Fusi i o Latou Manua
Saunia e Peresitene Henry B. Eyring
Fesoasoani Muamua i le Au Peresitene Sili
Ou te tatalo ina ia mafai ona tatou saunia i tatou lava e tuu atu soo se auaunaga faaleperisitua e ono tuu mai e le Alii ia i tatou i la tatou malaga faaletino.
Ua faamanuiaina i tatou uma i se tiutetauave e tausi i isi. O le umiaina o le perisitua a le Atua o lo tatou tali atu lea i le Atua e tusa ma le ola e faavavau o Lana fanau. E moni lena mea, e ofoofogia foi, ma e i ai taimi e mafai ona lagona ai le lofituina.
O loo i ai peresitene o korama a toeaina o loo faafofoga mai i le po nei o e e iloaina le uiga o la’u tala. O se mea lenei na tupu i se tasi o outou. Masalo ua tupu foi i le toatele o outou ma e sili atu foi ma le faatasi. Atonu e eseese ni faamatalaga ae e tutusa lava ia tulaga.
O se toeaina e te le masani lelei i ai na talosaga atu mo lau fesoasoani. Ua ia faatoa iloaina ua tatau ona ia siitia atu lona toalua ma le la pepe tama i le aso nei mai le fale sa mautotogi ai i se isi fale o lata ane.
Ua uma ona la talosagaina ma lona toalua se uo pe mafai ona la faaaogaina se loli mo le aso atoa e siitia ai lo la aiga ma la’u ai a la meatotino. Sa faamatuu atu i ai e le uo le loli. Na amata ona uta e le tamā talavou mea uma i totonu o le loli, ae i ni nai uluai minute, na mapuna lona tua. Sa pisi tele le uo talavou lea e ana le loli ua le mafai ai ona fesoasoani atu i ai. Sa lagona le atuatuvale o le tamā talavou. Na ia mafaufau ia te oe, o lana peresitene o le korama a toeaina.
E oo ifo i le taimi na ia talosaga ai mo se fesoasoani, ua oo i le aoauli. O le aso lea o se fonotaga a le Ekalesia i le afiafi. Ua uma ona e folafola atu e fesoasoani i lou toalua i galuega a le aiga i lena aso. Na fai atu foi lau fanau ia te oe e fai se mea faatasi ma i latou, ae e te lei maua lava se taimi e fai ai.
Sa e iloaina foi o uso o lau korama, aemaise lava i latou e sili ona faamaoni, i latou ia e masani lava ona e valaau i ai e fesoasoani atu, masalo o loo tutusa tulaga faigata o loo outou i ai i le taimi lea.
Sa silafia e le Alii o le a e oo i ni aso faigata faapea ina ua Ia valaauina oe i lenei tofiga, o lea na Ia tuu atu ai ia te oe se tala e faamalosiau ai oe. O se faataoto mo e umiaina le perisitua ua pisi tele. O nisi taimi tatou te faatatau i ai o le tala i le Samaria agalelei. Ae o le tala moni lava mo se tagata maoae e umiaina le perisitua, i nei aso pisi, faigata e gata ai.
O le tala e talafeagai lelei ma se auauna perisitua ua mamafatu i avega. Tau ina ia e manatua o oe o le Samaria agalelei ae le o le ositaulaga po o le sa Levi lea na pasia le tagata na fasia.
Atonu e te lei mafaufau i lena tala ina ua e fetaiai ma ni luitau faapena. Ae ou te tatalo ia e mafaufau i ai pe a toe oo atu na aso faapena, aua e mautinoa lava o le a oo atu.
E le o tauina mai ia i tatou i tusitusiga paia pe aisea na malaga ai le Samaria i le auala lea mai Ierusalema i Ieriko. Masalo sa lei savali na o ia ona e tatau ona ia iloaina sa faatalitali le au faomea mo tagata le faaeteete. Sa i ai o ia i se malaga tugā, ma e pei o le tu ma le masani, sa i ai ia te ia se manu ave avega faapea ai ma se suauu ma se uaina.
I upu a le Alii fai mai sa tu le Samaria, ina ua ia vaaia le tagata na fasia, ona sa “mutimutivale … lona alofa.”
Sa sili atu nai lo le na o le lagonaina o le alofa mutimutivale, na ia faatino. Ia manatua i taimi uma vaega patino o le tala:
“Ua alu atu [o ia], ma nonoa i ona manua, ua liligi foi i ai le suauu ma le uaina; ua faatietie ia te ia i lana lava manu, ma taitai ia te ia i le fale e tali ai malo, ma tausi ia te ia.
