I Fanau a La’u Fanau
Saunia e Peresitene Henry B. Eyring
Fesoasoani Muamua i le Au Peresitene Sili
E i ai se poloaiga aoao e tasi o le a fesoasoani ia i tatou e faafetaiaia ai luitau ma taitai atu ai i le fatu o se olaga fiafia faaleaiga.
O le tausaga lenei o le a faaipoipo ai le toalua muamua o le fanau o le ma fanau. I totonu o nai tausaga pe a ma le toa 10 o o laua tausoga e masalo o le a oo foi i se taimi o o latou olaga o le a latou mulimuli atu i le lalolagi matagofie o le atiina ae o ni aiga.
O lena vaaiga matagofie ua mafua ai ona ou mafaufau loloto ina ua latou fesili mai ia te a’u mo ni fautuaga. O le mea moni lava sa latou fesili mai, “O a filifiliga e mafai ona ou faia o le a taitai atu ai a’u i le fiafia?” Ae o le isi itu, “O a filifiliga e ono taitai atu ai a’u i le le fiafia?”
Ua faia e le Tama Faalelagi i tatou taitoatasi ia tulaga ese. E leai ni tagata se toalua o i tatou e tutusa lelei aafiaga. E leai ni aiga se lua e tutusa lelei. E le o se mea la e faateia ai le faapea, o fautuaga i auala e filifili ai le fiafia i le olaga faaleaiga e faigata ona tuuina atu. Ae ua faatulagaina e se Tama Faalelagi alofa le alāfua e tasi e tau atu i le fiafia mo Ana fanau uma. Po o a lava o tatou tulaga patino po o a foi o tatou aafiaga, ua na o le tasi lava le fuafuaga o le fiafia. O lena fuafuaga o le mulimuli lea i poloaiga uma a le Atua.
Mo i tatou uma, e aofia ai le fanau a la’u fanau o loo mafaufau e faaipoipo, e i ai se poloaiga aoao e tasi o le a fesoasoani ia i tatou e faafetaiaia ai luitau ma taitai atu ai i le fatu o se olaga fiafia faaleaiga. E faatatau i mafutaga uma e tusa lava po o a tulaga. Ua faafia ona ta’uina mai i tusitusiga paia ma i aoaoga a perofeta o o tatou aso. O le faaupuina lenei e le Tusi Paia o le fautuaga a le Alii ia i latou uma o e mananao e nonofo faatasi e faavavau i le alofa ma le fiafia:
“Ona fesili faatofotofo mai ai lea ia te ia o so latou, o le aoao tulafono, ua faapea mai,
“Le aoao e, o le fea poloaiga o i le tulafono ua sili?
“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe.
“O na poloaiga e lua ua autu ai le tulafono uma ma le au perofeta.”1
Mai lena faamatalaga faatauvaa e le faigata ai ona aotele mea uma ua ou aoaoina, po o a filifiliga e taitai atu ai i le fiafia i aiga. Ou te amata i le fesili, “O a filifiliga ua taitaiina atu ai a’u i le alofa i le Alii ma lo’u loto atoa ma lo’u agaga ma lo’u manatu atoa?” Mo a’u, o le filifili lea e tuu au lava i le tulaga lea na ou lagonaina ai le olioli i le faamagaloga e ala i le Togiola a le Alii.
I tausaga ua mavae sa ou papatisoina ai se alii talavou i Albuquerque, Niu Mekisiko, o le sa ma aoaoina ma la’u soa faifeautalai. Sa ou faatofuina le alii talavou i lalo o le vai ma toe faatu a’e i luga. Atonu sa toeitiiti a tutusa lelei o ma uumi, aua sa tautala tonu mai lava o ia i lo’u taliga. Faatasi ai ma vai mai le faatanoa ma loimata sa tafe ifo i ona foliga faapea ma le olioli i lona leo, sa ia fai mai ai, “Ua ou mamā, ua ou mamā.”
Na ou vaaia foi na lava loimata o le fiafia i fofoga o se tasi na toe faamatalaina saunoaga a se Aposetolo a le Atua. Sa saunoa atu [le aposetolo] ia te ia, i le maea ai o se faatalanoaga agalelei ma le mae’ae’a, “Ou te faamagaloina oe i le suafa o le Alii. O le a Ia faamagaloina oe i Lana lava taimi ma i Lana lava ala.” Ma sa Ia faia.
