Ang Iyang Espiritu Magauban Kaninyo
Nag-ampo ko sa tibuok nakong kasingkasing nga inyong madungog ang tingog sa Espiritu, nga gipadala kaninyo sa hilabihan ka madagayaon.
Mga kaigsoonan, mapasalamaton ko sa oportunidad nga mamulong kaninyo sa Igpapahulay sa Ginoo, sa kinatibuk-ang komperensya sa Iyang Simbahan, niining panahon sa Pasko sa Pagkabanhaw. Nagpasalamat ko sa atong Langitnong Amahan alang sa gasa sa Iyang Pinalanggang Anak, nga boluntaryong mianhi sa yuta aron mahimo natong Manunubos. Mapasalamaton ko nga masayud nga gitubos Niya ang atong mga sala ug mibangon diha sa Pagkabanhaw. Matag adlaw napanalanginan ko nga masayud nga, tungod sa Iyang Pag-ula, ako unya mabanhaw aron mabuhi sa kahangturan diha sa usa ka mahigugmaong pamilya.
Nasayud ako niadtong mga butanga pinaagi sa bugtong paagi nga si bisan kinsa kanato mahimong masayud niini. Ang Espiritu Santo namulong sa akong hunahuna ug kasingkasing nga kini tinuod—dili lang kausa apan kanunay. Nagkinahanglan ko nianang padayon nga kahupayan. Kitang tanan makasinati og trahedya diin magkinahanglan kita sa kahupayan sa Espiritu. Gibati ko kana usa ka adlaw samtang nagbarug ko uban sa akong amahan diha sa ospital. Nagtan-aw mi sa akong inahan nga mihimo og pipila ka mugbo nga mga ginhawa—ug dayon mihunong na. Samtang mitan-aw mi sa iyang nawong, nagpahiyum siya sa dihang nawala ang kasakit. Human sa pipila ka hilom nga gutlo, misulti og una ang akong amahan. Miingon siya, “Ang gamayng batang babaye mipauli na.”
Hinay niya kining gisulti. Daw malinawon siya. Gipaambit niya ang usa ka butang nga nasayran niya nga tinuod. Hilum niyang gisugdan ang paghipos sa personal nga mga butang ni Mama. Miadto siya sa hawanan sa ospital aron magpasalamat sa matag usa sa mga nurse ug doktor nga nangalagad ni mama sa daghang mga adlaw.
Ang akong amahan adunay pakig-uban sa Espiritu Santo nianang higayona aron mobati, masayud, ug mobuhat sa unsay iyang gibuhat nianang adlawa. Nadawat niya ang saad sama sa naangkon sa kadaghanan: “Nga sila unta makabaton sa iyang Espiritu uban kanila” (D&P 20:79).
Ang akong panghinaut karon nga mapadak-an ang inyong tinguha ug inyong abilidad sa pagdawat sa Espiritu Santo. Hinumdumi, Siya ang ikatulong sakop sa Dios nga Kapangulohan. Ang Amahan ug ang Anak nabanhaw nga mga binuhat. Ang Espiritu Santo usa ka personahe sa espiritu. (Tan-awa sa D&P 130:22.) Inyong pagpili kon modawat ba Kaniya ug mopasulod Kaniya diha sa inyong kasingkasing ug hunahuna.
Ang mga kondisyon diin atong madawat kanang langitnong panalangin gipatin-aw sa mga pulong nga gipamulong matag semana apan tingali dili kanunay motuhop sa atong mga kasingkasing ug hunahuna. Aron ipadala ang Espiritu ngari kanato, kita kinahanglang “sa kanunay mohinumdom” sa Manluluwas ug “maghupot sa iyang mga sugo” (D&P 20:77).
Kini nga panahon sa tuig makatabang kanato sa paghinumdom sa sakripisyo sa Manluluwas ug sa Iyang pagbangon gikan sa lubnganan isip usa ka nabanhaw nga binuhat. Daghan kanato ang naghanduraw niadto nga mga talan-awon. Kausa nagbarug ko uban sa akong asawa sa gawas sa usa ka lubnganan sa Jerusalem. Daghan ang nagtuo nga mao kadto ang lubnganan diin ang gilansang sa krus nga Manluluwas migawas isip nabanhaw ug buhi nga Dios.
Ang matinahuron nga tiggiya nianang adlawa misinyas sa iyang kamot ug miingon kanamo, “Dali, tan-awa ang walay sulod nga lubnganan.”
