1 Ea lluut eng diluertir me loluches a tekoi el Edam a milsa Malaki, el kirel louchais er tir. Eng luutang me a uriul er a blael meluches eng mlo smaod el mo er tir. Me a ikakid a tekoi el le dilung er tir el kmo: Ma ikakid a tikingel a Edam el mo er a Malaki,– Kamorrenges, ak mo oderchii oderchelek meng kudmeklii a rael eruchei er Ngak, me a Rubak el mosiik er ngii a di mo mereched el mei er a templo er Ngii, el ngii olab a chais er a telbiil, el ngii a somiu; mrenges, Ngii a mo mei, ngdmung a Rubak er a Ildois.

2 Endi ngtecha mo sebechel longengii a le mei er ngii el sils, e techa mo dechor sel le belcholt? Le Ngii a uaia ngeuil omiich, e uaia sebengel a chad er a omsilk.

3 Meng mo dengchokl el uaia chad lomiich e melechiir a silber; meng momekbeches er a rengelekel a Levi el sechal, e mo chomiich ertir el uaia kolt me a silber, me bol sebechir el mo meruul el mo er a Rubak a uldars el ngara llemalt.

4 E solang a uldersel a Judah me a Jerusalem a mo ungil er a rengul a Rubak, el uaia sils er a rechuodel mla memong el rak.

5 E Ngak a mo kmeed er kau er a kerrekeriil; e mo mereched el sioning lomtok er a rechad er a olai, e mo omtok er a remelaok a rengrir, e moemtok er a remengeblad, e mo omtok er tirkel mengeblad a ududir a rechad loureor, me a mlakleldil me a rediak a demerir, e mekngit er a rengodech el chad, e diak le medakt er Ngak, ngmelekoi a Rubak er a Ildois.

6 Le Ngak a Rubak, Ngak a diak bok ngodech; me kemiu el ngelekel a Jakob a dirkak bo mngemed.

7 El molmuut er a sils er aredemmiu e ko mloer cheroid er a llechuk, e dimlak bo moltirakl. Mluut el mer Ngak, mek luut lekoer kemiu, ng melekoi a Rubak er a Ildois. Endi kemiu a melekoi el kmo: Ngaerker aki mobult lekoer kau er ngii?

8 Ngsebechel a chad el merechorech er a Dios? E kemiu a mla merechorech er Ngak. Endi ko kmo: Ngera kimla rucherechii er kau? A ongeltacher me a uldars.

9 Komla medebeakl er a dellebeakl, le komla merechorech er Ngak, el chimo el beluu.

10 Kemiu mngai a rokui el longeltacher el mei er a blil a klalo, mel boerngii a kall er a blik; e moribet er Ngak el kmo, a Rubak er a Ildois a dmung, ngdiak bok bekais lekoer kemiu a tungelelbabeluades, ebo kulechubel a klengeltengat lekong me bolak bobetik er a leboerngii.

11 E ngak a mo odikii orakt, leng kau a uchul, meng mo diak lolemall a redechel a chetemem; e mo diak el sebechel a dellemelem el ruebet a redechel ruchei er a temel er a sers, ngdmu Rubak er a Ildois.

12 Me a rokui el beluu a mo omekedong er kau el kmo ngeltengat, le kemiu a mo klebokel beluu, ngdmu Rubak er a Ildois.

13 A tekingiu a mle mesisiich lomtok er Ngak, a Rubak a melekoi. Endi kemiu a kmo: ngera kimla melekoi lomtok er kau?

14 Ko mla melekoi: Ngdiak a belkul dosiou er a Dios, le ngerang mla kudmeklii a doltirakl a llechul, me a dorael mekngit a rengud er medal a Rubak er a Ildois?

15 Me chelecha kid omekedong er a remekididai a rengrir el kmo ngdmeu a rengrir; oi, me tirkei el meruul a mekngit a mla mo ungil beserir; oi, me tirkei el melasm er a Dios a diak le mekesakl.

16 E solang e tirkel medakt er a Rubak a blechoel dmak el chadecheduch, me a Rubak a kilengei e rirenges; me a babier er a uleklatk a melluches er medal el kirir tirkei el medakt er a Rubak, me tirkei lomdasu er a ngklel.

17 Me tir a mo soak, ng dmung a Rubak er a Ildois, mi sel sils el bo kuruul a mo besiichek eak moimakl el di uaia chad el moeklii a ngelekel melsiou er ngii.

18 E sola e kemiu a lmuut el mo melilt er a delongelel a kedung me a dengerenger, me a delongelel ngikei el melsiou er a Dios, me ngikei el dimlak losiou.