Ia Agamalu ma Maualalo le Loto
Saunia e Elder Ulisses Soares
O Le Au Peresitene o Fitugafulu
O le agamalu e le o le vaivai, ae o lona uiga o le amio pulea faatasi ai ma le amiolelei ma le agalelei.
Na aoao mai Mamona faapea “e le mafai [e se tagata] ona i ai ia te ia le faatuatua ma le faamoemoe, vagana ai ua agamalu, ma maualalo o ia i le loto.”1 Na ia faaopoopo mai a aunoa ma ia ituaiga uiga, “faatuatua ma le faamoemoe, ona e leai se tasi e ono talia i luma o le Atua, vagana ai i latou o e ua agamalu ma maualalalo i le loto.”2
O le agamalu o se uiga auau mama o i latou o e ua “matau i le Atua, amiotonu, faamaualalo, e mafai ona aoaoina, ma le onosai i puapuaga.”3 O i latou o e ua i ai lenei uiga e agavaivai, agalelei ma naunau e mulimuli ia Iesu Keriso ma o o latou natura e toafimalie, filemu, faapalepale, ma usitai.
Na aoao atu e le Aposetolo o Paulo e faapea o le agamalu o le fua o le Agaga.4 O le mea lea e matua faigofie ona maua pe afai tatou te “ola i le Agaga.”5 Ma o le ola i le Agaga, e tatau ona atagia mai i o tatou olaga le amiotonu i luma o le Alii.
A tatou ave i o tatou luga le suafa o Keriso, ua faamoemoeina ia tatou taumafai e faataitaia Ona uiga ma sui a tatou amio ia avea atili e faapei o Ia i aso taitasi. Na apoapoai atu le Faaola i Ona soo, e faapea, “Ia atoatoa ona lelei o la outou amio, e pei o lo outou Tama o i le lagi e atoatoa ona lelei o ia.”6 Afai tatou te “o mai ia Keriso, ma faafiti i [tatou] lava mai mea e le faaleatua uma; … ma alolofa i le Atua,” o le alofa tunoa o Keriso o le a mafai ai i se aso ona tatou atoatoa ia te Ia.7
“O uiga faaKeriso o ni meaalofa ia mai le Atua. E oo mai [nei uiga] a o [tatou] faaaogaina ma le amiotonu lo [tatou] faitalia. … Faatasi ai ma se manao e faafiafia le Atua, [e ao ona tatou] iloa o [o tatou] vaivaiga ma moomooga ma popolega ia faaleleia.”8
O le agamalu e taua mo i tatou ina ia avea atili ai e faapei o Keriso. A aunoa ma le [agamalu] e le mafai ona tatou atiina ae isi uiga mama taua. O le agamalu e le o le vaivai, ae o lona uiga o le amio pulea faatasi ai ma le amiolelei ma le agalelei, ua faaalia ai le malosi, toafimalie, faatauaina lelei o oe lava ia, ma le loto pulea.
O le agamalu o se tasi lea o uiga sa sili ona taatele i le soifuaga o le Faaola. O Ia lava na Ia aoao atu i Ona soo, “Ia outou faaaoao ia te au, aua o au le agamalu ma le loto maualalo.”9
Ua faamanuiaina i tatou e fananau mai ma le fatu o le agamalu i o tatou loto. E manaomia ona tatou malamalama e le mafai ona ola ma atiae lena fatu i le emo o se mata ae i le faagasologa o le taimi. Ua talosagaina i tatou e le Faaola ina ia “ave [o tatou] satauro i aso fai soo,”10 o lona uiga e tatau ona avea o se taumafaiga ma se naunautaiga tumau.
Na aoao mai Peresitene Lorenzo Snow, o le perofeta lona lima o la tatou tisipenisione, “O la tatou tiute le taumafai ina ia atoatoa, … ia faaleleia i aso taitasi, ma suesue mea na tatou faia i le vaiaso ua tuanai ma faia mea ia sili atu le lelei i lenei vaiaso; faia ni mea i le asō ia sili atu nai lo ananafi.”11 O lea, o le laasaga muamua lava ina ia agamalu o le faaleleia lea i aso taitasi. E manaomia ona tatou taumafai i aso taitasi ina ia sili atu le asō nai lo le aso ua mavae ao tatou agai atu i luma i lenei faagasologa.
Na faaopoopo mai Peresitene Snow:
“E i ai nai a tatou gaoioiga faavalevalea ma o tatou vaivaiga; e tatau ona tatou taumafai e faatoilaloina i le vave e mafai ai, ma … tatau ona [tuuina] lenei lagona i loto o a tatou fanau … ina ia mafai ai ona latou aoao e [amio pulea] ai ma le tatau i Ona luma i tulaga uma lava.