Miduko kami aron makasulod. Nakakita mi og bato nga lingkuranan tupad sa bongbong. Apan misulod sa akong hunahuna ang lain nga hulagway, sama ka tinuod sa unsay among nakita nianang adlawa. Kadto ang kang Maria, kinsa gibiyaan sa mga Apostoles diha sa lubnganan. Mao kana ang gipakita kanako sa Espiritu ug gani nadungog diha sa akong hunahuna, klaro kaayo nga daw anaa ako didto:
“Apan sa gowa sa lubnganan, si Maria nagtindog nga naghilak, ug samtang naghilak siya, mitikubo siya aron sa paglili sa lubnganan,
“Ug didto iyang nakita ang duha ka mga manolunda nga nanagsapot ug maputi, nanaglingkod sa dapit nga nahimutangan sa lawas ni Jesus, ang usa diha sa ulohan ug ang usa diha sa tiilan.
“Ug sila miingon kaniya, Babaye, nganong nagahilak ikaw? Siya miingon kanila, Kay ila mang gikuha ang akong Ginoo, ug wala ako masayud kon diin siya nila ibutang.
“Sa pagsulti niya niini, siya miliso ug nakita niya si Jesus nga nagtindog, apan wala siya mahibalo nga kadto mao si Jesus.
“Ug si Jesus miingon kaniya, Babaye, nganong nagahilak ikaw? Kinsa may imong gipangita? Sa pagdahum niya nga kadto mao ang magbalantay sa tanaman, si Maria miingon kaniya, “Senyor, kon ikaw man ang nagkuha kaniya, tug-ani ako diin mo siya ibutang, ug ako siyang kuhaon.
“Si Jesus miingon kaniya, Maria. Siya milingi ug miingon kaniya sa pinulongan nga Hebreohanon, Rabboni; nga sa ato pa, Magtutudlo.
“Si Jesus miingon kaniya, Ayaw na ako pagkupti, kay wala pa ako makasaka ngadto sa Amahan: apan adtoa ang akong mga kaigsoonan ug suginli sila nga mosaka ako ngadto sa akong Amahan, ug inyong Amahan, sa akong Dios, ug inyong Dios” (Juan 20:11–17).
Nag-ampo ko aron tugutan nga mobati sa unsay gibati ni Maria sa lubnganan ug unsay gibati sa duha ka mga disipulo diha sa dalan padulong sa Emaus samtang naglakaw sila uban sa nabanhaw nga Manluluwas, nagtuo nga usa Siya ka bisita sa Jerusalem:
“Apan gihawiran siya nila nga nag-ingon, Pabilin uban kanamo: kay hapit na magabii, ug tapus na ang adlaw. Ug siya misaka ug mipabilin uban kanila.
“Ug sa nagtambong siya sa kan-anan uban kanila, siya mikuhag tinapay ug nanalangin, ug kini iyang gipikaspikas, ug gihatag kanila.
“Ug unya nabuka ang ilang mga mata, ug ilang naila siya; ug unya nahanaw siya sa ilang mga mata.
“Ug sila nasig-ingon ang usa sa usa, Dili ba ang atong mga kasingkasing nagdilaab man sa sulod nato samtang nagsulti siya kanato diha sa dalan, samtang nagsaysay siya kanato sa kasulatan?” (Lucas 24:29–32).
Ang pipila niadto nga mga pulong gibalik og sulti sa usa ka miting sa sakrament nga akong gitambungan sobra sa 70 ka tuig na ang milabay. Niadtong panahuna ang mga miting sa sakrament gipahigayon sa gabii. Ngitngit na sa gawas. Ang kongregasyon nanganta niining pamilyar nga mga pulong. Kadaghan na ako makadungog niini. Apan ang mahangturon nakong panumduman mao ang sa usa ka pagbati sa usa ka partikular nga gabii. Mipaduol kini kanako sa Manluluwas. Tingali kon isulti nako ang mga pulong, moabut kini kanatong tanan pag-usab:
Ubani ko; gabii na.
Ang adlaw misalop na;
Miabut na ang kangitngit;
Ug ang kagabhion.
Sulod sa kasingkasing ko,
Ikaw dinapit ko.
Ubani ko; gabii na.
Sa panag-uban tang duha
Nadasig kasingkasing ko,
Sa pakigsulti nimo.
Napuno ang kalag ko sa pulong mo
Naduol ko kanimo.
Mas bililhon kay sa panumduman sa mga panghitabo mao ang panumduman sa Espiritu Santo nga naghikap sa atong mga kasingkasing ug sa Iyang padayon nga pagpanghimatuod sa kamatuoran. Mas bililhon kay sa pagkakita pinaagi sa atong mga mata o paghinumdom sa mga gipamulong ug gibasa mao ang paghinumdom sa mga pagbati nga nag-uban sa hinay nga tingog sa Espiritu. Panagsa ra nga gibati ko kini nga sama gayud sa gibati sa mga mibiyahe diha sa dalan sa Emaus—nga daw hinay apan dili masaypan nga kainit sa kasingkasing. Kasagaran usa kini ka pagbati sa kagaan ug hilum nga kasiguroan.
