Reki kei na Bulabula Vakayalo

Mai vei Peresitedi Russell M. Nelson

Peresitedi ni Kuoramu ni iApositolo Le Tinikarua

Ni vakanamata na noda bula vei Jisu Karisito kei na Nona kosipeli, e rawa ni da reki veitalia na cava e yaco—se sega ni yaco—ena noda bula.

Kemuni na taciqu kei na ganequ, nikua au vinakata me da veivosakitaka e dua na ivakavuvuli ka bibi sara ena noda bulabula vakayalo. E dua na ivakavuvuli ena qai yaga ga ena noda bula ni sa levu cake na leqa kei na veika rerevaki e wavoliti keda.

Oqo na iotioti ni gauna, sa sega kina ni dodonu me kurabuitaki ni sa vakayacori na veika a parofisaitaki. E dua na ilala levu ni parofita, oka kina o Aisea, Paula, Nifai kei Momani era sa raica rawa tu mai ni na yaco mai na veigauna ni vakararawataki, ni na tiko yavavala na vuravura taucoko, ena yaco na tamata me “ra dau lomani ira walega, … era na caca veiwekani, … era na lomana vakalevu na marau a ra na lomani koya na Kalou vakalailai,” ka na yaco e levu me ra italai nei Setani ka ra tokona na cakacaka ni vunica. Io, e daru dau “veivala … kei ira sa veitaliataka na butobuto ni vuravura oqo, [vakakina] o ira na ivavakoso yaloca ena veiyasana vakalomalagi.”

Ni sa levu cake tikoga na veisaqasaqa ena veimatanitu, ni ra veivakalolomataki na batikadi datuvu vei ira e sega na nodra cala, ni sa matau cake tikoga na cakacaka vakailoa mai na bisinisi ki na matanitu, na cava e rawa ni vukei keda? Na cava e rawa ni vukei keda yadua ena noda veidredre kei na bolebole kaukauwa ni bula ena veisiga e muri oqo?

E vakavuvulitaka na parofita o Liai e dua na ivakavuvuli ni bulabula tiko vakayalo. Matai, vakasamataka na ituvaki a tu kina o koya: A vakacacani ena nona vunautaka na dina mai Jerusalemi ka vakaroti koya na Turaga me laiva tu na veika e nona ka dro kei na nona matavuvale ki na lekutu. A vakaitikotiko ena dua na valelaca ka bula tiko ena kakana cava ga e kune ena ilakolako ki na dua na vanua tawakilai, ka raica toka na nodrau saqata tiko na luvena tagane e rua, o Leimani kei Lemueli na ivakavuvuli ni Turaga ka vakararawataki rau na tacidrau gone o Nifai kei Semi.

E matata, ni a sotava o Liai na veisaqasaqa, na vakanuinui ca, mosiniyalo, rarawa kei na yaluma. Ia a tukuna ena doudou ka sega ni vakasuka e dua na ivakavuvuli me vaka e vakatakila na Turaga: “Sa sucu na tamata me rawata na marau.” Vakasamataka mada! Mai na vosa kece a rawa ni vakayagataka me vakamacalataka kina na ituvaki kei na inaki ni noda bula ena vuravura oqo, a digitaka o koya na vosa reki!

E vakasinaiti tu na bula ena goletani kei na yacokoso, na veivakatovolei kei na bolebole ena kena veimataqali kecega. O keda yadua sa yaco na gauna a voleka sara kina ni rawai keda na rarawa, yaluma, kei na druka. Ia eda lako mai ke me da mai marau?

Io! Na kena isau e dua na io rogolevu! Ia e rawa vakacava oqori? Kei na cava me da cakava me rawa ni da kaya kina ni noda na reki sa vakarautaka tu na Tamada Vakalomalagi me noda?

A cavuta o Eliza R. Snow, na ikarua ni Peresitedi Raraba ni iSoqosoqo ni Veivukei, e dua na kena isau taleitaki. Ena vuku ni ivakaro ni veivakarusai mai Missouri, ka a soli mai ena vulaililiwa vakarerevaki ni 1838, era sa vakasaurarataki kina o koya kei na so tale na Yalododonu me ra dro tani mai na yasana oya ena vulaibatabata sara ga o ya. Ena dua na bogi eratou a moce na matavuvale nei Eliza’ ena dua na vale tolonikau era a vakayagataka na ise ni Yalododonu. E levu na ibono ena maliwa ni tolonikau era sa ceuti tani mai ka visa me buka mai vei ira era a liu mai, ka sa tu kina na qara ena maliwa ni tolonikau ka rawa ni curu kina e dua na pusi. Sa dua na ka na batabata, ka cevata kaukauwa tu na kedra kakana.

