Malosi Patino e ala i le Togiola a Iesu Keriso

Saunia e Elder Richard G. Scott

O Le Korama a Aposetolo e Toasefululua

E ala i le Togiola a Iesu Keriso, e mafai ai e i tatou taitoatasi ona mama ma aveesea ai le avega o lo tatou fouvale.

Talu ai nei, sa faamanuiaina au e feiloai ma se vaega o autalavou sili ona faagaeetiaina mai le setete o Idaho. Sa fesili mai se tasi o tamaitai talavou amio mama pe o le a sou lagona o le a le mea aupito sili ona taua e tatau ona latou faia i o latou olaga i le taimi nei. Sa ou fautua atu i ai ia latou aoao e iloa le mana o le Togiola a Iesu Keriso i o latou olaga. O le aso, o le a ou faamalamalama atu ai se vaaiga se tasi o lena mana, le malosi patino lea e mafai ona tatou mauaina e ala i le Togiola a Iesu Keriso.

I le Tusi a Mamona tatou te faitau ai ia Amona ma ona uso a o latou aoao atu le talalelei a Iesu Keriso i se nuu o ni “tagata aivao, ma lotomaaa ma feai.”¹ O le toatele o tagata sa liuaina ma filifili e lafoai ese a latou amioga agasala. Sa matua atoatoa lo latou liua lea na latou tanumia ai a latou auupega ma osifeagaiga ai ma le Alii o le a latou le toe faaaogaina lava.²

Mulimuli ane, o le toatele o o latou uso sa lei liuaina na osofaia i latou ma amata ona fasioti ia i latou. Sa filifili tagata nei ua faatuatua ia latou oti lava i le pelu nai lo le lamatia o o latou olaga faaleagaga i le toe aapa atu i auupega mo lo latou puipuiga. O la latou faataitaiga amiotonu na fesoasoani i isi tagata ina ia liua ma lafoai a latou auupega o le fouvale.³

Na auala mai ia Amona, na taitai atu ai i latou e le Alii e sulufai atu ia sa Nifae, ma lauiloa ai i latou o le nuu o Amona.⁴ Sa puipuia e sa Nifae i latou mo le tele o tausaga, ae mulimuli ane na amata ona vaivai le autau a sa Nifae, ma sa matua manaomia ai se autau.⁵

Sa i ai le nuu o Amona i se taimi taua tele o o latou olaga faaleagaga. Sa latou faamaoni i a latou feagaiga ia aua lava nei fetagofi i auupega. Ae na latou malamalama foi o le tiute o tamā o le puipui lea o o latou aiga.⁶ O lena manaoga na foliga mai ua lava lena e faamaonia ai le iloiloina o le solia o le latou feagaiga.⁷

O lo latou taitai perisitua atamai, o Helamana, sa iloaina o le solia o se feagaiga ma le Alii e le mafai lava ona faamaoniaina. Sa ia ofo atu se isi auala musuia. Na ia faamanatu atu ia i latou e faapea sa lei tausalaina lava o latou atalii i agasala lava ia e tasi ma o lea sa le manaomia ai ona latou osia lea lava feagaiga e tasi.⁸ E ui sa talavou tele nei atalii, ae sa matua malolosi faaletino ma, o le mea sa sili ona taua, o i latou o e mama ma paia. Sa faamalosia nei atalii i le faatuatua o o latou tina.⁹ I lalo o le taitaiga a lo latou taitai ma le perofeta, na suitulaga ai nei alii talavou i o latou tama i le puipuiga o o latou aiga ma auaiga.¹⁰

O mea na tutupu o loo siomia ai lenei faaiuga taua ua faaalia ai le auala e aumai ai e le Togiola a Iesu Keriso le malosi patino i olaga o fanau a le Atua. Mafaufau i lagona agamalu o na tamā. Mata na faapefea o latou lagona i le iloaina o amioga fouvale o lo latou tuanai na taofia ai i latou mai le puipuia o a latou ava ma fanau i lena taimi o mafatiaga? O le iloaina patino o tulaga lamatia o le a fetaiai nei ma o latou atalii, atonu sa latou fetagisi faalilolilo. O tamā, ae le o le fanau, e tatau ona puipuia o latou aiga!¹¹ Masalo sa matuai matuitui o latou faanoanoaga.

Aisea na matatau ai o latou taitai perisitua e iloilo le toe aumaia o a latou auupega, “nei maumau o latou agaga”?¹² Na tautino mai e le Alii, “Faauta, o ia o le ua salamo i ana agasala, o ia lava lea ua faamagaloina, ma o A’u, o le Alii, e le toe manatuaina lava i latou.”¹³ O nei tama faamaoni ua leva ona salamo mai ia latou agasala ma ua mama e ala i le Togiola a Iesu Keriso, o lea la, aisea na fautuaina ai i latou ia aua nei puipuia o latou aiga?

