Salamo: O Se Filifiliga Fiafia
E le gata ua mafai ona salamo ae ua faafiafiaina foi ona o lo tatou Faaola.
Ou uso e ma tuafafine, ina ua 12 ou tausaga, sa nonofo lo matou aiga i Göteborg, o se aai i le talafatai i le itu i saute o Suetena. Mo le silafia, o le nuu lea e susu mai ai la tatou paaga pele o Elder Per G. Malm, le na maliu i lenei taumafanafana. Ua tatou misia o ia. Tatou te faafetai mo lona malualii ma lana auaunaga mamalu faapea ai ma le faataitaiga a lona aiga peleina. Ma e tatou te tatalo ma le mautinoa mo faamanuiaga silisili a le Atua mo i latou.
I le lima sefulu tausaga talu ai, sa matou auai i le lotu i se fale tele na toefaafou. I se tasi Aso Sa, o la’u uo o Steffan, le isi tiakono e toatasi i le paranesi, sa faafeiloaia au i le lotu ma le fiafia. Sa ma o atu i le faaopopoga o le falesa na sosoo atu, ma ia toso maia i fafo mai lana taga se mea faapapa tele ma se afitusi. I se faatinoga o le lototele faatamaitiiti, sa ou ave ai le mea faapapa ma tutu le vavae umi faaefuefu. Sa ou faamoemoe e tapē le vavae ae lei pa le meafaapapa. Ae ina ua mu o’u tamatamai lima a o taumafai ai e tapē, sa pa’u ese le mea faapapa. Sa ma tilotilo atu ma Steffan ma le fefefe a o faaauau pea ona mu le vavae.
Sa pasae le mea faapapa, ma lilofia uma le faaopoopoga o le falesa ma le falesa i le asu. Sa ma faananati ona faamama toega o le mea faapapa na taape solo ma talai faamalama e taumafai ai e faaalu i fafo le manogi, ma le faamoemoe e leai se tasi o le a iloaina. O le mea e lelei ai, e leai se tasi na manu’a ma se mea na faaleagaina.
Ina ua o mai tagata i le sauniga, sa latou matauina le malosi o le manogi. Sa faigata ona le iloaina. Sa faalavelave le manogi i le natura paia o le sauniga. Ona sa toalaiti lava le au Perisitua Arona—ma i le mea e mafai ona faamatalaina o mafaufauga le fesootai (ona o le mea faapapa ma le faamanatuga)—sa ou tufaina le faamanatuga, ae sa ou lagona le le agavaa e ai. Ina ua ofo mai le fata faamanatuga ia te au, ou te lei tagofia le areto po o le vai. Sa le lelei ou lagona. Sa ou maasiasi ma na ou iloa o le mea sa ou faia na le fiafia i ai le Atua.
Ina ua tuua le lotu, sa fai mai le peresitene o le paranesi, o Frank Lindberg, o se toeaina matua tulagaese ma lona lauao sinasina, ou te alu atu i lona ofisa. Ina ua ou nofo i lalo, sa ia tilotilo mai ia te au ma le agalelei ma fai mai na ia matauina ou te lei ai i le faamanatuga. Sa ia fesili mai pe aisea. Sa ou masalo na ia iloa le mafuaaga. Sa ou mautinoa na iloa e tagata uma le mea na ou faia. Ina ua ou ta’u atu ia te ia, sa ia fesili mai po o le a so’u lagona. I lo’u tagi, sa ou ta’u atu ia te ia ma le gatete sa ou salamo ma ua ou iloa sa ou faatoatamaiina le Atua.
Sa susue e Peresitene Lindberg se kopi faaaoga soo o le Mataupu Faavae ma Feagaiga ma fai mai ia te au e faitau ni fuaiupu na vaseina. Sa ou faitauina leotele le fuaiupu lenei:
“Faauta, o ia o lē ua salamo i ana agasala, o ia lava lea ua faamagaloina, ma o Aʼu, o le Alii, e lē toe manatuaina lava i latou.
“O le mea lenei e mafai ai ona outou iloa pe afai ua salamo se tagata i ana agasala—faauta, e taʼutaʼu atu e ia i latou ma lafoai i ai.”
