O Le Mataupu Faavae a Keriso

Saunia e Brian K. Ashton

Fesoasoani Lua i le Au Peresitene Aoao o le Aoga Sa

O le mataupu faavae a Keriso e faatagaina i tatou ina ia maua le mana faaleagaga lea o le a siitiaina i tatou mai o tatou tulaga faaleagaga o i ai nei i se tulaga e mafai ai ona faaatoatoaina i tatou.

O le asiasiga a Iesu i sa Nifae ina ua mavae Lona Toetu sa faatulagaina lelei e aoao mai ai ia i tatou mea e sili ona taua. Na amata i le molimau atu o le Tama i tagata o Iesu o Lona “Atalii Pele, o le ua [Ia] fiafia lava i ai.”¹ Ona afio ifo lea o Iesu Lava Ia ma molimau atu e uiga i Lana taulaga togiola,² valaau atu i tagata ia “iloa mautinoa” o Ia o le Keriso e ala i le o mai ma tagotago i faailoga o le manua i Lona itu ma tulaga o fao i Ona lima ma ona vae.³ O nei molimau na faavaeina e aunoa ma le masalosalo o le Togiola a Iesu ua atoatoa ma ua faataunuuina e le Tama Lana feagaiga ina ia auina mai se Faaola. Ona aoaoina lea e Iesu o sa Nifae i le ala e maua ai faamanuiaga uma o le fuafuaga o le fiafia a le Tama, lea ua avanoa mo i tatou ona o le Togiola a le Faaola, e ala i le aoao atu ia i latou o le mataupu faavae a Keriso.⁴

O la’u savali i le asō e taulai atu i le mataupu faavae a Keriso. Ua faauigaina e tusitusiga paia le mataupu faavae a Keriso o se faatinoga o le faatuatua ia Keriso ma Lana Togiola, salamo, ia papatisoina, mauaina o le meaalofa o le Agaga Paia, ma tumau e oo i le iuga.⁵

O Le Mataupu Faavae a Keriso ua Mafai ai ona Tatou Maua Faamanuiaga o le Togiola a Keriso

Ua mamanuina e le Togiola a Keriso tulaga ia atonu tatou te faalagolago i ai “i galuega, ma le alofa mutimutivale, ma le alofa tunoa o le Mesia Paia,”⁶ ““[ia] atoatoa ia Keriso,”⁷ maua mea lelei uma,⁸ ma maua le ola e faavavau.⁹

O le mataupu faavae a Keriso i le isi itu o le ala lea—pau lea o le ala—tatou te maua ai faamanuiaga uma ua faaavanoa mai ia i tatou e ala mai i le Togiola a Iesu. O le mataupu faavae a Keriso lea e faatagaina i tatou ina ia maua le mana faaleagaga lea o le a siitiaina i tatou mai o tatou tulaga faaleagaga o i ai nei i se tulaga e mafai ai ona faaatoatoaina i tatou faapei o le Faaola.¹⁰ E faatatau i lenei faagasologa o le toe fanauina, na aoao mai ai Elder D. Todd Christofferson: “O le toe fanauina, e le pei o lo tatou fananau mai i la le tino, o se faagasologa ae le o se mea ua fuafua e tupu. Ma o le galue ai i lena faagasologa, o le faamoemoega tutotonu lea o le olaga nei.”¹¹

Sei o tatou vailiilia ia elemene taitasi o le mataupu faavae a Keriso.

Muamua, faatuatua ia Iesu Keriso ma Lana Togiola. Ua aoao mai perofeta o le faatuatua e amata i le faalogo atu i afioga a Keriso.¹² E molimau atu afioga a Keriso e uiga i Lana taulaga togiola ma tau mai ia i tatou le ala e mafai ai ona tatou maua le faamagaloga, faamanuiaga, ma le faaeaga.¹³

