Faanatinatiina o le Fuafuaga o le Taaloga a le Alii!

Saunia e Elder S. Gifford Nielsen

O Le Fitugafulu

E tatau ia i tatou taitoatasi ona atiina ae la tatou lava fuafuaga patino o le taaloga ina ia galulue soosootauau ma le naunautai ma faifeautalai faamisiona.

I le tele o tausaga ua mavae sa manaomia ai ona ou talanoa i le faletua o se tasi o epikopo i la matou siteki, ma o lea sa ou valaau atu i ai i le latou fale. Sa tali mai e le la atalii laitiiti le telefoni. Sa ou fai atu, “Talofa. O iina lou tina?”

O lana tali, “Ioe, lea e iinei. O le a ou alu e aumai. O ai lea?”

Na ou tali atu: “Fai i ai o Peresitene Nielsen.”

Sa i ai sina filemu teisi, ona sosoo lea ma se leo malosi na ou lagona atu, “Tina, o Peresitene Hinckley lea e i le telefoni!”

Ou te le iloa po o le a se mea na ia mafaufau i ai. Masalo o le savali sili lea ona umi sa na faia i le telefoni. Na oo mai se manatu i lou mafaufau: “Pe ou te fai ea i ai [o au o Hinckley]?” Ou te lei faia ae sa ma talie ai. Ia ona o lea ua ou mafaufau i ai, atonu sa matua le fiafia o ia i le iloaina o au o loo talanoa i ai.

O le a sau mea e fai pe afai e valaau moni atu lava le perofeta a le Alii ia te oe? Ia, sa valaau atu! Ua valaau mai Peresitene Thomas S. Monson, e pei ona ia toe faia i lenei taeao, ua ia valaauina i tatou taitoatasi i se galuega matua taua lava. Na Ia saunoa mai, “O le taimi lenei mo tagata o le ekalesia ma faifeautalai e o mai faatasi ai, e galulue faatasi, e galueaiina le tovine a le alii ma aumai agaga ia te Ia” (“Faatuatua i le Galuega o le Faaolataga,” [faasalalauga o le aoaoga mo taitai i le lalolagi atoa, 23 Iuni, 2013]; lds.org/broadcasts).

Na tatou faalogo ea?

Ua aafia le lalolagi atoa, siteki, itu, ma misiona i se tulaga fou o le malosi, ao faataunuuina le folafolaga a le Faaola ia Iosefa Samita i le 1832: “Faauta, o le a Ou faanatinatiina la’u galuega i lona taimi” (MF&F 88:73).

Uso e ma tuafafine, o le taimi lenei! Ua ou lagonaina ma ou te mautinoa ua faapea foi outou.

Sa ou manao e faatino lou fiafia ma lou faatuatua ia Iesu Keriso. Ao ou taalo lakapi faaAmerika, sa ou mafaufau i tulaga o fuafuaga o le taaloga. E le fesiligia lava le o atu i se taaloga pe afai ua lava tapena le matou au e faia ni faatinoga sao, o le a matou malo. Peitai, sa ma talanoa talu ai nei ma le faiaoga logologoa a BYU, o LaVell Edwards e uiga ia matou fuafuaga o le taaloga, ae na ia fai mai, “Ou te le popole po o le a le faatinoga e te valaauina pau lava le mea ia sikoa!” I le avea ai ma se tasi o ana tama autu i le laina i tua, sa ou mafaufau ai e sili atu ona faigata nai lo lena tulaga, ae atonu o lana filosifia faigofie o le mafuaaga lea ua faaigoa ai se malaetaalo ia te ia.

Talu ai ona ua tatou i ai uma i le au a le Alii, faamata ua tofu i tatou ma sa tatou lava fuafuaga o le taaloga? Ua tatou saunia ea e taaalo? Afai tatou te alolofa moni i o tatou aiga, uo, ma paaga, i le avea ai ma ni tagata o le ekalesia, faamata tatou te le o mananao ea e faasoa atu a tatou molimau e uiga i le talalelei toefuataiina ia i latou?

I le semina mo peresitene fou o le misiona na faia ia Iuni, na mauaina ai e se faamaumauga maoae o peresitene fou e 173 ma o latou faletua ni aoaoga faaiu ao lei amataina a latou auaunaga. Na saunoa uma ia sui e toa 15 o le Au Peresitene Sili ma le Korama a Aposetolo e Toasefulua i lenei vaega faapitoa.

