1 E chelechang e ngak el Moroni a mo lmuches a sesei er a tekingel a demak er a Mormon, e lullekoi el kirel a klaumerang, me a odanges, me a beltik el reng; leng mlengedecheduch el uaitiang el mo er a rechad er a lolisechakl er tir er a chelsel a sinagogue el tir a ulemekedechor el kirel blil omengull.

2 Me chelechang e ngak el Mormon a melekoi er kemiu el betik er a renguk lodam er ngak; me ngultuir er a klungiolel a Dios el Edam, me a Rubak er kid el Jesus Kristo, me a chedaol luldesuel, luchul a sengk er a okodongel mer ngak, meng sebechek kung el mengedecheduch el mer kemiu er chelechang el taem.

3 Me a le uaisei e ak melekoi er kemiu el ngar er a ikelesia, el ngara budech loltirakl er a Kristo, em nguu a ungil besul lomengiil el mo uchul eng mo sebechiu el mo soiiseb el mo er a ulengellel a Rubak, el ngar chelechang el taem el molmuut er sei el bo molengull lobengkel er a babeluades.

4 Me chelechang e rodam er ngak ak meruul a ikang el tekoi el uaisei el kiriu le kemiu el ngar er a budech lomeroliu lobenterir a rengalk el chad.

5 Le ak mo dobedebek a tekingel a Dios el kmo, ngultuir er a omerellir e ko mo medengelterir; le lungil omerellir, e solae tir a direk lungil.

6 Le kamosang, a Dios a dilung, a chad a le mekngit eng diak el sebechel rullii a ungil; le alsekum ngoldars er a sengk, me a lechub eng meluluuch el mo er a Dios, engdi a lak loruul er ngii el merang el ngarngii er a rengul, eng diak a ngerang el rellii er ngii.

7 Le kamosang, ngdiak le bo er a ochur er a klungiaol kirel.

8 Le kamosang, a mekngit el chad a loldars er a sengk, eng di chetil e meruul er ngii; mi seia uchul eng mo er ochur el di uaia di lurrekedii a sengk; me a le uaisei eng mo er ochur el mekngit er medal a Dios.

9 E direk el diosisiu el mo er chochur el mekngit el mo er a chad, alsekum eng meluluuch e diak el du rengul; oi, e diak a ngerang el rellii er ngii, le Dios a diak le kengei a uaikang.

10 Me a le uaisei ea mekngit el chad a diak el sebechel rulii a ungil, me a lechub e lodersii a ungil sengk.

11 Le kamosang, a mechuuached el madedok a diak le beskid a ungil ralm; me a lechub a ungil madedok le beskid a mechuuached el ralm; me a le uaisei a chad el mesiou er a diablong a diak el sebechel loltirakl er a Kristo; me a lsekum ngoltirakl er a Kristo, eng diak el sebechel mo mesiungel a diablong.

12 Me a le uaisei, a rokui lungil tekoi a ngar er a Dios el mei; me a ikei el mekngit a mei el ngar er a diablong, le diablong a cherreuel a Dios, me ngoldechelakl er ngii el blechoel, lomekedong e mengususeu el mo er a mekngit, el mo blechoel meruul a ikei el ngii a mekngit.

13 Engdi kamosang, a ikei el ngar er a Dios a blechoel mengususeu e olechau el mo meruul a ungil, me a le uaisei a rokui el tekoi el ngii a mengususeu e olechau el mo meruul a ungil, el mo oubeltikelreng el mo er a Dios, el mo mesiou er Ngii a nga er a Dios.

14 Me a le uaisei e bomkerekikl e betik er a renguk lodam er ngak, me lak bo mdebedebii a mekngit el kmo ng mla er a Dios, me a lechub eng ngerang lungil el mla er a Dios chomdung mla er a diablong.

15 Le kamosang e rodam er ngak, komla nguu a klisiich el melebodeb a tekoi, me ko mo medengelii a ungil me a mekngit; ea teletelel chomelebodeb el tekoi a bleketakl, me bomodengei lobang a bleketakl el klemedengei, el di uaia mellomes me a klebesei.

16 Kamosang, a Reng er a Kristo a mlo er a rebekel chad, me le bolodengelii a ungil me a mekngit; me a le uaisei e kuchotii er kemiu a teletelel chomelebodeb el tekoi, le rokui el tekoi el mengususeu el mo meruul a ungil, e mengitikaik el mo oumerang er a Kristo, a mlodurokl el mei loiak a klisiich me a sengk er a Kristo; me a le uaisei eng mo sebechiu el mo medengei loba bleketakl el klemedengei el kmo ng mla er a Dios.

17 Endi a ngii di le ngerang el mengususeu er a rechad el mo meruul a mekngit, el kmo lak moumerang er a Kristo, e modngeklii, e lak mosiou er a Dios, isei e kau a mo medengei lobang a bleketakl el klemedengei el kmo ngmla er a diablong; le tiaikid a teletelel a diablong a loureor, ngdiak longususeu er a chad el mo meruul a ungil, ngdiak, ngdiak a ditang; me a reanghel erngii meng diak, me a lechub el tirkei el kongei el mo chedal.

