Pulum Tugeta Famli blong God
God Papa i wantem ol pikinini blong Hem oli gobak hom, wetem ol famli blong olgeta mo wetem glori.
Ol dia brata mo sista. Mi glad tumas long janis ia blong stap wetem yufala long stat blong sesen ia blong jeneral konfrens. Mi welkamem yufala.
Jeneral konfrens i oltaem wan taem blong kam tugeta blong ol Lata-dei Sent. Longtaem finis, yumi nomo save kam tugeta long wan ples, be Lod i putum rod i stap blong ol blesing blong jeneral konfrens i kasem yufala nomata weaples yu stap long hem. Hem i bigwan tumas blong luk ol Sent oli kam tugeta long bigfala Konfrens Senta ia, be mifala we i stanap long pulpit ia, i gat ae blong maen blong mifala i go long ol milian pipol we oli kam tugeta wetem yumi raon long wol blong lukluk mo lisin long konfrens. Plante long yufala i kam tugeta wetem ol famli; sam oli kam tugeta wetem ol fren o ol nara memba blong Jos.
Long weaples yu stap long hem, mo wanem wei yu stap harem voes blong mi, plis save se nomata bodi blong yu i no stap wetem mifala, mifala i filim se yu stap wetem mifala long spirit. Mifala i hop se yufala evriwan i wan wetem mifala—se bae yufala i filim paoa long spirit we i kam taem wan grup blong ol man blong biliv oli kam tugeta long nem blong Jisas Kraes.
Mi filim blong toktok long yufala tedei abaot wan nara kaen kam tugeta. Kaen ia i no hapen evri sikis manis nomo, olsem jeneral konfrens. Be, i stap gogohed stat long ol fas dei blong Restoresen blong Jos, mo i stap go hariap long ol las yia we oli jes pas. Kam tugeta ia we mi tokbaot i kam tugeta blong famli blong God.
Blong tokbaot kam tugeta ia, maet i moa gud mi stat bifo yumi bon i kam, bifo wanem we Baebol i singaotem “stat” (Jenesis 1:1). Long tetaem ia, yumi bin stap wetem Papa long Heven olsem ol spirit pikinini blong Hem. Hem i tru long evriwan we i bin laef long wol ia.
Yu save, nem ia “brata,” mo “sista,” oli no jes ol toktok blong singaot, o kaen toktok. Oli talem wan trutok we i no save finis: God i stret Papa blong evri kaen man; yumi wanwan i pat blong famli blong Hem we i no save finis. From se Hem i lavem yumi wetem lav blong wan Papa we i stret evriwan, Hem i wantem yumi blong progres, mo muv, mo kam olsem Hem. Hem i odenem wan plan, we bae yumi kam long wol, long ol famli, mo gat eksperiens we bae i mekem yumi rere blong gobak long Hem mo laef olsem we Hem i bin laef.
Stamba pat blong plan ia i promes ia se Jisas Kraes bae i givim laef blong Hem olsem wan sakrifaes, blong sevem yumi long sin mo ded. Wok blong yumi, insaed long plan ia, i blong akseptem sakrifaes blong Sevya taem yumi stap obei long ol loa mo ol odinens blong gospel. Yu mo mi i akseptem plan ia. I tru, yumi stap glad long hem nomata we i minim se bae yumi aot long ples we Papa i stap long hem, mo iven bae yumi fogetem wanem yumi bin gotru wetem Hem.
Be yumi no kam ia long ful tudak. Wanwan long yumi i kasem wan smol laet blong God, we oli singaotem “Laet blong Kraes” blong helpem yumi blong luksave gud mo nogud, raet mo rong. Taswe, olgeta we oli laef we oli no save gud o oli no save nating long plan blong Papa oli save filim, insaed long hat blong olgeta, se sam samting oli stret mo oli klin, be sam nogat.
