1 Me chelecha eng mloerngii a klou lildois er a rechad el mle keldibel, a rechedal a Nephi er bita er a templo el mla er a chelsel a beluu er a Brikt; me te mle katekoi e kakerker lerrau a rengrir, e kaiuecholt a meklou e mengasireng el mla duubech.

2 E direk el mle chadecheduch el kirel ngikang el Jesus Kristo el Ngii a mla me chemolt olanch el kirel a kodellel.

3 Me tia er a le chadecheduch, e te rirngesii a ngor el kora mla er a ianged el mei; me tulemes el meliuekl, leng dimlak bo lodengelii a ngor el rirngesii; leng dimlak lemesisiich el ngor, me a lechub el ble leklou el ngor; meng uaisei el kmal mle kekerei, endi tir el rokui el rirngesii a mlo melchesiu er a klisichel el di ulliubek el mo er a reng, meng di mlo diak er a bedengir a dimlak bo lomritel; Oi, ng di ulliubek a rokui el mo er a delbengir, meng di mlo mengeald a rengrir.

4 Chelecha ete liluut el rongesii ngii el ngor, endi dimlak bo lodengelii.

5 Ma lluut er a ongedei el rengesii a ngor, e te mlo omtab er a dingerir; me a mederir a ulemes el mo bedul a ngor; me tulmes el bellemakl el bedul a ianged, el kirel a le blarngii a ngor el mei.

6 Ea ongedei er a taem, e te mlo medengelii a ngor el rirngesii; el dilu er tir el kmo:

7 Mesang a Betik er a Renguk el Ngelekek, el dmeu a renguk el kirel, el Ngii a mla msa klebkall a ngklek, mrengesii.

8 Me chelechang e tiael bocha lodengei, ete liluut lomes el mobedul babeluades; e chelechang ete milsa Chad el metengelang er babeluades; el mle bliull er a becheleleu el kekemangel bail; meng mlei el me dechor er a dlongelir; me a medal tiael seked a di mloerngii, e dimlak a ngii diltang el mle sebechel mekengii a ngerel, te mle bekikl el kmo tiang ngera belkul, le tulemdasu el kmo anghel a mla me chemolt er tir.

9 Meng mochamerk a chimal e dulael mo er a rechad el kmo:

10 Kamomes, Ngak a Jesus Kristo, el reprofet a uluchais el kmo ngmei er a bluulechad.

11 Me kamosang, ngak a llemesel, e klengar er a bluulechad; me ak mla melim er a kob er a mechuuached el Edam a milskak, e mla msa klebkall a Edam ra kngai el chemol a kentil a bluulechad, el ngii a blok charm er a uldesuel a Edam el kirel a rokui tekoi er a uchelel me chelechang.

12 Me chelecha Jesus er a lolkinga ikael tekoi e tiael lildois a dimlomoat er a chutem; le te mocha lotkang el kmo, ngmerang el dimla moerngii er a ulaoch el mle ertir el kmo, a Kristo mechotii el mertir ruriul er a lengasech el moer babeluades.

13 Me chelecha Rubak a dulaer tir el kmo:

14 Kabekiis e morael merngak, me bol sebechemiu lotuu a chimomiu er a chebaod er ngak, e bomrutech a ultil a deel er a chimak me a chochik, me bo modengei el kmo Ngak a Dios er a Israel, e Dios er a bluulechad er rokir, el mlo mad el kirel a kentil a bluulechad.

15 Me a ildois a mlong me tuleltuu chimorir er a chebaod er Ngii, e mlo merutech a ultil a deel er a chimal me a chochil; e tiang a bloloruul erngii loudertang er tir el momerek er rokui, me ngulemes a mederir, e mlo merutech a chimorir, mete mlo ungil medengei, e mlo oterkeklii el rekord el kmo, ngkmal Ngii ngikei el lulluches a reprofet el kmo ngmei.

16 Mi tia er a blalebong er rokui e lomes er a mederir, e tedi mlotael lelmangel klou a ngerir el kmo:

17 Hosanna! Bo lengeltengat a ngklel a Kot el Ngarbab el Dios! Me te mlo meterob er chochil a Jesus e mlengull er Ngii.

18 E chelechang millekoi el mo er a Nephi (le Nephi a mle teloi er a rechad) e diluer ngii me lemei.

19 Me a Nephi a mlekiis e mlong meng mlosus er medal a Rubak e mo melungel ochil.

20 Me a Rubak a diluer ngii mel bekiis. Meng mlekiis el mo dechor er medal.

21 Me a Rubak a diluer ngii: Ak meskau a klisiich me ke mo melecholb er tirkael chad sel kluut el ngmasch el moer babeluades.