O le a le galo lava ia te au le ataata agaalofa o Peresitene Lindberg ina ua ou tepa ae i luga ina ua uma ona faitauina. Faatasi ai ma ni nai lagona ootia, sa ia ta’u mai ia te au ua ia lagona ua toe lelei mo au le toe ai i le faamanatuga. Ina ua ou tuua lona ofisa, sa ou lagonaina se olioli le mafaamatalaina.
O lea olioli o se tasi o taunuuga masani o le salamo. O le upu salamo o lona uiga “ia iloa mulimuli ane” ma faia se “suiga.” I le FaaSuetena, o le upu o le omvänd, o lona uiga “ia toe liliu mai.” O le tusitala Kerisiano o C. S. Lewis sa tusia e uiga i le manaoga ma le metotia mo se suiga. Sa ia tusia o le salamo e aofia ai le “toe faafoi atu i luga o le ala sa’o. O se aofaiga sese e mafai ona toe faasa’o,” sa ia fai mai ai, “ae ua na o lou toe foi lava i tua ia maua le measese ma toe amata mai i lena vaega, ae le tau na ona alu pea.” O le suia o a tatou amioga ma le toe foi atu i le “ala sa’o” o se vaega o le salamo, ae ua na o se vaega. O le salamo moni e aofia ai foi se liliu atu o o tatou loto ma le naunautaiga i le Atua atoa ma le lafoaia o agasala. E pei ona faamalamalama mai i le Esekielu, o le salamo o le “liliu ese [mai] … agasala, … fai le amio tatau ma le amiotonu; … toe avane le mea na ia fao, … [ma] savali i sauniga e ola ai, ma ua le fai le amio leaga.”
Ae o se faamatalaga le atoatoa lenei. E le o faailoa tonu ai le mana e mafai ai le salamo, le taulaga togiola a lo tatou Faaola. O le salamo moni e tatau ona aofia ai le faatuatua i le Alii o Iesu Keriso, le faatuatua lea e mafai ona suia ai tatou, le faatuatua e mafai ona Ia faamagalo ai i tatou, ma le faatuatua o le a Ia fesoasoani mai ia i tatou ia aloese mai measese. O lenei ituaiga o faatuatua e aoga ai Lana Togiola i o tatou olaga. A tatou “iloa mulimuli ane” ma “toe liliu” faatasi ma le fesoasoaniga a le Faaola, o le a mafai ona tatou lagonaina le faamoemoe i Ana folafolaga ma le olioli o le faamagaloga. A aunoa ma le Togiola, o le a mou atu le faamoemoe ma le olioli masani, ma avea ai le salamo o se amioga pagatia e na ona fetuutuunai. Ae e ala i le faatinoina o le faatuatua ia te Ia, tatou te liua ai i Lona tomai ma le naunautaiga e faamagalo le agasala.
Sa faamautu mai e Peresitene Boyd K. Packer ia folafolaga faamoemoeina o le salamo ia Aperila 2015 i lana konafesi aoao mulimuli. Sa ia faamatalaina le mana o le Togiola a le Faaola e faamalolo ai mea ou te manatu o le aotelega o aafiaga o le olaga atoa e uiga i le poto na maua i le afa seneturi o auaunaga faaaposetolo. Na saunoa Peresitene Packer: “E le tuua e le Togiola ni asaga, po o ni faailoga. O le mea na te faaleleia e mausali. E na ona faamalolo, ma o le mea na te faamalolo o le a tumau lona manuia.”
Sa ia faaauau faapea:
“O le Togiola, lea e mafai ai ona toe faafoi atu i tatou taitoatasi, e leai ni mailaila. O lona uiga e tusa lava po o a mea sa tatou faia, pe o fea foi sa tatou i ai, pe na faapefea ona tupu se mea, afai lava tatou te salamo moni, ua folafola mai [e le Faaola] o le a Ia totogiina. Ma ina ua Ia totogiina, na taulimaina ai. …
“ … O le Togiola … e mafai ona fufulu mamaina soo se pisia e tusa lava po o le a le faigata po o le a le umi po o le a foi le tele o taimi na fai soo ai.”
