Piimau Pea

Saunia e Elder Kevin S. Hamilton

O Le Fitugafulu

Tau ina ia tatou piimau pea i le ai uamea lea e taitai atu ai i le afioaga o lo tatou Tama Faalelagi.

E manatua lelei e lou tama le aso tonu, e oo lava i le itula tonu na tuua ai e lona aiga—tama, tina, ma le fanau e toafa—le Ekalesia, e toatele na feoti e lei toe foi mai lava. Sa 13 ona tausaga, o se tiakono, ma i na aso sa auai aiga i le Aoga Sa i le taeao ae o le sauniga faamanatuga i le aoauli. I se aso matagofie o le tautotogo, ina ua toe foi atu [i le fale] mai sauniga tapuai o le taeao o le Aso Sa ao faia se taumafataga faatasi a le aiga i le aoauli, na faliu atu lona tina i lona tama ma fai atu, “Ia, lau pele, o le a sou manatu e tatau ona tatou o i le sauniga faamanatuga i lenei aoauli pe tatau ona ave le aiga mo se tietiega i nuu i tua?”

O le manatu sa i ai se filifiliga i le sauniga faamanatuga sa lei mafaufauina lava e lou tama, ae na latou nonofo sao i luga ma ona tei e toatolu ma gauai atu ma le totoa. Masalo o lena tietiega i le aoauli o le Aso Sa i nuu i tua o se gaoioiga fiafia faaleaiga, ae o lena filifiliga laitiiti na avea ma se amataga o se auala fou, lea na iu ai lava ina taitai ese ai lona aiga mai le Ekalesia mai lona saogalemu, puipuiga, ma faamanuiaga ma agai atu ai i se isi auala ese.

O se lesona la mo i latou i lenei vaitaimi mo e atonu o tofotofoina e filifili i se auala ese, na faasoa atu e le perofeta o Liae o le Tusi a Mamona se faaaliga i lona aiga lea na ia “vaai i motu o tagata e le masino, o le toatele o i latou sa fetaomi mai i luma, ina ia latou maua le ala e tau mai i le laau lea sa [ia] tu ai i ona tafatafa.

“Ma sa … latou o mai i luma ma amata ona savavali i le ala e tau mai i le laau.

“Ma … sa oo ina alu ae se puao o le pogisa; … sa oo ina le iloa ai e i latou o e na amata ona savavali i le ala, lo latou ala, ma latou feseseai ai, ma leiloloa.”¹

Na vaaia e Liae se vaega lona lua o e na “fetaomi mai i luma, ma sa latou o mai ma fepiiti i le pito o le ai uamea, ma sa latou fetaomi mai i luma e ala mai i le puao o le pogisa, ma fepiiti i le ai uamea, seia oo lava ina latou oo mai ma aai i le fua o le laau.” Ae paga lea, “ina ua uma ona latou aai i le fua o le laau sa fetepaai solo o latou mata e peiseai ua latou māmā” ona o i latou sa i “le fale tele ma le ateatea” lea na “faatauemu ma tusitusi mai o latou tamatamailima i e na o mai ma aai i le fua.” O nei tagata sa “pauu ese atu ai i ala faasaina ma ua leiloloa.”² Sa latou le mafai, po o le leai o se naunau, e tumau ai e oo i le iuga.

Peitai, sa i ai se vaega lona tolu sa le gata na faamanuiaina i le oo atu i le laau o le ola, ae sa latou lei pauu ese lava. O i latou nei, o loo fai mai ai tusitusiga paia sa latou fetaomi mai i “luma, ma piimau pea i le ai uamea i le ai uamea, seia oo ina latou o mai i luma ma faapauu i lalo ma aai i le fua o le laau.”³ Sa avea le ai uamea ma puipuiga ma saogalemu mo lenei vaega o tagata na mafai ona latou maua, ma sa latou piimau pea; sa latou mumusu e faamaamulu e tusa lava pe mo se mea faigofie e pei o le tietiega i le aoauli o le Aso Sa i nuu i tua.

