1 Me chelechang er a Alma er a bocha le merek el melekoi a ikal tekoi el mo er tir eng mlo dengchokl er a chutem, ea Amulek a mekisang e mocha olisechakl er tir el kmo:

2 Odam er ngak, akumdasu eng diak el sebechemiu el ku kmal di mo diak momekerreu el kirel a ikel tekoi el mla medung el kirel a lemei a Kristo, el kemam a ulisechakl el kmo ngii a Ngelekel a Dios; oi, ak medengei el kmo a ikang el tekoi a mle klou osisecheklel leko er kemiu e ruchei er a choblo mongeroid er kemiu er kemam.

3 E kemiu tial somiu a betikerarenguk el ta er ngak a bo lolecholt er kemiu a kiriu el mo meruul, le ringel blabo er ngii; meng mla mengedecheduch er kemiu el mengedmokl a uldesuiu; oi, meng mla orrimel er kemiu el kirel a klaumerang me a kllouelreng–

4 Oi, meng mo sebechemiu el mo kora oumerang me ko mo dolmii a tekoi er a chelsel a rengmiu, el mo melasm a klungiolel.

5 E kemam tial mla mo metik el kmo a klou el ker el ngar er a uldesuiu a kmo, a tekoi ng kirel a Ngelekel a Dios, me a lechub e kele llak a Kristo.

6 E kemiu tial dirrek el mla mo medengei el kmo odam er ngak a mla mo betok lochotii er kemiu el kmo a tekoi a mo er a Kristo el kirel a mo suobel.

7 A odam er ngak a mla dmu tikingel a Zenos, el kmo, a rolel a mo suobel a mei loiak a Ngelekel a Dios, me a tikingel a Zenok meng dirrek; e dirrek el mla mo dulii a Moses, el mo olecholt el kmo a ika el tekoi a klemerang.

8 Me chelechang e morrenges e kuchais er kemiu el kmo, a ikal tekoi a klemerang. Mesang, e kuchais er kemiu el kmo, ak medengei el kmo, a Kristo mei el me teloi er a rengalk el chad, e mo chemol a telemellir a re chedal, me ngii a mo kokad a kngtil a beluulechad; le Rubak el Dios a mla dmung.

9 Leng kmal kirel mo er ngii omengkad ra klengit; le bo doltirakl er a diak le medangs luldesuel a Diak a Ulebngelel Dios, eng kirel mo er ngii a tngakireng, le lak, ea rokui el chad a di mo remiid; oi, a rokui a di medecherecher a rengrir; oi, a rokui a di mla ruebet el mla remiid, meng kirir el di mo nguemed a lak le bor ngii a tngakireng el ngii a kmal kirel mo er ngii.

10 Leng kmal kirel mo er ngii a klou e ulebongel tenget; oi, el diak el tenget el chad, me a lechub el charm, me a lechub e ngii dil suebek el charm; ng diak el chad a mo metenget el kirel mo diak a ulebengelel el mo cherechar el tenget.

11 Chelechang eng diak a ngii di le chad el sebechel mo tonget a resechel el mo kokad a kngtil a tang. Chelechang ea lsekum a chad omkeuad, ea llechud el ngii a melemalt, ng monguu a klengar er a odam er ngii? Ak subdemiu el kmo ngdiak.

12 Engdi a llach a mengerchir er a klengar er ngikei el mlamekeuad; mi seia uchul eng diak el ngii di le ngerang el mo ngesonges er a diak a ulebengelel tngakireng, a mo ungil besul er a mo kirel a kngtil a beluulechad.

13 Sei kid a uchul meng kirel mo er ngii a klou e uriul lomelenget, e ngii a mochu er ngii kung me a lechub eng kirel mo er ngii a ulebongel er a omengitel a rasch; mi seia llechul a Moses a mocha er a ulebengelel; oi, ng kirel di mo tmaut er rokui, a tang el tekoi me a tang el dimech, e diak a di mo remiid.

