Ia Outou Faalagolago i le Alii

Saunia e Elder M. Russell Ballard

O Le Korama a Aposetolo e Toasefululua

Ia auai i le faia o mea e mafai ona e faia i le faasoaina atu o le savali maoae o le Toefuataiga o le talalelei a Iesu Keriso.

Na faatoa ma foi mai talu ai nei ma Sister Ballard mai se tofiga i ni atunuu se lima i Europa. O iina na ma maua ai le avanoa e feiloai ai ma le toatele o a tatou faifeautalai, masalo o o outou atalii ma afafine. Talu mai le faasilasilaga a Peresitene Thomas S. Monson o le tuuina i lalo o le matutua o tausaga o o tatou alii ma tamaitai talavou e auauna atu ai, ua ou maua le avanoa e feiloai ai i le silia ma le 3,000 o i latou. Ua susulu mai le Malamalama o Keriso i o latou foliga, ma ua latou naunau lava e tulei i luma le galuega—ia su’e ma aoao, ia papatiso, ia toe faatoaga, ma ia faamalolosia ma atiina ae le malo o le Atua. Ae peitai, o le feiloai ai ma i latou e vave lava ona iloa ai e se tagata, e le mafai ona latou faia na o i latou lenei galuega. O le asō ou te fia talanoa atu i tagata uma o le Ekalesia, ona o loo i ai se faananati mo i tatou taitasi ina ia punouai i le faasoaina atu o le talalelei.

E pei ona ta’uaina i le tele o taimi, na folafola mai e le Perofeta o Iosefa Samita e faapea “i le uma ai o faamatalaga uma lava ua faia, o le tiute silisili ma matua taua o le talaiina o le Talalelei” (Aoaoga a Peresitene o le Ekalesia: Iosefa Samita [2007], 330).

I le 1974 na saunoa mai ai Peresitene Spencer W. Kimball i le faamatalaga lenei: “Atonu o le mafuaaga silisili lava mo le galuega faafaifeautalai, o le tuu atu lea i le lalolagi o lona avanoa e faalogo ai ma talia le talalelei. Ua tumu tusitusiga paia i poloaiga ma folafolaga ma valaauga ma taui mo le aoaoina atu o le talalelei. Ua ou faaaogaina ma le iloa lelei le upu poloai aua e foliga mai o se faatonuga faifaipea lea e le mafai ona tatou sao mai ai taitoatasi pe sao uma mai ai” (“When the World Will Be Converted,” Ensign, Oct. 1974, 4).

O Iulai o lena lava tausaga, sa matou malaga atu ai ma Sister Ballard ma le ma fanau, ina ia pulefaamalumalu i le Misiona a Kanata Toronto. Sa tatagi pea i o’u taliga le saunoaga a Peresitene Kimball, ae maise lava ina ua ia saunoa mai, “O’u uso e, ou te mafaufau pe o tatou faia ea mea uma tatou te mafaia. Pe ua faamalieina i tatou i la tatou auala e aoao ai le lalolagi atoa? Ua 144 nei tausaga talu ona tatou talai atu. Pe ua tatou saunia ea e faalautele a tatou laa? Pe faamamao la tatou vaai?” (Ensign, Oct. 1974, 5).

Sa ia saunoa mai foi ia i matou e faatelea’i a matou laa, galulue faatasi e atiina ae le Ekalesia ma le malo o le Atua.

Ia Iuni na te’a atu nei, sa alagaina ai foi e Peresitene Thomas S. Monson lenei lava savali e tasi i tagata uma o le Ekalesia. Na saunoa le Peresitene: “O le taimi lenei mo tagata o le Ekalesia ma faifeautalai ia o mai faatasi … [e] galulue i le tovine a le Alii, e aumai agaga ia te Ia. Ua Ia saunia auala mo i tatou e faasoa atu ai le talalelei i le tele o auala, ma o le a Ia fesoasoani i a tatou galuega pe afai o le a tatou galulue i le faatuatua e faataunuu Lana galuega” (“Faith in the Work of Salvation” [saunoaga na fofogaina i se faasalalauga faapitoa, 23 Iuni, 2013]; lds.org/broadcasts).

