O Auega a Ieremia: Faaeteete i le Nofopologa

Saunia e Elder Quentin L. Cook

O Le Korama a Aposetolo e Toasefululua

O la tatou lui o le aloese lea mai soo se ituaiga o nofo pologa, fesoasoani i le Alii e faapotopoto Lana au filifilia, ma ositaulaga mo le tupulaga faiae.

I le popofou o le ma faaipoipoga, na tonu ai ia i maua ma Mary o le a ma filifilia i le mea e gata ai le mafai ia gaoioiga e mafai ona ma auai faatasi ai. Sa ma mananao foi ina ia ma faautauta i le faaaluina o a ma tupe. E fiafia Mary i musika ma sa popole ma le mautinoa o le a ou soona faamamafaina ia taaloga, o lea sa ia fautua mai ai e faapea ia ma auai i ni gaoioiga tai lua faamusika, tala faamusika (opera) pe faaleaganuu mo taaloga taitasi uma e totogi ma te o i ai.

I le taimi muamua, sa ou le fia auai i le vaega tau tala faamusika (opera), ae i le aluga o taimi sa suia lau vaai. Sa patino lava lou fiafia i le tala faamusika a Giuseppe Verdi.¹ O lenei vaiaso o le a faamanatu ai le 200 tausaga o lona fanau mai.

I lona talavou, sa matua fiafia lava Verdi i le perofeta o Ieremia, ma i le 1842, i le 28 o tausaga, na lauiloa ai o ia i le tala faamusika o le Nabucco, o le faapuupuu faaItalia lea o le igoa Nepukanesa, le tupu o Papelonia. I lenei tala faamusika o loo i ai ni manatu faavae o loo aumaia i le tusi o Ieremia, Auega, ma le Salamo i le Feagaiga Tuai. O le tala faamusika lea o loo aofia ai le toilalo o Ierusalema ma le ave faatagataotauaina ma le nofopologa o Iutaia. O le Salamo 137 o le uunaiga lea mo le tala faamomoiloto ma le musuia a Verdi o le “Chorus of the Hebrew Slaves.” O le ulutala o lenei salamo i a tatou tusitusiga paia e matua tele se aafiaga: “A o nofo pologa ai, sa aue ai tagata Iutaia i talaane o vaitafe o Papelonia—Ona o le faanoanoa, sa le mafai ai ona latou pepese i viiga o Siona.”

O lou faamoemoega o le iloiloina lea o le tele o ituaiga o nofo pologa ma le faatoilaloina. O le a ou faatusatusaina nisi o tulaga o o tatou aso ma tulaga o aso o Ieremia a o lei pa’u ia Ierusalema. A o tuuina atu lenei leo o le lapataiga, ou te faafetai o le toatele o tagata o le Ekalesia o loo teenaina ma le amiotonu ia amioga sa matua faatiga ai i le Alii i taimi o Ieremia.

O valoaga ma auega a Ieremia e taua i le Au Paia o Aso e Gata Ai. O Ieremia ma tulaga o Ierusalema i lona vaitaimi o tulaga ia o loo i ai i le amataga o mataupu i le Tusi a Mamona. O Ieremia o se tasi mai le taimi o le perofeta o Liae.² Sa faailoa manino atu lava e le Alii ia Ieremia e uiga i lona muai faauuga: “Na au iloa oe a o lei faia oe e au i le manava; na au faapaiaina oe a o lei fanau mai oe, na au tofia oe e fai ma perofeta i nuu.”³

E ese le valaauga, misiona, ma le tofiga o Liae mai le Alii. Sa lei valaauina o ia i lona talavou ae i lona matua. I le taimi muamua sa avea o ia ma leo o le lapataiga, ae ina ua maea ona ia folafola atu ma le faamaoni lea lava savali e tasi e pei o Ieremia, sa poloaiina Liae e le Alii e ave lona aiga ma malaga ese atu i le togavao.⁴ I le faia o lea mea, sa le gata ina faamanuiaina ai e Liae lona aiga ae faapea foi tagata uma.

I tausaga ao lei faatafunaina ia Ierusalema,⁵ o savali ia na tuu atu e le Alii ia Ieremia e le mafaagaloina. Sa Ia fetalai:

“A o lou nuu ua suia lo latou mamalu i le mea e le aoga. …

“… Ua latou tuua au le puna o le vai ola, a ua latou eli … o vaieli mavaevae e le tali ai ni vai.”⁶

Ao fetalai ai e uiga i mala o le a oo mai i e nonofo i Ierusalema, na faailoa mai ai le faanoanoa o le Alii e faapea, “Ua mavae ona po o le seleselegasaito, ua uma le tausaga vevela, a e le faaolaina i [latou].”⁷

Na faamoemoe le Atua o le a saoloto alii ma tamaitai e faia ni filifiliga i le va o le lelei ma le leaga. A oo ina avea filifiliga leaga ma uiga e pulea ai se aganuu po o se malo, o le a i ai taunuuga ogaoga e le gata i le olaga nei ae faapea foi le olaga a sau. E mafai ona faapologaina tagata pe tuu i latou lava i le nofo pologa e le gata i vailaau lamatia ua fai ma vaisu ae faapena foi i filosofia lamatia ua fai ma vaisu lea ua o ese ai mai le ola amiotonu.