“Afai e mafai e le tane ona nonofo faatasi ma lana ava i le aso e tasi, e aunoa ma le tauaimisa po o le aunoa ma le agaleaga atu i se tasi, pe, aunoa foi ma le faatiga i le Agaga o le Atua … ; ua matua atoatoa lava o ia. Ona taumafai lea e faia faapena i le aso e sosoo ai. Ae, a faapea e toilalo o ia i lana taumafaiga i le aso e sosoo ai, e le tatau ona avea lena ma mafuaaga o le a le taumafai ai ia faamanuiaina i le faia o lena mea i le aso lona tolu.”12
O le faailoa atu o lo tatou tuuto ma le maelega, o le a foai mai ai e le Alii ia i tatou ia mea ia na le mafai ona tatou mauaina ona o lo tatou le atoatoa ma vaivaiga faaletagata.
O le isi laasaga taua o le mauaina o le agamalu o le aoao lea o le auala e pulea ai lo tatou ita. Talu ai e nofo le tagata natura i totonu o i tatou taitoatasi ma ona tatou te nonofo i se lalolagi ua tumu i ta’iga, o le puleaina o lo tatou ita e mafai ona avea ma se tasi o luitau i o tatou olaga. Mafaufau mo ni nai sekone pe faapefea ona e tali atu pe afai e le gauai atu se tasi i ou manaoga i le taimi tonu lea e te manao ai ia i latou e gauai atu. Ae a pe a le malilie tagata i ou manatu, e ui lava ua e matua mautinoa o le tali tonu lea i se faafitauli? O le a sau tali pe a faatiga se tasi ia te oe, faitio i au taumafaiga, pe agaleaga atu foi ona na te le o maua se faalogona lelei? O taimi faapea ma isi tulaga faigata, e tatau ai ona tatou iloa pulea lo tatou ita ma faailoa atu o tatou lagona ma le onosai ma se faatauanau agamalu. E taua tele lenei mea i totonu o o tatou aiga faapea ma a tatou sootaga ma a tatou soa e faavavau. I le aluga o le 31 tausaga talu ona ou faaipoipo i la’u manamea, e masani lava ona ia tuuina mai ia te au ni faamanatu agamalu o lenei mea ao ma fetaiai ai ma ni luitau le mautonu o le olaga.
Na tuuina atu e le Aposetolo o Paulo ni faatonuga o loo maua lea i Lana Tusi Lona Lua ia Timoteo:
“Aua e le tatau ona finau o le auauna a le Alii, a ia agamalu i tagata uma, ia mafaia ona aoao atu, ma ia onosai,
“Ia aoao atu ma le agamalu i e o finau mai; pe mafai lava le Atua ona foai atu ia te i latou le salamo, ina ia latou iloa lelei le upu moni;
“Ia latou ala mai foi e na moe.”13
O le puleaina o a tatou amioga, i le toafimalie ma le faapalepale, ma aloese mai finauga, o le a amata ona tatou agavaa mo le meaalofa o le agamalu. Sa saunoa mai i se tasi taimi ia Peresitene Henry B. Eyring, “A tatou puleaina lo tatou ita i le faatuatua ma taofi lo tatou faamaualuga, e tuu mai e le Agaga Paia Lana faamaoniga, ma o le a mautinoa lava ia folafolaga ma feagaiga paia.”14
O le isi laasaga e mauaina ai le agamalu o le lotomaualalo lea. Na faatonuina e le Alii Thomas B. Marsh e ala i le Perofeta o Iosefa Samita faapea, “Ia e lotomaualalo; ma o le a taitai oe e le Alii lou Atua i le lima, ma tuu mai ia te oe tali i au tatalo.”15
Ou te talitonu, uso e ma tuafafine, ua na o i latou o e lotomaualalo e mafai ona iloa ma malamalama i tali a le Alii i a latou tatalo. O e lotomaualalo e mafai ona aoaoina, iloa le ala o latou faalagolago atu ai i le Atua ma mananao ai ina ia mulimuli i Lona finagalo. O i latou o e lotomaualalo e agamalu ma maua le tomai e uunaia ai isi ia faapena o latou uiga. O le folafolaga a le Atua i e lotomaualalo o le a Ia taitaiina i latou i le lima. Ou te matua talitonu o le a tatou aloese mai ala piopio ma faanoanoaga i o tatou olaga pe a tatou savavali faatasi pea ma le Alii.