O le faalogo i afioga a Keriso, tatou te faatino ai le faatuatua e ala i le filifili ia mulimuli i aoaoga ma faataitaiga a le Faaola.¹⁴ Ina ia faia lenei mea, na aoao mai ai Nifae e ao ona tatou faalagolago “atoa i galuega a [Keriso,] o lē ua malosi aoao e laveai.”¹⁵ Ona sa avea Iesu o se Atua i le muai olaga,¹⁶ sa soifua i se soifuaga e leai se agasala,¹⁷ ma i le taimi o Lana Togiola na faamalieina tulaga uma o le faamasinotonu mo oe ma a’u,¹⁸ ua ia te Ia le mana ma ki e faataunuu ai le toetutu mai o tagata uma,¹⁹ ma o Ia ua mafai ai ona faatoilaloina e le alofa mutimutivale le faamasinotonu i luga o tuutuuga o le salamo.²⁰ A tatou malamalama loa i lena mea o le a mafai ona tatou maua le alofa mutimutivale e ala i galuega a Keriso, o le a mafai ona tatou “maua le faatautua e salamo ai.”²¹ O le faalagolago atoa atu i galuega a Keriso o le talitonu lea sa Ia faia le mea na manaomia e laveai ai i tatou ona faatino lea o lo tatou talitonuga.²²

O le faatuatua e mafua ai foi ona tuu lo tatou popole tele e uiga i manatu o isi ia i tatou ma amata ona popole atili i mea o finagalo ai le Atua ia i tatou.

Lua, salamo. Na aoao mai Samuelu le sa Lamana, “Afai tou te talitonu i le suafa [o Keriso] o le a outou salamo ia outou agasala uma.”²³ O le salamo o se meaalofa taua mai lo tatou Tama Faalelagi ua mafai ona o le taulaga a Lona Alo e Toatasi na Fanaua. O se faagasologa ua tuuina mai e le Tama ia i tatou lea tatou te suia ai, po o le liliu atu, o o tatou manatu, amioga, ma o tatou lava tagata ina ia tatou avea atili faapei o le Faaola.²⁴ E le faapea ua na o mo agasala tetele ae o se faagasologa o aso taitasi o se iloiloga faaletagata lava ia ma le faaleleiga²⁵ lea e fesoasoani ia i tatou ina ia faatoilaloina a tatou agasala, o tatou le atoatoa, vaivaiga, ma o tatou faaletonu.²⁶ O le salamo e mafua ai ona avea i tatou ma “soo moni” o Keriso, lea e faatumuina i tatou i le alofa ²⁷ ma lafoaia o tatou popolega.²⁸ O le salamo e le o se fuafuaga faaleoleo i le le taunuu ai o tatou fuafuaga ia ola atoatoa.²⁹ O le salamo faifaipea ua na o le pau lea o le ala e mafai ona aumaia ia i tatou le olioli tumau ma mafai ai ona tatou toe foi e mau faatasi ma lo tatou Tama Faalelagi.

E ala atu i le salamo tatou te gauai atu ai ma le usiusitai i le finagalo o le Atua. O lenei mea e le faia na o oe. O le iloaina o le agalelei o le Atua ma lo tatou faatauvaa,³⁰ tuufaatasia ma a tatou taumafaiga sili ina ia ogatasi a tatou amioga ma le finagalo o le Atua,³¹ e aumaia ai le alofa tunoa i o tatou olaga.³² O le alofa tunoa “o auala paia ia o le fesoasoani atu po o le malosiaga, ua tuuina mai e ala i le alofa mutimutivale ma le alofa o Iesu Keriso … ia faia galuega lelei lea e le mafai ona [tatou] faatumauina pe a faia ia [tatou] lava auala.”³³ Talu ai o le salamo e faatatau moni lava i le avea ai e pei o le Faaola, lea e le mafai ona faia na o i tatou, tatou te manaomia tele le alofa tunoa o le Faaola e faia ai ni suiga talafeagai i o tatou olaga.

A tatou salamo, o le a suia a tatou amioga tuai ma lē tonu, vaivaiga, lē atoatoa, ma popolega i ni amioga ma talitonuga fou lea tatou te latalata atili atu ai i le Faaola ma fesoasoani ina ia tatou avea faapei o Ia.