Ua ou iloa le mafuaaga e mafai ai e le Alii ona fetalai mai e faapea, a faamagaloina agasala na te le toe manatuaina lava. E ala i le mana o le Togiola, na faafouina ai tagata ou te iloaina lelei, ma na soloi ese ai aafiaga o le agasala. Ua tumu lo’u loto i le alofa mo le Faaola ma le Tama agaalofa na aumaia o Ia.
O lena faamanuiaga sili ua oo mai e ala i le uunaia o tagata ou te alofa i ai, ina ia o atu i le Faaola mo le toomaga mai tiga, o se toomaga lea ua na o Ia lava e mafai ona tuuina mai. O le pogai lena ou te manaomia ai i latou ou te alofa i ai e talia ma ia faalauteleina valaauga uma e tuuina atu ia i latou i le Ekalesia. O lena filifiliga o se tasi o ki maoae i le fiafia faaleaiga.
O atuatuvalega i tulaga uma o le olaga e mafai ona faaosoosoina ai i tatou e teena pe tiutamala i valaauga e auauna atu i le Faaola. O lena mea e mafai ona tuu ai i tatou i le matautia faaleagaga mo i tatou lava, o tatou taitoalua, ma o tatou aiga. O nisi o na valaauga e pei e foliga mai e le taua, ae o lou olaga, ma lo’u aiga, na suia mo le lelei ona o lo’u taliaina o se valaauga e aoao se korama a le au tiakono. Sa ou lagonaina le alofa o na tiakono mo le Faaola ma Lona alofa mo i latou.
Ua ou vaai o tupu lena mea i le soifuaga o sē na avea muamua ma peresitene o se siteki ma peresitene o se misiona, i lona valaauga ia te ia e avea ma faufautua i se korama a le au aoao. Ou te iloa se isi sa avea ma se epikopo sosoo ai ma le avea ma se Fitugafulu Eria, sa faaaogaina e le Alii e fesoasoani i se tama i se korama o le au aoao, o le sa manu’a i se faalavelave. O vavega mai lena auaunaga sa pai atu i le tele o olaga, e aofia ai ma lou olaga, ma faateleina ai lo latou alolofa i le Faaola.
A o auauna atu i isi, atonu tatou te augani atu mo le mafutaga a le Agaga Paia. O le faamanuiaina i le galuega a le Alii e maua ai i taimi uma vavega e sili atu nai lo o tatou lava malosi. O le mātua o loo feagai ma se tamaitiiti e matuai faalogogata lava ua iloa e moni lea mea, e pei o le faiaoga asiasi na talanoa atu i ai se tamaitai e saili se faamafanafanaga ina ua ta’u atu i ai e lana tane o le a ia tuua o ia. Ua faafetai nei auauna e toalua ona sa la tatalo i lena taeao i le Alii ina ia auina mai le Agaga Paia e avea ma se soa.
E na o le mafutaga lava a le Agaga Paia e mafai ona tatou faamoemoe i ai ia tasi ai o se paaga tutusa i se faaipoipoga e saoloto mai feeseeseaiga. Ua ou vaaia le taua tele o lena mafutaga e maua ai le fiafia i se faaipoipoga. O le vavega o le tasi [o le loto] e manaomia ai le fesoasoani a le lagi, ma e umi se taimi e alu ai. O la tatou sini o le nonofo faatasi e faavavau i le afioaga o le Tama Faalelagi ma lo tatou Faaola.
O lo’u tama ma lo’u tina sa matuai eseese lava le tasi mai le isi. O lo’u tina o se tagata pese ma se tusiata. O lo’u tama sa fiafia i le kemisi. I se tasi taimi i se konaseti faamusika, sa faateia lo’u tina ina ua tulai lo’u tama ma amata ona tuumuli a o le’i amata ona patipati le aumaimoa. Sa fesili i ai lo’u tina po o fea a alu i ai. O lana tali sa mama atoatoa: “Ia ua uma, a ea?” Sa na o le faatosinaga malū a le Agaga Paia sa uunaia ai o ia e auai atu iina faatasi ma ia, ma toe avatu ai o ia i nisi taimi se tele mulimuli ane.
Sa nofo lo’u tina i New Jersey mo le 16 tausaga ina ia mafai ona tausi e lo’u tama le aiga e ala i le faiga o suesuega ma faiaoga i le kemisi. Mo ia, o se ositaulaga le nofo ese mai lona tina ua oti lana tane ma lona uso e le’i faaipoipo, o le na tausia o ia i le fale tuai o le aiga i le faatoaga. Sa maliliu uma i la’ua a o nofo mamao Tina i New Jersey. Na o le pau na o taimi na ou vaai ai o tagi lo’u tina.