Blong filimsave raet o rong i kam strong taem yumi stap lukaotem ol pikinini oli groap. I stap insaed long wanwan papa mo mama; hem i blong wantem tijim ol klin fasin long ol pikinini blong olgeta. Hemia i pat blong merikel blong plan blong Papa long Heven. Hem i wantem ol pikinini blong Hem blong kam long wol insaed long ol famli, folem paten we i no save finis blong ol famli we oli bin stap long heven. Ol famli oli stamba grup insaed long ol heven we oli no save finis, mo i tingting blong Hem blong i kam stamba grup long wol. Nomata ol famli long wol ia oli no stret evriwan, oli givim long ol pikinini blong God, wan moa gud janis blong kam gud long wol ia wetem lav long wol ia we i kolosap long hemia blong heven—lav blong papa mo mama. Ol famli oli bes wei tu blong holemtaet mo pasem ol klin fasin mo tru prinsipol we bae oli lidim yumi gobak long ples blong God.
Wan smol namba nomo blong ol pikinini blong God, oli kasem, long laef ia, wan ful save long saed blong plan blong God, wetem ol prishud odinens mo kavenan we i mekem paoa blong Sevya blong pem praes from yumi i laef fulwan long laef blong yumi. Iven olgeta we oli gat ol gudfala papa mo mama oli save laef fetful long laet ia, be, oli neva harem abaot Jisas Kraes mo Atonmen blong Hem, o oli neva invaetem olgeta blong baptaes long nem blong Hem. Hemia i tru long ol plante milian brata mo sista raon long histri blong wol.
Sam oli ting se hemia i no stret. Oli save yusum hemia tu blong pruvum se i no gat plan, i no gat samting blong mekem blong sevem man—oli filim se wan God we i stret, we i gat lav bae i no save krietem wan plan we i blong wan smol namba blong ol pikinini blong Hem. Ol narawan oli talem se God i mas jusum finis se wijwan pikinini blong Hem bae Hem i sevem mo i mekem gospel i stap long olgeta, be olgeta we oli neva harem gospel, Hem i no “jusum” olgeta.
Be yu mo mi i save, from ol trutok we oli putumbak tru long Profet Josef Smit, se plan blong God i gat moa lav mo i moa stret bitim hemia. Papa blong yumi long Heven i wari blong pulum tugeta mo blesem evri famli blong Hem. Hem i savegud se i no evriwan we bae i jusum blong kam tugeta, plan blong Hem i givim, long wanwan long ol pikinini blong Hem, janis blong akseptem o sakemaot invitesen blong Hem. Mo ol famli oli stap long hat blong plan ia.
Handred yia i pas, profet Malakae i talem se i gat wan dei i stap kam, we God bae i sendem Ilaeja “[blong tanem hat blong ol papa i go long ol pikinini, mo hat blong ol pikinini i go long ol papa]” (Malakae 4:6).
Profesi ia i impoten tumas, nao Sevya i kwotem taem Hem i bin visitim Ol Amerika afta we Hem i laef bakegen long ded (luk long 3 Nifae 25:5–6).. Mo taem we enjel Moronae i bin visitim Profet Josef Smit, hem tu i kwotem profesi ia abaot Ilaeja mo ol hat, mo ol papa, mo ol pikinini (luk long Joseph Smith—History 1:36–39).
Tedei i nambawan Epril. Long tu dei taem, 3 Epril, i makem 181 yia stat long taem we profesi blong Malakae i kamtru. Long dei ia, Ilaeja i bin kam, mo i givim long Josef Smit prishud paoa blong silim ol famli blong taem we i no save finis (luk long D&C 110:13–16).
Stat long dei ia kasem tedei, plante oli kam intres blong lukluk long famli histri blong hemwan. Ol bigfala namba blong ol pipol oli lukluk long histri blong olgeta wetem bigfala moa intres. Ol laebri blong famli laen, ol asosiesen, mo teknoloji oli girap raon long wol blong sapotem intres ia. Paoa blong intanet i mekem i isi blong famli i toktok blong wok tugeta blong mekem famli histri wetem wan gud spid mo i stret moa bitim bifo.
?From wanem evri samting ia i stap hapen? From i no gat wan moa gud toktok, yumi stap singaotem “spirit blong Elaeja.” Yumi save talem se “profesi we i kamtru”. Mi talem testemoni blong mi se Ilaeja i bin kam. Hat blong ol pikinini—blong yu mo mi—i bin tanem yumi long ol papa, ol bubu blong yumi. Filing we yu filim long ol bubu blong yu i pat blong profesi ia we i kamtru. I stap gud insaed long fasin blong yu. Be i moa bitim blad mak blong yu.