Tolu, papatisoga ma le faamanatuga. Na aoao mai le perofeta o Mamona faapea “o fua muamua o le salamo o le papatisoga.”³⁴ Ina ia atoatoa, e tatau ona tuufaatasia le salamo ma le sauniga o le papatisoga e faafoeina e se tasi o le umia le perisitua o le pule a le Atua. Mo tagata o le Ekalesia, o sauniga na osia i le papatisoga ma isi gaoioiga e toe faafouina pe a tatou feinu ma aai i le faamanatuga.³⁵

I sauniga o le papatisoga ma le faamanatuga, tatou te osifeagaiga ai ina ia tausia poloaiga a le Tama ma le Alo, manatua pea Keriso, ma gauai atu e tauave le suafa o Keriso (po o Lana galuega ma uiga paia³⁶) i luga o i tatou.³⁷ O le Faaola, i le tali mai, ua osifeagaiga e faamagalo, po o le faamagalo o a tatou agasala³⁸ ma liligi atili mai lona Agaga i luga o i [tatou].”³⁹ Ua folafola mai foi Keriso e saunia i tatou mo le ola e faavavau e ala i le fesoasoani ia i tatou ina ia avea faapei o Ia.⁴⁰

Na tusia e Douglas D. Holmes, Fesoasoani Muamua i le Au Peresitene Aoao o Alii Talavou: “O sauniga o le papatisoga ma le faamanatuga e faatusaina uma i le taunuuga faaiu ma le faagasologa o le toe fanaufouina. I le papatisoga, tatou te tanuina le tagata tuai o le tino ma o mai i se olaga fou.⁴¹ I le faamanatuga, ua tatou aoao ai o lenei suiga o se faagasologa auauai, [lea] i lea taimi, ma lea vaiaso, tatou te liua ai ao tatou salamo, osifeagaiga, ma e ala atu i le faateleina o faaeega paia a le Agaga [e avea ai faapei o le Faaola].”⁴²

O sauniga ma feagaiga e taua i totonu o le mataupu faavae a Keriso. O le mauaina ma le agavaa o sauniga o le perisitua ma le tausia o feagaiga e o faatasi o le a faaalia mai ai le mana o le amioatua i o tatou olaga.⁴³ Na faamalamalama mai e Elder D. Todd Christofferson o “lenei ‘mana o le amioatua’ e sau mai le tagata ma e ala i le uunaiga a le Agaga Paia.”⁴⁴

Fa, o le meaalofa o le Agaga Paia. A mavae le papatisoga e tuuina mai ia i tatou le meaalofa o le Agaga Paia e ala i le sauniga o le faamauga.⁴⁵ O lenei meaalofa, afai tatou te mauaina, o le a mafai ai ona tatou maua le mafutaga faifai pea o se Atua ⁴⁶ ma faaauau pea ona maua le alofa tunoa lea e avea ma se vaega taua o Lana faatosinaga.

I le avea ai ma o tatou soa tumau, o le a tuuina mai e le Agaga Paia ia i tatou le mana po o le malosiaga faaopoopo e tausia ai a tatou feagaiga.⁴⁷ Na te faapaiaina foi i tatou,⁴⁸ o lona uiga o le “saoloto mai le agasala, ua mama, faamamaina, ma faapaiaina e ala i le togiola a Iesu Keriso.”⁴⁹ O le faagasologa o le faapaiaga e le gata ua faamamaina i tatou, ae ua faaee mai ia i tatou ni meaalofa faaleagaga e manaomia po o ni uiga paia o le Faaola⁵⁰ ma suia o tatou lava natura,⁵¹ i se tulaga “ua le o toe i ai so [tatou] manao e fai mea leaga.”⁵² O taimi uma tatou te talia ai le Agaga Paia i o tatou olaga e ala i le faatuatua, salamo, sauniga, auaunaga faaKeriso, ma isi taumafaiga amiotonu, ua suia i tatou seia oo i lea laa ma lea laa, sina mea itiiti ii ma sina mea itiiti i o ia avea ai i tatou faapei o Keriso.⁵³