O tausaga mulimuli ane na ofoina atu ai i lo’u tama se galuega i Iuta. Sa ia toe fesili atu i lo’u tina, ma le mama atoatoa, “Mildred, e te manatu o le a le mea e tatau ona ou faia?”
Na fai atu o ia, “Henry, fai le mea e te manatu e sili ona lelei.”
Sa ia teena le ofo. O le taeao na sosoo ai, sa ia tusi atu ai ia te ia se tusi lea maimau pe ana i ai pea ia te a’u. Ou te manatua sa ia tau atu ia te ia, “Aua e te tatalaina ii. Alu i le ofisa ma tatala ai iina.” Sa amataina i se aoaiga. Sa ia folafola atu ia te ia i tausaga na muamua atu, afai na te mafaia, o le a ia aveina atu o ia ia latalata atu i lona aiga. Sa faateia o ia i le faaalia o le le fiafia [o lo’u tina]. Na te le’i manatuaina le faanaunauga o lona loto. Sa faavave ona ia auina atu se feau ia talia le ofo mo le galuega.
Sa ia faapea atu, “Mildred, aisea na e le ta’ua mai ai ia te a’u?”
Na fai mai o ia, “Sa tatau ona e manatua.”
Sa masani ona ia ta’ua lena filifiliga e masii atu i Iuta, o lana lava filifiliga, ae le taitai faapea o se ositaulaga o lana matata faalegaluega. Sa la maua le vavega o le tasi [o le loto]. Semanu e lelei atu pe ana faamanatu ia Tama e le Agaga Paia le folafolaga sa ia faia i tausaga na muamua atu. Ae sa ia faatagaina le Agaga Paia e faamaluluina lona loto ina ia avea le filifiliga a [Tina] ma ana [filifiliga].
Ua i ai i le Tama Faalelagi le muai vaaiga atoatoa, silafia i tatou uma taitoatasi, ma silafia o tatou lumanai. Ua Ia silafia faafitauli o le a tatou uia. Na Ia auina mai Lona Alo e puapuagatia ina ia Ona silafia le ala e fesoasoani ai ia i tatou i o tatou tofotofoga uma.
Ua tatou iloa o loo i ai fanau agaga a le Tama Faalelagi i lenei lalolagi, o e o nisi taimi e filifili ai le agasala ma le le fiafia tele. O le pogai lena na Ia auina mai ai Lana Ulumatua e avea ma o tatou Togiola, o le faatinoga silisili o le alofa i le foafoaga uma. O le mafuaaga lena e ao ai ona tatou faamoemoeina o le a manaomia le fesoasoani a le Atua ma le taimi e faaleleia ai i tatou mo le ola e faavavau, e nonofo faatasi ma lo tatou Tama.
O le olaga i aiga o le a tofotofoina ai i tatou. O le tasi lena o faamoemoega o le Atua i le tuuina mai ia i tatou o le meaalofa o le olaga i le tino—ia faamalosia ai i tatou e ala i le ui atu i tofotofoga. O lena mea o le a faapitoa ona moni i le olaga faaleaiga, lea o le a tatou maua ai le olioli tele ma le faanoanoa tele ma luitau, lea atonu e i ai taimi e foliga mai e le mafai e lo tatou malosi ona onosaia.
Na saunoa mai Peresitene George Q. Cannon e uiga i le ala ua saunia ai e le Atua oe ma a’u ma a tatou fanau mo tofotofoga o le a tatou fetaiai: “E leai se tasi o i tatou e le’i faasafuaina mai i ai le alofa o le Atua. E leai se tasi o i tatou Na te le’i tausia ma faapelepele i ai. E leai se tasi o i tatou e le’i finagalo o Ia e laveai, ma le’i fuafuaina se ala e laveai ai. E leai se tasi o i tatou e le’i tuuina mai i ai e Ia Ana agelu e vaaia. Atonu tatou te faatauvaa ma faaletonu i la tatou lava vaai, ma i le matau a isi, ae e tumau pea le mea moni e faapea, o i tatou o fanau a le Atua, ma ua Ia tuuina moni mai Ana agelu—o tagata e le vaaia e malolosi ma mamana—e nafa ma le vaaiga o i tatou, ma o loo latou vaaia i tatou ma puipuia i tatou.”2
O le mea na aoao mai e Peresitene Cannon e moni. O le a outou manaomia lena fesoasoani, e pei ona ou manaomiaina ma faalagolago i ai.