14 Kamorrenges, tiai kid a cherrengelel a belkul a llach, a dertang er a mekekerei el melutk el kirel a klou eluriul lomelenget; me sei el klou e uriul lomelenget a mo Ngelekel a Dios, oi, ng diak a ulebengelel e mo cherechar.

15 Me a le uaisei eng mo kudmeklii a rolel a mo suobel el mong er tir kei er rokui el mo oumerang er a ngklel; tia ikid a uldasu el kirel tia el luriul lomelenget, el mo olechau er a reng er a klechubechub, me bo le mesisiich er a llemalt, me bo luchul ea rechad bo loumerang e bo le mekngit a rengrir er a kngterir.

16 Me a le uaisei ea klechubechub a mo sebechel lomelemii a omengerchir er a llemalt, e ngoititerir er a chim er a budech, endi ngikei el diak bo lousbech er a klaumerang el mo mekngit a rengul er a kngtil, a mo motaut er a cherrengelel a llach el longerechir er ngii a llemalt; meng di ngikei el mo oumerang meng mo mekngit a rengul er a kngtil a mo bedochel tia el klou e diak a ulebengelel rolel a osobel.

17 Me chelechae bol sebechel a Dios el kongei er kemiu a rodam er ngak, me bo momuchel mousbech er a klaumerang el mo mekngit a rengmiu er a kngtemiu, me bo momekedong er a chedaol ngklel me bo le mekngit a rengul er kemiu;

18 Oi, mlangel mo er ngii el kirel a kle chubechub; le ngii a mereched el mo olsobel.

19 Oi, mngai a rengmiu el moriou, e bo blechoel meluluuch er Ngii.

20 Mlangel mo er ngii chomngara sersiu, oi, el kirel a cheremiu.

21 Mlangel mo er ngii ra chelsel a blimiu, oi, el kirel a rechad er a blimiu, er a tutau me a suelb me a kebesengei.

22 Oi, mlangel mo er ngii lomtok a klisiichel a cherroem.

23 Oi, mlangel mo er ngii lomtok er a diablong, el ngii a cheraro er a rokui el melemalt.

24 Mlangel mo er ngii el kirel a dellomel er a sersem, me bo lungil besum er ngii.

25 Mlangel kirel a chermem el ngara ked, me bo le betok.

26 Endi diak dil ikang e le merekong; ng kirem lochotii a rengum er a chelsel a blil a bail, me a berrotel basio el chobo er ngii, me a chelsel a cherremeliu.

27 Oi, e sel lako mlangel mo er a Rubak, ea rengmiu bo le mui, el di ngar er a nglunguuch el mo er ngii el kirel a delengchekliu me a delengcheklir a re ngar er a bita er kemiu.

28 Me chelechae morrenges e betik er a renguk lodam er ngak e kdu er kemiu, lako mousbech el kmo a ikang a ungiang; le uriul er a chobla motirakl a ikang er rokui, ea lsekum kodikii a ousbech a ngeseu, me a di meau, e diak moldingel er a re smecher me a re ngar a ringel, e morous a kloklem a le ngarngii er kau el mo er a re ngesonges – ak subedemiu el kmo, alsekum eng diak bo moruul a bebil er a ikang el tekoi, ea nglunguchem a bechachau, meng diak a ngerang el rellii er kau, me kau a di chad er a ngor lomtok er tial klaumerang.

29 Me chelechang ea lsekum eng diako bo bekelatk el mo chubechubchad, e kau a uaia uleokel, el le choit a romiich meng mo merderd er a rechad.

30 E elechang e rodam er ngak, eng soak el kmo, a uriul er a chobla mngai a betok locholt, e medengei el kmo chedaol llechukl ouchais a ika el tekoi. Ka mei me le bo er ngii a rodech er a uuchelreng el kirel a klengit.