22 A Rubak a liluut lomekedong er a rebebil, e diluertir osisiu; meng milsterir a klisiich el mo melecholb chelid. Meng diluertir: Tiakid a mo teletelel omolecholb chelid; meng diak le boerngii a klautitekangel er a dlongeliu.

23 Ngklemerang me ak melekoi er kemiu el kmo, ngikei el mo mekngit a rengul er a kentil leng tikingiu a uchul, e soal mo metecholb er a ngklek, a mo uaitiakid chomolecholb er tir, elechae komo metengel mo dechor er a ralm, e obang ngklek el melecholb er tir.

24 Me chelechang ea ikakid a tekoi el bo molekoi, lomekedong er tir er a ngklek el kmo:

25 Ak mlodurch er a Jesus Kristo, me ak melecholb er kau loba ngklel a Edam me a Ngalk me a Edaol Reng, Boluaisei.

26 E sola e oldulb er tir er a ralm, el lmuut el meduum.

27 Me tiaikid a teletelel chobo molecholb loba ngklek; leng klemerang me ak subdemiu el kmo, a Edam, me a Ngalk me a Edaol Reng, a ditang; me Ngak a ngar er a Edam, me a Edam a ngar er Ngak, me a Edam me Ngak a ditang.

28 Me ngoltirakl aikel blakdung er kemiu a mo teletelel chomolecholb. E diak le boerngii a klautok er a dlongeliu, el uaia mlamemong; me a lechub el boerngii a klautok er a dlongeliu el kirel a tang me a tang er a chosisecheklek, el diuaia ngaramong.

29 Leng klemerang, ngklemerang, me ak subedemiu, ngikei el ngar er ngii a reng er a klautok a diak lengar er ngak, e bai ngar er a diablong, el demal a klautok me ngosecha arengrir a rechad el kirel a tang me a tang me te mo kautok.

30 Tiang a diak losisecheklek el mo olengasech a rengrir a rechad el kirel a tang me a tang; ngbai tiakid osisecheklek el kmo, chouaikang el tekoi a kirel modiak.

31 Kamomes, ngklemerang, me ak melekoi er kemiu, Ak mo cholecholt er kemiu osisecheklek.

32 Me tiakid osisecheklek, el ngii osisechakl el Edam a milskak; me Ngak olchotel er a Edam, me a Edam olchotel Ngak, me a Edol Reng olchotel er a Edam me Ngak; me Ngak olchotel kmo, a Edam a mellach er a rokui el chad er ker me ker me bole mekngit a rengrir el kirel a kenterir e boeloumerang er ngak.

33 Me ngikei el mo oumerang er ngak, e mo metecholb, ngikei a mo suobel; tirkeitir a mo nguu a rengedel a Dios.

34 E ngikei el diak bo loumerang er Ngak e diak bol metecholb a mo delbeakl.

35 Ngklemerang, ngklemerang, me ak melekoi er kemiu el kmo, tiaikid osisecheklek, me Ngak olchotel mla er a Edam; me ngikei el mo oumerang er Ngak oumerang er a Edam el dirrek; me a Edam a mo olchotek el mo erngii, meng mo oldingel er ngii loba ngau me a Edaol Reng.

36 Mitia rolel ea Edam a mo olecholt er Ngak, me a Edaol Reng a mo sioning el mo erngii el kirel a Edam me Ngak; le Edam me Ngak me a Edaol Reng a ditang.

37 Me ak lmuut el melekoi er kemiu, ngkiriu el mo ouuchel a rengmiu el kirel a kentmiu, e moa remekekerei el ngalk, e mo metecholb er a ngklek, le lak eng diak a rolel e bomngai aikael tekoi.

38 Me ak lmuut el melekoi er kemiu, ngkiriu el mo ouuchel er a rengmiu, e mo metecholb er a ngklek, e moua remekekerei el ngalk, le lak eng modiak a rolel e bomsiseb er a rengedel a Dios.

39 Ngklemerang, ngklemerang, me ak melekoi er kemiu el kmo, tiaikid osisecheklek, me ngikei el mo omekedechor er bebul tiang, omekedechor er bebul a beduk, me a rengedel a beluu ra ngau a diak el sebechel mo omtok er tir.

40 E ngikei el molisechakl el modochel, me a lechub eng mo ongesonges aikang emo kmo, aikang osisecheklek, ngikei a chedal a diablong, e diak el dechor er a beduk; ngbai omekedechor er bebul a chelechol lomkedecheraol, me a tungelel a bluurangau a mo obok el melai er tir sel lemetengel a imui me a ses el iolt el meldechelakl er tir.

41 Ma leuaisei e morael el mo er tirka el chad e mouchais aika el tekoi el blakdung; el mo er a ulebongel me a ulebongel er a beluulechad.