Leai Ni Atua Ese

Saunia e Elder Dallin H. Oaks

O Le Korama a Aposetolo e Toasefululua

Pe o tatou auauna ea i mea ua faamuamua po o atua ese nai lo le Atua ua tatou tautino atu e tapuai i ai?

O Poloaiga e Sefulu o se vaega taua o faatuatuaga faaKerisiano ma faaIutaia. Na tuuina atu e le Atua i le fanauga a Isaraelu e ala i le perofeta o Mose, o tulafono muamua e lua e taitaia ai la tatou tapuaiga ma mea tatou te faamuamua. I le poloaiga muamua, ua poloai mai le Alii, “Aua nei e fai mo oe ni atua ese i ou luma” (Esoto 20:3). I seneturi mulimuli ane, ina ua fesiligia Iesu, “O le fea poloaiga o i le tulafono ua sili?” Na Ia fetalai mai, “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” (Mataio 22:36–37).

O le lona lua o Poloaiga e Sefulu o loo auiliili mai ai le faatonuga ina ia aua nei i ai ni atua ese ma faailoa mai le mea e sili ona taua e tatau ona faamuamua i o tatou olaga i le avea ai ma fanau a le Atua. “Aua e te fai mo oe se tupua ua ta, po o se faatusa lava” i le lagi po o le lalolagi (Esoto 20:4). Ona toe faaopoopo mai lea i le poloaiga, “Aua e te ifo i ai, aua foi e te auauna i ai” (Esoto 20:5). O se tulaga e sili atu nai lo le na o le faasaina o tupua faaletino, ua tau mai ai e lenei mea le tatau ai ona faamuamua i taimi uma. Ua faamalamalama mai e Ieova, “Aua o au o Ieova lou Atua, o le Atua fua, … ou te alofa i … e alofa mai ia te au, ma tausi mai i au poloaiga” (Esoto 20:5–6). O le uiga o le fua ua manino. O lona uiga autu faaEperu “o le i ai o ni lagona maaleale ma loloto” (Esoto 20:5, vaefaamatalaga e). Tatou te faatiga i le Atua pe a tatou “ifo” pe “auauna” i atua ese—pe a i ai foi nisi mea tatou te faamuamuaina.¹

I.

O a nisi mea o loo faamuamua e tagata o loo “ifo i ai” pe o “auauna i ai” ua sili atu i lo le Atua—e oo lava i tagata faalelotu—i o tatou aso? Mafaufau i filifiliga nei, e tutusa uma lava i lo tatou lalolagi:

Tu ma aga faaleaganuu ma faaleaiga
Faasaoga faaupufai
Siitaga i galuega
Meatotino faalelalolagi
Sailiga o mea faafiafia
Pule, tautaua, ma le mamalu

Afai e e leai ma se tasi o nei faataitaiga e foliga mai e faatatau i soo se tasi o i tatou, masalo e mafai ona tatou fautuaina mai nisi o faataitaiga e faatatau ia i tatou. E sili atu le taua o le mataupu faavae nai lo faataitaiga a tagata taitoatasi. O le mataupu faavae e le o faapea mai pe ua i ai nisi mea ua tatou faamuamuaina. O le fesili o loo tuuina mai e le poloaiga lona lua o le “O le a se mea silisili o tatou faamuamuaina?” Pe o tatou auauna ea i mea ua faamuamua po o atua ese nai lo le Atua ua tatou tautino atu e tapuai i ai? Pe ua tatou faagaloina ea le Faaola o le na aoao mai afai tatou te alolofa ia te Ia, o le a tatou tausi i Ana poloaiga? (tagai Ioane 14:15). Afai o lea, o lona uiga ua sese mea ua tatou faamuamua ona ua leai so tatou popole mo le faaleagaga, faapea ai ma manaoga le taupulea ia ua taatele i lo tatou vaitaimi.

II.

Mo le Au Paia o Aso e Gata Ai, o poloaiga a le Atua e faavae ma e le mavavaeeseina mai le fuafuaga a le Atua mo Lana fanau—o le ata sili o le faaolataga. O lenei fuafuaga, e ta’ua i nisi taimi o le “fuafuaga sili o le fiafia” (Alema 42:8), ma o loo faamatalaina ai lo tatou tupuaga ma le taunuuga o ni fanau a le Atua—le mea sa tatou o mai ai, aisea ua tatou i ai iinei, ma po o fea o loo tatou o i ai. O loo faamalamalama ai le faamoemoega o le foafoaga ma tulaga o le olaga faaletino, e aofia ai ia poloaiga a le Atua, le manaomia o se Faaola, ma le matafaioi taua o aiga faaletino ma aiga e faavavau. Afai o tatou o le Au Paia o Aso e Gata Ai, o e ua tuuina mai i ai lenei malamalama, ae tatou te le faatulagaina a tatou mea e faamuamua e tusa ai ma lenei fuafuaga, ua lamatia la i tatou i le auauna atu i atua ese.

