Ngak Ak Ngelekel a Dios?
Ke de mekerang e melchesua a klisichel a klemedengei el kirel a chedaol blebeled? Kede omuchel losiik el mo medengelii a Dios, el Demad.
Ak dirk mlo oldingel er a delak er a tial mechut el bad el Ikelesia er kemam. Botech a renguk er a kurrenges a mekekerei el choto er a ngerir a rengalek er tial osisiu el delmerab er Primary el kmla er ngii er a betok el rak er a memong, ak mirrael el mo er a rebai e ometab er a roungerachel lolisechakl el kirel a dai er omesuub er chelechal rak el: “Ngak a Ngelekel a Dios.” Ak mlo Klimechur le klotketerir a rungil sensei, er sel taem, el kimongitakl e te blechoel lomes er ngak— el kmal odikel el kekerei el buik el dengchokl er a ulebongel er a kingall— el locha melchedech er a rengirir el kmo, “Ngika ng meral ngelekel a Dios? E techa uldureklii el mei er tiang?”
A kulengit er kid el rokui me debok a rengud el kirel Chedaol Reng, el ngii “a sioning er a rengud, el kmo kid a ngelekel a Dios.”
A tekingel a President Boyd K. Packer a bleketakl e utebengall: “Kau a ngelekel a Dios. Ngii a demal a delbengem. Ng kmal mekreos a delbengem, el ulchellel a King er a Babeluades. Mdelemii tial klemrang er a uldesuem e murrekodel er ngii. Ng diak el iior er a kmo kongetela el telcheroll er a ruchelem er a beluulechad, me a diak el iior er a kmo ke chad er ker el beluu, a reksi er a delbengem a sebechel meluches er a chimol tekoi. Kau a ngelekel a Dios!”
A Brigham Young a silodii el kmo, “Sel mesa … Demad,” “e kemesa chad el kau a meketeketa el medengelii, e Ngii a mo ngoikau er a Chimal, e kau a mo kldmokl el Mechulii e turngur a Medal.”
Sel Klou el Mekemad el kirel a Chedaol Blebeled
A Moses a mlo medengelii a chedaol dikesel er a longedechduch er a Rubak el kabengebeng a mederir. Uriul er tial teletael, e a “Diablong a milngesuseu er a Moses lolab a blulak, e meringel lorrimel el mengeuid, e dirrek el melemall er a chedaol blebelel a Moses. A Diablong a ulemekedong er a Moses, el kmo ngelekel a chad, e dilu er a Moses me bo longull er ngii. A Moses a ulemes er a Diablong e uleker el kmo ng techang, le Moses a mle medengei el kmo ngii a ngelekel a Dios.”
Tial klou el mekemad el kirel a chedaol blebeled a melemolem le Diablong a melemomel lolab a betook el bedengel a teletael el moktek er ngii a melemall er a klaumerang me a klemedengei er kid el kirel a deleuill er kid me a Dios. Doureng a saul, le kede ngeltengat er a bleketakl el klemedengei el kirel a meral blebeled er a uchelel mei: “Me a Dios a dilu el kmo, Mei e debebii a chad el di [uai] kid, el uaia teleteled,” e a rengar el profet er Ngii a lmuut el smisichii tial tekoi, “A [dersta er kid] a mekreos er a reng el sechal me a redil er a rechad er a blid er a babeluades, me a, leuaisei, e a dersta er kid a chedaol a belebelir me a teletelir.”
Sel bo dungil medengei aika el “klemerang e ngosukid el mo mesisiich a rengud er a bek el bedengel a ongarm, mondai, me a ringel.A rechad sel loker el kmo, “Kede mekera ngosuterir tirkel ngara ringel [er a mondai er a klechad]?” e a Apostol er a Rubak a mla olisechakl el kmo, “Mosischekelterir el mo medengelii a chedaol blebelir me a moktek er tir.”
