1 E chelecha Jesus er a bla lengasch el moer babeluades, e tia lildois a milterakl, me a chad a nguu a bechil me a rengelekel e luutael mo er a blil.

2 Ea chais a kmal di mle mereched lobriid el moer cheroid ruchei er a bol milkolk el kmo, a ildois er a rechad a mla mesa Jesus, me ngullisechakl er tir, ea klukuk e Ngii a lmuut el mechotii er a ildois.

3 Oi, mi tiael kesus ea chais a ulebriid el moer cheroid el beluu el kirel a Jesus; me te mle betok el chad a mlodurch el mo er a rebetok el chad, oi, a klou lildois a kmal mle mechesang loureor el tael kesus, mebol sebechir er a klukuk el moer sei el kirel molecholt er Ngii a Jesus el mo er a ildois.

4 Me a bochael klukuk, me a ildois le mechedelang el mocha dmak, ea Nephi me a taer ngii lulkisii er a kodall el ngklel a mle Timothy, me a ngelekel el ngklel a mle Jonas, me a Mathoni el direk, me a Mathonihah el taer ngii, me a Kumen, me a Kumenonhi me a Jeremia, me a Shemnon me a Jonas me a Sedekia me a Isaia–Elecha ikakid a ngklir tirkel lodruchel el Jesus a mellutk er tir–mete mlong el mo dechor er a belngel tiael lildois.

5 E chelecha ildois a kmal mle klou, me te mlo chomii er tir el mo truich me a erung el chelechad.

6 Mar truich me a terung a ulisechakl er a ildois; e sola e dilu er a ildois me bo loutubuach er bebul a chutem, e loluluuch el mo er a Edam loba ngklel a Jesus.

7 Me a roderuchel me te dirrek el melluluuch el mo er a Edam loba ngklel a Jesus. E sola ete mekisang el mo olsisechakl er a rechad.

8 Me a bocha lemerek lolsisechakl osisiu el tekoi el Jesus a millekoi el dimlak a ngodech er ngii me a ikel tekoi el Jesus a millekoi, ete liluut el mo outubuach e milluluuch el me a er a Edam loba ngklel a Jesus.

9 Me te milluluuch el kirel sel kot el sorir; e mle sorir me a Edaol Reng lemei er tir.

10 Me chelecha bocha lemerek el meluluuch, ete mirrael mo metengel moer bita er a ralm, ea ildois a ulekiuellir.

11 Me chelecha Nephi a mlo metengel mo er a ralm e miltecholb.

12 E mle duum er a ralm e mocha melecholb. Meng millecholb er tirkei er rokui el Jesus a millilt er tir.

13 Me chelecha bocha lemerek el metecholb er rokui, el tobed er a ralm, ea Edaol Reng a mle metengel er tir, me te mlo mui er a Edaol Reng me a ngau.

14 E chelecha ete mloiliuekl er a kora teletelel a ngau; tia mle metengel mla er a ianged, me a rildois a melsang, e mloerngii lolchotel; me a reanghel a mle metengel er a ianged el mle olisechakl er tir.

15 Me chelecha reanghel er a lolsisechakl er a roderchelel, ea Jesus a mlei el modechor er a delongelir e mlo olsisechakl er tir.

16 Me chelechang eng millekoi el mo er a ildois, e diluer tir melluut el mo outubuach er bebul a chutem, me a roderchelel mel direk el mo outubuach er bebul a chutem.

17 Me chelecha bocha loutubuach er bebul a chutem er rokui, eng dilu er a roderchelel me loluluuch.

18 Mete mocha meluluuch; me te milluluuch el mo er a Jesus lomekedong er Ngii el kmo Rubak er tir e Dios er tir.

19 Me chelecha Jesus a tilobed er a delongelir, e mlo telkib el cheroid er tir, e mloutubuach er a chutem e dilung:

20 Edam, a kureng a sulem el mla mesterir Edaol Reng tirkang el bla kulilt er tir; leng klaumerang er tir er Ngak a uchul me ak mla melilt er tir er a bluulechad.