18 Me chelecha rodam er ngak e blabo modengelii a llomes el sebechiu lobang el melebodeb a tekoi, el ngii el llomes a llemesel a Kristo, bomodengei me lak bo mekngit el melebodeb a tekoi; le sei lolbedabel bomobang el melebodeb a tekoi, a mo melebodeb er kau.

19 Me a le uaisei a kurrimel er kemiu e rodam, me bomkerekikl losiik lobang a llemesel a Kristo, me bo modengelii a ungil me a mekngit; ea lsekum ko mo oreked a rokui lungil, e diako mdung ngmekngit, e kemiu a ulterekokl el mo ngelekel a Kristo.

20 Me chelechang e rodam er ngak, ngmekerang e mo sebechemiu loreked a rokui lungil tekoi?

21 E chelechang ak meremang er sei el klaumerang el kdilung ak mo melekoi er ngii; me ak mo ochotii er kemiu a rolel eng mo sebechiu el mo urekodel a rokui lungil tekoi.

22 Kamosang, a Dios el di medengei a rokui el tekoi, e ngar el diak a ulebengelel el mo er a diak a ulebngelel, kamosang, ngmla oldurokl er a reanghel me olsisechakl er a rengalk el chad, el mo olecholt el kirel a lemei a Kristo; me a oeak a Kristo eng mei a rokui lungil tekoi.

23 Me a Dios a direk el mle ngerel e dilung er a reprofet el kmo Kristo mei.

24 Me kamosang, ngmle betok el kakerous el teletael a mlorngii lolecholt a tekoi el mo er a rengalk el chad, el mle ungil; ea rokui el tekoi lungil a ngar er a Kristo el mei; le lak ea rechad a mla ruebet, meng diak a mo ungil tekoi el mei er tir.

25 Me a le uaisei, e nguleak osisecheklir a reanghel, me a rokui el tekoi el tilobed er a ngerel a Dios, ea rechad a mocha omuchel mo ousbech er a klaumerang er a Kristo; me ngoeak a klaumerang e te mlo orreked a rokui lungil tekoi; meng mle uaisei el mo lmuut er a le mlei a Kristo.

26 Me a uriul er a lemei; ea rechad a direk el mlo suobel lultuil er a klaumerang er tir er a ngklel; meng klaumerang a uchul me tir a mo ngelekel a Dios. Meng di uaia klemerang el kmo a Kristo ngar, ng millekoi a ikakid el mo er a redemad el kmo: ngii di le ngerang el molengit er a Edam loba ngklek, el ngii a ungil, lultuil er a klaumerang el kmo kau a mo nguu, motebengii leng mo meketmokl lekong er kau.

27 Me a leuaisei e betik er a renguk lodam er ngak, a tekoi el chelid ng dikeang le Kristo el mla ngmasech el moer babluades, meng kiei er a klisiichel a chimal a Dios, el mlo melai er a Edam a klisiichel er a klechubechub lobang el mo er a rengelekel a chad?

28 Leng mla onger el mo er a ulebongel er a llach, meng mo ngoititerir tirkei el rokui el mo oumerang er ngii; e tirkei el mo oumerang er ngii, a mo oreked a rokui el ungil tekoi; me a leuaisei e Ngii a mengeluch el kirir a rengelekel a chad; e Ngii a kiei el diak a ulebengelel er babluades.

29 Le ngii el mla rullii tiang e betik er a renguk lodam er ngak, ng dikea tekoi el chelid? Ka morrenges e kulekoi, Ngdiak; me a reanghel meng dirkak bolak lolisechakl er a rengelekel a chad.

30 Le kamosang tir a chederdall er Ngii, el mo olisechakl loltirakl er a ngerel oderchelel, el mo chemolt er tirkei el mesisiich a klaumerang er tir, el diak el mesim a uldesuir er a rokui el teletelel a tikingel a Dios.

31 Me a deruchellir er a osisechakl, a mo omekedong er a rechad el mo ouuchel a rengrir er a kenterir, e mo merekui e meruul a ureor er a telbiil er a Edam, el kildmeklii el mo er a rengelekel a chad, e mo mengedmokl er a rael er a deleuill er a rengelekel a chad, e mo ouchais a tekingel a Kristo el mo er a rengellitel el oderechelel a Rubak, me boel sebechir lochotii a klisiichel a klaumerang er tir er Ngii.

32 Me ngoeak tiang ea Rubak el Dios a kudmeklii a rael me a rebebil er a rechad a mo oumerang er a Kristo, me a Edaol Reng a mo ngar er a rengrir, loltirakl er a ngarngii el klisiich; me tiaikid a rolel ea Edam a mo lomolem a telbilel el mo er a rengelekel a chad.

33 Ea Kristo mla dmung: Alsekum kemiu a mo oumerang er ngak eng mo erngii a klisichiu el meruul a ngii diel tekoi a lungil besul er Ngak.

34 E mla melekoi: Bo mouuchel a rengmiu e rokui lulebongel er a bluulechad, e mei er Ngak, ebo metecholb er a ngklek, e moumerang er ngak, me boel sebechiu el mo suobel.