Ena bogi oya rauta ni 80 na tamata era a veiciqiciqi ena loma ni vale lailai oya, e 20 ga na fiti vakarivirivi (6.1 na mita vakarivirivi). E levu ga era a dabe toka ga se tucake tu ena bogi taucoko ka tovolea me ra katakata tiko. E tautuba, e dua na ilala turaga era a dabe wavolita e dua na matadravu buka warumisa, ka so era lagasere ni lotu, eso tale era tavu pateta cevata. A vola vaka oqo o Eliza: “E sega ni dua na vosakudrukudru e bau rogo—era mamarau kece, ka rawa ni da tukuna mai na kedra ituvaki, era na kaya beka o ira era sega ni kilai keimami ni keimami ilawalawa vaqara lasa ka sega ni tamata sa vakasevi mai vua na kovana.”

Na ripote nei Eliza me baleta na yakavi tarasui na kena batabata oya e vakurabui na yalonanamaki e kunei kina. A kaya kina o koya: “Oya e dua dina na bogi ni marau. E sega tale ni dua o ira ga na yalododonu e rawa ni ra marau tiko ena ituvaki ni bula kecega.”

Sai koya sara ga oya! O keda na yalododonu e rawa ni da marau tiko ena ituvaki ni bula kecega. E rawa ni da vakila na reki ni da sotava tiko e dua na siga ca, macawa ca, se dua sara mada ga na yabaki ca!

Kemuni na taciqu kei na ganequ, na reki eda vakila e vakatau vakalailai sara ena ituvaki ni noda dui bula ia sa baleta vakatabakidua na veika e vakanamata kina na noda bula.

Ni vakanamata na noda bula ena nona ituvatuva ni veivakabulai na Kalou, ka a vakavulica vei keda o Peresitedi Thomas S. Monson, kei Jisu Karisito kei na Nona kosipeli, e rawa ni da reki veitalia na cava e yaco—se sega ni yaco—ena noda bula. Na reki e yaco mai Vua vakakina ena Vukuna. O Koya na ivurevure ni reki kecega. Eda dau vakila ena gauna ni Siganisucu ni da lagata, “Me da marau, sa tadu mai.” Ka rawa ni da vakila ena yabaki taucoko. Vei keda na Yalododonu Edaidai, o Jisu Karisito na reki!

Oqori na vuna era biuta kina nodra itikotiko na daukaulotu me ra vunautaka na Nona kosipeli. Na nodra inaki e sega me vakalevutaki na iwiliwili ni lewe ni Lotu. O ira na noda daukaulotu era veivakavulici ka veipapitaisotaki me ra kauta mai na reki vei ira na tamata e vuravura!

Me vaka ga ni solia na iVakabula na vakacegu e “uasivia na ka kecega e kilai rawa,” Sa solia talega vakakina ko Koya na reki ka sega ni vakasamataka rawa na tamata se na kilaka vakayago na kena vakaitamera, titobu, kei na kena rabailevu. Me kena ivakaraitaki, e sega ni rawa ni da reki ni tauva tiko na luveda e dua na tauvimate sega ni valuti rawa, se ni sa sega nomu cakacaka, se ni sega ni dina vei iko na watimu. Ia oqori sara ga na reki e solia na iVakabula. E tudei na Nona reki, ka vakadeitaka vei keda ni “sa lekaleka walega na gauna ni noda rarawa” ka na vakalougatataki meda rawa-ka kina.

Na sala cava eda na kaya rawa kina ni noda na reki oqori? E rawa ni da tekivu ena noda “vakaraici Jisu o koya sa vakatekivuna ena sauma talega na noda vakabauta” “ena [noda] nanuma kecega.” E rawa ni da vakavinavinaka ena Vukuna ena noda masu kei na noda rokova na veiyalayalati eda sa cakava vata Kaya kei na Tamada Vakalomalagi. Ni sa yaco me ka dina cake tikoga vei keda na noda iVakabula ka ni da kerea me soli mai na Nona reki, ena levu cake na noda reki.

E ka kaukauwa na reki, ni da vakanamata tiko ena reki ena kauta mai na kaukauwa ni Kalou ki na noda bula. Me vaka sa ulumatua ni noda ivakaraitaki o Jisu Karisito, “o koya a vosota na kauveilatai ena vuku ni reki a tu e matana.” Vakasamataka mada oya! Me rawa Vua me vosota na ka dredre duadua se qai bau vosoti rawa e vuravura, a vakanamata na noda iVakabula ena reki!

Ia na cava na reki a tu e Matana? E ka dina e okati kina na reki ni veisavai, veivakabulai, kei na noda vaqaqacotaki; na reki ni kena saumi na nodra ivalavala ca o ira kece era na veivutuni; na reki ni kena rawati vei kedaru me daru lesu tale ki vale—ena savasava kei na kilikili—me da laki bula vata kei rau na noda iTubutubu Vakalomalagi kei na matavuvale.

Kevaka eda vakanamata ena reki ka na yaco mai vei keda, se vei ira na noda daulomani, na cava e rawa ni da vosota ka vaka me dredre tu, mosimosi, vakarerevaki, sega ni dodonu, se sega ga ni rawa?

