1 Ngklemerang, ngklamerang me ak melekoi er kemiu el kmo, ngsoak chobo molngeseu er a remechebuul; endi bom kerekikl me lak bo moruul er a ulengesuim lolecholt er kau er a rechad me bo lodengei; le lak eng modiak omuksullem er a Demam el ngar er babeluades.

2 Me a leuaisei e sel bo moruul er a ulengesuim e lak molebusech er a debusech er medam, el diuaia redi chadrangor el meruul osisiu er a chelsel a blil omeluluuch me a melengel a rael, me bolengai a chetengakl er a rechad. Ng klemerang me ak subdemiu, ngarngii omuksullir.

3 E bai sel moruul er a ulengesuim e lako bechirei a klitechetul a chimam me bo lodengelii a loruul er ngii a klisiichel a chimam.

4 Me a ulengesuim bole berrotel; me a Demam el mes a berrotel, a Ngii a mo meskau omuksullem er a di chemolt.

5 Me sel chomoluluuch e lak mosuub er a redichadrangor, leng kmal sorir el meluluuch el dechor er a chelsel a blil chomeluluuch, me a bkul a rael, me bole moes er a rechad. Ngklemerang me ak melekoi er kemiu, ngarngii omuksullir.

6 Endi kau sel chobo moluluuch, e bomsiseb er a blil a bail, e sel bla mechesmerii, e moluluuch el mo er a Demam el ngar er a berrotel; me a Demam el di mes a berrotel, a mo meskau omuksullem er a di chemolt.

7 E sel moluluuch lako molekoi el diomelekl a bachachau el tekoi el diuaia rediak lodengelii a Dios, le tomdasu el kmo, a betok el tekingir a mo morenges.

8 Me lak bo mosuub er tir, le Demmiu a medengei chomousbech ruchei er a chomolengit er Ngii.

9 Me a chomoluluuch eng uaitiakid a teletelel: Demmam el ngar er babeluades, a ngeklem bole chedaol.

10 Me a uldesuem bole mekedmokl er a bluulechad el diuaia babeluades.

11 E mousubes er kemam el kirel a belsam, me kemam kibo mousubes er a rebelsam.

12 E lako bechikemam me kim ngar er a ongitikaik, e mosoblemam er a mekngit.

13 Le renged a ngar kau, me a klisiich, me a klebkall el mo cherechar, Boluaisei.

14 Malsekum e kau a mousubes er a rechad a kenterir, ea Demam er babeluades a mo ousubes a kentim.

15 Endi alsekum e kau a diak bo mousubes er a rechad a kenterir, ea Demam er babeluades meng diak bo lousubes a kentim.

16 Me a tang, sel chomolsengerenger, e lak mosuub er a rechad er a ngor, el mechitatel a mederir, ngmo mekngit a mederir leng sorir a bo lodengei rechad el kmo tir cholsengerenger. Ng klemerang me ak subedemiu, tir a ngarngii chomuksullir.

17 Endi kau sel omolsengerenger e mchiltii a btelum, e mtechelbii a medam;

18 Me lak bo lodengei rechad el kmo kau olsengerenger, ndi Demam el ngii a ngara berrotel; me a Demam el Ngii omes a berrotel a mo meskau omuksullem el dichemolt.

19 Lak momekeek er kau er a kloklel a bluulechad, leng mo mekang er a charm e mochemert, me a remerechorch a soiseb el ruchorch;

20 E bai momekeek er kau er a klalo er babeluades, el diak le metemall er a charm me a ka bolchert, me a remerechort a diak el sebechir el mo soiseb me a ka lorechorch.

21 Le sel lengarngii a meringelchad el kloklem, seia le bereked er ngii a rengum.

22 A medad a uchul a llomes er a bedenged; me a lsekum a medam a dimo tang el nga er a llemalt, ea bedengem er rokir a momui er a llomes.

23 Endi alsekum a medam a ngar er a mekngit, ea bedengem er rokir a momui er a ilkolk. Malsekum ea llomes el ngar er kau a mlo ilkolk, eng merael mo klou lilkolk.

24 Ngdiak a chad el sebechel mesiou er a reterung el rubak; leng diak lokor el mo chetil a tang e mo soal a chimong, me a lechub eng mo orrenges er a tang e mo mekngit er a chimong. Ngdiak el sebechem el mesiou er a Dios me a iltetel a bluulechad.

25 E chelecha Jesus er a bocha lemerek el melekoi aikang el tekoi, e ngulemes el moer tirkael truich me a terung el lullilt er tir e dulang: Lako mobes a tekoi el blakdung. Leng kemiu a bla kulutk er kemiu el mo olisechakl er tirkael chad. Me a uchul eak melekoi er kemiu, lako bekikl el kirel a klengar er kemiu, er a ngera komo mengang, me a ngera komo melim; me a mo kirel a bedengiu, ngera komo oubail. Ngdiak lengarngii er a klengar a klouultutelel er a kall, me a ngar el bedenged el klouultutelel er a bail.

26 Kamomes a suebek el charm, el diak lolalem, me a ka loritm e longudel er a blai; ea Demmiu er Babeluades omekang. Kemiu ngdiak komluut el ngaruchei er tir?

27 Ngtechang er kemiu el di bekikl, e sebechel lodekiar a ngerang el mo er a cherrengelel a klengar er ngii?

28 Ngerang me kobekikl el kirel a bail? Kabo momtab a bung er a ked a lorael mo meklou; ngdiak loureor, me a ka lorasm.

29 Endi, kusubed er kemiu el kmo a Solomon er a rokui el klebkellel a dimlak el bliull el uaia ta ra ikang.

30 Malsekum a Dios a uaisei lomail a chudel er a ked, el di ngarngii er chelechang ea klukuk eng mo er a chelsel orrangel, eng direk el mo omail er kemiu, alsekum eng diak le kekerei a klaumerang er kemiu.

31 Me lako bekikl e mdu, ngera, ngera kimo mengang? me a lechub e, Ngera kimo melim? me a lechub eng ngera mo bilam?

32 Le Demmiu er babeluades a medengei el kmo kemiu ousbech chouaikang el tekoi.

33 Endi kot, e bomosiik er a rengedel a Dios me a melemalt el tekingel, eaikang er rokui el tekoi a dimei er kau.

34 Me lako bekikl el kirel a klukuk, le klukuk a kuk ngarngii a tekoi el keldmokl kirel. Ele ta el sils a klebechel a mekngit er a elsel.