O le malosi o le Togiola a le Faaola e le mafuatia i le lautele ma le loloto, mo oe ma au. Ae o le a le faamalosia i luga o i tatou. E pei ona aoao mai le perofeta o Liae, a “lava le aoaoina” o i tatou e “iloa ai le lelei mai le leaga,” ua tatou “saoloto e filifili le saolotoga ma le ola e faavavau, e ala i le Puluvaga sili o tagata uma, pe filifili le faatagataotauaina ma le oti.” I nisi upu, o le salamo o se filifiliga.
E mafai—ma o nisi taimi—tatou te faia ai ni filifiliga e ese ai. O ia filifiliga atonu e le foliga mai e sese, ae latou te taofia i tatou mai le faanoanoa moni ma o lea e taofia ai la tatou sailiga o le salamo moni. Mo se faataitaiga, e mafai ona tatou filifili e tuuā’ia isi. I le avea ai ma se tama 12 tausaga le matua i Göteborg, sa mafai lava ona ou tuua’ia Steffan. O ia lea na aumaia muamua le mea faapapa tele ma le afitusi i le lotu. Ae o le tuua’ia o isi, e tusa lava pe faamaonia, e faatagaina ai i tatou e fai se alofaga i a tatou amioga. O le faia o lena mea, tatou te fesiitaia ai tiutetauave mo a tatou amioga i isi. A fesiitai le tiutetauve, ua tatou faaitiitia uma le manaoga ma lo tatou tomai e faatino ai. Ua tatou liliua i tatou lava i tagata ua aafia ma le pagatia nai lo tagata e faaaoga le faitalia mo a latou lava amioga.
O le isi filifiliga e faalavelave i le salamo o le manatu e le ogaoga a tatou measese. I le faalavelave i le mea faapapa i Göteborg, sa leai se tasi ma manu’a, leai se mea na faaleagaina tumau, ma sa faia lava le sauniga. Sa ono faigofie lava le faapea sa leai se mafuaaga e salamo ai fua. Ae o le manatu e le ogaoga a tatou measese, e tusa lava pe leai ni taunuuga vave na iloa, e aveesea ai le uunaiga ia suia. O lenei manatu e taofia ai i tatou mai le vaai atu i a tatou measese ma agasala i ni taunuuga e faavavau.
Ae o le isi auala o le mafaufau lea o a tatou agasala e le afaina ona e alofa le Atua ia i tatou e tusa lava po o a a tatou mea e fai. E faaosoosoina le talitonu i mea na aoao e le taufaasese lea o Neoa i le nuu o Saraemila: “O le a faaolaina tagata uma i le aso mulimuli; ma e le tatau ona latou fefefe pe tetete, … ma, i le iuga, o le a maua e tagata uma le ola e faavavau.” Ae o lenei manatu taufaa’ole’ole e sese. E alofa le Atua ia i tatou. Peitai, o mea tatou te faia e afaina lea ia te Ia, ma ia i tatou foi. Ua Ia tuuina mai ni faatonuga manino e uiga i le auala e tatau ona tatou amio ai. Ua tatou taua nei mea o poloaiga. O Lana faamaoniga ma lo tatou ola e faavavau e faalagolago lea i a tatou amioga, e aofia ai lo tatou naunautaiga e saili ma le faamaulalo i le salamo moni.
Ma le isi, tatou te lafoaia le salamo moni pe a tatou filifili e tuuese le Atua mai i Ana poloaiga. I tulaga uma, ana faapea e le paia le faamanatuga, semanu la e le afaina le manogi o le mea faapapa lea sa faalavelave i lena sauniga faamanatuga i Göteborg. E tatau ona tatou faaeteete i le le manatu mamafa i amioga agasala e ala i le manatu mama pe le amanaia foi o le tusiaina e le Atua o Ana poloaiga. O le salamo moni e manaomia ai le faamamaluina o le paia o le Faaola ma le moni o Lana galuega i aso e gata ai.
