Godhed mo Plan blong Fasin blong Sevem Man
From se yumi gat trutok abaot Godhed mo rilesensip blong yumi long Trifala, yumi gat stret map blong rod blong wokbaot blong yumi tru long laef long wol ia.
I.
Fas Toktok blong bilif blong yumi i talem: “Mifala i biliv long God, Papa we I No Save Finis, mo long Pikinini blong Hem, Jisas Kraes, mo long Tabu Spirit.” Yumi joenem ol narafala Kristin man long bilif ia long wan Papa mo Wan Pikinini mo wan Tabu Spirit, be wanem yumi stap bilivim abaot Olgeta, i defren long ol bilif blong ol narawan. Yumi no biliv long wanem we Kristin wol i singaotem Holi Triniti. Long Fas Visen blong hem, Josef Smit i bin luk tufala defren man, tufala man, mo olsem ia nao i mekem i klia se ol bilif blong bifo long saed blong God mo Gohed, oli no tru.
Sam oli biliv se God i wan sikret we man i no save andastanem mo man i no save save; be yumi bilivim wanem i tru, i we huia i God mo rilesensip blong yumi long Hem, yumi save kam blong save, mo hem i ki blong evri nara samting long doktrin blong yumi. Baebol i rekodem Bigfala Prea blong Jisas long Bihaf blong Ol Man, we Hem i talem: “Mo laef ia i min se man i save yu, we yu nomo yu tru God, mo i save mi, se mi Jisas Kraes we yu yu sanem mi mi kam” (Jon 17:3).
Bigfala wok blong save God mo wok blong Hem i bin stat bifo laef long wol ia, mo bae i no finis long wol ia. Profet Josef Smit i tijim: “Bambae i wan longfala taem afta we yu pasem vel we bae yu kam blong lanem evri prinsipol blong kam olsem wan god.” Bambae yumi bildimap yumi long save ia we yumi bin kasem long laef bifo laef long wol. Nao, yumi traem blong tijim Ol Man Isrel long huia stret hem i God mo rilesensip blong Hem long ol pikinini blong Hem; Profet Aesea i talem:
“Sapos yumi wantem tokbaot God, bambae yumi save talem se hem i olsem hu? …
“?Olsem wanem? ?Yufala i no save? ?Yufala i no harem … ? !Ol man oli talemaot long yufala bifo finis! Fasin we wol ia i stat fastaem, yufala i harem stori blong hem finis” (Aesea 40:18, 21).
Yumi save se olgeta tri memba blong Godhed oli seperet mo ol defren man. Yumi save hemia tru long toksave we i kam long Profet Josef Smit: “Papa i gat wan bodi blong mit mo bun we oli save tajem, semmak olsem hemia blong man; Pikinini blong Hem tu; be Tabu Spirit, hem i no gat wan bodi blong mit mo bun, be hem i wan we i Spirit. Sapos i no olsem, bae Tabu Spirit i no save stap insaed long yumi” (luk long D&C 130:22).
Long saed blong hae ples we God Papa i gat insaed long Godhed, mo wanem nao wok blong wanwan long olgeta, Profet Josef i eksplenem:
“Eniwan we i bin luk ol heven oli open oli save se i gat trifala man insaed long ol heven we oli holem ol ki blong paoa, mo wan i prisaed ova long olgeta evriwan.
“Olgeta ia, oli singaotem olgeta God, faswan, we i Krieta; God, sekenwan, we i Ridima; mo God nambatri, Witnes mo Man blong Testifae.
“Hem i wok blong Papa blong prisaed olsem Jif, o Presiden; Jisas i Man blong Toktok long Bihaf, mo Tabu Spirit i Man we i Testifae o i Witnes.”
II. Plan
Yumi andastanem rilesensip blong yumi long ol memba blong Godhed aot long ol revelesen abaot plan blong fasin blong sevem man.
Ol kwestin olsem: “?Yumi kam wea? ?From wanem yumi stap ia? Mo ?Weaples yumi stap go? Oli gat ansa long wanem ol skripja oli singaotem “plan blong fasin blong sevem man,” “bigfala plan blong stap glad,” o “plan blong pemaot man” (Alma 42:5, 8, 11). Gospel blong Jisas Kraes i stap long medel blong plan ia.
Olsem ol pikinini blong God, long wan laef bifo long hemia long wol, yumi bin wantem fiuja blong laef we i no save finis, mo yumi progres nomo kasem we yumi mas kam long wol long wan bodi blong mit mo bun. Blong givim janis ia long yumi, Papa blong yumi long Heven i prisaed ova long Kriesen blong wol ia, we, yumi nomo gat memori blong laef bifo, nao yumi kam blong pruvum se yumi wantem blong obei long ol komanmen blong Hem mo gat eksperiens mo gro tru long ol nara jalenj blong laef long wol. Be long rod ia blong eksperiens long wol, mo from fasfala papa mo mama oli bin foldaon, bae yumi save ded mo aot long ples blong God, kam doti long sin, mo kam blong save ded. Plan blong Papa i putum mo givim ol rod blong winim evri samting we oli blokem rod.
