Ng kmal Di Kirir a Rokui el Rechad
A Ikelesia a kmal di kiriu, a roltirakl ra Rubak—tirke el tir a betik a rengrir e oltirakl er ngii e dirrek el tir a mla nguu a Ngklel el mo er tir.
Me longetmokl el kirel okedecherul sel mengerechired el Templo ra Paris France, E ak milchesuar ra blekeradel el diak kubes er ngii. Sera 2010, ra le bo rengii a basio ra templo, e ngkel mayor ra beluu a ulengit me ki bom kaseues mel luut el mo ungil medengelii a Ikelesia. Tial miting a mle etiteuokel el rael ra omeliul a kengei ra mo okederaol. A ki mle kerkikl el kutmeklii a mo siasing el luldimukl e ra bebil ra klebokel el templo e ra Uriul-klebesei el Santo. A kmal mle urungulek a kmo a ikal klebokel el bleob el chaus bo el loremelii ngikal mayor me le kengei e ra urreram.
Ak kilbetiekl, le ngikal mayor e milketeklii ra bai lomes e ra siasing el kimolcholt er ngii, e ngii ma rechedal a bai sorir el di tir el mesuub el mo medengei el kmo tial ikelesia ng ua ngerang. Ma le mermang a beches el buil, e aki mlokedong e lmuut el mo renges e ra uldasu el bol loltobed er ngii ngkel lomtechei e ra beluu el dirrek el toktang e ra reksii ra klechelid. Mg millekoi, “Ng ruchei ra rokui el tekoi, eng mle somam el mo medengei el kmo te re ua techang a chedal Ikelesia er kemiu. Ma kot, e aki mlara tara miting er kemiu ra sakrament. Aki mle dengchokl e ra rebai ra ikelesia e ungil lomes ra rechad el ngara ongdibel ma ikel loruul. E solang e mlo mesterir a re tonarii er kemiu—tirkel kiei ra mats e ra stake er kemiu—e uleker er tir el kmo a rechad e ra Mormons te kora ua ngerang.”
“Me ngerang a uldesiu?” Ma kulker, el telkib el suebek a renguk. Me ngul nger, “Aki miltik el kmo a Ikelesia ra Jesus Kristo ra Uriul-klebesei el Santo e a kot el kmeed el morsel meral Ikelesia ra Jesus Kristo ra ngidil ikelesia el ki modengelii.” Ng kileed e ak mlo omtok el kmo, “Tilechang a di omekbitang! Ng diak el ikelesia el ngii a kmeed; ngii e a Ikelesia e ra Jesus Kristo—ngosisiu el Ikelesia, sel meral Ikelesia!” Engdi ak kulserchii a renguk e bai di miluluuch el ngara renguk el kirel a omereng el saul. Ma mayor a uluchais er kemam el kmo, ngokiu a urelir, e ngii a rechedal a diak a mondelngir el kirel a okedecherul a templo e ra el sel a belurir.
Chelechang, e sel kumdasu el kirel seikid el longasireng el blekeradel, e ak kumelchesiu el mereng a sulel ngkel mayor ra lemsel ma reng el lulemtab. Ng mle medengei el kmo sel lutebengal el tekoi el mo medengelii a Ikelesia a diak el sel losenged el lomes e ra ikrel a blai malechub e ngikel lungil klebechel el chelechad engdi ngokiu tirkel million el mekedung el chedal, el melasem ra bekl el sils e loltirakl er sel lokesiul a Jesus Kristo.
Sel belkul a kmo ng Ikelesia a locha milngai er sel tekoi el ngara Babier ra Mormon el bldukl el kmo, “Me … tirkel [belkul a loltirakl er a Rubak] el tir a miltecholb el ngara ngklel a Jesus a mlokedong el ikelesia ra Kristo.”
Ng belkul a kmo, tial Ikelesia a cherengelir a rechad. Ng kmal di kirem, el mesiungel a Rubak—ng tirkel betik a rengrir e oltirakl er Ngii e mla nguu a Ngklel me tobang e lokiu a telbiil.