Nai lo le faia o alofaga, ia tatou filifili e salamo. E ala i le salamo, e mafai ona tatou iloaina ai i tatou lava, e pei o le atalii faamaumau oa i le faataoto, ma mafaufau i le taua e faavavau o a tatou amioga. A tatou malamalama i le auala e mafai ona aafia ai lo tatou fiafia e faavavau ona o a tatou agasala, e le gata tatou te faanoanoa moni ae tatou te tauivi foi ia lelei atili. A fetaiai ma faaosoosoga, e ao ona tatou fesili ifo ia i tatou lava, i upu a William Shakespeare:
Afai ua tauaso le tatou vaai i le faavavau ona o se meataalo, e mafai ona tatou filifili e salamo. Ona o le Togiola a Iesu Keriso, ua maua ai se isi o tatou avanoa. I se talafaatusa, e mafai ona tatou faafesuiaia le meataalo lea na tatou faatauina ma le faavalevalea i le taimi muamua, ae toe maua mai le faamoemoe o le faavavau. E pei ona faamalamalama mai e le Faaola, “Aua, faauta, na mafatia le Alii lo oulua Togiola i le oti i la le tino; o le mea lea na mafatia o ia i le tiga o tagata uma, ina ia mafai ona salamo tagata uma ma o mai ia te ia.”
E mafai ona faamagalo mai Iesu Keriso ona o Ia na totogia le tau mo a tatou agasala.
E filifili lo tatou Togiola e faamagalo mai ona o Lona agaalofa, alofa mutimutivale, ma le alofa lemafaatusalia.
E finagalo lo tatou Faaola e faamagalo mai ona o se tasi lea o Ona uiga paia.
Ma, i le avea ai o Ia ma se Leoleo Mamoe Lelei, e fiafia o Ia pe a tatou filifili e salamo.
E tusa foi pe tatou te lagonaina le tiga e tusa i le Atua mo a tatou amioga, ae a tatou filifili e salamo, e vave lava ona tatou valaauliaina le Faaola i o tatou olaga. E pei ona aoao mai Amoleka, “O mai ma aua le toe faamaaaina o outou loto; aua faauta, o le taimi ma le aso lenei o lo outou olataga; ma o lea, afai tou te salamo ma le faamaaaina o outou loto, o le taimi nei lava o le a faataunuu ai le fuafuaga tele o le togiolaina ia te outou.” E mafai ona tatou lagonaina le tiga e tusa i le Atua mo a tatou amioga ae i le taimi lava e tasi e lagonaina le olioli o le mauaina o le fesoasoani a le Faaola.
O le mea moni o le mafai ai ona tatou salamo o le tala fou lea o le talalelei! O le tausalaga e mafai ona “tafi ese.” E mafai ona faatumulia i tatou i le olioli, maua se faamagaloga o a tatou agasala, ma maua le “filemu o le mafaufau.” E mafai ona faasaolotoina i tatou mai lagona o le faanoanoa ma le nofopologa i le agasala. E mafai ona faatumulia i tatou i le malamalama ofoofogia o le Atua ma “le toe tiga [ai].” E le gata ua mafai ona salamo ae ua faafiafiaina foi ona o lo tatou Faaola. Ou te manatua pea lagona na ou lagonaina i le ofisa o le peresitene o le paranesi ina ua mavae le pa o le mea faapapa. Sa ou iloaina ua faamagaloina au. Sa mou ese atu lagona o le tausalaina, sa aveesea ou lagona atuatuvale, ma sa toafilemu lo’u loto.
Uso e ma tuafafine, a o tatou faaiuina ai lenei konafesi, ou te valaaulia outou ia lagona atili le olioli i lou olaga: olioli i le iloaina o le Togiola a Iesu Keriso e moni; olioli i le gafatia o le Faaola, naunautaiga, ma Lona finagalo ia faamagalo mai; ma le olioli e filifili le salamo. Ia tatou mulimuli i le faatonuga a le Faaola ia “utu vai ma le olioli i vaipuna o le faaolataga.” Ia tatou filifili e salamo, ia lafoai a tatou agasala, ia toe liliu o tatou loto ma manatu ia mulimuli ai i lo tatou Faaola. Ou te molimau atu i le moni o Lona soifua. O au o se molimau ma se tagata e maua sooa Lona agaalofa, alofa mutimutivale, ma le alofa le mafaatusaliaina. Ou te tatalo ina ia avea faamanuiaga laveai o Lana Togiola ma o outou faamanuiaga i le taimi nei—ma toe maua ai foi pea lava pea lava pea i o outou olaga atoa, e pei ona i ai foi i lo’u olaga. I le suafa o Iesu Keriso, amene.