O le liliuese mai le tapuai atu i le Atua moni ma soifua ae tapuai i atua ese e pei o le oa ma le lauiloa ma le punouai i amioga le mama ma le amiotonu i le nofo pologa i ona ala uma ua aafia ai tagata. Ua aofia ai i nei mea le nofo pologa faaleagaga, faaletino, ma faaleatamai ma o nisi taimi e aumaia ai le faafanoga. Na aoao mai foi e Ieremia ma Liae e faapea o i latou o e amiotonu e tatau ona fesoasoani i le Alii e faamautu Lana Ekalesia ma le malo ma faapotopoto mai ia Isaraelu ua faataapeapeina.⁸

O nei savali ua tau soo mai ma o loo faamalosia i le tele o seneturi i tisipenisione uma. Ua i ai nei savali i le fatu o le Toefuataiga o le talalelei a Iesu Keriso i lenei tisipenisione faaiu.

O le faatagataotauaina o tagata Iutaia ma le faataapeapeina o ituaiga o Isaraelu, e aofia ai ituaiga e sefulu, o ni upumoni faaleaoaoga faavae taua ia e mafaufau i ai i le Toefuataiga o le talalelei. O ituaiga e sefulu ua leiloloa o vaega ia o le Malo i Matu o Isaraelu ma sa ave faatagaotauaina i Asuria i le 721t.l.m. Sa latou o atu i atunuu i matu.⁹ O la tatou mataupu faavae o le faatuatua lona sefulu o loo faapea mai, “Matou te talitonu i le faapotopotoina moni o Isaraelu ma le toefuataiga mai o Ituaiga e Sefulu.”¹⁰ Tatou te talitonu foi i le avea ai ma se vaega o le feagaiga na osia e le Alii ma Aperaamo, e le gata o le a faamanuiaina le gafa o Aperaamo ae faapena foi le faamanuiaina o tagata uma o le lalolagi. E pei ona saunoa Elder Russell M. Nelson, o le faapotopotoina “e le o se mataupu o nofoaga faitino ‘o se mataupu o tautinoga faaletagata lava ia. E mafai ona ‘aumaia [tagata] i le malamalama o le Alii’ [3 Nifae 20:13] e aunoa ma le tuua o o latou nuu moni.”¹¹

Ua manino lava le tatou aoaoga faavae: “Na faataapeapeina ma faapuapuagatia e le Alii ituaiga e sefululua o Isaraelu ona o lo latou amioleaga ma le fouvale. Ae ui i lea, ua [faaaoga] foi e le Alii lenei faataapeapeina o lona nuu filifilia i atunuu eseese o le lalolagi e faamanuiaina ai na atunuu.”¹²

Ua tatou aoaoina ni lesona taua mai lenei vaitaimi matautia. E tatau ona tatou faia mea uma i lo tatou malosi e aloese ai mai le agasala ma le fouvale lea e taitai atu ai i le nofo pologa.¹³ Ua tatou iloa foi o le ola amiotonu o se mea e manaomia mo le lagolagoina o le Alii i le faapotopotoina o Lana au filifilia atoa ai ma le faapotopotoina moni o Isaraelu.

O le nofo pologa, faatoilaloina, vaisu, ma le saisaitia e oo mai i le tele o auala. E mafai ona avea o se pologa moni faaletino ae e mafai foi ona avea ma mea e le toe maua pe ua faatamaiaina ai le faitalia lea e mafai ona faalavelave i lo tatou alualu i luma. Ua manino lava le upu a Ieremia e faapea o le amioletonu ma le fouvale o mafuaaga autu ia mo le faatafunaga o Ierusalema ma le ave faatagataotauaina i Papelonia.¹⁴

O isi ituaiga o nofopologa ua tutusa lava le faataumaoia i le agaga o le tagata soifua. O le faitalia e mafai ona soona tafili saunoa i ai i le tele o auala.¹⁵ O le a ou taua ni mea se fa o loo patino lava le faataumaoia i aganuu i aso nei.