“Sel Kot el Mesisiich el Klemedengei el Kubang”
Aikaikid el kmal mesisiich el klemerang a ngildechii a klengar er a sechelik er a Jen, el sera lengeasek eng miltemall er a klou el aksident er a mlai. Ng uaisei el kmal mle klou a telmellel a bedengel, eng di sel lemuut el meisiich el ringel le blarngii a ngike el ulmekall er a mlai a mlad. “A tara chad a mlad a delal, e telmellek,” ngii a melekoi. A Jen, el tela el klebesei ruchei er a aksident eng dilechor e menguiu el kmo, “Kid a ngelekel a Chedam er a Babeluades, el betik a rengul er kid,” e chelechang melelbedebek el kmo, “Ng mekerang e Ngii a betik a rengul er ngak?”
“A ringel er a bedengek a mlo diak,” ng melekoi, “eng di a kumdasou eng diak el sebechek el mo ikrii a ringel er a uldasou me a reng.”
Ng millemolem el melisiich er a rengul, eng di a Jen a ulemart aikel lomelchesiu, e ko er a di mengeroid er ngii. Tal rak ruirul, er a bocha el sebehcel mengedecheduch el kirel tial aksident, e a mellomes a rengul counselor a ulengit er ngii me lechesii a tekoi el “Ngak a ngelekel a Dios” e melekoi er ngii el teruich el taem er a tal sils.
Ng melekoi el kmo, “A omeluches a mle beot,” “eng di dimlak el sebechek el dulii. …Ng kmal mle meringel e dimlak ksal oumerang el kmo a Dios a soal ak Ngelekel. Ak di mo chelimetemet e lmangel.”
Uriul er a tela el buil, e a Jen a mocha sebechel kudmeklii tial tekoi er a bek el sils. Ng millekoi el kmo, “Ak meral mlo ngara nglunguuch er a renguk,” “lolengit er a Dios. …Eng mocha sebechek loumera ikal tekoi.” Tial klaumerang a mle uchul e a Oosbel a ulemuchel el omekungil er a rengul. A Babier er a Mormon a milsa ongelaod e milisiich er a rengul lokiu a Tngakireng er Ngii.
“A Kristo mlo melchesuar a ringel el kblarngii, me a klengitelreng, me a ouchelreng,” ng melekoi a Jen. “Ak mlo melchesuar a klikiid el beltikereng er a Dios el dirkak a ta me kulchesuar a uai tia el klisiich! Sel kudengei el kmo ak ngelekel a Dios a kot el mesisiich el klemdengei el kubang!”
Osiik el mo Medengelii a Dios, el Demad
Rodam me a rodos ke de mekerang e melchesua a klisichel a klemedengei el kirel a chedaol blebeled? Kede omuchel losiik el mo medengelii a Dios, el Demad. A President Russell M. Nelson a ulechais el kmo, “Ngarngii a mesisiich el kmo ngerang el duubech sel sekum a ngelekel a Dios osiik el muut el mo medengei a betook el Kirel me a Betik er a Rengul Ngelekel.”
Sel dosuub e doltirakl er a Osobel e ngosukid el mo medengelii a Chedam. “Ngii el … di uaia blebelel a [Demal],” e a Jesus a ulisechakl el kmo, “A Ngalek a diak a ngera el di ngii el meruul, ng di meruul aikel loruul a Demal.” A bek el tekoi me a omeruul loruul a Kristo luldimukl er a ringel el Ngii a mlara chelsel—a meral ochotii a meral teletelel a Dios me a deleuill er kid lobengkel. A Elder Jeffrey R. Holland a ulsisechakl el kmo, “A rsechel el mlo mengerngars me a ringel el Ngii a mlara chelsel, e a Kristo a ulsiik er Ngike el Ngii a dibla losiik er Ngii—Demal. ‘Abba,’ Ng lilangel, ‘Chedam.’”
A Jesus er a lesal losiik er a Demal er a le ngara Gethsemane, ngeasek el Joseph Smith, er a 1820, e ng miluluuch losiik er a Dios er a le ngara Chedaol Chereomel. Uriul er a longuiu el kmo, “A lengarngii olngesonges er a llomes, e lolengit er a Dios,” Me a Joseph a mlo meluluuch.
