1 Me chelechang e bocha lemerek a Jesus el melekoi aikang el tekoi, eng liluut lomes el meliuekl er a ildois, e diluer tir: Kamosang, a temek a meremang.

2 Ak medengei el kmo, kemiu a mechitechut, meng diak el sebechemiu el mo medengei a rokui el tekingek el Ngak a mlodurch er a Edam el me melekoi er kemiu er chelechang el taem.

3 Me a leuaisei e bo er a blimiu, e momdasu el kirel a tekoi el blakdung, e molengit er a Edam loba ngklek, me bol sebechiu el mo medengei, e mongedmokl a uldesuiu el kirel a klukuk, me ak luut el me er kemiu.

4 Endi chelechang eak mo er a Edam, e direk el mo olecholt er Ngak el mo er a ririid el kebliil er a Israel, le Edam a diak ellak lodengelterir, leng medengelii a blalengititrir el moer ngii.

5 Me chelecha bocha lemerek a Jesus el mengedecheduch, eng ngulmerk er a chosengel meliuekl er a ildois, ea lomes er tir e telmangel, e di mle ultaut a mederir er Ngii, el leko di lolengit er Ngii kung melluut el kiei lobenterir el telkib el meketeket.

6 Meng dulang ertir, a klechubechub er a renguk a mla mo mui el kiriu.

7 A lengarngii a resmecher er a delongeliu? Mngititerir el mei. Te ngarngii ar chitechut, me a lechub e te meiko me a lechub e te tiuach me a lechub e te sechudel, me a lechub e te chebedes, me a lechub e te chelisemsum, me a lechub e tirkel mechad, me a lechub e te chuarm er a ngii di lengerang? Mngititerir el mei me bo kumekungil er tir, leng mekente renguk er kemiu; a blil a klechubechub er a renguk a mla mo mui.

8 Le kumes eng somiu a kulecholt er kemiu aikel kriruul el mo er a rodam er kemiu er a Jerusalem, le kumes a klaumerang er kemiu a mesisiich meng kirek el mo omekungil er kemiu.

9 Me chelecha bocha lemerek el melekoi, ea rokui el chad a dimle tael mekiis e mirrael mong lobeterir a rechederir el smecher me a re telemall er tir, me a re sechudel er tir, lobeterir a re miko er tir, me a re mechad er tir, lobeteterir a rokui er tirke el meringel er a ngii di lengerang; me ngulmekungil er tir loudertang sel lemei er Ngii.

10 E tir er rokui, tirkei el mloungil me tirkei el mle cherrungel a mloeriou er bitaer ochil e mlengull er Ngii; e tirkel mlo sebecherir a mlong, le tiael lildois a di mlo melungel ochil, e mlo melecholb ochil lolab a iuechel a mederir.

11 Ea lluut eng diluer tir me le ngititerir a rengelekir el mong.

12 Me te ngiltiterir a remekekerei el ngelekir el mo dengchokl er a chutem el meliuekl er Ngii, a Jesus a dechor er a belngel; ea seked a ulebii me te mlei er Ngii er rokui.

13 Chelecha lemeremang er rokui, me a Jesus el dechor er a belngir, eng diluer er a ildois me bo loutubaruach er bebul a chutem.

14 E chelecha tiael bocha loutubaruach er bebul a chutem, ea Jesus a lilangel a rengul e dilung: Edam, ngmekngit a renguk le delngerngerir a rechad er a blai er a Israel.

15 E tiael ledelang aikael tekoi, eng Ngii meng dirrek el mlo utubaruach er a chutem; e mocha meluluuch el mo er a Edam, ea tekoi el Ngii a milluluuch a diak el sebechel meluches, me a ildois a mlo olchotel le tir a rirngesii.

16 Me tiakid a teletelel chisir: Ng dirkak lemoes er a mad, me a lechub e bla lemorrenges er a dingal a chad, leng ngkmal mle meklou e mengasireng el tekoi a kimules e rirenges er a Jesus el melekoi el mo er a Edam.

17 Meng diak a ngor el sebechel dmung, me a lechub el sebechel meluches er a ngii dilechad, me a lechub el sebechel a rengrir a rechad el lotekau a kmal meklou e mengasireng el tekoi el kimules e rirenges er a Jesus el melekoi; e diak a chad el sebechel mo medengelii a deuelreng el mlomui er a rengmam, er sel taem el kimorrenges er Ngii el meluluuch el mo er a Edam el kiram.

18 Me chelecha Jesus er a bocha lemerek el meluluuch el mo er a Edam, eng mlekiis; endi deuelreng el mlo er a ildois a kmal mloimong me tedi mlo ko er a oureuachel.

19 Me a Jesus a milekoi er tir e diluer tir me lebekiis.

20 Me te mlekiis er a chutem, meng diluertir: Kom ngeltengat leng klaumerang er kemiu a uchul. Me chelechang a deureng er ngak a mui.

21 E tiael le delang aikael tekoi eng lilangel, me a ildois a mlo cholchotel, e ngiltiterir a remekekerei el ngalk loudertang ertir e meltelat ertir, e melluluuch el mo er a Edam el kirir.

22 Ea bocha lemerek, eng liluut lelmangel;

23 E milngedecheduch el mo er a ildois el dilung er tir: Momes er tirkael mekekerei el ngelekiu.

24 Mi tia er a lomes, ea mederir a mlo bedul a ianged, ete milsa ianged lobkais, e milsterir a reanghel me metengel er a ianged el di uaia le ngar er a chelsel a ngau; me te mlei el meriou el meiiliuekl er tirkael mekekerei, etir a mleiliuekl er a ngau; me a reanghel a mlo olisechakl ertir.

25 Me a ildois er a rechad a kmal, lulemes e orrenges meng mlorngii el rekord; mete medengei el kmo a rekord er tir a klemerang, leng tir er rokui a kmal lulemes e orrenges el dertang ertir; te mle bekord ngar er a erung el telael me a eim el dart el chad; e mlaerngii a re sechal me a redil me a rengalk.