O le malamalama i le fuafuaga a le Atua mo Ana fanau ua maua ai e le Au Paia o Aso e Gata Ai se vaaiga tulagaese e uiga i le faaipoipoga ma le aiga. Ua iloa lelei i tatou o se ekalesia e faamuamua le aiga. O la tatou mataupu faalelotu e amata i matua faalelagi, ma o lo tatou faamoemoega sili o le mauaina o le atoaga o le faaeaga e faavavau, lea ua tatou iloa ua na o le sootaga po o mafutaga faaleaiga lava ua mafai ai. Ua tatou iloa o le faaipoipoga o se alii ma se tamaitai e manaomia mo le faataunuuina o le fuafuaga a le Atua. Ua na o le pau lenei o le ituaiga faaipoipoga e maua ai se faatulagaga faatagaina mo le fanau mai faaletino ma le sauniaina o tagata o le aiga mo le ola e faavavau. Tatou te vaavaai atu i le faaipoipoga ma le fanauina ma le tausiaina o fanau o se vaega o le fuafuaga a le Atua ma o se tiute paia a i latou o e ua tuuina atu i ai le avanoa e faia ai. Ua tatou talitonu o oa silisili o le lalolagi ma le lagi o a tatou fanau ma e tutupu mai ia i tatou i le lumanai.

III.

Ona o mea ua tatou malamalama i ai e uiga i le matafaioi tonu e faavavau o le aiga, ua tatou faanoanoa ai i le televave o le faaitiitia o pepe e fananau mai ma faaipoipoga i le tele o atunuu i Sisifo o a latou aganuu faasolopito e faaKerisiano ma faaIutaia. O ni lipoti nei mai ni puna faamoemoeina:

O le Iunaite Setete i le taimi nei ua sili atu le maualalo o le aofaiga o pepe fananau mai i lona talafaasolopito,² ma i le tele o malo o le Iuni a Europa ma isi malo mautu o le aofai o pepe fananau mai ua i lalo ifo o le tulaga e tatau ai ina ia faatumauina ai pea lo latou faitau aofai o tagata.³ O lenei tulaga ua lamatia ai le saogalemu o aganuu e oo lava i malo.
I Amerika, o le pasene o talavou matutua mai le vaitausaga o le 18 i le 29 o e ua faaipoipo ua pau mai le 59 pasene i le 1960 i le 20 pasene i le 2010.⁴ O le vaitausaga masani lea ua i ai nei mo tagata faatoa faaipoipo ma o se tulaga sili ona maualuga i le talafaasolopito: o le 26 mo tamaitai ma le lata i le 29 mo alii.⁵
I le tele o atunuu ma aganuu (1) o se aiga masani e i ai se tina ma se tama ua faaipoipo faatasi ma le fanau ua avea ma se tuusaunoaga nai lo le tulafono, (2) o le sailia o se galuega nai lo le faaipoipoga ma le fanauina o se fanau o se filifiliga ua faateleina a le toatele o tamaitai talavou, ma le (3) o le tuuitiitia o le matafaioi ma le manaomia moni o tama.

I le lotolotoi o nei faiga ua faapopoleina ai i tatou, ua tatou malamalama i le fuafuaga a le Atua e mo Ana fanau uma ma e alofa le Atua i Ana fanau uma, i soo se mea.⁶ Ua tautino mai i le mataupu muamua o le Tusi a Mamona e faapea “o [le] mana [o le Atua], ma [lona] agalelei, ma [lona] alofa mutimutivale ua i ai i luga o e uma o nonofo i le lalolagi” (1 Nifae 1:14). Na toe tautino mai i se isi mataupu e faapea “ua foaifua mai e ia lana olataga mo tagata uma” ma o “tagata uma o le tasi e pei o le tasi, ma ua leai se tasi ua faasaina” (2 Nifae 26:27–28). O le mea lea, ua aoao mai ai tusitusiga paia e tatau ona tatou agaalofa ma agalelei atu i tagata uma (tagai 1 Tesalonia 3:12; 1 Ioane 3:17; MF&F 121:45).

IV.