Muamua, o vaisu ia ua faatamaia ai le faitalia, feteenai ai talitonuga moni, ma faaleagaina ai le soifua maloloina lelei ua mafua ai le nofo pologa. O le aafiaga o fualaau faasaina ma le ava malosi, ola le mama, ponokalafi, taaloga faitupe, faafitauli tautupe, ma isi mafatiaga ua mafua ai se avega i luga o i latou ua nofo pologa faapea ma malo i se fuataga tele, lea ua toetoe lava a le mafai ona fuatiaina.

Lua, o nisi o vaisu po o le manao e fai ni mea atonu e le o ni mea leaga pe a faia na o na mea e mafai ona faoa ai le tele o o tatou taimi taua ia e mafai ona faaaoga e ausia ai a tatou sini amiotonu. E mafai ona aofia ai i lenei mea le soona faaaoga o ala faasalalau o agafesootai, taaloga vitio ma komepiuta, taaloga, tafaoga, ma le tele o isi mea.¹⁶

O le auala tatou te faasaoina ai le taimi mo le aiga o se tasi lea o mataupu sili ona taua o loo fetaiai ma i tatou i le tele o aganuu. I se taimi sa nao au ai le tagata o le Ekalesia i la matou ofisa o loia, sa faamalamalama mai ai e se tasi o tamaitai loia ia te au le auala na ia lagona ai i taimi uma e pei o ia o se fai maneta o loo taumafai e taofia ni polo se tolu i luga i le ea i le taimi lava e tasi. O le tasi polo o lana matata faaloia, o le tasi o lana faaipoipoga, ma le tasi o lana fanau. Sa toetoe lava a ia fiu i le leai o se taimi mo ia lava. Sa matuai popole lava o ia o se tasi o ia polo sa i ai pea i le palapala. Sa ou fautua atu ia matou fono o se vaega ma talanoaina a matou mea e faamuamua. Sa matou iloaina o le mafuaaga autu lava o loo matou faigaluega ai o le tausia lea o o matou aiga. Sa matou malilie o le sailia o nisi tupe se tele atu sa le latalata lona taua i le taua o o matou aiga, ae sa matou iloaina o le tautuaina o a matou tagata i le mea sili matou te mafaia sa taua lea. Ona suia lea o le talanoaga i le mea sa matou faia i le falefaigaluega lea sa le manaomia ma sa le ogatusa ma le faasaoina o se taimi mo le aiga. Pe sa i ai se avega e faaalu se taimi i le falefaigaluega lea sa le taua?¹⁷ Sa tonu ia i matou o le matou sini o le faia lea o se siosiomaga faaleaiga ma faaleuo mo tamaitai ma alii uma. Ia avea i tatou ma taimua i le puipuia o taimi mo le aiga.

Tolu, o le toilalo popo ua sili ona taatele i o tatou aso, e pei lava ona i ai i le talafaasolopito atoa, o le filosofia po o talitonuga faaupufai ia e le ogatusa ma le talalelei a Iesu Keriso. O le suitulaga ai o filosofia a tagata mo upumoni o le talalelei e mafai ona taitai ese ai i tatou mai le faigofie o le savali a le Faaola. Ina ua asiasi atu le Aposetolo o Paulo i Atenai, na ia taumafai e aoao atu le Toetu o Iesu Keriso. O lenei taumafaiga tatou te faitau ai i le Galuega, “Aua ua leai se isi mea ua faia e tagata Atenai uma atoa ma tagata ese e aumau ai, na ona tala atu ma faalogo mai sina tala faatoa iloa.”¹⁸ Ina ua iloa e le motu o tagata le natura faigofie faalelotu o le savali a Paulo, sa le o se mea fou, na latou teenaina.

O se faatusa lea o o tatou lava aso, lea e teena ai i le tele o taimi ia upumoni o le talalelei pe aveseseina ina ia avea ai ma mea faatosina sili atu faaleatamai pe sili atu ona talafeagai ma faiga faaleaganuu o loo i ai i le taimi nei ma filosofia faaleatamai. Afai tatou te le faaeteete, e mafai ona maileia ai i tatou e nei faiga ma tuu ai i tatou lava i le nofo pologa faaleatamai. O loo i ai le tele o leo i le taimi nei o loo tau atu ai i tamaitai le auala e ola ai.¹⁹ E tele ona feteenai ma le tasi ma le isi. O se atugaluga patino o na mea, o filosofia ia e faitioina pe faaitiitia ai le faaaloalo mo tamaitai o loo filifili e faia ni osigataulaga talafeagai e avea ai ma ni tina, faiaoga, uo, po o e e faafaileleina ia fanau.