“O le taeao o le a alu ia, ona to ae lea o tenari e lua, ma avatu i le matai e ona le fale, ua fai atu ia te ia, Ina e tausi ia te ia; ai se mea e te toe faatau ai, ou te taui atu ia te oe pe a ou toe sau.”1
O oe ma ē umiaina le perisitua ua valaauina e taitai, e mafai ona maua e le ititii ifo ma le tolu ia faamautinoaga. Muamua, o le a tuu atu e le Alii ia te oe, pe afai e te ole atu ai, ia lagona o le alofa mutimutivale īa Na te lagonaina mo i latou e mafatia. Lua, o le a ia saunia isi, e pei o le matai o le faletalimalo, ia auai faatasi ma oe i lau auaunaga. Ma le lona tolu, o le a toe taui atu e le Alii, e pei o le Samaria agalelei, i latou uma e auai i le tuuina atu o fesoasoaniga ia i latou o mafatia.
O outou peresitene o korama masalo ua sili atu ma le faatasi ona outou faatinoina na faamautinoaga. Na outou talosagaina isi o le perisitua a le Alii e fesoasoani atu, ma le mautinoa o le a latou tali atu ma le alofa mutimutivale. Tou te lei fefefe lava e talosaga i latou e tele ina tali soo atu i taimi ua tuanai ona ua outou iloaina e faigofie ona latou lagonaina le alofa mutimutivale. Na outou talosagaina i latou ma le iloa sa latou lagona i taimi ua mavae le agalelei a le Alii pe a latou filifili e fesoasoani. Na outou talosagaina nisi o loo i ai lava ni avega mamafa, ma le iloaina o le tele o le ositaulaga, o le faateleina foi lena o le taui o le a latou mauaina mai le Alii. O i latou ua fesoasoani atu i se taimi ua tuanai na lagonaina le taumasuasua o le agaga faafetai o le Faaola.
Atonu foi na musuia lelei oe ia aua nei talosagaina se tasi e fesoasoani atu e uta i luga ona toe la’u ese lea o uta mai lena loli. I le avea ai ma se taitai ua e silafia lelei tagata o lau korama ma o latou aiga. E silafia atoa i latou e le Alii.
Na te silafia le avā na toetoe lava a lofituina ona sa le mafai e lana tane ona maua se taimi e faia ai mea sa ia manaomia e tausia ai ona manaoga. Ua Ia silafia po o ai tamaiti e faamanuiaina e ala i le vaai i lo latou tama ua toe alu atu tasi lava e fesoasoani atu i isi pe afai foi ua manaomia ona lagonaina e le fanau e lava lo latou taua i lo latou tama e faaalu ai se taimi faatasi ma i latou i lena aso. Ae Na te silafia foi le e manaomiaina le valaaulia e auauna atu ae atonu e foliga mai e le o le tagata tonu lea e ao pe naunau foi e fesoasoani atu.
E le mafai ona e iloaina lelei ma le atoatoa ia uso uma o lau korama, ae e silafia e le Atua. O lea, e pei ona e faia i le tele o taimi, na e tatalo ai ia iloa po o ai e talosagaina ia fesoasoani e auauna atu i isi. Ua silafia e le Alii po o ai o le a faamanuiaina e ala i le talosagaina e fesoasoani atu ma po o ai le aiga o le a faamanuiaina e ala i le le talosagaina. O le faaaliga lena e mafai ona e faamoemoeina e oo atu ia te oe a o e taitai ai i le perisitua.
Sa ou vaai o tupu lena mea a o avea au ma se alii talavou. Sa avea au ma fesoasoani muamua i se korama a ositaulaga. Na valaau mai le epikopo ia te au i se tasi aso i lo’u fale. Sa ia fai mai e manao ia te au ia ma o faatasi ma ia e asiasi i se tina ua maliu lana tane o loo matua mafatia lava. Sa ia fai mai e na te manaomia au.
A o ou faatali mo ia e piki au mai lo’u fale, sa ou atuatuvale. Sa ou iloa o loo i ai i le epikopo ni fesoasoani malolosi ma atamamai. O le tasi o se faamasino lauiloa. O le isi e fai sana kamupani tele ma o le a mulimuli ane avea ma se Pulega Aoao. O le epikopo lava ia o le a i ai se aso e auauna ai o se Pulega Aoao. Aisea na fai mai ai le epikopo i se ositaulaga e le o i ai se poto masani, “Ou te manaomia lau fesoasoani”?