A President Russell M. Nelson a mle tal lomekesiu ra Ikelesia el mora ungil el mlai. Kede bekl el chad el soad a mlid sel beches e longeldoich. Engdi a moktek e ra mlai a diak ke dolecholt er ngii el klebokel el mesil; ng kirel el loltak er a rechad er a mlai. Meng ngosisiu el teletael, kid, sel de chad er tial Ikelesia, a soad sel ngar ngii a klebokel el basio ra omenguul el beches e ungil keltmokl, e kid a dirrek el soad a ungil klebechel el prokram. Eng di a ikang a kuk urrellel a melkakl. Sel imol douedikel er ngii a mengemedaol ra rengelekel a Dios lobult el mora Kristo, e mo mekrael er tir e lokiu sel rael ra telbiil. Ng diak a ngodech el lusbechal. A urered a kmal di kirir a rechad ma telbiil.
Ng diak el lungil el kmo sel ngakl el mlodars e lokiu ocholt el mlora mla moluut el Ikelesia a mechem elmo dmak a ikel leru el kot el meklou el tekoi e ra derta el telbiil ra ebangkelio? A kot sel ngklel a Jesus Kristo. Tial Ikelesia a kloklel, e sel lomengikiid el Tngakireng er Ngii ma telbiil a di eru el rael a bode sobel ma deurreng. E sel longerung el ngakl e melutk el kired: a Resanto, malechub eng tara belkul, kede sioning er Ngii e mesiungel.
Ak silubii sel ngorechudel el de kerekikl ra rechad sera kusiou rak stake president e ra France. Sera uchelel ra kusiou, eng mla ra uldesuek a bebil ra meringel el moktek el kirel tial stake: sel mo mekdubech a beches el ward, okedecherur a beches el blil a miting, molmuut e ra okedecherur a templo ra basio er kemam. Sera bo lak kusiou uriul ra elolem el rrak, eng diak a tara a ikal moktek el mlo tekoi. Tia dolchesuar er ngii el ua le telmall engdi sel el sel a ikel lelolem el rrak, e a ikel moktek a milngodech.
Mek dengchokl er medal er sel sils e ra bok merek, e ak mlo melchesuar ra mesisiich el reng e ra omereng el saol ma ungil lureor. Ma kumes ra re mederir a re dart el chedal a ikelesia el mlei. Ng sebechek el metebengii a mle blekerdelel a reng el kilsang elmo ra re derta er tir el rokui.
Te ngar ngii tirkel rodom ma rodos el mlo metecholb, tirkel tir a blok saing a kot el babilngir me bol sebechir el ngmai aikel chedaol el lureor ra templo, me tirkel ngeasek el chad ma rubekel el kul mekngerachal er tir malechub eng tirkel kuledaes er tir el milesiou el missionaris. Te mle betok tirkel kulesiou er tir ra le ngara ringel ma ongarem ra klengar er tir. Ak milchesuar ra mesisiich el beltik el reng ra klodam el mora derta er tir. Ak miltik e ra klikiid el deurreng el milesiou er tir e uleldeu ra renguk ra le blol mesisiich el lultuil e loumerang e ra Osobel.
A President M. Russell Ballard a ulsisechakl, “Ngera sel kot el lorechudel ra ikel ngercheled e ra Ikelesia a diak el lochur el dosaod malechub e ngikel miting el ngar ngii eng di bai te rechad—el dosiou el dou dertang er tir el uai e a Osobel—a mla mekiis e mesisiich e mla bult.”
Rodom ma rodos, kid kede mesisiich e ra ebangkelio, malechub e kede di mechesang ra ureor ra Ikelesia? Sel rael a mo oltirakl e ra okesiul a Osobel ra rokui el tekoi. Sel bode uaisei, e kede di merael mo kerkikl el lolsobel e ra rechad ra bai dongetmokl a ureor e oltaut a prokram.
Ngar ngii a tal dil kau loker el kmong ngmo ua ngerang alsekum a Osobel a mlo oldingel e ra ward malechub eng branch er sel mei el Sandei? Ng locha mo mekerang? Ngkol mo bekikl el mo medengei alsekum ma ikel siasing a ungil malechub a kingal a ungil el blechobech ra el sel a klas? Malechub eng a mesa kmung techang el Ngii a sebechel lou beltik el reng el mo rengii, osisecheklii, e omekngeltengat er ngii? Altang e Ngii a mo osiik ra tir kel beches el chad ra Ikelesia malechub eng sechelil el loutkeu er ngii, ng smecher el rodam malechub eng odos el lousbech ongelaod, malechub eng chad el mechitechut a klaumerang er ngii el kirel el mekiis e mo mesisiich.
