1 Me chelecha Jesus ral delang aikael tekoi el mo er a Nephi, me a moer tirkel lulmekedong er tir, (chelecha ildisir tirkel mlokedong e ngiluu a klisiich me a ngerachel el mo melecholb a mle truich me a terung) meng mochamerk a chimal mo er a rubdois e lilangel moertir el kmo: Komo ngeltengat chobo morrenges a tekingir tirkang el truich me a terung el blakulilt er tir er a delongeliu el mo olisechak er kemiu, e mo mesiungiu; me ak mla mesterir a klisiich meng sebechir el melecholb er kemiu er a ralm; ea uriul er a ometecholb er a ralm, e Ngak a mo melecholb er kemiu er a ngau me a Edaol Reng; me chelechang e kom ngeltengat alsekum komo oumerang er ngak emo metecholb, le komla mesekak me komedengelkak.

2 Me a lmuut, telmuut el ngeltengat tirkei el mo oumerang a tikingiu le komo ouchais el kmo, komla mesekak e medengei el kmo Ngak a ngar. Oi, te ngeltengat tirkei el mo oumerang a tikingiu e me metengel er a dmolech el klengariouelreng e mo metecholb, le te mo modingel er a ngau me a Edaol Reng, e nguu a ngbetel a kenterir.

3 Oi, te ngeltengat a remechebuul er a reng, me te mei er ngak, leng mo er tir a rengedel babeluades.

4 E lmuut, te ngeltengat a rokui el ngar er a klengit el reng, le tir a mo mechelaod.

5 E ngeltengat a roba ngariou el reng le bluulechad a boel nguu.

6 E ngeltengat er rokui tirkei el mo songerenger e meched a rengrir el kirel a llemalt, le tir a momui er a Edaol Reng.

7 E ngeltengat a rechubechub leng moertir a klechubechub.

8 E ngeltengat a klikiid a rengrir letir a mo mesa Dios.

9 E ngeltengat a rokui el chad er a budech le tir a mo mokedong el ngelekel a Dios.

10 E ngeltengat tirkei el mochuarm el kirel a ngklek, leng moertir a rengedel babeluades.

11 E kom ngeltengat alsekum a rechad a mo choltuub e chomekcharm er kemiu, e melekoi a betok el mekngit el blulak el kiriu, le Ngak a uchul;

12 Me bole klou a deuelreng er kemiu, e bo lungil a rengmiu, leng klou a omuksulliu er babeluades; le te direk lulmekcharm er a reprofet ruchei er kemiu.

13 Ngklemerang, Ngklemerang, me a kmelekoi er kemiu, ak rullemiu el mo cherrecherel a bluulechad; endi lsekum a sar oridii a cherrecherel eng mo ngera mo mechercherel a bluulechad? A sar a mo dikea belkul, meng mo mechoit e mo merderd er a chocherir a rechad.

14 Ngklemerang, Ngklemerang, ak melekoi er kemiu, ak rullemiu el mo llomes el moer tirkael chad. A beluu el ngar bebul a ked a diak el sebechel mobart.

15 Chelecha chad ngmekerdii a kandalang e nguu el loia er cheungel a blil a mungi? Ngdiak, ngbai loia er a chorkedellel a kandalang, meng mo omekellomes er a rengara chelsel a blai.

16 Me becherei a llemesem me lomekellomes er tirkael chad, me boloues a ungil lurrerem e bo loldanges er a Demam el ngar er babeluades.

17 Lak momdasu el kmo, Ngak a mei el me melemall a llach me a lechub a reprofet. Ngak a mei el diak bo kulemall, ak mle mengerrungel.

18 Mak merael subedemiu, a tael kekrei el tekoi me a tael dimech a diak boelriid er a llach, le Ngak a uchul me ngii a rokui el dimla mecherrungel.

19 Me chelechang e ak mla meskemiu a llach me a tekingel a Demak, me komo oumerang er Ngak, meng mo mekngit a rengmiu er a kentmiu, e mei er Ngak loba klengitelreng me a uuchelreng. Kamosang a kiriu el meruul a ngar medemiu me a llach a mla mecherrungel.

20 Me mei er Ngak me bomsobel; le kmerang el melekoi er kemiu, alsekum eng diak bo moltirakl a tikingek el blakdung er chelechal taem, eng diak a rolel e bomsiseb er a rengedel babeluades.

21 Ko mla remenges el kmo, te millekoi er a ngara mong el taem, e dirrek lelluches er medemiu el kmo, kele bochu momekeuad, e ngikei el mo chomekeuad a mo er a metacherbesul a bo loukerrekeriil a Dios.