Eksampol. Taem yu stap folem ol toktok blong Spirit blong lanem abaot famli histri blong yu, bae yu faenem se wan famli longwe i luk olsem yu, o i intres long sem buk, o gat sem talen. Hemia i wan gudfala samting mo i save givim tingting. Be sapos wok blong yu i stop long ples ia, bae yu filim se wan samting i no gat. Hem i from se blong kam tugeta mo kam wan long famli blong God i nidim moa bitim sam gudfala filing. I nidim ol tabu kavenan we oli mekem wetem ol prishud odinens.
Plante long ol bubu blong yu oli no kasem ol odinens ia. Be God i putum rod, mo yu bin mekem. Mo God i save se bae yu kam kolosap long ol bubu blong yu wetem lav, mo bae yu gat teknoloji we yu nidim blong faenem olgeta. Hem i bin save tu se bae yu laef long wan taem we bae yu save go long ol tabu tempol, ples we oli save mekem ol odinens, mo wan taem we i moa gud long histri.
I tru. Yumi evriwan i gat plante bigfala responsabiliti we yumi mas lukluk long olgeta mo i nidim taem. Yumi evriwan i faenem sam samting we Lod i wantem yumi wok long ol i bitim paoa blong yumi. Laki, Lod i oltaem putum wan rod i stap blong wanwan long yumi i gat tras mo glad long seves blong yumi; hemia i tekem tu famli histri seves. Yumi kasem paoa blong mekem wanem we Hem i askem tru long fet blong yumi se Lod i no save givim wan komanmen “sapos Hem i no rere finis wan rod blong yumi mekem ol samting we Hem i askem yumi” (1 Nifae 3:7).
Mi save se hemia i tru from eksperiens blong mi. Plante yia i pas, olsem wan yunivesiti studen, mi mitim wan man we i bin wok blong wan long ol bigfala kompiuta kampani blong wol. I long ol taem we ol fas kompiuta oli kamaot, mo i hapen se kampani ia i sendem hem blong salem ol kompiuta long Jos blong Jisas Kraes blong Ol Lata-dei Sent.
Mi tingbaot se man ia i no gat relijin. Be yet, hem i talem wetem ol gudfala toktok se: “insaed long jos ia, oli sap mekem wanem oli singaotem “famli laen wok,’ we oli stap lukaotem ol nem blong ol pipol we oli ded, mo traem faenem ol bubu blong olgeta. Ol pipol, we plante oli ol woman, oli ronron raon bitwin ol kabod, oli lukaotem ol smol kad blong kasem infomesen. Sapos mi tingbaot gud, hem i se ol sista oli bin werem spot sus so oli ron moa kwik. Man ia i gohed, i talem: “Taem mi luk bigfala wok we oli stap mekem, mi luksave se from wanem oli mekem ol kompiuta.”
Yes, hem i talem tru long wan wei. Ol kompiuta oli wan impoten pat blong fiuja blong wok blong famli histri—i no jes ol kompiuta ia we hem i stap salem. Wan lida blong Jos wetem insperesen i talem se bae oli no pem ol kompiuta blong mania. Jos i mas wet from wan teknoloji we oli no tingting long hem yet long tetaem ia. Be mi bin lanem se long ol yia afta long hemia, i no gat wan teknoloji i save tekem ples blong revelesen we i kam long heven, semmak olsem hemia we Jos lida ia i bin kasem. Hemia i wan wok long saed blong spirit, mo Lod i lidim wok ia tru long Tabu Spirit blong Hem.
Sam wik i pas, mi bin stap wok long famli histri blong mi wetem wan we i save wok ia long saed blong mi, mo wan narawan we i help tru long fon. Long kompiuta skrin long fored blong mi, i gat wan problem we mi no save stretem. Mi luk tu nem, we teknoloji i sendem i kam long mi, blong sam pipol we oli stap wet long wan tempol odinens. Be trabol hem i we ol nem oli defren, be i gat wan risen blong biliv se i wan semfala man nomo. Wok blong mi i blong faenemaot wanem i tru.