Tatou te faaaloalo foi i talitonuga faalelotu a tagata uma e oo lava ia i latou ua faateleina le faitau aofai o e ua tautino mai e le talitonu i le Atua. Ua tatou iloa e ala i le mana o le filifiliga ua tuuina mai e le Atua, e toatele o le a i ai ni talitonuga e ese mai ia i tatou, ae tatou te faamoemoe o le a latou tuuina mai lea lava faaaloalo e tasi ia tatou talitonuga faalelotu ma ia malamalama o o tatou talitonuga e manaomia ai lo tatou faia o nisi o filifiliga ma amioga e ese mai ia i latou. Mo se faataitaiga, tatou te talitonu, o se vaega taua o Lana ata o le faaolataga, ua faatulaga ai e le Atua se tulaga faatonuina e faavavau e faapea o le sootaga faalefeusuaiga ua na o le va lava o se alii ma se tamaitai ua uma ona faaipoipo e tatau ona faatino ai.

O le mana e foafoa ai le ola faaletino o se mana sili lea ona faaeaina na tuuina mai e le Atua i Ana fanau. O lona faaaogaina o loo faatonu mai i le poloaiga muamua a le Atua ia Atamu ma Eva (tagai Kenese 1:28), ae o isi poloaiga taua na tuuina mai e faasa ai lona faaaogaina sese (tagai Esoto 20:14; 1 Tesalonia 4:3). O le faamamafa ua tatou tuuina i le tulafono o le legavia ua faamalamalama mai e ala i lo tatou malamalamaaga i le faamoemoega o o tatou mana foafoa i le faataunuuina o le fuafuaga a le Atua. O le faaaogaina o o tatou mana foafoa i fafo atu o noataga o le faaipoipoga i le va o se alii ma se tamaitai, o se agasala ma o le tetee lea i le fuafuaga a le Atua mo le faaeaga o Ana fanau.

O le faamamafa lea tatou te faapipii atu i le tulafono o le legavia ua faamatala ai lo tatou tautinoga i le mamanu o le faaipoipoga lea na amatalia e Atamu ma Eva ma o loo faaauau pea i le talafaasolopito e avea ma mamanu a le Atua mo le sootaga o mana foafoa i le va o Ona atalii ma afafine ma mo le faafaileleina o Ana fanau. O le mea e lelei ai, o le toatele o tagata e fesootai ma isi tapuaiga po o faalapotopotoga latou te ioe faatasi ma i tatou i le natura ma le taua o le faaipoipoga, o nisi e ioe i le faavae o aoaoga faalelotu ae o isi o faavae o mea latou te manatu ua sili ona lelei mo nuu ma malo.

O lo tatou malamalama i le fuafuaga a le Atua mo Ana fanau⁷ ua faamatalaina ai le mafuaaga ua tatou atuatuvale ai i le faateleina o le aofai o tamaiti o loo fananau mai i fafo atu o le faaipoipoga—i le taimi nei o le 41 pasene o pepe uma o loo fananau i totonu o le Iunaite Setete⁸—ma o le aofai o ulugalii o loo nonofo faatasi e lei faaipoipo ua matua faateleina i le afa seneturi ua mavae. O le 50 tausaga ua mavae, sa na o sina pasene itiiti lava o ulugalii na muamua nonofo faapouliuli ona faaipoipo mulimuli ai lea. I le taimi nei e 60 pasene ua sili ai ulugalii faapouliuli i lo ulugalii faaipoipo.⁹ Ma ua faateleina le taliaina o lenei mea, aemaise lava i talavou. Na maua i ni faamaumauga o ni sailiiliga lata mai pe a ma le 50 pasene o talavou na ta’ua e faapea o le fanauina o pepe ae lei faaipoipo o se “ituaiga olaga talafeagai.”¹⁰

V.

E tele ia faafitauli faaupufai ma faaagafesootai mo suiga faaletulafono ma aiaiga faavae e faatulagaina ai ni amioga e feteenai ma tulafono a le Atua e uiga i amioga feusuai ma le natura ma faamoemoega e faavavau o le faaipoipoga ma le fanauina o fanau. O nei faafitauli ua leva ona faatagaina ai ia faaipoipoga i le va o itupa e tasi i le tele o setete ma malo. O isi faafitauli o le a faafenumiaia ai itupa pe suia ai na eseesega ina ia tutusa i le va o alii ma tamaitai ia e taua i le faataunuuina o le fuafuaga sili o le fiafia a le Atua.

O lo tatou malamalamaaga i le fuafuaga a le Atua ma Lana aoaoga faavae ua aumaia ai ia i tatou se vaaiga e faavavau e le faataga ai i tatou ia laaloa le vaai i ia ituaiga amioga po o le saili o ni faamaoniga mai tulafono e faataga ai na amioga. Ma, e ese mai la i isi faalapotopotoga lea e mafai ona suia a latou aiaiga faavae ma e oo lava ia latou aoaoga faavae, o a tatou aiaiga faavae e fuafuaina i upumoni a le Atua ua folafola mai e le masuia.