Na tuuina mai e Elder L. Tom Perry ni manatu faaopoopo, “O se vaitau sili ona ofoofogia lenei i le talafaasolopito o le Ekalesia. Ua tutusa lenei mea ma mea maoae na tutupu i le talafaasolopito ua mavae, e pei o le Uluai Faaaliga, le meaalofa o le Tusi a Mamona, e pei o le Toefuataiga o le talalelei, e pei o mea uma ia na fausia lena faavae mo i tatou ina ia agai ai i luma ma aoao atu i le malo o lo tatou Tama oi le Lagi” (“Saunoaga Faaiu” [saunoaga na tuuina atu mo peresitene fou o misiona i le aso, 26 Iuni, 2013], 1, Church History Library, Salt Lake City).

Ua tatau ia i tatou ona matuai auai ma le naunautai ia tutusa ma le naunautaiga o o tatou taitai ma le tuuto o o tatou faifeautalai faamisiona. O le a le mafai ona alualu i luma lenei galuega i le ala o faamoemoe i ai le Alii pe a aunoa ma outou! E pei ona saunoa Peresitene Henry B. Eyring, “Po o le a lava lo tatou matutua, malosi, valaauga i le Ekalesia, po o nofoaga, ua tasi i tatou o e ua valaauina i le galuega e fesoasoani ia te Ia i Lana seleselega o agaga” (“E Tasi Lava i Tatou,” Liahona, Me 2013, 62).

Mata e mafai ona ou faasoa atu ia te outou se fuafuaga o le taaloga ua ou lagona le uunaiga e faatulaga ina ua uma ona tatalo, faitauina le mataupu e 13 o le Talai Lau Talalelei, ma mafaufau loloto i aafiaga ua mavae? Ou te valaauliaina outou e mafaufau i nei manatu e tolu ao outou mafaufau ia outou lava fuafuaga.

Muamua, fai se tatalo faapitoa ina ia aumai faalatalata atili se tasi i le Faaola ma Lana talalelei i aso uma. E mafai ona outou faia lenei mea e ala i le tagai atu i tagata uma o ni atalii ma afafine o le Atua o loo fesoasoani i le tasi ma le isi i la latou malaga o le toe foi i le aiga. Mafaufau i ni uo fou o le a e maua.

Lua, tatalo mo faifeautalai o loo galulue i la outou eria ma a latou tagata sailiili e ala i igoa i aso uma. Pau lava le auala e faia ai lenei mea o le faafeiloai ia i latou, tagai ia latou pine, valaau atu i o latou igoa, ma fesili i ai po o ai o loo latou aoaoina. O se saofaga atamai lenei mai ia Elder Russell M. Nelson, “Seiiloga ua e silafia le igoa ma foliga o se tagata, e le mafai ona fesoasoani le Alii ia te outou ia silafia lona loto.”

Sa ou auai i le papatisoga o se tamaitai lelei lea sa faasoa mai lana molimau. Ou te manatua pea e faavavau lona faapea mai, “Ou te lei mauaina lava muamua se toatele o ni tagata o tatalo mo au ma lagonaina le matua alofagia! Ou te iloa e moni lenei galuega!”

Tolu, valaaulia se uo i se gaoioiga i lou fale po o se isi nofoaga. Po o fea lava tou te o i ai po o le a le mea tou te faia, mafaufau po o ai o le a fiafia i le gaoioiga ona faalogo lea i le Agaga ao Ia taitaia outou.

Na aoao mai e le Faaola ia te au se lesona faigofie i lau aoaoga patino o le talalelei lea ou te talitonu, e faatatau ma le matagofie i “le faanatinatiina.” Pe a uunaia au faalelagona e uiga i se mea, e faaalia i lau tusitusi ma e masani lava ona faaiuina i le faailoga ofo lea e faailoa mai i le faauigaga o se “lagona malosi [po o se] faailoga o le matua taua tele” (Merriam-Webster’s Collegiate Dictionary, 11th ed. [2003], “exclamation point”).

Sa lofituina au i le amata ona oso ae o mau e uiga ‘i le faapotopotoina,” lea na faaiu i le faailoga ofo, e pei o le aioi faamomoiloto a Alema: “E, pe ana o au o se agelu, ma mafai ona ou maua le moomooga o lou loto, ina ia mafai ona ou alu atu ma tautala atu ma le pu a le Atua, ma i se leo e luluina ai le eleele, ma alaga atu le salamo i tagata uma!” (Alema 29:1).