Ia, ua ou iloa lelei nei le mea semanu na te tau mai ia te au: “E manaomia e le Alii ona faamanuia ia te oe.” I le fale o le tina ua oti lana tane, na ou vaaia, i lou maofa, o ia tau atu i le tina lea e le mafai ona ia mauaina lava se fesoasoani mai le Ekalesia seiloga na te faatumuina le fomu o le paketi na ia tuu atu ia te ia i se taimi na muamua atu. A o ma toe foi atu i le fale, sa ia ata ao ia vaaia le mea na ou te’i ai ma fai mai, “Hal, a mafai ona ia puleaina ana tupe faaalu o le a mafai ona ia fesoasoani atu i isi.”
I se isi taimi, sa ave au e lou epikopo faatasi ma ia i le fale o ni matua inu ava malosi ia na la auina maia ni teineiti laiti fefefe se toalua e faafeiloai i maua i le faitotoa. Ina ua uma ona matou talanoa ma teineiti e toalua, na ma liliu ma o ese ae ia fai mai ia te au, “E le mafai ona ta suia le faaletonu o o latou olaga i le taimi nei, ae e mafai ona latou lagonaina e alofa le Alii ia i latou.”
I se isi afiafi sa ia ave au i le fale o se alii ua autausagā e lei toe sau i le lotu. Na tau atu e le epikopo ia te ia le tele o lona alofa ia te ia ma le tele o le manaomiaina o ia e le uarota. Sa lei foliga mai na i ai se aafiaga tele o lea mea i le alii lea. Ae i lena taimi, ma taimi uma sa ave ai au e le epikopo faatasi ma ia, sa i ai lava se aafiaga tele ia te au.
E leai ma se auala e mafai ai ona ou iloa ai pe na tatalo le epikopo ia iloa po o ai le ositaulaga o le a faamanuiaina e ala i le malaga faatasi ma ia i na asiasiga. Sa mafai lelei ona ia ave isi ositaulaga faatasi ma ia i le tele o taimi. Ae sa silafia e le Alii o le a i ai se aso e avea ai au ma se epikopo e valaaulia i latou ua faavaivaia lo latou faatuatua ina ia toe foi mai i le mafanafana o le talalelei. Sa silafia e le Alii o le a i ai se aso o le a tuu mai ai ia te au le tiutetauave faaleperisitua mo le faitau selau e oo lava i le faitau afe o fanau a le Tama Faalelagi o e o loo i ai ni manaoga vave faaletino.
O outou alii talavou e le mafai ona outou iloa po o a faatinoga o auaunaga faaleperisitua ua saunia e le Alii mo outou e tuu atu. Ae o le luitau tele atu mo e uma e umia le perisitua o le tuu atu lea o le fesoasoaniga faaleagaga. Ua i ai ia i tatou uma lenei tiute. E oo mai faatasi ma le avea ai ma se uso o se korama. E oo mai faatasi ma le avea ai ma se tasi o le aiga. Afai ua osofaia e Satani le faatuatua o soo se tasi i lau korama po o lou aiga, o le a e lagonaina le alofa mutimutivale. E pei lava o le auaunaga ma le alofa mutimutivale na tuu atu e le Samaria, o le a e auauna atu foi ia i latou i le suauu faamalolo mo o latou manua i taimi o o latou mafatiaga.
I lau auaunaga o se faifeautalai faamisiona, o le a e alu atu ai i le faitau afe o tagata o loo matua manaomia le faaleagaga. O le a le iloaina e le toatele, sei vagana ua e aoaoina i latou, o loo ia i latou ni manuaga faaleagaga, ua tuua e lē togafitia, o le a aumaia ai le faanoanoa tumau. O le a e alu atu i le feau a le Alii ia laveai i latou. Ua na o le Alii lava e mafai ona fusifusi i o latou manua faaleagaga pe a latou taliaina sauniga ia e taitai atu ai i le ola e faavavau.