35 E chelechang e betik er a renguk lodam er ngak, alsekum tiaikid a teletael me a ikang el tekoi a klemerang el bla kulekoi er kemiu, ea Dios a mo olecholt er kemiu, lobang a klisiich me a klou el klebkall er a uriul klebesei el kmo ngklemerang, me a lesekum eng klemerang, eng mla momerek a kebesengil a tekoi el chelid?

36 Me a lechub ea reanghel ngmerekong el dikea belecholt er a rengelekel a chad? Me a lechub eng mla kiresii a klisiichel Edaol Reng er tir? Me a lechub eng sebechel a di lengarngii chelechang me a klukuk, me a lechub edi le ngarngii a bluulechad, me a lechub ele ngarngii a ditang el chad el ngar el mo suobel?

37 Me chelechang eak melekoi er kemiu, Ngdiak; leng klaumerang a uchul meng ngarngii a tekoi el chelid; e klaumerang a uchul me a reanghel a mo chemolt e olisechakl er a rechad; me a lsekum eng dikea ikang el tekoi ete metaech a rengelekel a chad, leng dikeang a klaumerang, me a rokui a di dikea belkul.

38 Leng diak a chad el sebechel mo suobel, el di uaia tikingel a Kristo, alsekum eng diak a moumerang er a ngklel; me a leuaisei, alsekum aikang el tekoi a mla nguemed, e sola klemerang a direk el mla nguemed; meng chelbuul a le ngarngii a chad, le tir a ngar el di uaia le mlak a rolel osobel el mla mekedmokl.

39 Endi kamosang e betik er a renguk lodam er ngak, akumtab a ungil tekoi el nga er kemiu, akumtab el kmo kemiu oumerang er a Kristo le klengariou el reng er kemiu; le alsekum eng diak a klaumerang er kemiu er Ngii, eng diak er kemiu a sebechel mo ulecherangel el teloi er a rechad er a ikelesia er Ngii.

40 Me ngelmuut e betik er a renguk el odam er ngak, ak mo melekoi er kemiu el kirel ongiil. Ke mekerang e mo nguu a klaumerang a lak chomongiil er ngii?

41 Meng ngeraisei el kau a mengiil el kirel? Mrenges e kulekoi er kemiu el kmo, ngmo er ngii ongiil er kemiu loeak a tngakireng er a Kristo me a klisiichel okiis er ngii, el mo mekiis el mo er a diak a ulebngelel klengar, el tiang a mo uaisei le klaumerang er kau er ngii loltirakl er a telbiil.

42 Me a leuaisei alsekum a chad oumerang eng kirel ngarngii ongilel; le lak a klaumerang eng diak el sebechel ngarngii ongiil.

43 Ka morrenges ak lmuut el melekoi er kemiu el kmo, ng diak, el sebechel morengii a klaumerang me a ongiil er ngii a lak boel medemedemek el ngariou a rengul.

44 Alsekum eng uaisei, a klaumerang er ngii me a ongiielel a diak a belkul, leng diak a monguu a kengei er medal a Dios, endi tirkei el medemedemek e ngariou a rengrir; me a lsekum a chad a mo medemedemek e ngariou a rengul, e kongei el kirel a kentil loeak a klisiichel Edaol Reng el kmo Jesus a Kristo, eng kirel mo obang a beltik el reng; le lak lobang a beltik el reng eng diak el ngerang; me a uchul eng kmal kirel mo obang a beltik el reng.

45 Ea beltik el reng a chuarm el kekemangel, e chubechubchad, e diak le mechechei, a diak el belkuuk, e diak di losiik er a ungil er ngii, e diak el bokongesengasech a rengul, e diak lomdasu a mekngit, e diak loldeu el kirel a mekngit, ngbai oldeu el kirel a klemerang, e outekangel a rokui el tekoi, oumerang a rokui el tekoi, mengiil a rokui el tekoi, e lomolem a rokui el tekoi.

46 Me a leuaisei e betik er a renguk lodam er ngak, alsekum eng diak mobang a beltik el reng, e kemiu a diak komngerang, le beltik el reng a diak el sebechel nguemed. Me a le uaisei e morkedii a beltik el reng, el ngii a kot er a rokui, le rokui el tekoi a di mo nguemed–

47 Endi beltik el reng a bliochel el beltkil a rengul a Kristo, meng melemolem el diak a ulebngelel; me ngikei el boel betik er ngii lobang er a uriul klebesei, a kmal mo ungil besul.

48 Me a le uaisei e betik er a renguk lodam er ngak, moluluuch el mo er a Edam lolab a rokui el klisiichel a rengum, me bo mui er a beltik el reng er ngii, el bla le besterir a rokui el merang loltirakl er a Ngelekel Jesus Kristo; me bo mngelekel a Dios; me sel le belcholt e bo de uaingii, le kede mo mesang el kmal Ngii; me bo dobang tiang el ongiil; me bo deklikiid el di uaingii el klikiid. Boluaisei.