1 Eng luutang me a Jesus er a lemerekong el melekoi aikael tekoi, eng milkingang el mo er a roderchelel loudertang er tir el kmo: Ngera somiu er Ngak ruriul er a kurael mo er a Demak?

2 Meng tir rokui el millekoi, endi tirkei el tedei a dimlak, el kmo: Kemam a somam el sel kibla bomturk er a rekil a chad, me a chosisecheklam el bla beskemam a mocha er a ulebngelel, e kidi mereched el mei er kau er a rengedem.

3 Meng diluertir: Kom ngeltengat leng somiu tiaikid er Ngak; me a leuaisei e sel bocha lokeuid me a erung a rekmiu e komei er Ngak er a rengedek; me komo metik er a ulengull lobengkek.

4 Me a bocha lemerek el melekoi er tir, eng mileltii el mochemau tirkael tedei, e millekoi er tir: Ngera somiu a bokrellii lekoer kemiu sel blakbo er a Edam?

5 Meng mlo mekngit a rengrir leng dimlak el sorir el melekoi er Ngii a tekoi el mle sorir.

6 Meng diluer tir: Kamosang, Ngak a di medengei a uldesuiu, me kemiu a somiu a tekoi el John, el betik er a renguk, el lulbengkek er a kulisechakl, ruchei er ak mengerd el moerbab er a re chiJews, a mle soal er Ngak.

7 Me a leuaisei e kolmuut el ngeltengat, leng modiako bomchermiia kodall; endi kobai mo kiei el mo mes a rokui lomerellel a Edam el mo er a rengalk el chad, el di merekmo rokui el tekoi a mo mecherrungel el di motireklii a uldesuel a Edam, er sel kmei er a klebkall er Ngak loba klisiichel babeluades.

8 E diako bomcheremiia rengelel a kodall; endi sel kmei er a klebkall er Ngak e kemiu a di obult er a ditael busechmad el el ngaer a ngarngii a ulebngelel klengar el mo er a diak a ulebngelel klengar; e sola eko mo ngeltengat el ngar er a rengedel a Demak.

9 E lmuut meng diako bomeringel er tiang el klengar er a tech, me a lechub el klengit el reng, endi merekmo kirel a kentil a bluulechad; ea ikang er rokui a Ngak a meruul le sel tekoi el kemiu a somiu er Ngak a uchul, le kemiu a somiu el melai a delbengir a rechad el mei er Ngak, er a dirkel dechor a bluulechad.

10 Meng tiaikid a mouchul e kemiu a mo nguu a cherrengelel a deuelareng; me komo dengchokl er a rengedel a Demak; oi, a deuelareng er kemiu a momui, el di uaia bla lebeskak a Edam el mui el deuelareng; me komdi mo uaingak, le Ngak a di uaia Edam; me a Edam me Ngak a ditang;

11 Me a Edaol Reng olecholt er a Edam me Ngak, me a Edam a mesterir a rengalk el chad a Edaol Reng, le Ngak a uchul.

12 Me alluut ea Jesus rael delang aikael tekoi, e ngoudertang el merutech er tir loba chimal, el di mlo medechel tirkei el tedei el di mo kiei, e sola engii a ririid.

13 Ea lomes, ea ianged a ulebkais, e tir a mlengai el mo er a chelsel babeluades e miles e ringes a diak le mechedereder el tekoi.

14 Meng mle mekull er tir el diak lolekoi, me a lechub e lengiluu a klisiich el mo sebechir el melekoi a tekoi el lules me a le rirenges;

15 E dimlak lodengei el kmo tullab a bedengir me a lechub eng dimlak; endi tir a lomdasu eng ko er a di uaia le blolngodech, e tulebult el ngar tiang el bedenged er a tech el mo er a diak bol mad el teletael, meng mlo sebechir lotekau a blekeradel er a Dios.

16 Eng luutang mete mlo olisechakl er a bluulechad; endi dimlak lolisechak a tekoi el rirenges me a lules, le llach el lengilai er a babeluades.

17 Me chelechang, kele te mo mad me a lechub eng diak bol mad, er sel sils er a bol mengodech, ngdiak kudengei.

18 Endi aikakid a kudengei loltirakl a rekord el mlaerngii, te mirrael mo er a rokui el beluu, e ullisechak el mo er a rokui el chad, el mlengideb er a rebetok el mo er a ikelesia el mloeumerang osisecheklir; el mellecholb er tir, me tirkei lildisir el mlo metecholb a mlo nguu Edaol Reng.

19 Me te mlechesimer er a kelebus er tirkei el dimlak le chad er a ikelesia. Ea kelebus a dimlak el sebechel lorreked er tir, leng di ulebriid er a belngel.

20 Me te ulebidokl el mo er a chelsel a kliokl el chutem; endi te mirruud a chutem loba tekingel a Dios, meng klisiichel auchul me tir a tilobed er a medeldelechel a bluulechad; meng mlo diak el sebechir el kmiis a dmolech el kliokl el mo orreked ertir.