E faatatau i lenei vaega o tagata na aoao mai ai Elder David A. Bednar faapea: “O le fasifuaitau autu i lenei fuaiupu o le ‘piimau pea’ i le ai uamea. … Atonu o lenei vaega lona tolu o tagata sa faitau pea e le aunoa ma suesue ma sailiili i afioga a Keriso. … O le vaega lea e tatau ona e taumafai ma ou taumafai e auai.”⁴

O i tatou o tagata o le Ekalesia a le Atua i lenei vaitaimi ua uma ona osi feagaiga e mulimuli ia Iesu Keriso ma usitai i poloaiga a le Atua. I le papatisoga tatou te osi feagaiga ai e tutu o ni molimau a le Faaola,⁵ e fesoasoani i e vaivai ma e le tagolima,⁶ tausi poloaiga a le Atua, ma salamo pe a manaomia, aua e pei ona aoao mai le Aposetolo o Paulo, “Aua ua agasala tagata uma, ma ua le oo i le viiga mai le Atua.”⁷

O vaiaso taitasi tatou te maua ai le avanoa e auai ai i se sauniga faamanatuga lea e mafai ona tatou faafou ai nei feagaiga e ala i le taumamafa i le areto ma le vai o le sauniga o le faamanatuga. O lenei faatinoga faigofie tatou te mafai ai ona toe folafola atu o le a tatou mulimuli ia Iesu Keriso ma salamo pe a tatou le faataunuuina lena folafolaga. O le folafolaga a le Atua ia i tatou o le a avea Lona Agaga o se taiala ma se puipuiga.

Mai le Talai Lau Talalelei, o loo aoao ai a tatou faifeautalai e faapea e oo mai faaaliga ma le molimau pe a tatou auai i a tatou sauniga Lotu o le Aso Sa: “A o tatou auai ai i sauniga a le Ekalesia ma tapuai faatasi, tatou te faamalosia le tasi ma le isi. E faafouina i tatou e ala i a tatou fegalegaleaiga ma uo ma aiga. E faamalosia lo tatou faatuatua pe a tatou suesue i tusitusiga paia ma aoao atili e uiga i le talalelei toefuataiina.”⁸

E ono fesili se tasi, aisea e tolu ai a tatou sauniga eseese i le Aso Sa ma pe aisea e manaomia ai sauniga taitasi? Sei o tatou tagatagai puupuu atu i nei sauniga e tolu:

O le sauniga faamanatuga tatou te maua ai le avanoa e auai ai i le sauniga o le faamanatuga. Tatou te faafouina ai a tatou feagaiga, maua se fuataga faateleina o le Agaga, ma maua nisi faamanuiaga o le aoaoina ma le faagaeetiaina e le Agaga Paia.
O le Aoga Sa e faataga ai i tatou e “aoao i le tasi mataupu faavae o le malo,”⁹ ina ia “faagaeetiaina ma olioli faatasi i laua uma.”¹⁰ E oo mai le mana sili ma le filemu patino pe a tatou malamalama i aoaoga faavae o le talalelei toefuataiina.
O sauniga perisitua o se taimi lea mo alii matutua ma alii talavou e “aoao [ai o latou] tiute”¹¹ ma “ia aoaoina atoatoa atili,”¹² ma o sauniga a le Aualofa e saunia ai tamaitai o le Ekalesia mo se avanoa e “faateleina ai lo latou faatuatua …, faamalolosia [o latou] auaiga ma aiga, ma fesoasoani ia i latou e le tagolima.”¹³

E faapena foi, ia o tatou tamaitai talavou ma fanau, e i ai a latou lava sauniga ma vasega lea e aoao ai i latou i le talalelei ao latou sauniuni mo tiutetauave taua o le a oo mai ia i latou. I nei sauniga tulagaese taitasi ae fesootai, ua tatou aoao ai i aoaoga faavae, lagona le Agaga, ma auauna atu ai le tasi i le isi. E ui atonu e i ai ni faaletonu ona o le mamao, tau o femalagaaiga, po o le soifua maloloina, ae e tatau ona tatou taumafai ia auai ia tatou sauniga uma o le Aso Sa. Ou te folafola atu o le a oo mai ni faamanuiaga o le olioli tele ma le filemu mai le tapuai i le taimi faatulagaina o a tatou sauniga e tolu itula i le Aso Sa.

Ua tautino lo matou aiga ina ia auai ia matou sauniga uma o le Aso Sa. Ua matou iloa o lenei mea ua faamalosia ai lo matou faatuatua ma faateleina ai lo matou malamalama i le talalelei. Ua matou iloa le lelei o matou lagona e uiga i a matou faaiuga ina ia auai atu ia matou sauniga Lotu, aemaise lava pe a matou toe foi i lo matou fale ma faaauau ai pea le tausia o le Sapati. Matou te auai foi ia matou sauniga uma o le Aso Sa pe a matou faimalologa pe faimalaga foi. Sa tusi mai se tasi o le ma fanau teine talu ai nei sa ia auai i se lotu i totonu o le taulaga i le mea sa ia malaga i ai ona ia faaopoopo mai lea, “Ioe, Tama, sa ou auai i sauniga uma e tolu o le Aso Sa.” Na matou iloa sa faamanuiaina o ia i lenei filifiliga amiotonu.