Mi askem tufala wokman ia blong famli histri blong talemaot long mi. Tufala i talem: “No, yu mas jusum.” Mo tufala i save fulwan se bambae mi faenemaot wanem i tru. Kompiuta, wetem evri paoa mo infomesen blong hem, i livim mi blesing ia blong lukluk nating long tufala nem ia long skrin, skelem infomesen we i stap, lukaotem sam moa, prea insaed long hat, mo faenemaot wanem i tru. Taem mi bin prea, mi bin save stret wanem blong mekem—semmak long sam nara situesen we mi bin nidim blong dipen long help blong heven blong stretem wan problem.
Yumi save se wanem God i glad long hem bae i givim insperesen long ol pipol blong krietem ol samting blong help long wok blong Hem blong pulum tugeta famli blong Hem. Be nomata wanem niu samting i save kam, taem yumi yusum, bae i nidim Spirit i wok long ol pipol olsem yu mo mi. Hemia i no mas wan sapraes long yumi. Long en, oli ol boe mo gel blong God. Bae Hem i sendem wanem insperesen we i nid blong givim olgeta janis blong gobak long Hem.
Long sam yia i pas, ol yut blong Jos oli folem spirit blong Ilaeja long wan gudfala wei. Plante naoia oli holem ol limit-yus tempol rekomen mo oli yusum plante taem. Ol ples blong baptaes long ol tempol oli bisi i bitim bifo; sam tempol oli mas jenisim taemtebol blong olgeta blong save tekem ol bigfala namba blong ol yang pipol we oli stap go long tempol.
Bifo, i no isi blong ol yut oli tekem nem blong ol bubu blong olgeta oli kam long tempol. Tedei, hemia i wan mas, mo plante taem, ol yang pipol ia nao oli faenem ol bubu blong olgeta.
Antap long hemia, plante yut oli faenem se taem oli givim taem blong mekem famli histri wok mo tempol wok, i mekem testemoni blong olgeta long plan blong fasin blong sevem man i kam antap moa. Hem i mekem se Spirit i lidim moa laef blong olgeta, mo i daonem paoa blong enemi. I bin helpem olgeta blong kam kolosap moa long ol famli mo oli kam kolosap moa long Lod. Oli bin lanem se wok ia i no sevem ol dedman nomo; i sevem yumi evriwan (luk long D&C 128:18).
Ol yut oli kasem visen ia; naoia papa mo mama blong olgeta oli mas kam long level blong olgeta. I gat naoia plante pipol we oli bin akseptem baptaes long spirit wol, from wok we ol yut oli bin mekem, mo oli stap wet from ol nara odinens we ol adalt nomo oli save mekem insaed long tempol. Wok blong pulum tugeta famli blong Papa long Heven i no blong ol yangfala nomo, mo i no jes blong ol bubu. Hem i blong evriwan. Yumi evriwan i man blong pulum man i kam tugeta.
Hemia i wok blong jeneresen blong yumi, mo i wanem Aposol Pol i singaotem “dispensesen blong taem blong evri wok blong God i kamtru,” taem God bae i “pulum evri samting oli kam wan tugeta long Kraes, ol samting we oli stap long heven, long wol, oli kam long hem” (Efesas 1:10). Hemia i posibol tru long wok blong atonmen blong Pikinini blong God we Hem i lavem, Jisas Kraes. From Hem, ol memba blong famli we “samtaem oli stap longwe, nao blad blong Kraes i tekem olgeta oli kam kolosap. Kraes nomo i mekem we yumi gat pis, i mekem yumi wan, mo i nomo seraotem ol samting long medel blong yumi” (Efesas 2:13–14). Yufala i bin filim hemia, semmak olsem mi, taem yu stap filim moa lav taem yu lukluk pikja blong wan bubu. Yu bin filim hemia insaed long tempol, taem nem long kad i moa bitim wan nem, mo yu save filim save se man o woman ia i save yu mo i filim lav blong yu.
Mi testifae se God Papa i wantem ol pikinini blong Hem blong oli gohom bakegen, long ol famli, mo wetem glori. Sevya i stap laef. Hem i lidim mo blesem wok ia, mo Hem i stap lukaotgud mo gaedem yumi. Hem i talem tangkyu long yu from fetful seves blong pulum tugeta famli blong Papa blong Hem, mo mi promesem yu se bae yu kasem help we yu lukaotem mo nidim. Long nem blong Jisas Kraes, amen.