Ua Ia Valaau Mai e Folafola Atu Lana Afioga
Saunia e Elder Randy D. Funk
O Le Fitugafulu
Afai tou te lotomaualalo ma usiusitai ma faafofoga i le leo o le Agaga, o le a outou maua le fiafiaga sili i a outou auaunaga o se faifeautalai.
Ina ua lagolagoina au o se Pulega Aoao ia Aperila ua tuanai atu, sa ou auauna atu o se peresitene o le misiona i Initia. Sa ou matauina mo au lava se mea sa tau mai ia te au e se isi peresitene o le misiona na muamua atu: “E ese le ofoofogia o faifeautalai o lenei Ekalesia.”1
O se tasi o le toatele o faifeautalai mataina sa matou galulue faatasi ai ma Sister Funk, o Elder Pokhrel mai Nepal. E na o le lua tausaga talu ona avea o ia ma se tagata o le Ekalesia, ae valaauina o ia e talai i le Misiona a Bangalore Initia, o se misiona faaPeretania. Na te tau atu ia te oe sa lei saunia lelei o ia. O se mea sa malamalama i ai. Sa le i vaai lava o ia i se faifeautalai seia oo ina avea o ia ma se faifeautalai, aua sa leai ni faifeautalai talavou e auauna atu i Nepal. Sa le lelei lana faitau i le faaPeretania ina ia malamalama ai i faatonuga sa i ai i lona valaauga. Ina ua taunuu atu i le nofoaga autu mo le aoaoina o faifeautalai, nai lo le aumaia o ofuvae mananaia, ofutino papae, ma fusiua, sa ia teuina i lana ato, ma i ana lava upu, “e lima pea o ofuvae li, o nai mitiafu, ma le tele o fagu teu ulu (gel).”2
E oo lava ina ua ia maua laei talafeagai mulimuli ane, sa ia faapea mai na ia lagona le le atoatoa i aso uma i nai uluai vaiaso. Sa ia faamatalaina lena taimi o lana misiona: “Sa le gata na faigata le Igilisi, ae sa luitauina foi le galuega. … O le faatumutumuga o nei faigata uma, sa ou fiaai, lelava, ma ma’i manatu i le aiga. … E ui lava sa faigata ia tulaga, ae sa ou naunau pea. Sa ou lagona le vaivai ma le le atoatoa. Sa ou tatalo i na taimi mo le Tama Faalelagi ia fesoasoani mai ia te au. E aunoa ma le toilalo, o taimi uma sa ou tatalo ai, na ou lagona lava le mafanafana.”3
E ui lava sa fou ma luitauina le galuega faafaifeautalai mo Elder Pokhrel, ae sa ia auauna atu ma le faatuatua maoae ma le faamaoni, i le saili atu ia malamalama ma mulimuli i mea sa ia aoaoina mai i tusitusiga paia, Tala’i La’u Talalelei, ma ona taitai misiona. Sa avea o ia ma se faiaoga mamana o le talalelei—i le gagana faaPeretania—ma se taitai sili ona lelei. Ina ua maea lana misiona ma nai taimi i Nepal, sa ia toe foi atu i Initia e faaauau lana aoga. Talu mai Ianuari, o loo ia auauna atu o se peresitene o le paranesi i New Delhi. Ona o le tuputupuae moni sa ia aafia ai o se faifeautalai, ua ia faaauau pea ona saofaga atu i le tuputupuae moni o le Ekalesia i Initia.
Sa faapefea e se alii talavou o le sa le i vaai lava i se faifeautalai muamua ona avea ma se tasi o faifeautalai e i ai sea malosiaga faaleagaga? O le a faapefea ona e mauaina mana faaleagaga o se faifeautalai e matala ai faitotoa, faaaoga imeli, ma tatala loto o i latou i le misiona o le a e galue ai? E pei ona masani ai, o loo maua tali i tusitusiga paia ma saunoaga a perofeta ma aposetolo soifua.