I ni nai masina talu ai, e toalua a ma afafine a le ma fanau aupito laiti na asia i maua—tasi i vaiaso taitasi. Sa ou i ai i le fale ma sa tatala atu le faitotoa. Sa i ai lou toalua o Mary i le isi potu. I asiasiga uma e lua, ina ua uma se fusi mai, sa toetoe lava a tutusa a la tala e fai. Sa la autilotilo solo ona fai mai lea, “Ou te fiafia e i ai i le fale o Tinamatua. O fea Tinamatua?” Sa ou lei fai atu ia i laua, ae sa ou mafaufau, “Pe le o le fale foi lenei a Tamamatua?” Ae sa ou iloaina a o ou laitiiti, sa o atu ai lo matou aiga i le fale o Tinamatua. Sa oo mai upu o se pese e masani ai i lou mafaufau: “E asa le vaitafe ma le togavao i le fale o Tinamatua tatou te o atu i ai.”

Ia, sei ou fai atu ma le manino ua faagaeetia lava au i avanoa faaleaoaoga ma isi o loo avanoa mo tamaitai. Ou te faatauaina le mea moni e faapea o le galuega faigata faaletino i le faatulagaina lelei o le fale o loo manaomia ai tamaitai ua faaitiitia i le tele o nofoaga o le lalolagi ona o avanoa faaonapo nei ma o loo faia e tamaitai ia saofaga ofoofogia i soo se vaega o galuega po o suesuega. Ae afai tatou te faatagaina la tatou aganuu na te faaitiitia le sootaga faapitoa o loo i ai i le fanau ma tina ma tinamatutua ma isi o loo faafaileleina i latou, o le a tatou salamo ai i se taimi mulimuli.

Fa, o malosiaga o loo solia ai mataupu faavae faalelotu o loo tausisia ma le faamaoni, e mafai ona oo ai i le nofo pologa. O se tasi o ituaiga malosiaga sili ona le lelei, o le taimi lea e lagona ai e tagata amiotonu lo latou tali atu i le Atua mo a latou amioga ma ua faamalosia ai e fai gaoioiga ia e solia ai lo latou lotofuatiaifo mo se faataitaiga, e faamalosia ni fomai e filifili i le va o le lagolagoina o le faapauina o pepe lea e feteenai ma o latou lotofuatiaifo po o le faatea ma a latou galuega.

O le Ekalesia o se vaega toalaitiiti lava e tusa lava pe fesootai ma ni tagata e tutusa o latou manatu. O le a faigata ona suia se malo atoa, ae e tatau ona tatou galulue e faaleleia le aganuu moni lea o loo siomia ai i tatou. O le Au Paia o Aso e Gata Ai i atunuu uma e tatau lava ona avea ma ni tagatanuu lelei, ia auai i mataupu faalemalo, ia aotauina i latou lava i mataupu faaupufai, ma ia palota.

Peitai, o le tatou faamamafa autu, e tatau lava i taimi uma ona faia soo se osigataulaga talafeagai e puipui o tatou lava aiga ma le tupulaga faiae.²⁰ O le toatele o i latou e le o nofo pologa i le taimi nei i ni vaisu ogaoga po o ni talitonuga sese. E tatau ona tatou fesoasoani atu ia i latou e tetee atu i se lalolagi ua talitutusa lava ma Ieruslema lea na oo i ai Liae ma Ieremia. Ma le isi, e manaomia ona tatou saunia i latou ia osia ma tausia ni feagaiga paia ma avea o ni auauna autu e fesoasoani i le Alii e faamautu Lana Ekalesia ma faapotopoto ia Isaraelu ua faataapeapeina faapea ai ma le au filifilia a le Alii i soo se mea.²¹ E pei ona faitauina ma le matagofie i le Mataupu Faavae ma Feagaiga, “O le a oo mai o le a faapotopoto mai e e amiotonu i fafo mai atunuu uma, ma o le a o mai i Siona, ma pepese i pese o le olioli e tumau-faavavau.”²²

O la tatou lui o le aloese lea mai soo se ituaiga o nofo pologa, fesoasoani i le Alii e faapotopoto Lana au filifilia, ma ositaulaga mo le tupulaga faiae. E tatau ona tatou manatua i taimi uma tatou te le faasaoina i tatou lava. Ua faasaolotoina i tatou e le alofa, alofatunoa, ma le taulaga togiola a le Faaola. Ina ua sosola ese le aiga o Liae, na taitaia i latou e le malamalama o le Alii. Afai tatou te faamaoni i Lona malamalama, mulimuli i Ana poloaiga, ma faalagolago i Ana galuega, o le a tatou aloese mai le nofo pologa faaleagaga, faaletino, ma faaleatamai faapea ai foi ma faanoanoaga o le fesesetai solo i lo tatou lava togavao, ona ua malosi o Ia e faaola.

Ia tatou aloese mai le faavauvau ma le faanoanoa o i latou e pauu atu i le nofo pologa ma ua le toe mafai ai ona pepese i viiga o Siona. I le suafa o Iesu Keriso, amene.