1 E chelechang er a lluut me a Jesus bocha lemerek el melekoi aikael tekoi, eng mlo mesaod el mo er a ildois; meng melsaod a rokui el tekoi el mo ertir, a meklou me a mekekerei.

2 Meng dilung: Aikang el chedaol llechukl el dimlak molab lobengkemiu, a Edam a mla dmung er Ngak meng kirek el meskemiu; le ngellemesel kmo, ngkirel mo er a ngarmedad el cheroll.

3 Meng milsaod a rokui el tekoi, el ngara uchul molmuut er a taem el ngii a mei el ngara klebkellel – Oi, molmuut er a rokui el tekoi el moerngii er bebul a bluulechad, el molmuut er sel rokui el klalou a dimo mosoasech er a kmal mesisiich el kleald, me a bluulechad a mo meiuil el uaia babier, me a ianged me a chutem a mo merek.

4 E molmuuter a klou e uriul klebesei el rokui el chad, me a rokui el klebliil, me a rokui el beluu, me a rosisiu a tikingir a mo dechor er medal a Dios e mo er a kerrekeriil er a urerir el kmo, ng mlo ungil me a lechub eng mlo mekngit.

5 A blo lungil, eng mo er a okiis er a diak a ulebngelel klengar; endi blo lemekngit, el moer okiis er a dellebeakl; el ngara oucherbitang, a tang a ngara tael chimad me a chimong a ngara bitael chimad, loltirakl er a chubechub, me a llemalt, me a klechedaol el ngii a ngar er a Kristo, el mle ngar ruchei er a bluulechad.

6 E chelechang eng diak el sebechel meluches er a chelsel tiael babier a tang er a dart el tiud er a tekoi el Jesus a merael lullisechakl er a rechad.

7 Endi a tibereberk el kloklel a Nephi a ngarngii a betok er a ikel tekoi lullisechak er a rechad.

8 Me a ikael tekoi a blakluches, el ngii a di sesei er a ikel tekoi el Ngii a ullisechakl er a rechad; me ngak a liluches leng mle soak a lluut el mei er tirkael chad el loeak a reIsentael, loltirakl a tekoi el dilung a Jesus.

9 Me sei el lengai a ikang, el ngii a klou a ultutelel me lengai, a kot el mo melasm a klaumerang er tir, ea lsekum etir a mo oumerang aikael tekoi, ea lmuut el meklou el tekoi a mochu chemolt er tir.

10 Ea lsekum eng diak bo loumerang aikael tekoi, ea lmuut el meklou el tekoi a mo moreked el kirir, el mouchul a dellebeklir.

11 Kamosang a leko kmochu meluches ngii el rokui el blotk er a tibereberk el kloklel a Nephi, endi Rubak a dimlak lekengei, e dilungi ak mo melasm er a klaumerang er a rechedak.

12 Me a leuaisei e ngak el Mormon a molmuches a tekoi el Rubak a mla dmung er ngak. Me chelechang e ngak el Mormon a mo merekui a tekingek, e mo melemolm el meluches a tekoi el mla medung el merngak.

13 Misei a uchul eng soak chobo modengei el kmo, a Rubak a merang el lulsisechakl er a rechad, el mle edei el klebesei; ea uriul er sei, eng mle betok el blelcholt er tir, e melliud a blauang el betok el time, e meltelat er ngii emelsterir.

14 Eng liluut me ngullisechakl el milngedereder el mo er a rengelekir a rildois el dullekoi ertir, e kildoked a chururir mete millekoi er a redemerir a betok el meklou e mengasireng el tekoi, el lmuut el meklou er a ikel ngii a ulecholt el mo er a rechad, Ngii a kildoked a chururir meng mlo sebechir el melekoi.

15 Eng liluut me a uriul er a lengasech el moer babluades – er a ongerung er a ble lochotii er tir, el luut el mo er a Edam, ruriul er a lomekungil er a rokui el smecher er tir, me a resechudel er tir, e milok a mederir a remiko, e ngilai a tengetel a dingerir a remle mechad, e mirruul er a rebetok el moungil er a delongelir, e ulekisii a chad er a kodall, e ullisech a klisiichel moer tir, e ngilasech el mo er a Edam–

16 Me chelecha, bocha le klukuk, ea rildois a mlo mechudel mlo dmak, me te mlo dul lomes e chorrenges er tirkael ngalk; oi, a remekekrei el ngalk a ulebok a ngerir el millekoi a mengasireng el tekoi; ea tekoi lullekoi a mle mekull el dimlak le kirel a ngii di le chad el meluches.

17 Me chelecha lluut ea roderuchel el mlengilt er a Jesus a mocha omuchel er seikid el taem el mo melecholb e olisechakl er a iltekngir a rechad el mlei ertir; me a iltekngir a remlo metecholb er a ngklel a Jesus a mlo mui er a Edaol Reng.

18 Mete betok er tir a miles e rirenges a betok el diak le mechedereder el tekoi, el mle mekull el dimlak le kirel meluches.

19 Me tullisechak e mlengedereder el mo er a tang me a tang; me a rokui el tekoi a dimle tabesul er a deklongelir, a rokui el chad el di mle melemalt omerellir el mo er a tang me a tang.

20 Me a lluut ete mlo meruul a rokui el tekoi el Jesus a dilung er tir.

21 E tirkei el mlo metecholb er a ngklel a Jesus a mlo mokedong el ikelesia er a Kristo.