O au sailiiliga ua iloa ai e 65 fuaitau, o loo faaalia mai ai lenei ituaiga o malosi o lagona faafaifeautalai, e aofia ai mea nei:

“Ua matua tele lava lona olioli i le agaga e salamo! …

“Ma afai e faapea lua te galulue i o oulua aso uma i le alagaina o le salamo i lenei nuu, ma aumai, nao se agaga e toatasi ia te a’u, e matua tele lava lo oulua olioli faatasi ma ia i le malo o lo’u Tama!

“Ma o lenei, afai o le a tele lo oulua olioli faatasi ma se agaga e toatasi na oulua aumai ia te a’u i le malo o lo’u Tama, e matua tele atu lo oulua olioli pe afai lua te aumai ni agaga e toatele ia te a’u!” (MF&F 18:13, 15–16).

O le fagua o au i nei mau tulagaese na faia ai se matafaioi taua i lou tofiga muamua o se Fitugafulu Eria. Sa fai si ou tamai popole i le avea ma se soa o le Aposetolo, o Elder Quentin L. Cook, i se konafesi faalesiteki. Ao ou savali atu i le ofisa o le peresitene o le siteki mo le uluai fonotaga o le faaiuga o lena vaiaso, sa ou matauina se pea seevae lanu auro foliga masaesae i luga o le kapineta i tua o lana kesi ma o loo i ai se mau e faaiuina i le faailoga ofo. Ao ou faitauina, sa ou lagona ua silafia e le Alii au suesuega, ua taliina au tatalo ma na Ia silafia lelei le mea sa ou manaomia e faatoafilemu ai lou loto popole.

Sa ou fesili atu i le peresitene o le siteki e faamatala mai ia te au le tala i seevae.

Sa ia fai mai:

“O seevae nei o se talavou na liliu mai i le Ekalesia e matitiva lona aiga, ae sa ia naunau lava e auauna atu i se misiona faamanuiaina ma sa ia faataunuuina i Kuatemala. I lona toe foi mai sa ma feiloai ai e tuuina atu se faamalologa faamamaluina ma ou iloa ai ona seevae ua matua masaesae lava. Na tuuina atu e lenei alii talavou mea uma na ia maua i le Alii, e aunoa ma se tele o se lagolago mai lona aiga, pe afai na i ai.

“Sa ia iloa lou sioa atu i ona seevae ma sa ia fesili mai, ‘Peresitene o i ai se mea o sese?’

“Na ou tali atu, ‘Leai, Faifeautalai, o loo lelei mea uma! E mafai ona ave ma au seevae na?’”

Na faaauau pea le peresitene o le siteki: “Sa lofituina au i le faaaloalo ma le alofa mo lenei faifeautalai ua toe foi mai! Na ou manao e faamamaluina lena aafiaga, ma o lea ua ou faa lanu auroina ona seevae. O se faamanatu ia te au pe a ou savali mai i totonu o lenei ofisa e uiga i taumafaiga e tatau ona tatou faia e tusa lava po o a o tatou tulaga. O le mau e mai ia Isaia: ‘E matua matagofie i luga o mauga o vae o le ua fai mai le tala lelei, o lē logologo mai le manuia; ua tala mai le tala lelei, ua faailoa mai le olataga; ua fai mai ia Siona, O loo pule lou Atua!’ (Isaia 52:7).”

Ou uso e ma tuafafine, atonu e lei mafaufau le faletua o le epikopo pe aisea ua valaau mai ai le perofeta ia te ia. Ou te molimau atu e le tatau ona toe mafaufau atili o ia po o i tatou i le—FAAILOGA OFO!

Ou te iloa e tatau ia i tatou taitoatasi ona atiina ae a tatou lava fuafuaga patino o le taaloga ina ia galulue soosootauau ma le naunautai ma faifeautalai faamisiona i le— FAAILOGA OFO!

Ou te faaopoopo atu lau molimau i le molimau a le Perofeta o Iosefa Samita: “Ma o lenei, ina ua mavae le tele o molimau ua tuuina mai e uiga ia te ia, o le molimau mulimuli lenei, i molimau uma, ua tuu atu e uiga ia te ia: O loo soifua o ia!” (MF&F 76:22). I le suafa paia o Iesu Keriso, amene.