Uso e ma tuafafine, e lelei le mafaufau loloto i aoaoga a perofeta mai le taimi o Iosefa Samita seia oo mai i aso nei. Ua latou uunaia ma valaau mai i taitai ma tagata o le Ekalesia ina ia auai ma le naunautai i le auina atu o le savali o le Toefuataiga o le talalelei i fanau uma a le Tama Faalelagi i le lalolagi atoa.

O la’u savali i le aoauli nei e faapea ua faanatinatiina e le Alii Lana galuega. I o tatou aso, na pau le ala e mafai ona faia ai lenei mea, pe afai lea e aapa atu tagata uma o le Ekalesia ma le alofa e faasoa atu upumoni o le talalelei toefuataiina a Iesu Keriso. E manaomia ona tatou galulue faatasi faapaaga ma a tatou faifeautalai e 80,000 o loo auauna atu i le taimi nei. O faamatalaga e uiga i lenei galuega maoae, ae maise lava o tofiga mo taitai o aufono a le siteki ma uarota, ua otooto atu ma le manino i luga o le LDS.org i le uepisaite ua ta’ua “Faanatinatiina o le Galuega o le Faaolataga.”

Ua matou iloa mai a tatou suesuega, o le toatele o tagata malolosi o le Ekalesia e mananao i faamanuiaga o le talalelei ia avea o se vaega o olaga o isi o e latou te alolofa i ai, e oo lava ia i latou o e latou te le’i feiloai i ai. Ae ua matou iloa foi o le toatele o tagata o le Ekalesia e mumusu e fai le galuega faafaifeautalai ma faasoa atu le talalelei mo ni mafuaaga autu se lua.

O le mea muamua o le fefe. O le toatele o le au paia e le tatalo mo ni avanoa e faasoa atu ai le talalelei, ona o le fefefe ina ne’i o latou maua ni uunaiga faalelagi e fai se mea latou te manatu latou te le gafatia ona faia.
O le mafuaaga lona lua o le le malamalama i le uiga o le galuega faafaifeautalai.

Ua tatou iloa a tulai se tagata e fai se tautalaga i le sauniga faamanatuga ma faapea mai, “O le asō o le a ou talanoa ai e uiga i le galuega faafaifeautalai,” ia pe atonu foi e tulai Elder Ballard i se konafesi aoao ma fai mai foi lena lava mea e tasi, atonu e mafaufau nisi o outou o loo faafofoga mai, “Oi leai, ua toe fai mai foi; na tatou faalogo muamua foi i ai.”

Ia, ua tatou iloa e leai se tasi e fia lagonaina le tausalaina. Atonu e te lagona e ono talosagaina oe e fai ni mea e le mo’i i a outou mafutaga ma uo po o tuaoi. Faatasi ai ma le fesoasoani a le Alii, se’i o’u aveeseina soo se fefe o loo ia te oe po o soo se tasi o o tatou faifeautalai faamisiona i le faasoaina atu o le talalelei i isi.

Ia fai le filifiliga e fai mea ua fetalai mai ia Iesu Keriso tatou te faia. Na fetalai mai le Faaola:

“Ia ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou:

“Aua ai se ole atu, e maua e ia; o le saili foi, e iloa e ia; e toina foi i le tu’itu’i atu.

“O ai foi se tagata o outou pe a ole mai lona atalii se areto, na te avane ea ia te ia se maa?

“A ole mai foi se i’a, na te avane ea ia te ia se gata?

“… Afai ua iloa e outou ona avatu o mea lelei ma a outou fanau, e le sili ea ona foaiina mai e lo outou Tama oi le lagi o mea lelei i e ole atu ai ia te ia?” (Mataio 7:7–11).