O se tasi o faataitaiga o le agamalu o aso nei e sili ona matagofie ua ou iloaina o le liua o Uso Moses Mahlangu.Sa amata lona liua i le 1964, ina ua ia mauaina se kopi o le Tusi a Mamona. Sa faagaeetiaina o ia ao ia faitauina lenei tusi, ae ina ua oo i le amataga o le vaitau o le 70 faatoa ia vaai ai i se faailo o le Ekalesia AAG i luga o se fale i Johannesburg, Aferika i Saute ao ia savali atu i le auala. Na fiafia Uso Mahlangu ma ulu atu ai i le fale ina ia aoao atili i le Ekalesia. Na tau atu ia te ia ma le agalelei e le mafai ona ia auai i sauniga pe papatisoina ona sa lei faatagaina e tulafono a le taunuu i lena taimi.
Na talia e Uso Mahlangu lena faaiuga ma le agamalu, loto maualalo, ma e aunoa ma se ita, ae sa faaauau pea ona ia maua se naunautaiga malosi ina ia aoao atili e uiga i le Ekalesia. Sa ia talosagaina taitai o le Ekalesia pe mafai ona faamatala se tasi o faamalama o le falelotu i taimi o sauniga o le Aso Sa ina ia mafai ai ona ia saofai i fafo ma faalogo atu i sauniga. Mo le tele o tausaga, na auai ai e le aunoa ia le aiga o Uso Mahlangu ma uo i le lotu “e ala atu i se faamalama.” I se tasi aso i le 1980 na tau atu ai ia i latou ua mafai ona latou auai i le lotu ma papatisoina. Oka o se aso ina a faamamaluina mo Uso Mahlangu.
Mulimuli ane, na faatuina e le Ekalesia se paranesi i lona alalafaga i Soweto. Pe ana leai le naunautaiga, lototele, ma le faamaoni o tagata e pei o Uso Mahlangu o e na tumau faamaoni mo le tele o tausaga i tulaga faigata, semanu e le tupu lenei mea.
O se tasi o uo a Uso Mahlangu, o le sa auai i le Ekalesia i lea lava taimi e tasi, na toe faamatala maia lenei tala ia te au ina ua ou asia le siteki a Soweto. I le faaiuga o la maua talanoaga, sa ia opoina au. Sa ou lagonaina i lena taimi, uso e ma tuafafine, e pei o opoina au e aao agaalofa o le Faaola. Na faaalia i fofoga o lenei uso lelei le agamalu. Ma se loto ua tumu i le agalelei ma le loto faafetai loloto, sa ia talosaga mai ai pe mafai lava le na ona ou tau atu ia Peresitene Thomas S. Monson lona lotofaafetai ma le faamanuiaina o ia ma le toatele o isi mo le mauaina o le talalelei moni i o latou olaga. O faataitaiga o le agamalu o Uso Mahlangu ma ana uo na matuai uunaia ai le tele o olaga mo le lelei—aemaise lava au.
Uso e ma tuafafine, ou te talitonu o le Faaola o Iesu Keriso o le faataitaiga sili lea o le agamalu. Na oo lava i ona toe taimi o Lona soifuaga faaletino, i le tuuaia ma le sauaina le tonu, amoina ma le tiga o Lona satauro i luga i Kolokota, ulagia ma upuleagaina e Ona fili, tuulafoaia e le toatele o e na iloa o Ia ma molimauina Ana vavega, sa tuituiina o Ia i luga o le satauro.
Na oo lava ina ua mavae le tiga matuitui faaletino, na liliu atu le Alii i Lona Tama ma fetalai atu mai le loloto o Lona loto agamalu ma le maualalo: “Lou Tama e, ia e faamagaloina atu ia te i latou, aua ua latou le iloa le mea ua latou faia.”16 Na fetaiai Keriso ma tiga matuitui faaletino ma le faaleagaga, ma tuuina mai ai ia i tatou le avanoa e sui ai o tatou uiga faaleagaga ma ia agamalu faapei o Ia.
Ou te molimau atu o Iesu Keriso o lo tatou Faaola. Ou te molimau atu ia te outou, ma le faafetai i Lona alofa, ua mafai ai e i tatou ona suia. E mafai ona lafoai o tatou vaivaiga. E mafai ona teenaina ia faatosinaga leaga i o tatou olaga, pulea lo tatou ita, agamalu, ma atiina ae ia uiga o lo tatou Faaola. Na Ia faaali mai ia i tatou le ala. Na Ia tuuina mai ia i tatou le faataitaiga atoatoa ma poloaiina i tatou taitoatasi ina ia avea faapei o Ia. O Lana valaaulia ia i tatou, o le mulimuli atu lea ia te Ia, mulimuli i Lana faataitaiga, ma ia avea faapei o Ia. Ou te molimau atu ai i nei upumoni i le suafa paia, o Iesu Keriso, amene.