21 Edam ak meluluuch er kau me mnguu Edaol Reng el mesterir tirkei el mo oumerang a tikingir.

22 Edam, Kau a mla mesterir Edaol Reng le toumerang er Ngak; me kau a medengei el kmo toumerang er ngak, le kau tiael lorrenges er tir, a loluluuch el mer ngak, me te meluluuch el mer ngak le kubenterir.

23 Me chelechang e Edam, ak meluluuch er kau el kirir, e direk el kirir tirkei el mo oumerang a tikingir, me bo loumerang er ngak, me bok ngar er tir, el uai kau e Edam el ngar er ngak, me di bo detang.

24 Me chelecha Jesus er a bocha lemerek el meluluuch el mo er a Edam, eng mlei er a roderchelel, ea lemei etir a dirke melemolm el diak le medeb el meluluuch el moerngii; e dimlak lomiou a betok el tekoi, leng mlortir aikel kirir el meluluuch el kirel, mete mlo mui el blak a rengrir.

25 E chelechang a Jesus a ulemekngeltengat er tir er a loluluuch el moer ngii; me a osengel a mloungil moer tir, me a didiichel a medal a mellidiich el moer tir, me te mlo becheleleu el dimlo uaia medal me a bilel a Jesus; mitiael chelleleu a mlochit a rokui el becheleleu, Oi, ngdiak a ngara bluulechad el becheleleu el uaia chelellengel.

26 Me a Jesus a diluer tir: Moluluuch; endi tir a dimlak bolak loluluuch.

27 Meng liluut lobult, e mirrael telkib el mloer cheroid er tir e dimlo ngii loutubuach er a chutem; e liluut el meluluuch el mo er a Edam el kmo:

28 Edam ak kureng a sulem le kemla mengikiid er tirkei el bla kulilt ertir, le klaumerang er tir auchul, me ak meluluuch el kirir, e direk el kirir tirkei el mo oumerang a tikingir, me bo lemekikiid lokiu ngak, loeak a klaumerang er a tekingir, el di uaitir el mlekikiid lokiu ngak.

29 Edam ngdiak kululuuch el mo er a bluulechad, ndi moer tirkei el kau a mla meskak el tilobed er a bluulechad, le klaumerang er tir auchul, me bo lemekikiid lokiu ngak, me bok ngar er tir, el uai kau e Edam el ngar er ngak, me di bo detang, me bok mukebkall er tir.

30 Me a Jesus er a le merekong el melekoi aikal tekoi, eng liluut el mei er a roderchelel; etir a dirke blak a rengrir el meluluuch, el dirke melemolm el moer ngii; meng liluut el moungil osengel mo ertir; me te mlo becheleleu el diuaia Jesus.

31 Meng liluut er mo er a telkib el cheroid, e milluluuch el mo er a Edam;

32 Ea churad a diak el sebechel dmu ikel tekoi el ngii a milluluuch, me a lechub el sebechel meluches er a chad a ikel tekoi el ngii a milluluuch.

33 Me a ildois a rirenges e ngarngii lolchotel; le rengrir a ulebkais me te mlo medengei er a chelsel a reng er tir a tekoi el ngii a milluluuch.

34 Endi ngkmal mle meklou e mengasireng a tekoi el ngii a milluluuch, meng diak el sebechel meluches, me a kal sebechel medung er a chad.

35 E chelecha Jesus er a bocha lemerek el meluluuch eng liluut el mei er a roderchelel, e dilur tir: Ngklou el klaumerang el dirkak kisang er a delongelir a rokui el chiJews; me a uchul eng dimlak kulecholt er tir a meklou longasireng, leng dimlak loumerang.

36 Ngklemerang me ak melekoi er kemiu, ng dirkak er tir a mes choa meklungel aikang el tekoi el blamues; e dirkak el renges choa meklungel aikael tekoi el blamrenges.