Uso e ma tuafafine, o le fefe o le a suia i le faatuatua ma le mautinoa pe a tootutuli le au paia ma faifeautalai faamisiona i le tatalo ma ole atu i le Alii e faamanuia i latou i ni avanoa faafaifeautalai. Ona, tatau lea ia i tatou ona faaali atu lo tatou faatuatua ma vaavaai mo ni avanoa e faailoa atu ai le talalelei a Iesu Keriso i fanau a lo tatou Tama Faalelagi, ma e mautinoa lava o le a oo mai na avanoa. O nei avanoa o le a le manaomia ai lava se tali e fai faamalosi po o se tali e le loto i ai. O le a oo mai o se taunuuga masani o lo tatou alolofa mo o tatou uso ma tuafafine. Tau lava o le talitonu o le a lelei mea uma, ma o le a lagona e i latou e te talanoa i ai lou alofa. O le a le galo lava ia i latou lena lagona e ui atonu e le o le taimi tonu lea latou te taliaina ai le talalelei. O lena foi mea e ono suia i le lumanai pe a suia o latou malamalamaaga.

E faigata mo i tatou ona toilalo pe a tatou faia le mea sili tatou te mafaia pe a tatou i ai i le feau a le Alii. E ui o le iuga o se taunuuga lea o le faaaogaina o le faitalia o le tagata, ae o le faasoaina atu o le talalelei o la tatou tiutetauave lea.

Ia faalagolago i le Alii. O Ia o le Leoleo Mamoe Lelei. Na te silafia Ana mamoe, ma e iloa e Ana Mamoe Lona siufofoga; ma o le asō, o le siufofoga o le Leoleo Mamoe Lelei o lou leo ma lo’u leo lea. Ma afai tatou te le auai [i le galuega], o le toatele o e o le a faalogo i le savali o le Toefuataiga o le a misia. I se faaupuga faigofie, o se mataupu o le faatuatua ma faatinoga i la tatou vaega. E faigofie lava ia mataupu faavae—tatalo, faaletagata lava ia ma i lou aiga, mo ni avanoa faafaifeautalai. Ua fetalai mai le Alii i le Mataupu Faavae ma Feagaiga, e toatele tagata ua nao na taofia mai le upumoni, “ona ua latou le iloa le mea e maua ai” (MF&F 123:12).

E le faapea e tatau ona avea oe ma se tagata e fiafia i fegalegaleaiga po o se faiaoga gutu poto ma faatauanau. Afai o i ai sou alofa e le femoumoua’i ma le faamoemoe i totonu ia te oe, ua folafola mai e le Alii, afai e “sii a’e o oulua leo i lenei nuu; [ma] tautala atu mafaufauga o le a [Ia] tuu i o oulua loto, … o le a le faafememeaiina oulua i luma o tagata.

“[Ma] o le a tuu atu ia te oulua … i le minute tonu lava, mea e te lua fai atu ai” (MF&F 100:5–6).

Ua faamanatu mai e le Tala’i La’u Talalelei ia i tatou uma e faapea “e leai se mea e tupu i le galuega faafaifeautalai sei vagana [tatou] te maua se tagata e aoao. Talanoa atu i le toatele o tagata e mafai ona e talanoa i ai i aso uma. O le mea masani lava le i ai o sina popole e talanoa atu i tagata, ae e mafai ona e tatalo mo le faatuatua ma le malosi ina ia e atili toa ai e tautala atu e folafola atu le talalelei toefuataiina” ([2004], 156–57). O outou faifeautalai faamisiona, afai tou te mananao e aoao atu atili, e tatau ona outou talanoa atu i ni tagata se toatele i aso uma. O le mea lava lenei na auina atu ai e le Alii ia faifeautalai e fai.

E silafia i tatou e le Alii. Ua Ia silafia o loo i ai o tatou luitau. Ua ou iloa o nisi o outou o loo lagonaina le mamafatu o avega, ae ou te tatalo ia leai se tasi o outou e lagonaina o le aapa atu i auala masani ma lelei e faasoa atu ai le talalelei, o le a avea ma se avega. Ae, o se faamanuiaga! E leai se fiafia e sili atu i le olaga nai lo o le auai ma le naunautai i le galuega a le Alii.

O le ki lava o le musuia o oe e le Atua, ia e ole atu ia te Ia mo le taitaiga, ona alu loa lea e fai e pei ona uunaia ai oe e le Agaga. A manatu le au paia i le galuega o le faaolataga o se tiutetauave e mo na o i latou, e mafai ona avea ma se mea taufaamata’u. Ae a latou manatu i ai o se valaaulia ia mulimuli i le Alii i le aumaiga o agaga ia te Ia ina ia aoaoina e alii ma tamaitai faifeautalai, o le a musuia, faaosofia, ma faagaeetia.