Ina ua faatoa talaiina le talalelei i Egelani ia Iulai 1837, sa faaali mai e le Alii, “Soo se tasi tou te auina atu i lo’u igoa, e ala i le leo o outou uso, o le Toasefululua, ua fautuaina mai i le ala tatau ma tuuina atu i ai e outou le pule, o le a i ai le mana e tatala ai le faitotoa o lo’u malo i soo se atunuu i soo se mea tou te auina atu i ai i latou.”4
Po o fea lava e auina atu i ai oe, po o le a le misiona e tofia i ai oe, ia silafia sa fautuaina lena tofiga e se sui o le Toasefululua ma ua valaauina oe e le perofeta a le Alii. Ua valaauina oe e “ala i valoaga, ma ala i le faaeega o lima.”5
Ona tuuina mai lea e le Alii tuutuuga ina ia faataunuuina ai lenei folafolaga. Sa Ia fetalai, “O le tulaga e oo i ai le [o lona uiga o le a faataunuuina le folafolaga pe afai] latou [te] [o lona uiga o faifeautalai o e ua auina atu] [1] faamaualalalo o i latou lava i o’u luma, ma [2] tumau i la’u upu, ma [3] faalogo i le leo o lo’u Agaga.”6
Ua manino lava folafolaga a le Alii. Ina ia mafai ona mauaina le mana faaleagaga e moomia e tatala ai le faitotoa o le malo o le Atua i atunuu ua auina atu i ai outou, e tatau ona outou lotomaualalalo, ma usiusitai, ma maua le gafatia e faalogo ai ma mulimuli i le Agaga.
O uiga nei e tolu o loo fesootai lelei faatasi. Afai e te lotomaualalo, o le a e manao e te usiusitai. Afai e te usiusitai, o le a e lagonaina le Agaga. E taua le Agaga, aua, sa aoao mai Peresitene Ezra Taft Benson e faapea, “A aunoa ma le Agaga, e le mafai lava ona e manuia e tusa lava po o a au taleni ma tomai.”7
A o avea ai ma se peresitene o le misiona, sa ou faatalatalanoaina e le aunoa faifeautalai o e sa feagai ma faigata i le galuega, aua sa le i agavaa atoatoa i latou. Sa latou soifua i tulaga maualalo o o latou gafatia faaleagaga. Po o le a lava le malosi sa latou galulue ai po o le a le tele o mea lelei sa latou faia, sa le mafai lava ona latou lagonaina le filemu ma olioli i le mafutaga a le Agaga Paia, seia oo ina faalotomaualaloina i latou lava, salamo atoatoa, ma tofo ai i le alofa mutimutivale ma le alofa tunoa o le Faaola.
Sa faatonuina e le Alii Ana auauna ia lotomaualalo, ona o le faagasologa o le faaatoatoaina faaleagaga e amata i se loto momomo. Mafaufau i le lelei e oo mai mai mea ua nutimomoia: E sua le palapala e toto ai le saito. E olo le saito e gaosi ai le falaoa. E vaevaeina le falaoa ia avea ma faatusa o le faamanatuga. Pe a taumafa se tagata ua salamo i le faamanatuga ma se loto momomo ma se agaga salamo, o le a faamamaina o ia.8 A tatou salamo ma faamamaina e ala i le Togiola a Iesu Keriso, e tele atu mea ua tatou ofoina atu i le Faaola a o tatou auauna atu ia te Ia. “Ioe, o mai ia te ia, ma tuu atu o outou agaga atoa e fai ma taulaga ia te ia.”9
Afai ua mafatia i le agasala ma ua manaomia ona salamo, faamolemole ia faia loa. A o faamalolo e le Faaola i latou sa puapuagatia, sa Ia valaaulia soo i latou e le aunoa ia tutulai i luga. Ua faamauina i tusitusiga paia sa latou faia i le taimi lava lena.10 Ina ia faamaloloina ou mafatiaga faaleagaga, faamolemole talia Lana valaaulia e tutulai i luga. E aunoa ma le faatuai, talanoa i lau epikopo, peresitene o le paranesi, po o le peresitene o le misiona ma amata nei lava le faagasologa o le salamo.
O le mana faamalolo o le Togiola na te aumaia le filemu i lou agaga ma mafai ai ona e lagonaina le Agaga Paia. O le taulaga a le Faaola e le mafuatiaina, ae o a tatou agasala, e ui e anoanoai ma ogaoga, ae e mafai ona faitauina ma tautau atu, lafoai ma faamagaloina. “Ma ua matua tele lava lona olioli i le agaga salamo!”11
O lenei folafolaga i le Mataupu Faavae ma Feagaiga e mamana: “Ia tuu le amiomama e teuteuina ai ou mafaufauga e le aunoa; ona solo malosi ai lea o lou lototele i luma o le Atua.”12 A o e soifua i se olaga mama, o le a e lagonaina se faamautinoaga filemu i lou agavaa ai i luma o le Atua ma o le a e mauaina le mana o le Agaga e faatasi ma oe.13
O nisi o e sa avea ma tagata sili ona fou o le Ekalesia, po o e sa toe foi mai talu ai nei i le faatoagaina atoatoa, atonu e faapea mai, “Ua ou agavaa nei ma maua se manao e auauna atu, ae ou te le iloa pe o lava mea ua ou iloaina.” Ia Aperila, sa aoao ai i tatou e Peresitene Thomas S. Monson, “O le iloa o le upumoni ma tali i a tatou fesili silisili e oo mai ia i tatou pe a tatou usiusitai i poloaiga a le Atua.”14 Ua toe faamautinoa mai mo lo tatou iloaina e ala i lo tatou usiusitai tatou te maua ai le malamalama.