Lima, tumau e oo i le iuga. Na aoao mai le perofeta o Nifae a uma ona maua le meaalofa o le Agaga Paia, e ao ona tatou “tumau … sei oo i le iuga, i le mulimuli lea i le faataitaiga a le Alo o le Atua soifua.”⁵⁴ Ua faamatalaina e Elder Dale G. Renlund le faagasologa o le tumau e oo i le iuga faapenei: “E mafai ona faaatoatoaina i tatou e ala i le faateleina o le faalagolago atoa e le aunoa  … faatinoina o le faatuatua ia [Keriso], salamo, taumamafa ma feinu i le faamanatuga e faafou ai feagaiga ma faamanuiaga o le papatisoga, ma le mauaina o le Agaga Paia e fai ma soa tumau i se tulaga maualuga atu. A tatou faia lea mea, e avea atili i tatou e faapei o Keriso ma ua mafai ona tumau e oo i le iuga, ma mea uma e aofia ai.”⁵⁵

I se isi faaupuga, o le taliaina o le Agaga Paia ma suiga ia e fatuina i totonu o i tatou o le a fausia atili ai lo latou faatuatua. O le faateleina o le faatuatua e taitai atu ai i le salamo faaopoopo. Ao tatou ositaulagaina faafaaatusa o tatou loto ma a tatou agasala i luga o le fatafaitaulaga, o le a tatou maua le Agaga Paia i se tulaga sili atu. O le mauaina o le Agaga Paia i se tulaga sili atu e uunaia atili ai i tatou i le ala o le toe fanaufouina. A o tatou faaauau pea i lenei faagasologa ma maua sauniga ma feagaiga faaola uma o le talalelei, o le a tatou maua le “alofa tunoa mo le alofa tunoa” seia tatou maua le atoaga.⁵⁶

E Tatau ona Tatou Faaaogaina le Mataupu Faavae a Keriso i o Tatou Olaga

Uso e ma tuafafine, ao tatou faaaogaina le mataupu faavae a Keriso i o tatou olaga, ua faamanuiaina faaletino ma faaleagaga i tatou, e oo lava i tofotofoga. O le a iu ina mafai ona tatou “taofi mau i mea lelei uma.”⁵⁷ Ou te molimau atu ua tupu lenei faagasologa ma e faaauau pea ona tupu i lo’u lava olaga, i lea laasaga ma lea laasaga, i sina mea itiiti ma sina mea itiiti.

Ae o le mea sili ona taua, e ao ona tatou faaaogaina le mataupu faavae a Keriso i o tatou olaga aua ua saunia ai le ala lava e tasi e toe foi atu ai i lo tatou Tama Faalelagi. Ua na o le pau lea o le ala e talia ai le Faaola ma avea ai ma Ona atalii ma afafine.⁵⁸ O le mea moni, ua na o le pau le ala ia magalo ai mai agasala ma agai ai i luma faaleagaga o le faaaogaina lea o le mataupu faavae a Keriso i o tatou olaga.⁵⁹ I se isi itu, na aoao mai le Aposetolo o Ioane faapea “o i latou … e le tumau i le mataupu ia Keriso, e le o ia te i latou le Atua.”⁶⁰ Ma na fofoga atu e Iesu Lava Ia i le Toasefululua i sa Nifae afai tatou te toilalo i le faatinoina o le faatuatua ia Keriso, salamo, ia papatisoina, ma tumau ia oo i le iuga, o le a “tatuu ifo i lalo [i tatou] ma lafo i le afi, o se mea e le mafai ona [tatou] toe foi mai ai.”⁶¹

E faapefea la ona tatou faaaogaina ma le atoatoa le mataupu faavae a Keriso i o tatou olaga? O se tasi o auala o le faia o se taumafaiga magafagafa i vaiaso taitasi e saunia ai mo le faamanatuga i le faaaluina o sina taimi e mafaufau ai ma le agaga tatalo i mea e sili ona manaomia ai se faaleleiga. O le a tatou mafai loa ona tatou aumaia i luga o le fata faitaulaga se mea se tasi o loo taofia i tatou mai le avea faapei o Iesu Keriso, ia ole atu i le faatuatua mo se fesoasoani, ole atu mo meaalofa faaleagaga talafeagai, ma osifeagaiga ia faaleleia i le vaiaso a sau.⁶² A o tatou faia lena mea, o le a oo mai le Agaga Paia i o tatou olaga i se tulaga sili atu, ma o le a tatou maua se malosiaga faaopoopo e faatoilalo ai o tatou le atoatoa.