O se upumoni autu e faapea e ala i le Togiola a Iesu Keriso, e mafai ai ona faamamaina i tatou. E mafai ona tatou mama ma paia. Peitai, o nisi taimi o a tatou filifiliga le lelei e tuua ai i tatou i ni taunuuga faifai umi. O se tasi o laasaga taua e faaatoa ai le salamo o le onosaia lea o taunuuga mo taimi pupuu ma taimi faifai umi o a tatou agasala ua mavae. O a latou filifiliga i le tuanai na oo ai nei tamā sa Amonā i se manao faaletino lea sa ono mafai ona toe avea ma se vaivaiga e taumafai Satani e faaaoga mo ona faamoemoega.

O le a taumafai Satani e faaaoga o tatou manatuaga o soo se tausalaina ua mavae e mailei ai i tatou e toe foi i tua i ana faatosinaga. Na faapea foi le tulaga o tuaa o le nuu faamaoni o Amona. Na oo lava ina ua mavae tausaga o le ola faamaoni, sa manaomia le puipuia mai o i latou lava faaleagaga mai soo se faatosinaga o manatuaga o agasala ua mavae.

I va o taua e tele, na faatonutonu ai e Kapeteni Moronae le puipuiga o aai sili ona vaivai. “Sa ia faatonuina e tatau ona latou fausia se pa laau tetele i luga o le itu i totonu o le utu; ma sa latou lafo ae i luga palapala mai le utu e tatao i le pa laau tetele … seia oo ina latou siomia le aai … i se pa malosi o laau ma le eleele, i se maualuga tele lava.”¹⁴ Sa malamalama Kapeteni Moronae i le taua o le faamalosiaina o vaega vaivai ina ia fatu ai le malosi.¹⁵

O nei tamā sa Amona sa tele lava mea na tutusa ai. Sa latou manaomiaina se puipuiga tele faaleagaga e tuueseese ai o latou olaga faatuatua mai amioga eleelea o lo latou tuanai. O o latou atalii, o e na faamanuiaina i uputuu amiotonu, sa lei vaivai i ia lava faaosoosoga e tasi. Sa mafai ona latou puipuia o latou aiga ma le faamaoni e aunoa ma le fetuunaia o o latou tulaga manuia faaleagaga.

O le tala fiafia mo soo se tasi e manao ina ia aveese ia taunuuga o filifiliga le lelei o le tuanai e faapea, e ese le silasila a le Alii i vaivaiga nai lo Lana silasila i le fouvale. O lea e lapatai mai le Alii e faapea o le fouvale e aunoa ma le salamo o le a aumaia ai faasalaga,¹⁶ ae pe a fetalai le Alii e uiga i vaivaiga, o taimi uma lava e fetalai mai ma le alofa mutimutivale.¹⁷

E mautinoa lava, o loo i ai sina agalelei ona sa aoaoina tamā sa Amona i uputuu sese a o latou matua, ae o fanau uma a le Tama i le Lagi e o mai i le olaga faitino ma se Malamalama o Keriso. E tusa lava la po o le a le mafuaaga o a latou amioga agasala, o o latou aafiaga o fua ia o se vaivaiga faaleagaga na taumafai ia Satani e faaaoga.

Sa aoaoina i latou ma le alofa mutimutivale i le talalelei, na salamo, ma na ala atu i le Togiola a Iesu Keriso na matua malolosi atu ai faaleagaga nai lo faatosinaga a Satani. E foliga mai latou te lei lagonaina le faaosoosoga e toefoi atu i o latou tuanai leaga, ae o lo latou mulimuli i le perofeta ma le taitai, sa latou lei tuua ai se avanoa ia Satani e “[olegia] o latou agaga ma [ia taitai] lemu ese atu i latou i lalo i seoli.”¹⁸ O le Togiola a le Faaola sa le gata na faamamaina ai i latou mai le agasala, ae ona o lo latou usiusitai i le fautuaga a lo latou taitai perisitua, na mafai ai e le Faaola ona puipuia i latou ma o latou vaivaiga ma faamalosia i latou. O la latou tautinoga lotomaualalo i le olaga atoa e lafoai a latou agasala, na tele atu mea na fai ai e puipuia ai o latou aiga nai lo se isi lava mea na mafai ona latou faia i luga o le malae o le taua. O lo latou usiusitai na maua ai o latou faamanuiaga. Sa faamalosia ma faamanuiaina ai i latou ma faamanuiaina ai foi ia tupulaga i le lumanai.