III. Godhed
From yumi save stamba tingting blong bigfala plan blong God, naoia yumi lukluk long wanwan rol blong ol trifala memba blong Godhed insaed long plan ia.
Bae yumi stat wetem wan tijing insaed long Baebol. Blong endem seken leta blong hem long Ol Man Korin, Aposol Pol i tokbaot Godhed blong Papa, Pikinini mo Tabu Spirit: “Jisas Kraes, Masta blong yumi, bambae i stap givhan long yufala evriwan long gladhat blong hem, ] mo God bambae i lavem yufala mo Tabu Spirit bambae i stap wetem yufala evriwan” (2 Korin 13:14).
Skripja blong Baebol ia i represent Godhed mo i talemaot evri samting abaot lav blong God Papa, misin we i fulap long sore mo i sevem man we Jisas Kraes i mekem, mo felosip o kampani blong Tabu Spirit.
God Papa
Evri ting i stat wetem God Papa. Nomata yumi no save tumas abaot Hem, wanem we yumi save i inaf blong andastanem hae ples we Hem i stap long hem, rilesensip blong Hem long yumi, mo bigfala rol blong Hem insaed long plan blong fasin blong sevem man, Kriesen, mo evri nara samting we oli bin kam afta.
Olsem we Elda Bruce R. McConkie i raetem jes bifo long ded blong hem: “Folem stret mining blong toktok ia, i gat wan God nomo we i tru mo i stap laef. Hem i Papa, Elohim we I Gat Olgeta Paoa, Man we i hae we i hae, i Krieta mo Man we I Rul long Yunives.” Hem i God mo Papa blong Jisas Kraes, mo tu, blong yumi evriwan. Presiden David O. McKay i tijim yumi se “fasfala stamba trutok we Jisas Kraes i toktok from i we, biaen, antap mo ova long evri samting, i gat God Papa, Lod blong heven mo wol.”
Wanem we yumi save abaot huia i God Papa, i wanem we yumi save lanem aot long seves mo ol tijing blong Wan Stret Pikinini blong God, Jisas Kraes. Olsem we Elda Jefri R. Holan i tijim, se wan long hae stamba tingting blong seves blong ministri i blong soemaot long ol man we oli stap long wol “se God, Papa blong Yumi we I No Save Finis, i olsem wanem, blong soemaot mo i talem stret long yumi se huia stret i Papa blong hem, Papa blong yumi we i stap long Heven.” Baebol i tekem witnes blong ol aposol se Jisas i bin “stret pikja” blong huia i Papa blong hem, (Hibrus 1:3), we i tokbaot smol moa nomo tijing blong Jisas Hemwan se “Man we i luk mi, hem i luk Papa blong mi” (Jon 14:9).
God Papa i Papa blong ol spirit blong yumi. Yumi ol pikinini blong Hem. Hem i lavem yumi mo evri samting we Hem i mekem, i blong gud blong yumi blong taem we i no save finis. Hem i stamba blong plan blong fasin blong sevem man, mo Hem i gat paoa blong mekem ol tingting blong Hem oli kamtru, blong ful glori blong ol pikinini blong Hem.
Pikinini
Long ol man long wol, memba blong Godhed we oli save luk moa i Jisas Kraes. Wan bigfala toktok blong doktrin blong Fas Presidensi long 1909 i tokbaot se “Hem i fasbon blong evri pikinini blong God, i faswan we i bon long spirit, mo i wan stret pikinini ia nomo long wol.” Pikinini ia, we i hae moa long evriwan, Papa i bin jusum Hem blong kareaot plan blong Papa—blong yusum paoa blong Papa blong krietem ol wol we namba i no save kaontem, (luk long Moses 1:33) mo blong sevem ol pikinini blong God long ded tru long Laef Bakegen long Ded blong Hem, mo sevem yumi long sin tru long Atonmen blong Hem. Bigfala sakrifaes ia we i bitim paoa blong man, i tru, yumi singaotem se “i aksen we i stap long medel long histri blong man.”