O nisi atonu latou te lagona le faatapulaa o taleni, tomai, po o le poto masani e tuuina atu. Afai ua ia te oe na popolega, manatua le aafiaga o Elder Pokhrel. Ia saunia lelei i le mea e te mafaia ma iloa o le a faalautele e lo tatou Tama Faalelagi au taumafaiga faamaualalo ma le usiusitai. Sa ofoina mai e Elder Richard G. Scott lenei fautuaga faamalosiau: “A tatou usitai i poloaiga a le Alii ma auauna atu i Ana fanau ma le le manatu faapito, o le taunuuga masani lava o le mana mai le Atua—o le mana e fai ai mea e tele atu nai lo o mea e mafai ona tatou faia na o i tatou lava. O o tatou manatu, a tatou taleni, o tatou tomai o le a faalauteleina ona ua tatou maua le malosi ma le mana mai le Alii.”15
A e faalagolago i le Alii ma Lona agalelei, o le a faamanuia e le Atua Silisiliese Ana fanau e ala ia te oe.16 Sa aoaoina e Elder Hollings mai Nevada lena mea i le amataga o lana misiona. O le aso na sosoo ma le aso na taunuu ai i Initia, sa ia malaga ai faatasi ma i maua ma Sister Funk i Rajahmundry, o lana eria muamua. O lena aoauli sa asiasi ai Elder Hollings ma Elder Ganaparam i se tagata o le Ekalesia ma lona tina. Sa manao le tina ia aoao e uiga i le Ekalesia, aua sa ia vaaia le faamanuiaina o le olaga o lana tama teine. Sa faatasi atu Sister Funk ia i latou e tuuina atu le faaaumea. Ona o le a aoaoina le lesona i le faaPeretania ma na o le gagana Telugu e tautala ai le tina, sa i ai iina se uso o le paranesi e faaliliuina mea sa aoaoina.
O le tofiga a Elder Hollings i lana aoaoga muamua lava o le aoao atu lea o le Muai Faaaliga, e faaaoga ai upu a le Perofeta o Iosefa. I lena taimi o le lesona sa ia liliu atu ai ia Sister Funk ma fesili, “E tatau ea ona ou tau atu ia upu uma taitasi?” ma le iloaina o le a faaliliuina.
Sa ia tali atu, “Tau atu ia upu uma taitasi ina ia mafai ona molimau atu le Agaga i mea uma e te fai atu ai.”
A o aoaoina ma le faamaoni e lenei faifeautalai fou le Muai Faaaliga, ma faaaogaina upu a le Perofeta, sa suia foliga vaaia o lena tuafafine pele. Sa i ai loimata. A o faamaeaina e Elder Hollings lena savali mamalu, ma a o le i faaliliuina mea sa ia saunoa atu ai, sa fesili mai le tina ma ona loimata i lana lava gagana, “E mafai ona ou papatiso? Ma e mafai ona e aoaoina lou atalii?”
O’u uso e auauna talavou, ua tatalaina faitotoa ma loto i aso uma i le savali o le talalelei—o se savali e aumai ai le faamoemoe, ma le filemu, ma le olioli i fanau a le Atua i le lalolagi atoa. Afai tou te lotomaualalo ma usiusitai ma faafofoga i le leo o le Agaga, o le a outou maua le fiafiaga sili i a outou auaunaga o se faifeautalai.17 O se vaitau matagofie le avea ai ma faifeautalai—o se taimi ua faanatinatiina ai e le Alii Lana galuega!
Ou te molimau atu i lo tatou Faaola, o Iesu Keriso ma Lana “poloaiga paia”18 ia “outou o atu e fai nuu uma lava ma soo.”19 O Lana Ekalesia lenei. O loo Ia taitaiina e ala i perofeta soifua ma aposetolo. I le isi itula e sosoo ai, o le a aoaoina i tatou e le Au Peresitene Sili. Ia tatou “vave ona matau,”20 e pei o Mamona, ina ia oo mai le valaau, ua tatou agavaa ma mafai ona folafola atu ma le mana o le Agaga: “Faauta, o au o se soo o Iesu Keriso, le Alo o le Atua. Ua ia valaauina au e talai atu lana afioga i totonu o ona tagata, ina ia mafai ona latou maua le ola tumau-faavavau.”21 I le suafa o Iesu Keriso, amene.