O le faaiuga o le tala ua manino ai le auala e faia ai e le alofa mutimutivale o le Alii ia “mea vaivai ia avea ma mea malolosi.”¹⁹ O nei tamā faatuatua na auina atua o latou atalii i le taua i lalo o le taitaiga a Helamana. E ui na tau atalii i taua leaga tele lea sa tofu uma ai ma se manua, ae e leai ma se ola na maumau.²⁰ Na avea alii talavou ma puna o le malosiaga i le autau vaivai a sa Nifae. Sa latou faamaoni ma malolosi atu faaleagaga ina ua latou toe foi mai i le aiga. Na faamanuiaina, puipuia, ma faamalosia o latou aiga.²¹ I o tatou aso, e le mafaitaulia tamaiti aoga o le Tusi a Mamona ua faagaeetia i le faataitaiga a nei atalii mama ma amiotonu.

Ua tofu i tatou taitoatasi ma se taimi i o tatou olaga ua faia ai ni filifiliga le lelei. Ua tatou matua manaomia lava le mana faaola o le Togiola a Iesu Keriso. E tatau ona salamo i tatou uma mai soo se mea o fouvale ai. “Ona o A’u o le Alii e le mafai ona Ou vaai i luga o le agasala ma sina tikeri itiiti o le faatagaina.”²² E le mafai ona Ia faatagaina ona Na te silafia mea e fai ina ia avea ai e faapei o Ia.

O le toatele o i tatou ua faatagaina vaivaiga e atiae i o tatou uiga faaletagata. E ala i le Togiola a Iesu Keriso, e pei o sa Amona, e mafai ona tatou fausia ni olo faaleagaga i o tatou va ma soo se mea sese ua tuanai lea o loo taumafai ia Satani e faaaoga e faavaivaia ai tatou. O puipuiga faaleagaga ua fausia faataamilo i tamā sa Amona na faamanuiaina ma faamalosia ai i latou lava, o latou aiga, lo latou atunuu, ma tupulaga i le lumanai. E moni foi lena mea mo i tatou.

E faapefea la ona tatou fausiaina nei olo faaleagaga? O le laasaga muamua lava e tatau ona fai, o le salamo faamaoni, maeaea ma atoatoa. E ala i le Togiola a Iesu Keriso, e mafai ai e i tatou taitoatasi ona mama ma aveesea ai le avega o lo tatou fouvale. Manatua, o le salamo e le o se faasalaga. O le ala lea ua tumu i le faamoemoe e tau atu i se lumanai sili ona mamalu.

Ua saunia e le Tama o i le Lagi mo i tatou ni meafaigaluega e fesoasoani ai e fausia ni olo i va o o tatou vaivaiga ma lo tatou faatuatua. Mafaufau i fautuaga nei:

Osia ni feagaiga ma maua ia sauniga mo oe lava ia. Ona galue tumau lea ma le faifai pea e faia ia sauniga o le malumalu mo ou lava tuaa.
Faasoa atu le talalelei i tagata le lolotu po o tagata o le aiga ua le toe toaaga mai po o ni uo. O le faasoaina atu o nei upumoni e aumaia ai se naunautaiga faafouina i lou olaga.
Ia auauna atu ma le faamaoni i valaauga uma a le Ekalesia, aemaise i tofiga o faiaoga o aiga ma faiaoga asiasi. Aua nei tau na ona avea oe ma se faiaoga o aiga po o se faiaoga asiasi 15 minute i le masina. Ae, ia aapa atu i tagata taitoatasi o le aiga. Ia iloa patino i latou. Ia avea ma se uo moni. E ala i faatinoga o le agalelei, ia faaali atu i ai lou popole tele mo i latou taitoatasi.
O le mea aupito sili ona taua, ia auauna atu i tagata o lou lava aiga. Ia avea le atinaega faaleagaga o lou toalua ma le fanau o se mea aupito sili ona faamuamua. Ia e gauai atu i mea e mafai ona e faia e fesoasoani ai i tagata taitoatasi. Foai fua atu i ai lou taimi ma le naunautaiga.

I nei fautuaga taitasi, o loo i ai se autu e tutusa ai: faatumu lou olaga i auaunaga i isi. A faamaumau lou ola e auauna atu ai i fanau a le Tama i le Lagi,²³ o le a aveesea le mana o Satani mai lou olaga.

Talu ai ona e alofa tele lou Tama o i le Lagi ia te oe, ua mafai ai e le Togiola a Iesu Keriso ona tuu atu lena malosi. E le ofoofogia ea? E toatele outou ua lagonaina le mamafa o filifiliga le lelei, ma ua mafai e outou taitoatasi ona lagonaina le mana musuia o le faamagaloga a le Alii, alofa mutimutivale, ma le malosi. Ua ou lagonaina, ma ou te molimau atu o loo avanoa mo outou taitoatasi, i le suafa o Iesu Keriso, amene.