21 E edei el lobidokl er a chelsel a blil a ngau e dimlak le mekesakl.

22 E erung lobidokl er a chelsel a blil a teblik el charm; ea domes, e tir a bai mlo ousekool aikael charm el di uaia kekerei el ngalk loba dirketmut el ngelekel a sib meng dimlak le metemall.

23 Malluut ete mlo er a dlongelir a rokui el chad er a Nephi, e ullisechakl er a ungil chais er a Kristo me tulebult el mo er a Rubak, e mlo modak er a ikelesia er a Kristo, me a rechad erisel telcheroll a mlo ngeltengat, loltirakl a tekingel a Jesus.

24 Me chelechang e Ngak el Mormon a mo merekui a tekingek el kirel a ikang el tekoi el telkib el taem.

25 Kamosang, Ngak tiang el leko kmochu meluches a ngeklir tirkei el diak bol cheremii a kodall, endi Rubak a ulekebai; meng diak bo kuluches er tir, leng tir a berrotel er a bluulechad.

26 Endi kamorrenges, ngak a mla mesterir, lete mla me cholisechakl er ngak.

27 Me kamosang, tir a mo teloi er a reIsentael, ea reIsentael a diak bolodengelterir.

28 Tir a direk el motloi er a re chiJews, ea re chiJews a diak bolodengelterir.

29 Meng diak boliit el sel bolungil er a Rubak er a klemedengei er Ngii, e tir a mo olisechak er a reberriid el kebliil er a Israel, me a rokui el beluu, me a rekauchad, me a rechad el mengedecheduch a kakerous el tekoi me a redi chad, e mo melai er a delongelir, a rebetok el chad el mei er a Jesus, meng mo melemolm aikel sorir, me a dirrek el uaisei leng klisiichel a Dios lomult a reng el nga er tir.

30 Metir a di uaia reanghel er a Dios, me a lsekum e te meluluuch el mo er a Edam loba ngklel a Jesus, eng sebechir el mo chemolt er a ngii dilechad el tir a sorir.

31 Me a leuaisei eng meklou e mengasireng el lurreor a mo mekedmokl er tir, ruchei er a klou el mei el sils el rokui el chad a kirir el mo dechor er medal a kingall er a kerrekeriil er a Kristo.

32 Oi, me a delongelir a reIsentael a moerngii a meklou e mengasireng lurreor el mo mekedmokl er tir ruchei er a kerrekeriil sils.

33 Alsekum ko molab a rokui el llechukl el ngarngii a teletelel a rokui el mengasireng lurrelel a Kristo, e kemiu a mo loltirakl a tikingel a Kristo, ked medengei el kmo aikang el tekoi a kmal merang el moerngii.

34 Malii er ngikei el diak bolorrenges a tikingel a Jesus, me a direk el tirkel bla lolilt e oldurch el moer tir; le ngikei el diak lekengei a tikingel a Jesus me a tikingir tirkei el bla lodurech er tir a diak le kengei er Ngii; misei eng mo diak le ngititrir ruriul klebesei.

35 Meng bai moungil er tir a lemlak le mechell. Le chomomdasu eng sebechem el lodikii a llemalt el ngara mla metemall a rengul el Dios, el mla merderd er a ocherir a rechad, me bolsebechel moerngii a rolel a mo suobel?

36 Me chelechang e kamosang, aikei el kullekoi el kirir tirkei el Rubak a mellilt, oi, tirkei el tedei el mlengai el mo er a ianged, el diakudengei el kmo te mlo mekikiid er tiael momad el bedenged el mo er a dikea el lemad el bedenged–

37 Endi kamosang, tia er a kulluches, eak mla oker er a Rubak, meng mlachotii el mei er ngak el kmo ngkirel moerngii a mo mengodech er a bedengir, le lak eng mo kirir el mo chormii a kodall;

38 Me a leuaisei, ea rolel eng modiak lecheremii a kodall, ngkirel moerngii a ngodech el mekedmokl el kirel a bedengir, meng mo diak bol meringel me a kal bol mekngit a rengrir, el di merekmo kirel a kentil a bluulechad.

39 Chelechang e tiaikid el mlo ngodech a diak leuai sel moerngii a uriul klebesei; endi ng mloerngii a mo ngodech er tir meng mo diak a klisiichel a Satan er tir, meng modiak longitikaik er tir; metir a mlechedaol er a tech, me te mlochedaol, me a klisiichel a bluulechad a modiak el sebechel lorreked er tir.

40 Me tiaikid el teletael a le blaerngii el molmuut er a kerrekeriil sils er a Kristo; misel sils etir a monguu a klou el mengodech, e mo mengai el mo soiseb er a rengedel a Edam el dikeael lluut el tuobed, el mo kiei lobengkel a Dios el diak a ulebngelel nga er a ianged.