Long ol spesel mo tabu taem ia we God Papa i presentem Pikinini, Hem i talem: “Hem, Hem i Pikinini blong Mi we Mi Lavem Hem Tumas: Lisin long Hem.” (Mak 9:7; Luk 9:35; luk tu long 3 Nifae 11:7; Joseph Smith—History 1:17). Olsem ia nao Jisas Kraes, olsem Jehova, Lod God blong Isrel, we i toktok long mo tru long ol profet. I olsem nao we taem Jisas i kamaot long Ol Man blong Nifae afta we Hem i laef bakegen long ded, Hem i presentem Hem olsem “God blong ful wol” (3 Nifae 11:14). I olsem nao we Jisas i toktok long ol profet blong Buk blong Momon mo ol Lata-dei Sent olsem “Papa mo Pikinini,” wan taetol we Fas Presidensi i eksplenem long doktrin toktok 100 yia i pas.
Tabu Spirit
Nambatri memba blong Godhed, i Tabu Spirit, we oli singaotem tu Holi Spirit, Spirit blong Lod, Spirit blong Givhan. Hem i memba blong Godhed we i givim revelesen long yuwan. Olsem wan spirit (luk long D&C 130:22), Hem i save stap insaed long yumi mo mekem wok blong Hem blong toktok bitwin Papa mo Pikinini mo ol pikinini blong God long wol ia. Plante skripja oli tijim se misin blong Hem i blong testifae abaot Papa mo Pikinini (luk long Jon 15:26; 3 Nifae 28:11; D&C 42:17). Sevya i bin promesem se Spirit blong Givhan bae i tijim evri samting, i mekem yumi tingbaot evri samting, mo i gaedem yumi long evri trutok (luk long Jon 14:26; 16:13).. Olsem ia nao, Tabu Spirit i stap helpem yumi blong luksave bitwin trutok mo giaman tok, i lidim yumi long ol bigfala desisen, mo i helpem yumi tru long ol jalenj blong wol ia. Hem i rod tu we bae yumi kam tabu long hem, we i blong yumi kam klin mo klin gud long evri sin (luk long 2 Nifae 31:17; 3 Nifae 27:20; Moroae 6:4)..
IV.
So, ?olsem wanem nao we taem yumi andastanem doktrin ia we i kamtru long heven abaot Godhed mo plan blong fasin blong sevem man i stap helpem yumi wetem ol jalenj blong yumi tedei?
From se yumi gat trutok abaot Godhed mo rilesensip blong yumi long Trifala, stamba tingting blong laef mo wanem i fiuja blong taem we i no save finis, yumi gat stret map blong rod mo stret tok blong wokbaot blong yumi tru long laef long wol ia. Yumi save huia yumi stap wosipim mo from wanem yumi stap wosip. Yumi save huia yumi mo wanem yumi save kam (luk long D&C 93:19). Yumi save huia i mekem ol samting oli posibol mo yumi save wanem yumi mas mekem blong stap glad long ol bigfala blesing we oli kam tru long plan blong God blong fasin blong sevem man. ?Olsem wanem yumi save evri samting ia? Yumi save tru long ol revelesen blong God i go long ol profet blong Hem, mo long wanwan long yumi.
Blong kasem wanem we Aposol Pol i tokbaot se “yumi kam we yumi bigman finis … olsem Kraes” (Efesas 4:13) i nidim moa bitim blong kasem save. I no inaf blong yumi save se gospel i tru; yumi mas tekem aksen mo tingting se yumi kam we yumi jenisim laef tru long gospel ia. I defren long ol nara ples long wol, we oli stap tijim yumi blong save samting, be plan blong fasin blong sevem man mo gospel blong Jisas Kraes oli jalenjem yumi blong kam samting.
Olsem Presiden Thomas S. Monson i tijim yumi long las jeneral konfrens:
“Wanem i mas stap long plan blong fasin blong sevem man, hem i Sevya, Jisas Kraes. Sapos i no gat sakrifaes blong Hem we i pem praes from sin, evri samting bae oli lus nomo. I no inaf blong stap biliv nomo long Hem mo misin blong Hem. Yumi nidim blong wok, blong lan, blong luklukgud mo prea, blong sakem sin mo kam gud moa. Yumi nidim blong save ol loa blong God mo laef folem. Yumi nidim blong kasem ol odinens we oli sevem laef. Taem yumi mekem nomo, bae yumi kasem hapines we i tru, we i no save finis. …
Presiden Monson i talem: “Wetem ol dip tingting blong sol blong mi mo wetem evri tingting i stap daon, mi testifae abaot bigfala presen we i plan we Papa i gat long yumi. Hem i wan stret rod i go long pis mo hapines, long wol ia mo long nekis wol.”
Mi ademap testemoni blong mi long hemia blong profet mo Presiden blong yumi. Mi testifae se yumi gat wan Papa long Heven we i lavem yumi. Mi testifae se yumi gat wan Tabu Spirit we i stap lidim yumi. Mo mi testifae abaot Jisas Kraes, Sevya blong yumi we i mekem se evri samting i posibol, long nem blong Jisas Kraes, amen.