Ou te molimau atu o Iesu Keriso o le Faaola o le lalolagi ma ua na o Lona suafa e mafai ona laveaiina ai i tatou.⁶³ Ua na o Ia e ala mai ai mea lelei uma.⁶⁴ Ae o le “taofi mau i mea lelei uma,”⁶⁵ e aofia ai le ola e faavavau, e tatau ona faaauau pea ona tatou faaaogaina le mataupu faavae a Keriso i o tatou olaga. I le suafa paia o Iesu Keriso.

Faamatalaga

1. 3 Nifae 11:7.

2. Tagai 3 Nifae 11:10–11.

3. Tagai 3 Nifae 11:14–15.

4. Tagai 3 Nifae 11:21–39.

5. Tagai 2 Nifae 31; 3 Nifae 27:16–20. O loo maua le mataupu faavae a Keriso i tusitusiga paia uma ae e matele lava i le Tusi a Mamona.

6. 2 Nifae 2:8.

7. Moronae 10:32.

8. Tagai Moronae 7:22–24.

9. Tagai Mataupu Faavae ma Feagaiga 132:23.

10. O le tuufaatasiga o le Togiola a Keriso ma le mataupu faavae a Keriso ua faavaeina ai le talalelei a Keriso (tagai 3 Nifae 27:13–21).

11. D. Todd Christofferson, “Toe Fanauina,” Liahona, Me 2008, 78.

12. Tagai Roma 10:17; 2 Nifae 31:19; Alema 32:27–29; Moronae 7:25.

13. Tagai 2 Nifae 32:3.

14. Tagai 2 Nifae 31:10, 13.

15. 2 Nifae 31:19.

16. Tagai Ioane 1:1–3; Mose 7:47; Aperaamo 3:24–27.

17. Tagai Eperu 4:15; Mataupu Faavae ma Feagaiga 45:4.

18. Tagai Alema 34:16.

19. Tagai 2 Nifae 9:21–22; Dallin H. Oaks, “O Ki ma le Pule o le Perisitua,” Liahona, Me 2014, 49–52.

20. Tagai Alema 34:15–16.

21. Alema 34:15.

22. O le faalagolago atoa i galuega a Keriso e aofia ai le iloaina ua na o Iesu Keriso le punavai o le togiolaina (tagai Mosaea 4:7–8). E manaomia ai foi lo tatou talitonu e mafai e Keriso ona laveaiina i tatou o ni tagata taitoatasi. O se tasi na o mafuaaga o i le Mataupu Faavae ma Feagaiga 27:2, ua faatonuina ai i tatou a tatou aai ma feinu i le faamanatuga, e le na o lo tatou manatuaina o mafatiaga o Keriso ae o mea sa Ia faia foi mo i tatou taitoatasi.

23. Helamana 14:13.

24. Tagai Russell M. Nelson, “Salamo ma le Liuaina,” Liahona, Me 2007, 102–5.

25. Tagai Neil L. Andersen, “Salamo … Ina Ia Ou Faamaloloina Outou ,” Liahona, Nov. 2009, 40–43.

26. Tagai Jeffrey R. Holland, “O Mea Malepelepe e Fonofonoina,” Liahona, Me 2006, 69–71; Anthony D. Perkins, “O Le Alofa Tele ma le Ofoofogia ,” Liahona, Nov. 2006, 76–78.

27. Moronae 7:48.

28. Tagai Moronae 8:16. E moni o lo tatou salamo o se tasi lea o faamaoniga autu o i tatou o soo o le Faaola. E mafai moni ea ona tatou faapea atu o loo mulimuli ia Keriso pe afai tatou te le o faaauau pea ona salamo pe o taumafai ia liliu atu o tatou loto ma galuega ia te Ia?

