Susū Maia i le Konafesi
Saunia e Peresitene Thomas S. Monson
O lau tatalo ina ia faatumuina i tatou uma e le Agaga o le Alii a o tatou faalogologo atu ma aoao.
Ua matagofie lava ou uso e ma tuafafine, le toe feiloai faatasi ai foi. Ua silia teisi nei ma le 183 tausaga talu ona faatulagaina e le Perofeta o Iosefa Samita le Ekalesia, i lalo o le taitaiga a le Alii. I lena sauniga i le aso 6 Aperila, 1830, sa auai ai tagata e toaono o le Ekalesia.1
Ua ou fiafia lava e faasilasila atu i le lua vaiaso ua tuanai ua oo atu ai le aofai o tagata o le Ekalesia i le 15 miliona. O loo faaauau pea ona tuputupu ae le Ekalesia ma le mausali ma ua suia ai olaga o tagata e toatele i tausaga uma. Ua salalau atu i le salafa o le lalolagi a o saili e a tatou faifeautalai i latou o loo sailia le upumoni.
Ua silia teisi lava ma le tausaga talu ona ou faasilasila atu le tuuitiitia o le tausaga o auaunaga faafaifeautalai. Talu mai lena taimi, ua faateleina lava le aofai o faifeautalai faamisiona mai le 58,500 ia Oketopa 2012 i le 80, 333 i le asō. E maeu le ofoofogia ma le musuia o le tali mai ua tatou molimauina!
E le o i ai lava i tusitusiga paia se isi folafolaga e sili atu ona fitoitonu, leai se tiutetauave e sili atu ona noatia, leai se faatonuga e sili atu ona tuusao nai lo le poloaiga na tuuina mai e le Alii toetu ina ua Ia faaali atu i Kalilaia i aposetolo e toasefulutasi. Sa Ia fetalai, “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Atalii, ma le Agaga Paia.”2 Sa tautino mai le Perofeta o Iosefa Samita, “I le uma ai o faamatalaga uma lava ua faia, o le tiute silisili ma matua taua o le talaiina o le Talalelei.”3 O nisi o outou o loo i ai iinei i le asō o le a manatuaina ia upu a Peresitene Tavita O. MaKei, na faaupuina le fuaitau ua masani ai “O tagata uma lava o se faifeautalai!”4
Ou te faaopoopo atu foi sa’u upu i a latou saunoaga. O le taimi lenei mo tagata uma ma faifeautalai e o mai faatasi ai, ia galulue faatasi, ma galueaiina le tovine a le Alii ina ia aumai agaga ia te Ia. Ua Ia saunia auala mo i tatou e faasoa atu ai le talalelei i le anoanoai o ala, ma o le a Ia fesoasoani mai ia i tatou i la tatou galuega pe afai o le a tatou galulue i le faatuatua e faataunuu Lana galuega.
Ina ia fesoasoani e faatumauina le faatoateleina o faifeautalai, na ou talosagaina ai o tatou tagata i se taimi ua fano ia foai atu, pe a latou gafatia, i le tupe mo faifeautalai i a latou uarota po o le Tupe mo Faifeautalai Lautele a le Ekalesia. O le tali mai i lena talosaga e faamalieloto ma ua fesoasoani e lagolago le faitau afe o faifeautalai ia e le o faatagaina e o latou tulaga i latou e lagolago ai i latou lava. Ou te faafetai atu ia te outou mo a outou sao lotofoai. E manaomia pea le fesoasoani, ina ia mafai ona faaauau pea ona tatou fesoasoani atu ia i latou o loo i ai se manao tele e auauna atu ae ua latou le mafaia e i latou lava ona maua ni auala e faia ai.
Ia uso e ma tuafafine, ua tatou o mai iinei ina ia aoaoina ma musuiaina. E anoanoai savali, o le a aofia ai le tele o autu o le talalelei, o le a tuuina atu i nei aso e lua. O na alii ma tamaitai o le a saunoa atu ia te outou na saili atu i le fesoasoaniga a le lagi e faatatau i savali o le a latou tuuina atu.
O lau tatalo ina ia faatumuina i tatou uma e le Agaga o le Alii a o tatou faalogologo atu ma aoao. I le suafa o lo tatou Faaola, o Iesu Keriso, amene.