O la tatou mataupu faavae o le faatuatua e sefululua o loo ta’ua ai lo tatou talitonuga i le usiusitai i pulega o malo ma le “usiusitai, faamamaluina, ma le lagolagoina o le tulafono.” Ae e le mafai e tulafono faaletagata ona taumamaina ni amioga ia ua tautino mai e le Atua e le mama. O le tuuto atu i le mea e aupito sili ona faamuamua—ia alofa ma auauna atu i le Atua—e manaomia ai lo tatou faalagolago atu i Lana tulafono mo lo tatou tulaga faatonuina o le amio. Mo se faataitaiga, ua tatou tumau i lalo o le poloaiga paia e aua le mulilua pe faitaaga e tusa lava po o na amioga ua le o toe avea ma se solitulafono i lalo o tulafono a setete po o atunuu o loo tatou aumau ai. E faapena foi i tulafono ua faatagaina ai le “faaipoipoga o itupa e tasi” e le suia ai lava le tulafono a le Atua o le faaipoipoga po o Ana poloaiga ma a tatou tulaga faatonuina e faatatau i ai. Tatou te tumau pea i lalo o le feagaiga ia alolofa i le Atua ma tausi Ana poloaiga ma ia aloese mai le ifo pe auauna atu i atua ese ma isi mea e faamuamua—e oo lava i mea ia ua amata ona lauiloa i o tatou vaitaimi ma nofoaga patino.

I lenei naunautaiga, atonu o loo malamalama sese ai [nisi] ia i tatou, ma e ono oo mai ai ia i tatou ni tuuaiga o le manatu faapito, mafatia ai i le faailogalanu, po o le onosaia o le aiaina o lo tatou saolotoga e tapuai ai faalelotu. Afai o lea, ou te manatu e tatau ona tatou manatua ia mea tatou te faamuamua—ia auauna atu i le Atua—ma, faapei o tatou augatama paionia, ia onosaia o tatou tofotofoga patino i le malosi lava e tasi sa latou faaalia.

E i ai se aoaoga a Peresitene Thomas S. Monson e faatatau i le tulaga lenei. I lenei konafesi i le 27 tausaga ua mavae, sa ia tautino mai ma le lototoa: “Ia tatou maua le lototoa e tetee atu ai i taaiga, le lototoa e tutu ai mo mataupu faavae. O le lototoa, ae le o le palaai, e aumai ai le fiafia i le faamaoniga a le Atua. E avea le lototoa ma uiga mama olaola ma faatosina pe a manatu i ai e le gata o le loto ia oti ma le mamalu, ae o le naunautaiga foi ia ola faamamaluina. O le tagata palaai o le tagata lea e fefe e fai le mea ua ia iloa e sao ona o le a le fiafia pe talie i ai isi tagata. Ia manatua e tofu lava tagata uma ma mea e fefefe i ai, ae o i latou e faafeagai ma mea e fefefe ai ma le mamalu ua ia i latou foi le lototoa.”¹¹

Ou te tatalo ina ia aua nei o tatou tuu atu i luitau le tumau o le olaga faaletino mafua ai ona tatou faagaloina poloaiga sili ma mea e faamuamua ua tuuina mai e lo tatou Foafoa ma lo tatou Faaola. E le tatau ona pupu o tatou loto i mea o le lalolagi ma saili i viiga a tagata (tagai MF&F 121:35) nei o tatou le iloa atu lo tatou taunuuga e faavavau. Ua tatou iloa le fuafuaga a le Atua mo Ana fanau—o i tatou ua uma ona osifeagaiga i lea fuafuaga—ua i ai se tiutetauave manino. E le tatau lava ona galo ia i tatou lo tatou faanaunautaiga silisili, o le ausia lea o le ola e faavavau.¹² E le tatau ona tatou tuuitiitia mea tatou te faamuamuaina—ia aua nei i ai ni atua ese ma aua nei auauna i nisi mea e faamuamua nai lo le Atua le Tama ma Lona Alo, lo tatou Faaola, o Iesu Keriso.

Tau ina ia fesoasoani mai le Atua ia i tatou ina ia malamalama i lenei mea e faamuamua ma ia malamalama foi i ai isi a o tatou saili atu e tulitulimatagauina i se auala atamai ma le alofa, ou te tatalo ai i le suafa o Iesu Keriso, amene.