31 Oi, ng soak cho mei e lak mongemangel el melcherecher a rengmiu; le ka mosang, elechang a belsechel e kelsel a osobeliu; me chelechang ea lsekum ko mo mekngit a rengmiu el kirel a kentmiu e diak molcherecher a rengmiu, eng di mereched ea klou el tekoi er a rolel a osobeliu a mei er kemiu.

32 Le tia ikid el klengar a belsechel kirir a rechad el mengedmokl er tir el mo omes er a Dios; Oi, ng uaisei, a kebesengil tia el klengar a belsechel kirir a rechad el meruul a urerir.

33 Me chelecha engdi uaia ike el kullekoi er kemiu er a ngara mong, ng mla mei er kemiu a betok locholt, me a uchul ea kurrimel er kemiu me lak mongeteket er a sils er a uuchel reng el mo er a ulebongel; le uriul er tial temel a klengar, el le beskid el mo mengedmokl el kirel a diak a ulebngelel, le kamosang, a isekum eng diak kede ketmeklid er a temed er tiang el klengar e solae ngii a mei a klebesei er a ilkolk, meng mo diak el sebeched el mengedmokl a ureor.

34 Ng diak el sebechem sel cho bochang er sel metacher besul teletael e mdu, ak mo mekngit a renguk el kirel a kngtik, e obult el mo er a Dios er ngak. Ng diak, ng diak el sebechem el mo dulii tiang; le sel osisiu el reng loba bedengem sel chomtobed er tiael klengar, a osisiu el reng a mo er ngii a klisiichel er a bedengem er a chelsel a diak a ulebengelel beluulechad.

35 Ka morrenges, alsekum e kau a mo mengeteket er a sils er a uuchel reng mo er a kodall, e kau a mla mo er cheungel a klisiichel a reng er a diablong, meng mo oterkeklau el chedal; le Reng er a Rubak a mla ngoseklii er kau, meng diak a basio er ngii er a rengum, me a diablong olab a rokui el klisiich el kirem; me tia ikid a mo uriul teletelir a re dengerenger.

36 E tiang a kudengelii le Rubak a mla dmung, ng diak le kiei er a chelsel a diak el chedaol templo, ng di chelsel a rengrir a re melemalt a bo le kiei; oi, e dirrek el mla dmung el kmo a re melemalt a mo dengchokl lobengkel er a rengedel, el diak el lluut el mo tuobed; engdi a bilir a kirel mo mesilk el mo becheleleu loiak a resechel a Sib.

37 E elechang e betik er a renguk lodam er ngak, ng soak obom latk a ikang el tekoi, meng kiriu el mo oureor el kirel chobo msobel loba dakt el kirel a Dios, e dikea mluut el mo kmo ng diak le mei a Kristo;

38 Meng mo diak mluut lomtok er a Edaol Reng, meng bai mei er kemiu, me ko mo oungakl er a ngklel a Kristo; e mo ngmai a rengmiu el meriou el di mo uaia chebechab, e mongull er a Dios, er a ngii di le ker el chom ngarngii, el ngar er a reng me a klemerang; me ko mo kiei el ngar er a omereng el saul er a bek el sils, el kirel a betok el chubechub me a klengeltengat el lomeskemiu.

39 Oi, me a kurrimel er kemiu e chodam er ngak, me bom kerekikl meluluuch el blechoel, me lako mechetakl er a ongitikaik er a diablong, me lak bo le mesisiich er kau, me lak bom chederdall er ngii er a uriul klebesei; le ka mosang, ng diak a ngerang lungil el bo le beskau.

40 Me chelechang e betik er a renguk lodam er ngak, a kurrimel er kemiu me bo mnguu a kllou el reng, e moutekangel a rokui el teletael er a ringel; e lak moutokotok er tir kei loldik er kemiu le ko kmal mechebuul, melak bom nga er a klengit el uai tir;

41 E bai bo mnguu a kllou el reng e moutekangel a ikel ringel, el mesisiich el mengiil kmo, a ta er a klebesei e kau a mo olengull er a rokui el ringelem.