1 E solae aikel melluches a diak boliit: Mongitakl, e kau el kebai kau el dimlak momechell; bekiis el mengitakl, e moldiu el mo klou, kau el dimlak bom secher er a cheroll; le te betok a rengelekel a diak lomechell er a rengelekel a bechiil dil, a Rubak a dmung.

2 Mkilungii a leboerngii a tento er kau, e bechitir mel berk a ulebngelel chomkiei er ngii; lako mongereomel, mkemangel a ukereliu e msisiich a kui er kemiu.

3 Le kau a mo mekiis er a kadikm me a katur, me a remo ngelekem a mo oubliongel er a reIsentael e mo remuul a medidriik el beluu el moerngii a delengechokl.

4 Lako medakt eng diak bomerur; me a lechub e bom chebechobel, me a diak a mo omekrur er kau; le ke mobes er a rur er a chomngalk, e mobes a terchedem er a chomngalk, e mo merekong lobes er a omelekoi el kirem le kau el mle melakleldil.

5 Le ulemeob er kau, a bechim, a Rubak er a Ildois a ngeklel; me a Osobelem, el Ditang el Edaol er a Israel, el Dios er a rokui el bluulechad a mo ngklel.

6 Le Rubak a mla mekedong er kau el uaia mla mechoit el dil ngara klengit el reng, e buch el dil er chomngeask e mlechoit, a Dios er kau a dmung.

7 Le kulebes er kau el mle telkib, endi ak mo ngoikau loba klou el chubechub.

8 Er a telkib el kelsib el reng, eak milertii a medak er kau el telkib, endi a diak a ulebengelel chubechub a bokubang lekor kau, ng dmu Rubak el Dios losebelem.

9 Le tiang a di uaia ielb er a Noah er ngak, le Ngak el mla dmu er a renguk el kmo a ielb er a Noah a dikeael luut el mo er a bluulechad, ak direk el mla dmung er a renguk el kmo, ng dikeael luut el mo kesib a renguk er kau.

10 Le rois a mo dibus me a ked a mo mengukl, endi chubechub er Ngak a dikeael luut el mo cheroid er kau, me a lechub a telbiil er a budech er Ngak bol mengukl, ng melekoi a Rubak el ngarngii a chubechub er Ngii er kau.

11 E kau el chormang, el mla obidokl er a ses el iolt, e diak a ulengellel! Kamosang, ak mo mechobech a bedum lungil a bedengel, e mo chodesii omekedecheraol er kau er a oumellemau el bad.

12 E mo remuul a mado er kau er a mengeldoech el bekerkard el bad, me a tungelem a mo medidiich el bad, me sel motkul a chetemem a di mo klungiolel a bad.

13 Me a rokui el ngelekem a mo mosisechakl er a Rubak; e mo klou el budech a ngar er a rengelekem.

14 Ngchelsel a llemalt a mo delengcheklem; me kau a mo cheroid er a ulecheracheb leng mo diako medakt, ea uldikel a mo diak bel keed er kau.

15 Nguaisei, te mo dmak er rokui e me omtok er kau, e diak el Ngak a uchul; le tirkel modmak e meldechelakl er kau a di meriou leng kau a uchul.

16 Kamosang Ngak a milebii a chad er a deel meloko a kol el ngara ngau, e meruul a klekedall er a urerel; e mla mebii a chad er a chomelemall el mo melemall.

17 Ng diak a klekedall er a mekemad el mekedmokl kirel mo chomtok er kau e mo medechel; me a rokui el ngor el mo melekoi a mekngit el kirem er a kerrekeriil, kau a mo melebeakl er ngii. Tiaikid a blingelir a remesiungel a Rubak, me a llemeltir a Ngak a uchul, ngdmu Rubak.