli na vale ni dua na dawai kei na tolu na luvena e Niu Siladi. Sa yabaki 18 na luvena tagane qase duadua ka a ciqoma na Matabete i Melikiseteki ena Sigatabu ga sa oti. Au a tarogi koya ke a sa vakayagataka mada na matabete oqo. Kaya o koya, “Au sega ni kila na cava na kena ibalebale oqori.”
Au tukuna vua ni sa tiko vua oqo na dodonu ni lewa me solia kina na veivakalougatataki vakamatabete ni veivakacegui se veivakabulai. Au raici tinana, ka a sega ni tu e yasana e dua ka tauri Matabete i Melikiseteki ena vuqa na yabaki. “Au kila ni na ka totoka,” au a kaya, “kevaka o na solia vei nomu Na e dua na veivakalougatataki.”
A sauma o koya, “Au sega ni kila na kena icakacaka.”
Au vakamacalataka ni rawa ni biuta na ligana ki na ului tinana, tukuna na yacana, tukuna ni sa solia tiko na veivakalougatataki kivua ena dodonu ni lewa ni Matabete i Melikiseteki, kaya na veika e vakauqeta kina na lomana kei na nona vakasama na Yalotabu, ka tinia ena yaca i Jisu Karisito.
Na siga ka tarava, au a ciqoma e dua na imeli mai vua. E tukuna vakatikina: “Ena bogi nikua au a vakalougatataka na tinaqu. … Au a tavariri ka veilecayaki saraga, au mani tomana na noqu masu meu vakadeitaka ni sa tiko vei au na Yalotabu, baleta niu sega ni rawa ni veivakalougatataki kevaka e sega. Niu sa tekivu, au a guilecavi au vakataucoko kei na noqu malumalumu. … Au [sega ni namaka] na kaukauwa vakayalo vakaitamera au a vakila. … Ni oti a tarai au vakaukauwa saraga na yalo ni loloma au sega kina ni taqea rawa na noqu luluvu, au a mani mokoti tinaqu ka tagi vaka na gonelailai. … Niu vola tiko madaga oqo, [au vakila] na Yalotabu [vakalevu kau] sa sega ni via valavala ca tale. … Au taleitaka na kosipeli oqo.”
E sega li ni veivakauqeti me raici na nona rawa ni rawata na veika lelevu e dua na cauravou wale ga ena veiqaravi ni matabete, ke veilecayaki tu mada ga? Au qai mai kila tiko ni a ciqoma na italatala qase gone oqo na kaci vakaulotu ka na curuma na vale ni veituberi vakadaukaulotu ena vula mai oqo. Au vakabauta ni na vagolea o koya e vuqa na yalo vei Karisito baleta ni sa vulica na iwalewale ni nona muri Karisito ena nona veiqaravi vakamatabete—vakatekivu ena nona itikotiko, ka sa veivakayarayarataki vakalevu kina na nona ivakaraitaki kivua na tacina yabaki 14.
Kemuni na taciqu, ke da vakila se sega, era sa raici keda cake tiko na tamata—lewe ni matavuvale, veitokani, na vulagi talega. Ni da tauri matabete, e sega ni rauta walega meda lako vei Karisito; sa noda itavi oqo meda “sureta na tamata taucoko mera lako vei Karisito.” Eda sega ni rawa ni yalovakacegu ni ciqoma voli vakataki keda na veivakalougatataki vakayalo; sa dodonu meda liutaki ira na tamata eda lomana ki na veivakalougatataki vataga oya—ka vaka na tisaipeli i Jisu Karisito, meda lomana na tamata kecega. Na ivakasala ni iVakabula kivei Pita sa noda ivakasala talega: “Ia ni ko sa saumaki tale, mo vakataudeitaki ira na wekamu.”
Muria na Turaga ni Kalili
Ena yaco mai na gauna ena vaka me butobuto kina na salatu eliu, ia muria tikoga na iVakabula. Sa kila o Koya na sala; vakaidina, sa i Koya na sala. Na levu ni nomu gu mo lako vei Karisito, na levu cake ni nomu gagadre ena nodra vukei na tani mera sotava na veika o sa sotava. Dua tale na vosa ni vakanananu oqo na loloma cecere, “sa solia [na Tamada] vei ira era sa muria na Luvena, ko Jisu Karisito ena yalodina.” O na qai raica ena nomu muri Karisito voli vakavinaka sara, ni o sa liutaki ira tale tikoga na tani kivei Koya, ena vosa nei Peresitedi Thomas S. Monson, “Ni da muria na Turaga ni Kalili oya—na Turaga o Jisu Karisito—ena vakilai vinaka sara na noda veivakayarayarataki ena vanua cava ga eda tiko kina, se cava ga na noda veikacivi.”
Au vakadinadinataka ni oqo na Lotu dina i Karisito. Eda sa liutaki mai vua e dua na parofita ni Kalou, o Peresitedi Monson—e dua na iliuliu levu ka sa dua talega na dauvakamumuri dina ni iVakabula. Ena yaca i Jisu Karisito, emeni.