E dua na tama ka sotava tiko e dua na ituvaki malumalumu vakayalo a vakanamata ena reki ni sa yaco me savasava ka tudonu vua na Turaga—na reki ni sa vagalalataki mai na kilaiyalona kei na madua—kei na reki ena vakacegu ni vakasama. Na vakanamata oqori e solia vua na yaloqaqa me vakatusa vei watina kei na nona bisopi na nona leqa ena iyaloyalo vakasisila kei na sega ni dina vei watina a salavata mai. Ena gauna oqo sa cakava tiko na veika kece a vakasalataki koya kina nona bisopi me cakava ka tovolea tiko mai vuniyalona me rawata tale na veivakabauti nei watina.

A vakanamata e dua na goneyalewa ena reki e kauta mai na savasava ena bula vakaveiyacovi me vukei koya ena nodra veivakalialiai na itokani ena nona lako tani mai na dua na itutunibula veivakacudrui, ka rerevaki vakayalo.

E dua na turaga ka dau ivalavala kaukauwa vua na watina ka dau nona itovo na vosa karakara vei ira na luvena a vakanamata ki na reki ni bulakilikili kaya na nona veitokani tudei ni Yalo Tabu. Na vakanamata oqori a vakayarayarataki koya me biuta tani na tamata vakayago, a dau soli koya kina vakalevu, ka vakayacora na veisau e gadrevi.

E dua na noqu itokani talei a kaya vei au na veivakatovolei levu a yaco vua ena tini na yabaki sa oti. A kaya, “au sa vulica meu rekitaka na vakararawataki. A yali yani na noqu rarawa niu reki vei Karisito.”

Na cava e rawa ni daru vosota ni daru vakanamata ki na reki sa “viritu e matadaru?” Na veivutuni cava sa na qai rawa ena gauna oya? Na malumalumu cava ena yaco me kaukauwa? Na veicudruvi cava ena veivakalougatataki? Na yalorarawa cava, na leqa vakasauri sara mada ga, ena yaco me veivakalougatataki vei keda? Kei na veiqaravi dredre cava beka vua na Turaga ena rawa ni da solia?

Ni da vakanamata ena gugumatua vua na iVakabula ka muria na nona ivakarau ena vakanamata kina reki, eda na gadreva me da levea na veika e rawa ni vakataotaka noda reki. Nanumi Korio, na meca i Karisito? Kacivaka tiko na lasu me baleta na iVakabula, a lako o Korio mai na dua na vanua ki na dua tale me yacova ni a kau yani ki vua e dua na bete levu ka a tarogi koya: “A cava ko sa vakatanitaka kina na ivakavuvuli ni Turaga? A cava ko sa vakacacana kina nodra vakanuinui na tamata oqo, ka kaya ni sega ni dua na Karisito?”

Na ka kecega e saqati Karisito se na Nona ivakavuvuli ena vakataotaka na noda reki. Oqori e oka kina na ivakavuvuli vakatamata ka sinai tu ena initaneti kei na buloqu, ka cakava sara tikoga na veika a dau cakava o Korio.

Kevaka eda raici vuravura ka muria na kena iwalewale ni bulamarau, eda na sega vakadua ni kila na reki. O ira na sega ni dau buladodonu era na sotava e vuqa na yaloluluvu kei na veika marautaki, ia era na sega vakadua ni vakila na reki! Na reki e isolisoli vei ira na yalodina. Oqori e dua na isolisoli ka yaco mai ena noda nakita me da bulataka e dua na buladodonu, me vaka e vakavulica o Jisu Karisito.

E vakavulica vei keda o Koya na ivakarau me rawata kina na reki. Ni da digitaki Tamada Vakalomalagi me noda Kalou kei na gauna eda rawa ni vakila kina na Veisorovaki ni iVakabula ni cakacaka ena noda bula, eda na vakasinaiti ena reki. Ena veigauna kece eda mareqeta kina na watida ka tuberi ira na luveda, na veigauna kece eda vosota kina e dua se kerea na nona veivosoti, e rawa ni da vakila na reki.

Ena veisiga kece e daru digitaka kina me daru bulataka na lawa vakasilesitieli, ena veisiga kece daru maroroya kina nodaru veiyalayalati ka vukei ira tale eso me ra vakayacora vakakina, ena noda na reki.

Rogoca na nona vosa oqo nei Daunisame: “Niu a raici Jiova ni sa tu e mataqu ena veisiga kecega: kau na sega ni yavalati ni sa tu ko koya ena ligaqu imatau. … Sa ka uasivi vakaidina na marau sa tu e matamuni.” Ni sa vatonaki ki yaloda na ivakavuvuli oqo, sa rawa ni yaco na veisiga yadua me siga ni reki kei na marau. Au vakadinadinataka ena yaca tabu i Jisu Karisito, emeni.