1 Me chelechang ea bo domes a rekord er kemam, ea rekord er kemam aki modengei el klemerang, leng mle kedung el chad a ulemtebechel a rekord–leng merael mirruul a tekoielchelid loba ngklel a Jesus; e dimlak a chad el sebechel meruul a tekoielchelid loba ngklel a Jesus alsekum eng dimlak le klikiid er a rokui el kentil–

2 Me chelechang ea lsekum ngdimlak le cheleuid ngikael chad er a otebengel a taem er kid, ea okedei me a edei er a rak a mlaengelakl;

3 Me a rechad a mocha omes loba klou el blak el reng el kirel chocholt el le dilung a profet Samuel, el chedal a Laman, oi, el kirel sel taem el moerngii a ilkolk el edei el klebesei er a beluu er rokir.

4 Meng mocha erngii a klou lerrau er reng me a klautitekangel er a delongelir a rechad, loker a betok lolangch el mla moerngii.

5 Mal merema okedei me a ongeuang er a rak, er a kot el buil ra eua el kebesengil a buil, eng mlo erngii a klou el ses el iolt, el dirkak lemoes er a ngara mong retia el rokir el beluu.

6 E dirrek el mlo erngii a klou e meringel ses el iolt; e mlo erngii a klou el drumk meng di mlo omritel a bluulechad el rengud eng dimetiud.

7 E mla erngii a bisebusech el dirkak lemoes er a ngara mong er a ngiidil beluu.

8 Me a klou el beluu a Zarahemla tilaut er a ngau.

9 Me a klou el beluu er a Moroni a rirechorch el mo er a bertak er a daob, me a rekiliei er ngii a diriros.

10 Me a klou el chutem a mletelechii a klou el beluu er a Moronihah, me sel mle beluu a mlo klou el rois.

11 E mlo erngii a klou e meringel tellemall el mlo erngii er a beluu er a dims.

12 Endi bai mloerngii almuut el klou e meringel tellemall el mloerngii er a beluu er a diluches; le rokui el bebul a beluu a mlo ngodech, le ses el iolt me a iechadedaob, me a drumk, me a bisebusech, meng kmal mlo meringel el melmesim a bluulechad er rokir;

13 Me a meklou el rael a di miltemall, me a moded el rael meng di mlo diak, me a betok el mle oberberk a dimlo tebtebull.

14 Me a betok el meklou e merael chisel beluu a ngilbeet, me a betok a milseseb, me a betok a dimlo omritel me a blai a di mle eriou er a chutem, me a rechad a di mlad, me a beluu a di mlo cheloit el telemall.

15 E mla erngii a bebil er a meklou el beluu el di mlo medechel; endi telmellel a mle meklou me a betok er tir el mlaerngii a mlad.

16 Me a ngarngii a rebebil el mlengai er a iechadedaob; e diak a chad el medengel kmo te mloerker, tedi medengei el kmo te mlengai.

17 Me a bebul a bluulechad er rokir a miltemall, le ses el iolt, me a drumk, me a bisebusech, me a bluulechad a dimlo melmesim.

18 Me a risois a di meltutiud er a belngel; e ulebriid er bebul a bluulechad er rokir, meng mlo moes el mekekerei el blechebached, me a mlorael, er bebul a beluu er rokir.

19 Chelechang ea bochael ngemed a drumk, me a besebasech, me a oiiu, me a sesel iolt, me a omelmesim er a bluulechad, el mlaerngii el locha edel sikang; e te mlaerngii a remillekoi er sel taem el kmo ng mle kekemangel; endi aikang el rokui el meklou e kengaol tekoi a dilubech er a chelsel a locha edel sikang e solae ng mloerngii a ilkolk er bebul a bluulechad.

20 Me chelechang mloerngii a klou el ilkolk er bebul a beluu er rokir, me tirkel mlaerngii el dirkak lemad a sebechir lomelchesiu er a berredel a ilkolk;

21 E diak el sebechel kmard a ngiidil ngerang leng ilkolk a uchul, kal kandalang, me a kal tuich; me a lechub e kal sebechel dokerdii a ngau lousbech a kmal merat e medidirt el idungel, meng dimlak a rolel e leboerngii a ngii di le llomes;

22 Meng dimlak a ngii di le llomes el moes, kal ngau, kal bas me a lechub el sils, me a le buil, me a kal btuch, leng merang mle okrokr a a ilkolk el mlaerngii er bebul a beluu;

23 Meng mlaerngii el edei el klebesei, e dimlak a llomes el moes; e mlaerngii a klou el llangel me a omengebechub, me a relmangel a rengrir el di morenges el blechoel er a dlongelir a rechad; Oi, ng mle klou a berredel a klengit el reng, le ilkolk me a klou el tellemall el mla mei er tir.

24 Me a chelsel a ta er a basio e te mlorengs lelmangel el kmo: Oi, cholekum e kede mlo ouuchel a rengud er a kentid ruchei er tiael klou e kengaol sils, me a rodam er kid a mlo medechel, e dimlak le meseseb er a chelsel sel klou el beluu er a Zarahemla.

25 Me a ta er a basio e te mlorenges lelmangel e mengebechub el kmo: Oi, cholekum e kede mlo ouuchel a rengud er a kentid ruchei er tiael klou e kengaol sils, e dimlak domekeuad e dometech er a reprofet er a bad, e doldik er tir; ea redelad, me a rengeleked el redil, me a rengeleked a mlo medechel, e dimlak lemedakl er a chelsel a klou el beluu er a Moronihah. Me a ikaikid a mle meklou e meringel lengelir a rechad.