22 Endi ak subedemiu el kmo, ngikei el mo kesib a rengul er a odam er ngii, a mo er a metacherbesul er a kerrekeriil er ngii. E ngikei el modmung er chodam er ngii el kmo, Raca, a moer metacher besul er a re kansol, ea ngii dile chad el kmo, Kau el kebelung a moer metacher besul kirel a nguuil a bluu er a ringel.

23 Me a leuaisei, ea lsekum e kemei er Ngak, me a lechub eng soam el merngak, e mo lotkii el kmo, odam er kau a ngarngii a kentil a rengul er kau

24 Bo mosang odam er kau, ea kot e bolungil a dlongelem kau me a chodam er kau, e merekung er Ngak el beches a rengum me bok ngikau.

25 Boelta rengum kau me a chomkaucheraro er chodirke mobengkel ngara rael, le lak e boel mesisiich er kau, eng mo otungau er a kelebus.

26 Ngklemerang, Ngklemerang, me ak melekoi er kau, ngmo diak a rolel e bemtobeb, el di merekmo chobla mkekedir a ulebongel senain. Ea chomngara kelebus eng sebechem el kokedir a chimong el sinain? Ngklemerang, ngklemerang, ak subedau el kmo, ng Diak.

27 Chelechang ngelluches er tirkel mle chad er a ngaramong el kmo, kele bochu er a laokreng;

28 Endi Ngak a dmung er kemiu, ngikei el mo chomes er a redil, e moerngii a nglebokelreng er a rengul, a mla ruebet er a laokreng er a chelsel a rengul.

29 Chelechang ak meskemiu a llach el kmo, ngdiak kobechei chouaikang el tekoi mel siseb er a rengmiu.

30 Leng baiungil chomcheridau er chouaikang el tekoi, me kemonguu a krus er kau, er chobai bo mobidok er a bluu ra ngau.

31 Ng mla meluches el kmo, ngikei el momerek er a bechil a kirel msa babier er a dertel a chebechiil.

32 Ngklemerang, ngklemerang a kulekoi er kemiu el kmo, ngikei el choitii a bechil, e dimlak boel dengerenger er a ta er a chad, a mouchul e ngii el dil a mo er a laokreng; e ngikei el mo bechil a mla mo cheroid er a bechil a mla ruebet er a laokreng.

33 E lmuut meng direk lelluches, lako momulak er cheungel a telbiil, ngkirem lodars el mo er a Rubak a rokui el telbilem;

34 Ngklemerang, ngklemerang a kulekoi er kemiu, lako molisiich a ngidil tekoi tekoi loba babeluades leng kingellel a Dios;

35 Me a lechub el bluulechad le ngultikellel chochil;

36 Me a lechub e molisiich a tekoi loba btelum, leng diak el sebechem el rullii a tael chuii el mo chedelkelk me a lechub eng mo becheleleu;

37 E mruul a tekingem, me a lsekum eng choi, e dil choi, me a diak, dil diak; le lluut el mo betok er a ikang eng mocha mekngit.

38 E chelechang eng dirrek lelluches, a chelsul a mad el kirel a chelsul a mad, me a uingel kirel a uingel;

39 Endi Ngak a subedemiu el kmo, ngdiak bo momtok a mekngit, ea lengarngii a mertechii a klisiichel chotengem, e mnguu a bitang el mesang el dirrek;

40 Ea lengarngii a chad el mo otuteklau er a llach e lenguu a chelsel a bilem, e mnguu aikrel a bilem el msang el dirrek.

41 Ea lengarngii ormelau el mo obengkel el tang el mael, e bong el mo erung.

42 Mkengei er cholengit er kau, e ngikei el meleng, lako molutii me lorael.

43 E chelechang eng dirrek lelluches el kmo, ngkirel mo betik er a rengum er a ngaer a bita er kau, e bol mengelengalk er a rengum a cherroem;

44 Endi chelechang e Ngak a melekoi er kemiu, bole betik er a rengum a cherroem, e momekngeltengat er a remellebeakl er kau, moruul a ungil mo er a romtok er kau, e moluluuch el kirir a remekngit er kau, e omekcharm er kau;

45 Me bom ngelekel a Demmiu el ngar er babeluades; le nguchul me a sils a meng masech el kirir a redengerenger me a remekedung.

46 Me chelechang ea ikel tekoi er a ngara mong, el mlar cheungel a llach, a ngaer ngak e mla rokui el mecherrungel.

47 A tekoi er a ngara mong a mla momerek, a rokui el tekoi a mla mo beches.

48 Mi sei auchul eng soak chobom cherrungel el uai Ngak me a lechub eng Demmiu el ngar er babeluades el cherrungel.