Ngeral klas a Jesus a moldingel? Ng diak el bol ngodech a renguk alsekum e Ngii a moldingel e ra rengalk ra Primary el kot. Ngii a locha mo tubareuach e mengedecheduch el elbangel er tir. Ng mo ochotii a beltkil a rengul el mo er tir, ouchais er tir a cheldecheduch el chelid, chemat er tir ra zunga er tir, e ouchais el kirel a Demal el ngara Babeluades. A blekerdelel a di beot, klemerang, e diak a kora omengeblad. Ng sebeched el mo uaisei?
Ak yaksok er kau el kmo sel molasem el meruul a soal a Rubak, eng diak a ngodech el lorechudel el ua sel mosiik er tirkel chad el sebechem el ngosuterir e omekngeltengat er tir. Sel mngara ikelesia e komes el losisehchakl ra rechad e remutech a rengrir. A bom kerkikl er ngii a dolmii a blekerdelel a reng ra bai mo ngederodel e ra ungil el lureor, bo mesiou el mo ra re bebil er kau ra Ikelesia ra bai momchur ra idisir a rechad el blo momes er tir. Tiang a diak el bol kirem ng bai kirir el kid a omekedong er tir el rodam ma rodos.
Bebil ra taem e kede mesaod e ra mo er a ikelesia. Eng di a Ikelesia a lmuut el klou a belkul ra blai malechub eng basio. Tiang a klemerang e ngar eldi ua ikel utsu el delengchokl e ra ikel mesechesechel a basio ra beluulechad meng uaisei ra mats ra Ikelesia ra Salt Lake City. Ngii el Rubak a dilung, “Isel ngarngii a re terung malechub e te tedei el dmak e ngara ngklek, e ak ngar sei el teloi er tir.”
Kede nguu a Ikelesia lobengked ra ikel de bo rengii: mora ureor, mora skuul, ma ulenguul, e tokubets ra keblid. Eng di klechad er kid ma klisiched a kmal medeel el rulii a ngidil basio el de ngar ngii el chedaol el basio.
Ak dobedebekii ra kim chadecheduch ngak ma sechelik el diak el chad e ra klechelid er kid. Ng mlo mechas a rengul ra bo lodengei el kmo ngidil chad e ra Ikelesia er kid a sebechel nguu a priesthood. Ng uleker, “Eng di te telang a rubang a priesthood e ra ward er kau?”
Ma kulenger, “Delongelel okedei ma okeuang.”
Ng kora ngodech a rengul, meng melmolem, “Sel klechelid el kngar ngii, aki oba a dital baderei. Ngerang me kom mousbech ra re betok el baderei ra tutau ra Sandei?”
Ma kumtab e ra keril, e ak kumelchesiu er ngak el mo onger. “Ak dirrek el di uai kau. A kumdasu eng diak ki mousbech ra re betok el priesthood el ngara ikelesia sel Sandei. Eng di a ki meral lousbech e ra oba priesthood el ngara bekl el blai E sel lak a priesthood e ra blai, e a re bebil ra obang a priesthood a mo kedong el sobecheklii e mesiou el morsel telungalk.”
A ikelesia er kemam a diak dil sel Sandei. Sel lomenguul a melomolm ra bekl el sils er sel tal sandei, ra ikel de ngarngii ma ikel doruul. A keblid el tokuni a ngii e a “olbechel el basio ra tekingel a klechelid.” Ngou mesind ra taem ra el sel a keblid el doluluuch, kede omekngeltngat, kede mesuub, kede olsisechakl a tekingel a Dios, e kid a mesiou e loba klikiid el reng. Ng soak el louchais lokiu a blekeradel el me rengak el kmo a kebliid a kot chedaol el basio el Reng a kiei er ngii—el blechoel, e bebil ra taem e ngelakl, ra elsel a ikel meral basio e ra omenguul.
Ak sioning el kmo tial Ikelesia e a Ikelesia ra Jesus Kristo. Sel klisichel ma klengar er ngii a mengai e ra omerelir ra bekl el sils a re millions el mesiungel el melasem ra bekl el sils el moltirakl ersel ngarbab e lokesiul el kerkikl ra re bebil. A Kristo a ngar, e Ngii a omekrael er tial Ikelesia. A President Russell M. Nelson a prophet el ngii a ngileltii elmo mekrael e omtebechel er kid e ra ikal luriul sils. A ikal tekoi ak sioning e loba ngklel a Jesus Kristo, amen.