I le avea ai ma se uso o le korama, se faiaoga o aiga, ma se faifeautalai, e le mafai ona e fesoasoani i tagata e toe faaleleia ni mea ua faaleagaina faaleagaga sei vagana o loo malosi lou lava oe faatuatua. O lona uiga e sili atu nai lo le na ona faitau soo o tusitusiga paia ma tatalo e uiga i ai. O le tatalo vave ma le tau na ona faitau o sina mea mai tusitusiga paia ua le lava lea e sauniuni ai. O le faamautinoaga o mea o le a e manaomiaina e sau mai le fautuaga lenei mai le vaega 84 o le Mataupu Faavae ma Feagaiga: “Pe tou te mafaufau muamua foi po o a tou te fai atu; ae ia teu i o outou mafaufau e le aunoa afioga o le ola, ma o le a tuu atu ia te outou i lea lava itula le vaega lena o le a fua atu i tagata taitoatasi.”2
E faatoa mafai ona maua lena folafolaga pe afai tatou te “teuina” ia upu o le ola e faavavau ma ia faifai soo. O le vaega o le teuina o lena mau ua i ai lava sona uiga ia te au o se mataupu o le lagonaina o se mea e uiga i upu. Mo se faataitaiga, a ou alu e taumafai e fesoasoani i se tagata ua femoumouai lona faatuatua e uiga i le valaauga paia o le Perofeta o Iosefa Samita, e toe oo mai ni lagona ia te au.
E le o na o upu mai le Tusi a Mamona. O se lagona o le faamautinoaga o le upumoni lea e sau mai soo se taimi ou te faitau ai i ni laina fou mai le Tusi a Mamona. E le mafai ona ou folafola atu o le a oo atu i tagata uma ua aafia i le masalosalo e uiga i le Perofeta o Iosefa po o le Tusi a Mamona. Peitai, ou te iloa o Iosefa Samita o le Perofeta o le Toefuataiga. Ou te iloa o le Tusi a Mamona o le afioga a le Atua ona ua pele ia te au.
Ua ou iloa mai aafiaga e mafai ona e mauaina le faamautinoaga o le upumoni mai le Agaga ona ua oo mai ia te au. E tatau ia te oe ma au ona i ai lena faamautinoaga a o lei tuuina i tatou e le Alii i le ala o se tagata malaga tatou te alolofa i ai o lē ua faamanualiaina e fili o le upumoni.
O loo i ai foi se isi sauniuniga e tatau ona tatou faia. O se uiga faaletagata ina ia faamausaliina i tiga o isi. O le tasi lena o mafuaaga na ala ai ona faia e le Faaola le tele naua o mea e faamatala ai Lana Togiola ma Lona tauaveina i Ona lava luga o tiga ma faanoanoaga o fanau uma a lo tatou Tama Faalelagi ina ia Ona iloaina le auala e fesoasoani ai ia i latou.
E oo lava i e sili ona umiaina le perisitua a le Tama Faalelagi i la le tino, e le faigofie ona latou mauaina lena fuataga o le alofa mutimutivale. O lo tatou faanaunauga faaletagata o le onosai lea i le tagata e le o mafai ona vaaia le upumoni lea e matua faigofie lava ona tatou vaaia. E tatau ona tatou faaeteete ina nei faauigaina lo tatou lē onosai i le tausalaga po o le teenaina.
A tatou saunia e tuu atu se fesoasoaniga mo le Alii ma Ana auauna i le perisitua, o loo i ai se mau e taiala ai i tatou. O loo i ai se meaalofa o le a tatou manaomiaina mo la tatou malaga, po o fea lava o le a auina atu i ai i tatou e le Alii. Sa i ai i le Samaria agalelei lena meaalofa. O le a tatou manaomiaina, ma ua tau mai e le Alii ia i tatou le auala e mafai ai ona tatou mauaina:
“O le mea lea, ou uso pele e, afai e le ia te outou le alofa mama o ni mea noa outou, ona e le uma le alofa mama. O le mea lea, ia outou fusi ai i le alofa mama, le mea ua silisili lea i mea uma, ona e iu mea uma—
“Ae o le alofa mama o le alofa le pona lea o Keriso, ma e tumau e faavavau; ma o soo se tasi e maua ua i ai ia te ia i le aso gataaga, o le a lelei ia te ia.
“O le mea lea, ou uso pele e, ia outou tatalo atu i le Tama ma le malosi atoa o le loto, ina ia faatumulia outou i lenei alofa, lea ua ia faaee mai i luga oi latou uma o e o soo moni o lona Alo, o Iesu Keriso; ina ia mafai ona avea o outou ma atalii o le Atua; a oo ai ina afio mai o ia o le a tatou faapei o ia, ona o le a tatou vaai ia te ia e pei ona i ai o ia, tau ina ia tatou maua lenei faamoemoe, tau ina ia mafai ona faamamaina i tatou e pei lava ona mama o ia.”3
Ou te tatalo ina ia mafai ona tatou saunia i tatou lava e tuu atu soo se auaunaga faaleperisitua e ono tuu mai e le Alii ia i tatou i la tatou malaga faaletino. I le suafa paia o Iesu Keriso, amene.