Ng milluches el kmo “Ak mlo outubaruach,” “e mocha odersii a renguk el mo er a Dios. …
“ … E milsa llomes er bebul a bdeluk. …
“… Ak milsterir a reteru el Chad, el medidiich me a klebkellir a diak a ngii di el ngera el smodii, el dilchor er a melaongel. A chimo er tir a milngedecheduch er ngak, el ulekerir a ngklek e dilu, e millutk er ngika el chimong—e dilu el kmo [Joseph] Ngika Betik er a Renguk el Ngelekek. Mrengesii!”
Sel doltirakl er a okesiu Osobel me a Profet Joseph e demeral losiik er a Dios, e kid a mo ungil medengei er sel meral teletelel, el uaia Jen, el kmo a Demad a medengelkid e kid a Ngelekel.
Kemiu a rengeasek el chedil, el blechoel omelchesiu er a berraod sel molasm lomekeroul er a “re mo mekedung el telcheroll er a rengalek,” e lak bol beot a rengmiu el kirel a ngercheliu er a chelsel a uldesuel a Dios. Aikel taem el msal meriked—el locha oltoir er a remekekrei el ngalek e mkora di bul a bekechat el locha mla mechas a kall meng bai mocha uldersem—e bomodengei el kmo a Dios a mo smisichau er a ikel kot el meringel el sils er a klengar kau. “Lak komedakt; e ngak obengkem,” Ngii a milketeklii el mei er kid. Kede chemat er kemiu sel motutii a urungulel a Sister Joy D. Jones, el dilu el kmo, “A rengeleked a kirir el mo medengelii sel chedaol el blebelir.”
Ak siotai er a dersta er kid el mo osiik er a Dios me a Betik er a Rengul Ngelekel. “Ng diak a ngodech,” el uaikel osischeklel a President Nelson el dilu el kmo, “aika el klemrang a kmal bleketakl e mesisiich el mosisechakl er a chelsel a Babier er a Mormon.” Bekengii e mosuub el mo medengei el kmo a Dios a “meruul a rokui el tekoi el moklungioled e deureng er [kid”; e Ngii a “chubechub e mui er a krazia, e diak el mereched el ngmasech a rengul, klou a rengul e mui er a klungiaol”; e a rokui el chad a diosisiu er [Medal].” Sel bom ngara ringel, rrau a rengum, medakt, kesib a rengum, mekngit a rengum, songerenger, malechub e kecheloit el di kau el ngara ringel— e bekengii a Babier er a Mormon, e kau a mo medengei el kmo a “[Dios] a diak el chitid. Ng dirkak a ta melchitid, e diak bol chitid. Ng diak el sebechel kudmeklii el tekoi. Ng diak el Teletelel el mo [uaisei].”
Sel bo dodengelii a Demad e ngmodech a rokui el tekoi, oumesingd a rengud, le sel medemedemek el Reng er Ngii a oterkeklii el me er kid a meral teleteled me a klou el ultuteled er a Uldesuel. A Dios a merael lobengked er a rolel a telbiil sel dosiik er Ngii lokiu a ongtid loek a nglunguuch, omesubel chedaol llechukl, e melasm lolngesenges a llach.
Sel Klebekelel a Teletelel a Dios—Sioning er Ngak
Ng betik a renguk er a Dios er a redemak, “e medengei el kmo a Ngarbab el Dios,” a ngara klengitereng lobengked sel dengara ringel, e mekekokil mesmechokl er kid er a chelitechetud, e ngara deureng sel dosiik el mo “chemoit a rokui el [kngtid] el mo [Medengelii].” Ak mengull er Ngii, el dimla “demerir a rediak a redemerir” e kldemir a recheloit. Ak mereng a saul, e sioning el kmo ak mla mo medengelii a Dios, el Demak, e ouchais er a sioning el kirel a cherrungel klengar ngii, blekerdelel, me a “klebekelel a [Teletelel].”
Me a dersta er kid bo demui el medengei e dongeluolou a “dikesed” el ngelekel a Dios sel bo Dodengelii, “el meral Dios, me a Jesus Kristo, el [Ngii] a uldureklii” a ngii a nglunguchek el ngara ngklel a Jesus Kristo, amen.