Matou te le o talosagaina tagata uma ia fai mea uma. Ua matou talosagaina ia tagata uma o le ekalesia ia tatalo, ma le iloaina afai o le a aapa atu tagata uma o le ekalesia, talavou ma matutua, i le tau lava o se [tagata] se “toatasi” i le va o le taimi nei ma le Kerisimasi, o le a faapea ona lagona e le faitau miliona le alofa o le Alii o Iesu Keriso. Ma o se meaalofa ina a matagofie lena mo le Faaola.

O le ono vaiaso talu ai na ou maua ai se tusi mai se aiga faamisiona faamanuiaina o le au paia, o le aiga o Munn i Florida. Sa latou tusi mai:

“Lau Susuga Elder Ballard, i le 30 minute talu ona uma le faasalalauga i le lalolagi atoa e faatatau i le faanatinatiina o le galuega o le faaolataga, sa fai ai le fono faafaifeautalai a le matou aiga. Sa matuai o ma fiafia lava i le iloa, sa fia auai ai foi le fanau talavou a le ma fanau. Matou te fiafia lava e lipoti atu, talu mai le matou fonotaga, ua faateleina le aofai o tagata e aoao e lo matou aiga i le 200 pasene.

“Na i ai fanau a le ma fanau na aumai a latou uo i le lotu, sa matou fiafia i sauniga faamanatuga ma nisi o a matou uo ua tau le malolosi i le lotu, ma na i ai foi nisi o a matou tagata faafesootai fou ua tautino e faalogologo i lesona a faifeautalai. O se tasi o o matou tuafafine sa le toaga ua le gata ina toe foi mai i le lotu ae na sau foi ma aumai ni tagata sailiili fou.

“E leai se tasi na teenaina le valaaulia e faalogologo i lesona a faifeautalai. Oka se taimi ina a faafiafiaina e avea ai ma se tagata o lenei Ekalesia” (tusi patino, 15 Aok., 2013).

Faalogo i uunaiga a le Agaga. Faatoga atu i le Alii i le tatalo faatauanau. Ia auai i le faia o mea e mafai ona e faia i le faasoaina atu o le savali maoae o le Toefuataiga o le talalelei a Iesu Keriso.

Ou te sii maia se isi tagata faamisiona faamanuiaina o le au paia, o Clayton Christensen: “O taimi uma lava e te fesoasoani ai i se tagata ma faailoa atu o ia ia Iesu Keriso, o le a e lagona le loloto o le alofa o lo tatou Faaola ia te oe ma lou alofa i le tagata o loo e uuina lona lima” (The Power of Everyday Missionaries: The What and How of Sharing the Gospel [2013], 1).

Ia faamanuia le Atua ia te outou, uso e ma tuafafine, ia maua le olioli tele lea e oo mai mai le mauaina o vavega e ala i lou faatuatua. E pei ona aoaoina i tatou i le Moronae mataupu e 7:

“Ma ua fetalai mai Keriso: Afai tou te faatuatua mai ia te a’u o le a outou maua le mana e fai ai soo se mea e tatau ai ia te a’u. …

“… Ona o le faatuatua e faia ai vavega; ma o le faatuatua e afifio mai ai agelu ma auauna mai i tagata; o le mea lea, afai ua taofia nei mea oi talofa i le fanauga a tagata, ona o le le talitonu ua taofia ai, ma ua le aoga ai mea uma” (Moronae 7:33, 37).

Mai i o’u lava aafiaga ua mafai ai ona ou molimau atu ia te outou, o le a faafofogaina e le Alii a outou tatalo ma o le a outou mauaina le tele o avanoa i le taimi nei ma tausaga o le a oo mai e faailoa atu ai le talalelei a Iesu Keriso i fanau faapelepele a lo tatou Tama Faalelagi. Peresitene Monson ua matou faalogo atu. O le a matou saili ia maua le tasi. Ou te tatalo ina ia mafai ona lagona e i tatou uma le olioli tele lea e sau mai le galuega faafaifeautalai, i le suafa o Iesu Keriso, amene.