Na ou tatalo ma le faatuatua ina ia saili ma lagona e se tasi ou te alofa i ai le mana o le Togiola. Na ou tatalo ma le faatuatua ina ia oo mai ni agelu tagata e fesoasoani ia i latou, ma sa latou oo mai.
O loo i ai i le Atua se auala ua fuafuaina e laveai ai Ana fanau taitoatasi. Mo le toatele, o lena mea e aofia ai le tuuina i se uso po o se tuafafine po o matua matutua o e alolofa ia i latou e tusa lava po o a mea latou te faia.
I tausaga ua mavae sa faamatalaina e sau uo lona tinamatua. Sa soifua o ia i se olaga amiotonu, sa faamaoni e le aunoa i le Alii ma Lana Ekalesia. Ae o se tasi o atalii a sana tama sa filifilia se olaga solitulafono. Sa iu ina faafalepuipuiina o ia. Sa faamatala e la’u uo e faapea o lona tinamatua, a o alu atu lana taavale i le alatanu e asi le tama a lana tama i le falepuipui, sa maligi ona loimata a o tatalo o ia ma le tiga, “Sa ou taumafai e ola i se olaga lelei. Aisea, aisea ua ou maua ai lenei tamaitiiti faigata o lē e foliga mai ua faaleagaina lona olaga?”
Na oo mai le tali i lona mafaufau i upu nei: “Sa ou tuuina atu o ia ia te oe ona e mafai ma o le a e alofa ia te ia e tusa lava po o a mea na ia faia.”
E i ai se lesona matagofie mo i tatou uma. O le ala mo matua agalelei ma matua matutua ma auauna uma a le Atua, o le a le faigofie i se lalolagi ua faateteleina le amioleaga. E le mafai ona tatou faamalosi fanau a le Atua e filifili le ala i le fiafia. E le mafai e le Atua ona fai lena mea ona o le faitalia ua Ia tuuina mai ia i tatou.
E alolofa le Tama Faalelagi ma Lona Alo Pele i fanau uma a le Atua e tusa lava po o a mea latou te filifili e fai po o a foi ituaiga tagata e avea ai i latou. Na totogi e le Faaola le tau o agasala uma, e tusa lava pe o le a le inosia. E ui lava e ao ona i ai le faamasino tonu, ae ua faasafua mai le avanoa mo le alofa mutimutivale lea o le a le faoa ai le faamasino tonu.
Na ta’u atu e Alema lena faamoemoe i lona atalii o Korianetona i upu nei: “O lea, e tusa ma le faamasino tonu, e le mafai ona faataunuuina o le fuafuaga o le togiola, ua nao tulaga lava o le salamo o tagata i lenei olaga vaavaaia e mafai ai, ioe, lenei olaga vaavaaia; ona vagana ai nei tulaga, e le mafai ona aoga le alofa mutimutivale vagana ai ua ia faaumatiaina le galuega a le faamasino tonu. O lenei e le mafai ona faaumatiaina le galuega a le faamasino tonu; a faapea, po ua le toe avea le Atua ma Atua.”3
O la’u savali la i le fanau a la’u fanau, ma ia i tatou uma o loo taumafai e fatu ni aiga e faavavau, e faapea e mautinoa e i ai le olioli mo e faamaoni. Mai lava i le taimi a o le’i i ai le lalolagi, sa galulue se Tama oi le Lagi agaalofa ma Lona Alo Pele faatasi ma i latou o e na La’ua silafia o le a se ese. O le a alofa le Atua ia i latou e faavavau.
Ua ia te outou lena itu lelei o le iloaina na latou aoaoina le ata o le faaolataga mai aoaoga na latou maua i le lalolagi o agaga. Sa lava lo latou ma lo outou faamaoni e faatagaina ai lo outou o mai i le lalolagi lea na toatele isi sa le faatagaina.
Faatasi ai ma le fesoasoani a le Agaga Paia, o le a aumaia ai upumoni uma i lo outou manatua. E le mafai ona tatou fai faamalosi lena mea i isi, ae e mafai ona tatou faataga i latou e vaaia i o tatou olaga. E mafai ona tatou maua le lototetele mai le faamautinoaga e faapea, sa i ai se taimi sa tatou lagonaina uma ai le olioli o le faatasia i le avea ai ma se tasi o le aiga pele a lo tatou Tama Faalelagi. Faatasi ma le fesoasoani a le Atua e mafai ai e i tatou uma ona toe lagona lena faamoemoe ma lena olioli. Ou te tatalo ia faapena mo i tatou uma, i le suafa o le Alii, o Iesu Keriso, amene.