E tofu i tatou taitoatasi ma le tele o filifiliga e faia i le auala tatou te tausia ai le aso Sapati. O le a i ai lava nisi gaoioiga “lelei” e mafai ma e tatau ona ositaulagaina mo le filfiliga sili atu ona lelei o le auai i sauniga a le Ekalesia. O le mea moni o se tasi lea o auala o loo “olegia [ai] e le tiapolo o [tatou] agaga, ma taitai lemu ese atu ai i [tatou].”¹⁴ Na te faaaogaina ni gaoioiga “lelei” e sui ai ni gaoioiga “lelei tele” po o ni gaoioiga “lelei silisili.¹⁵

O le piimau pea i le ai uamea o lona uiga soo se taimi lava e mafai ai, ia tatou auai ia tatou sauniga o le Aso Sa: sauniga faamanatuga, Aoga Sa, ma sauniga perisitua po o le Aualofa. Ia auai foi a tatou fanau ia latou lava sauniga i le Peraimeri, Alii Talavou, ma Tamaitai Talavou. E le tatau lava ona tatou filifili po o fea o sauniga tatou te auai atu i ai. Ia tau na ona tatou pipiimau i le afioga a le Atua e ala i le tapuai ma auai ia tatou sauniga o le Sapati.

O le piimau pea i le ai uamea o lona uiga o le tatou taumafai lea e tausi poloaiga uma a le Atua, fai tatalo faaletagata lava ia ma faaleaiga i aso uma, ma suesue i tusitusiga paia i aso uma.

O le piimau pea o se vaega o le mataupu faavae a Keriso e pei ona aoaoina i le Tusi a Mamona. Tatou te faatinoina le faatuatua ia Iesu Keriso, salamo mai a tatou agasala, liua o tatou loto, ona mulimuli lea ia te Ia i lalo o vai o le papatisoga ma maua le meaalofa faamautuina o le Agaga Paia, lea e avea o se taiala ma se faamafanafana. Ona sosoo ai lea, e pei ona aoao mai Nifae ia tatou “fetaomi atu i luma, ma taumamafa fiafia i le afioga a Keriso,” seia oo i le faaiuga o o tatou olaga.¹⁶

Ou uso e ma tuafafine, o i tatou o se nuu o le feagaiga. Ua tatou osia ma tausia ma le loto i ai ia feagaiga, ma o faamanuiaga folafolaina e faapea o le a tatou maua “mea uma ua i ai i [le] Tama.”¹⁷ A tatou piimau pea i le ai uamea e ala i le tausia o a tatou feagaiga, o le a faamalolosia i tatou e tetee atu i faaosoosoga ma mea lamatia o le lalolagi. O le a mafai ona tatou faatonutonuina lenei olaga faaletino faatasi ai ma ona luitau uma seia tatou oo moni atu i le laau o i ai le fua “ua silisili ona pele ma silisili ona manaomia i lo o isi fua uma lava.”¹⁸

Na faamanuiaina lou tama e faaipoipo atu i se tamaitai lelei o le sa faamalosiau ia te ia e toe foi mai i le lotu o lona talavou ma toe amata ona alualu ai i luma i le ala. O o laua olaga faamaoni ua faamanuiaina ai olaga o a la fanau uma, le tupulaga o fanau a fanau e sosoo ai, ma i le taimi nei o fanau a fanau a fanau.

E pei lava ona faia e se faaiuga faigofie se eseesega tele i olaga o le aiga a ou matua matutua e auai pe le auai i se tasi o a latou sauniga tapuai o le aso Sapati, e faapena foi i a tatou faaiuga i aso uma lea o le a aafia ai o tatou olaga i ni auala iloga. O se faaiuga e foliga e faatauvaa e pei o le auai pe le auai i se sauniga faamanatuga e mafai ona i ai ni ona taunuuga loloto, e oo atu lava i le faavavau.

Tau ina ia tatou filifili ina ia filiga ma ia maua ni faamanuiaga ma puipuiga sili lea o le a oo mai i le faapotopoto faatasi ma tausia feagaiga. Tau ina ia tatou piimau pea i le ai uamea lea o le a taitai atu ai i le afioaga o lo tatou Tama Faalelagi, o lau tatalo lea i le suafa paia o Iesu Keriso, amene.