Aduna kitay bililhon nga saad sa Espiritu Santo isip usa ka kauban, samtang aduna usab kitay tinuod nga mga direksyon kon unsaon sa pag-angkon niana nga gasa. Kini nga mga pulong isulti sa awtorisado nga sulugoon sa Ginoo samtang ang iyang mga kamot anaa sa atong ulo: “Dawata ang Espiritu Santo.” Nianang higayona ikaw ug ako aduna sa kasiguroan nga Siya ipadala. Apan ang atong obligasyon mao ang pagpili sa pag-abli sa atong mga kasingkasing aron madawat ang pag-alagad sa Espiritu sa tibuok kinabuhi.
Ang mga kasinatian ni Propeta Joseph Smith naghatag og giya. Iyang gisugdan ug gipadayon ang iyang pagpangalagad uban sa desisyon nga kulang ang iyang kaugalingong kaalam aron masayud unsa nga dalan ang iyang subayon. Gipili niya nga magpaubos atubangan sa Dios.
Sunod, gipili ni Joseph nga mangutana sa Dios. Nag-ampo siya uban sa pagtuo nga ang Dios motubag. Ang tubag miabut samtang bata pa siya. Kadto nga mga mensahe miabut sa dihang kinahanglan niyang masayud kon sa unsang paagi ipaestablisar sa Dios ang Iyang Simbahan. Ang Espiritu Santo mihupay ug migiya kaniya sa tibuok niyang kinabuhi.
Misunod siya sa inspirasyon bisan kon kini lisud. Sama pananglit, nakadawat siya og instruksyon nga ipadala ang Napulog Duha ngadto sa England sa dihang nanginahanglan siya pag-ayo kanila. Gipadala Niya sila.
Midawat siya og koreksyon ug paghupay gikan sa Espiritu sa dihang napriso siya ug ang mga Santos hilabihan nga gidaug-daog. Ug mituman siya sa dihang miadto siya sa lungsod sa Carthage bisan kon nasayud siya nga nag-atubang siya og posibleng kamatayon.
Si Propeta Joseph Smith mipakita og ehemplo kanato kon unsaon nga makadawat kanunay og espiritwal nga direksyon ug kahupayan pinaagi sa Espiritu Santo.
Ang unang pagpili nga iyang gihimo mao ang pagpaubos atubangan sa Dios.
Ang ikaduha mao ang pag-ampo uban ang pagtuo diha ni Ginoong Jesukristo.
Ang ikatulo mao ang hingpit gayud nga pagsunod. Ang pagkamasulundon mahimong nagpasabut nga molihok dayon. Mahimong nagpasabut kini nga mangandam. O tingali nagpasabut kini sa paghulat nga mapailubon alang sa dugang nga inspirasyon.
Ug ang ikaupat mao ang pag-ampo aron masayud sa mga panginahanglan ug mga kasingkasing sa uban ug unsaon sa pagtabang kanila alang sa Ginoo. Si Joseph nag-ampo alang sa mga Santos nga nag-antus sa dihang anaa siya sa bilanggoan. Aduna koy oportunidad nga makaobserbar sa mga propeta sa Dios samtang nag-ampo sila, nangayo og inspirasyon, midawat og direksyon, ug misunod niini.
Nakita nako nga ang ilang mga pag-ampo kasagaran kalabut sa mga tawo nga ilang gimahal ug giserbisyuhan. Ang ilang pagpakabana alang sa uban daw miabli sa ilang mga kasingkasing aron makadawat og inspirasyon. Mahimong ingon ana usab alang kaninyo.
Ang inspirasyon motabang kanato sa pag-alagad sa uban alang sa Ginoo. Nakita ninyo kana sa inyong mga kasinatian, sama nako. Ang akong bishop kausa misulti kanako—sa panahon nga ang akong asawa mibati og hilabihang kalisud sa iyang kaugalingong kinabuhi—“Matag higayon nga makadungog ko og tawo sa ward nga nagkinahanglan og tabang, inig-abut nako didto aron motabang, makita nako nga nag-una na ang imong asawa. Giunsa man niya sa pagbuhat niana?”
Susama siya sa tanan nga maayo nga mga tigpangalagad sa gingharian sa Ginoo. Daw adunay duha ka butang nga ilang buhaton. Ang maayo nga mga tigpangalagad nahimong takus sa hapit kanunay nga pakig-uban sa Espiritu Santo. Ug nahimo silang takus sa gasa sa gugmang putli, nga mao ang tiunay nga gugma ni Kristo. Kadto nga mga gasa milambo diha kanila samtang gigamit nila kini sa pag-alagad gumikan sa gugma alang sa Ginoo.