29. Tagai Fetuunai i le Olaga Faafaifeautalai (tamaitusi, 2013), 46.

30. Tagai Mosaea 4:5–7.

31. Tagai 2 Nifae 10:24; 25:23.

32. Tagai Helamana 5:11; Eteru 12:27; Moronae 10:32–33.

33. Bible Dictionary, “Grace.”

34. Moronae 8:25.

35. A tatou aai ma feinu ma le agavaa i le faamanatuga, ua tatou faafouina a tatou feagaiga ma le Atua (tagai Delbert L. Stapley, i le Conference Report, Oct. 1965, 14; L. Tom Perry, “Ao Tatou Fetagofi Atu Nei i le Faamanatuga,” Liahona, Me 2006, 41).

36. Tagai Dallin H. Oaks, “Molimau” (o le lauga na tuuina atu i le semina mo peresitene fou o le misiona, 25 Iuni, 2014), 1–2.

37. Tagai Moronae 4:3; tagai foi Mosaea 18:8–10; Mataupu Faavae ma Feagaiga 20:37 mo nisi feagaiga tatou te osia i le papatisoga.

38. Tagai Moronae 8:25.

39. Mosaea 18:10.

40. Tagai 2 Korinito 3:18; Eteru 12:27; Mataupu Faavae ma Feagaiga 35:2; Mose 1:39.

41. Tagai Roma 6:4.

42. Douglas D. Holmes, “Come unto Christ—the Doctrine of Christ,” unpublished manuscript.

43. Tagai Mataupu Faavae ma Feagaiga 84:19–21.

44. D. Todd Christofferson, “O Le Mana o Feagaiga,” Liahona, Me 2009, 22.

45. O le faamauga e faia i le faaee atu o lima (tagai, mo se faataitaiga, Galuega 8:17).

46. Tagai Mataupu Faavae ma Feagaiga 20:28; O Le Taiala i Tusitusiga Paia, “Agaga Paia,” scriptures.lds.org.

47. Tagai 2 Korinito 3:18; 1 Nifae 14:14; Mataupu Faavae ma Feagaiga 93:20.

48. Tagai 3 Nifae 27:20.

49. Taiala i Tusitusiga Paia, “Faapaiaga, (Sanctification),” scriptures.lds.org.

50. Tagai Moronae 7:48; 8:26; 10:8–18.

51. Tagai Mosaea 4:14; Mataupu Faavae ma Feagaiga 84:33; Bruce R. McConkie, “The Ten Blessings of the Priesthood,” Ensign, Nov. 1977, 33–35.

52. Mosaea 5:2.

53. E taialaina foi i tatou e le Agaga Paia ia toe foi atu i le Tama oi le Lagi (tagai 2 Nifae 32:5; Mataupu Faavae ma Feagaiga 45:57) i le fesoasoani mai ia i tatou ia iloa mea e ao ona tatou faia ia avea ai e pei o Keriso (tagai 2 Korinito 3:18; Eteru 12:27; Mataupu Faavae ma Feagaiga 84:46–48).

54. 2 Nifae 31:16. O le tumau seia oo i le iuga ua talafeagai lava le faaigoaina, aua e manaomia uma ai le taimi ma le onosai (tagai Iakopo 1:2–4). O le mea moni e le mafai ona tatou atinaeina nisi uiga faaKeriso e aunoa ma le fetaiai ma fetauaiga ma faigata. Mo se faataitaiga, e faapefea ona tatou avea ma tali-tiga pe afai e le manaomia ona tatou mafatia mo se taimi umi?

55. Dale G. Renlund, “Le Au Paia o Aso e Gata Ai, Taumafai Pea,” Liahona, Me 2015, 56.

56. Tagai Mataupu Faavae ma Feagaiga 93:12, 19.

57. Moronae 7:25; tagai foi Mosaea 2:41.

58. Tagai Mataupu Faavae ma Feagaiga 39:4–6.

59. Tagai 2 Nifae 9:24.

60. 2 Ioane 1:9.

61. 3 Nifae 27:17.

62. Atonu e masani ona aumai e se tasi le taulaga lava e tasi mo le tele o vaiaso seiloga, faatasi ai ma le fesoasoani a le Faaola, ma e pei ona aoao mai e Elder Neal A. Maxwell, “ua uma ona totogiina” (“Ia Teena e Outou le Amioletonu Uma,” Liahona, Iul. 1995, 64).

63. Tagai 2 Nifae 25:20.

64. Tagai Moronae 7:24.

65. Moronae 7:25.