1 Meng klemerang, ngklemerang a kulekoi er kemiu el kmo, ngarngii a bebir er a sib er Ngak el diak le ngar tiang el beluu, me a diak el Jerusalem, me a diak el bita er a ikeel beluu el kullisechakl er ngii.

2 Le tirkei el kullekoi el kirir a dirkak a tang el rengesii a ngerek; e direk el dirkak a tang el bo kuchotak er tir.

3 Endi Ngak a mla nguu a tekoi el mla er a Edam el kirek el moertir, me te mo rongesii a ngerek, e mo ulecherangel luldak er a sib er Ngak, meng di mo tael onriul me a tael loucharm a sib; mauchul ak mo olecholt er Ngak er tir.

4 Ak meskemiu a llach el kiriu el mo lmuches a ikang el tekoi sel kurael, me a lsekum tirkeel chedak er a Jerusalem, el milsekak e ulebengkek er a kulisechakl, a diak lolengit er a Edam loba ngklek, me bol sebechir el mo medengelkemiu loeak Edaol Reng, me tirkei el bebil er a kebliil el tir a dirrek el diak lodengelterir, e bol mekedmokl aikael tekoi el bo moluches, leng mo mocholt el mo er a reIsentael, leng mo oeak a sils er a reIsentael, ea mo medechel er a rengelekir el tir a mo berriid er ker me ker er bebul a bluulechad leng mo diak loumerang, a mo mechudel me a lechub eng mo sebechir el mo medengelkak el Osobelir.

5 Misei e Ngak a mo mengudel er tir el ngar euang el biingel a bluulechad; e solae Ngak a mo churrengelii a telbiil el Edam a dillii el mo er a rokui el chad er a blai er a Israel.

6 Me tengeltengat a reIsentael le klaumerang er tir er Ngak, me a Edaol Reng, el Ngii olecholt er tir el kirek Ngak me a Edam.

7 Me chelechang klemerang er tir er Ngak a uchul, a Edam a dmung, me a bechachau el klaumerang er kemiu, e blai er a Israel, me a uriul klebesei ea klemerang a mei er a reIsentael, el cherrengelel aikael tekoi a mo mocholt el moertir.

8 Endi alii, a Edam a melekoi el mo er a rediak loumerang el Isentael–nguaisei me te meremang er bebul tiael beluu, e mla omriid er a rechedak el chad er a blai er a Israel; me a rechedak el chad er a blai er a Israel a mla modik er a dlongelir, e mla merderd er cheungel ocherir.

9 Meng klechubechub er a Edam el mo er a reIsentael, me a direk el blals er a Edam el mo er a rechedak el chad er a blai er a Israel, ngklemerang, ngklemerang me ak melekoi er kemiu el kmo, a uriul er tiang el rechedak el chad er a blai er a Israel el Ngak a milchititrir me te mla modechelakl, e mo er a ringel, e mo er a kodall, e modik er a dlongelir, el mo mengelengalk er a rengrir, e chongebelung e blil a dlungulir–

10 Me tiakid a tikingel a Edam el kirek el dulii lekong er kemiu: Sel sils el reIsentael a mo er a klengit lomtok er a ungil chais, me tir a mo oltngakl er a cherrengelel a ungil chais er Ngak, e mo mekididai a rengrir el moimong er a rechad er a bluulechad er rokir, e mo mui er a betok el teletelel a blulak, me a omengeblad, me a uldikel me a betok el teletael di mesiou er a ikrel, me a omekeuad, me a olai, me a laokreng, me a berrotel mekngit, me a lsekum tir a mo meruul ouaikang el rokui el tekoi, e mo otngeklii a cherrengelel a ungil chais er Ngak, a leuaisei a Edam a dmung, ak mo nguu a cherrengelel a ungil chais er Ngak el choridii er tir.

11 E solae Ngak a mo lotkii a telbiil el kildmeklii el mo er a rechedak, Oi, e blai er a Israel, me ak mo nguu a ungil chais er Ngak el moer tir.

12 Mak mochotii er kemiu e blai er a Israel kmo, a reIsentael a diak le boerngii a klisiichir er kemiu; lek mo lotkii a tilbilek lekoer kemiu, e blai er a Israel, me komo medengelii a cherrengelel a ungil chais er Ngak.

13 Endi lesekum a reIsentael a mo chouuchel er a rengrir e lmuut el meer Ngak, a Edam a dmung, a leuaisei e te mo ngara ulecherangel er a rechedak, e blai er a Israel.

14 Meng diak bok bechititrir a rechedak el chad er a blai er a Israel, me boltuu er a delongelir el merderd er tir el moriou, a Edam a dmung.

15 Endi lesekum eng diak bo lobult el mer Ngak e lorrenges er a ngerek, eak mo mechititerir a rechedak, a blai er a Israel, me te mo soiseb er a dlongelir, e mo merderd er tir el moriou, mete mo kora sar el mla modiak a cherecherel, meng mla modiak a belkul kirel a ngerang meng mo mechoit el mo merderd er cheungel chocherir a rechedak, e ra blai er a Israel.

16 Ngklemerang, ngklemerang, ak melekoi er kemiu, ng uatiang, a Edam a mla dmung er Ngak meng kirek el nguu tiael beluu el mesterir tirkael chad meng blingelir.

17 E solang ea tikingel a profet Isaia motmaut eleng dilung:

18 A rechedam el mengkar a mo oldiu, e mo ta ngerir e mo mengitakl, le te mo omes el di mo tabesul a mad el mo er a taer a mad, sel Rubak a lmuut lolutii a Zion.

19 Lobkais a rengmiu er a deuelreng, e bomdak el mengitakl kemiu el medidriik el chutem er a Jerusalem; le Rubak a mla kidrii a berraod er a rechedal, ngmla osobelii a Jerusalem.

20 A Rubak a mlachotii a klisiichel a chedaol el chimal er mederir a rokui el beluu; me a rokui lulebongel er a bluulechad a mo mesa Dios a lolsobel.