Ang paagi diin ang pag-ampo, inspirasyon, ug gugma sa Ginoo magtambayayong diha sa atong pagserbisyo hingpit nga gihulagway alang kanako niini nga mga pulong:
“Kon pinaagi sa akong ngalan mangayo kamog bisan unsa, kini akong pagabuhaton.
“Kon nahigugma kamo kanako, inyong pagatumanon ang akong mga sugo.
“Ug ako mangamuyo sa Amahan, ug kamo iyang pagahatagan og laing Manlalaban, nga magapakig-uban kaninyo hangtud sa kahangturan;
“Nga mao ang Espiritu sa kamatuoran; kang kinsa ang kalibutan dili makadawat tungod kay ang kalibutan dili man makakita kaniya ni makaila kaniya: apan kamo nakaila na kaniya, kay siya nagapuyo man uban kaninyo, ug maanha siya sa sulod ninyo.
“Dili ko kamo pagabiyaan nga daw mga ilo: ako mobalik ra kaninyo.
“Hamubo na lang ang panahon, ug unya ang kalibutan dili na makakita kanako; apan kamo makakita ra unya kanako: tungod kay ako buhi, kamo usab mabuhi.
“Niadto unyang adlawa inyong masuta nga ako anaa sa akong Amahan, ug nga kamo ania kanako, ug ako anaa kaninyo.
“Ang nagabaton sa akong mga sugo ug nagatuman niini, kini siya mao ang nahigugma kanako; ug ang nahigugma kanako pagahigugmaon sa akong Amahan, ug ako mahigugma kaniya ug magapadayag sa akong kaugalingon ngadto kaniya” (Juan 14:14–21).
Mohatag ko sa akong personal nga pagsaksi nga ang Amahan niining higayuna nakaila kaninyo, nasayud sa inyong mga pagbati, ug sa espiritwal ug temporal nga panginahanglan sa tanan nga naglibut kaninyo. Ako mopamatuod nga ang Amahan ug Anak mopadala sa Espiritu Santo sa tanan nga aduna niana nga gasa, nangayo niana nga panalangin, ug nagtinguha nga mahimong takus niini. Ang Amahan, ang Anak, ug ang Espiritu Santo dili mopugos sa Ilang Kaugalingon sulod sa atong kinabuhi. Gawasnon kita nga mopili. Ang Ginoo miingon sa tanan:
“Tan-awa, nagatindog ako sa pultahan, ug nagatuktok: kon may magapatalinghug sa akong tingog, ug moabli sa pultahan, kaniya mosulod ako, ug makigsalo ako sa pagkaon uban kaniya, ug siya uban kanako.
“Ang magamadaugon pagatugutan ko sa paglingkod sa akong trono uban kanako, maingon nga ako usab nagmadaugon, ug milingkod uban sa akong Amahan diha sa iyang trono.
“Ang adunay igdulongog, kinahanglan magpatalinghug sa sulti sa Espiritu” (Pinadayag 3:20–22).
Nag-ampo ko sa tibuok nakong kasingkasing nga inyong madungog ang tingog sa Espiritu, nga gipadala kaninyo sa hilabihan ka madagayaon. Ug ako nag-ampo nga kanunay ninyong ablihan ang inyong kasingkasing sa pagdawat Kaniya. Kon kamo mangayo uban sa tinuod nga katuyoan ug uban sa pagtuo diha ni Jesukristo alang sa inspirasyon, madawat ninyo kini sumala sa pamaagi sa Ginoo ug sa Iyang panahon. Gibuhat kana sa Dios alang sa batan-ong si Joseph Smith. Gibuhat Niya kini karon alang sa atong buhi nga propeta, si Presidente Russell M. Nelson. Mibutang Siya kaninyo diha sa kinabuhi sa ubang mga anak sa Dios aron sa pagserbisyo kanila alang Kaniya. Nasayud ako niana dili lamang tungod sa akong nakita pinaagi sa akong mga mata apan sa mas gamhanang paagi pinaagi sa unsay gihunghong sa Espiritu sa akong kasingkasing.
Gibati nako ang gugma sa Amahan ug sa Iyang Hinigugmang Anak alang sa tanang mga anak sa Dios dinhi sa kalibutan ug sa Iyang mga anak sa kalibutan sa espiritu. Gibati nako ang paghupay ug ang direksyon sa Espiritu Santo. Nag-ampo ko nga makaangkon kamo og kalipay sa pagbaton sa Espiritu isip kanunay ninyong kauban. Sa pangalan ni Jesukristo, amen.