1 E chelechang e rungalk, tia kid a soak el muut el dulii er kau; le kumdasu ea uldesuem a bekikl el kirel okiis er a re mla mad.

2 Ka mosang, ak melekoi er kau el kmo, ng diak okiis, me a lechub ak melekoi lokiu a ta er a teletael el kmo, tial mad el bedenged a diak bo le nguu sel diak le mad el bedenged, tial mo mechut a diak bo el nguu a diak bo le mechut el di merekmo uriul er a le mei a Kristo.

3 Kamosang, ngii a mo uchul a okiis er a re mla mad. Engdi chelechang e rungalk eng dirkak okiis er a kodall. Chelechang ea kuchotii er kau a berotel tekoi; engdi ng betok a berotel tekoi e di chelsimer, meng diak a chad el medengei, ngdi tal Dios. Engdi ngak a mochotii a tael tekoi el blek blechoel lolengit er a Rubak me bo kudengelii el tiang a kirel okiis.

4 Kamosang, ngarngii a taem el metutk el kirel okiis er a rokui el mla mad. Chelechang ngoingerang tial taem, ngdiak a medengei; Ngdi tal Dios a medengelii a taem el mla metutk.

5 Elechang ea le ngarngii a kot el taem, me a ongerung el taem, me a lechub eng ongedei el taem el rechad a mo mekiis er a kodall, a diak a belkul; le Dios a medengei a ikang er rokui el tekoi; ngungia besul er ngak el mo medengei el kmo, nguaisei el kmo ngarngii a taem el mla metutk el rokui a mo mekiis er a kodall.

6 Chelechang eng kirel ngarngii a taem el ngara delongelel a kodall me a okiis.

7 Me chelechang ea kuker el kmo, ng mo mekerang a ikel delbengir a rechad er tiang el taem er a kodall el molmuut er sel telutk el taem er a chokiis?

8 A le ngarngii me a lak a betok er a tal taem el mla metutk el mo er a rechad el bo le bekiis er a kodall a diak a belkul; le rokui el chad a diak di le mad er a diosisiu el taem, meng diak a belkul; a rokui a di uaia tal sils er a Dios, a taem a mlo telkael kirir a re chad.

9 Mi seia uchul e ngarngii a taem el mla metutk el mo er a rechad el bo le bekiis er a kodall; e ngarngii a taem er a delongelel a kodall me a okiis. Me chelechang e dolekoi el kirel tia ikid el delongelel, ngera mo duubech el mo er a delbengir a re chad, tia ikid a kulker er ngii el blechoel er a Rubak me bo kudengelii; me tia kid sel tekoi el kudengelii.

10 Me sel le merema temel me le bekiis a rokui, e solae tir a mo medengei el kmo a Dios a medengei a rokui el taem el mla metutk el mo er a chad.

11 Chelechang ea kirel a teletael le bor ngii a deleb er a delongelel a kodall me a okiis. Ka morrenges, ng mlo chemolt el mer ngak er a anghel el kmo, a reng er a rokui el chad sel le tobed er tia el mo er a kodall el bedenged, oi, a reng er a rokui el chad, a le mekedung me a lechub el dengerenger, a mengai el mo remei er ngike el Dios el milsterir a klengar.

12 E solae e ngii a mocha mekedmokl el kmo, a reng er tirkei el melemalt a mengai el mo er a delengchokl er a deoureng, el lomekedong er ngii el kmo baradis, el delengchokl er a ulengull, e delengchokl er a budech, me te mo nguu a ulengellir er a rokui el tellemall el mlo er tir, me a rokui el ngerchelir, me a klengitelreng.

13 E solae ngii a kuk mocha mekedmokl el kmo, a reng er a re mekngit, oi, tir a dengerenger meng chelechang diak a telkib me a lechub e sesei er a Reng er a Rubak el ngar er tir; le kamosang, te mlo melilt a mekngit lomeruul e chiloit a ungil; mi seia reng er a diablong a siliseb er tir, e mlo merreder er a blirir me tir kang itir a mo obidokl el mo er a milkolk er a iikrel; el mo er ngii a langel me a omengebechub, me a omengerkor el uingel, leng kngterir a uchul, me te mlorael el sibai lokiu a uldesuel a diablong.

14 Chelechang e tiaikid a mo teletael el mo er a delbengir a re mekngit, oi, el ngar er a chelsel a ilkolk, me a kle kengaol me a dakt, el mengiil er a mekeald el ngesechel a rengul a Dios el merekung er tir; mitia a mo teletael lengarngii, me a re mekedung a ngar er a baradis, el di merekmo sel taem er a okiis er tir.

15 Chelechang e ngarngii a re bebil el mlousbech el kmo, tiaikid el teletael er a deiul a reng me a teletael er a ringel er a deleb ruchei er a okiis, a kot elokiis. Oi, Ak kongei el kmo ng sebeched el kmo ngokiis, leng ngokiis er a reng me a lechub eng deleb, me a leboerngii el deiul a reng me a lechub eng klengit el reng, el di uaia ikel tekoi el mla medung.

16 Esola e, dirrek el mla medung el kmo, ngarngii a kot lokiis, a okiis er tirkel mla ngar, me a lechub e te ngar, me a lechub ete mongar, el mo lmuut er a taem er a okiis er a Kristo er a kodall.

17 Chelechang eng diak el sebeched el kmo, tiaikid el kot elokiis el dosaod er ngii el uai tiang, a sebechel mo okiis er a deleb el mo er a ulebongel blingelir er a deuel reng me a lechub eng klengit el reng. Ng diak el sebechiu el kmo tiang a uaisei a belkul.

18 Ka morrenges e kdung, ng diak; ng bai belkul a mo modak a delbengir me a bedengir tirkel kiliei er a taem er a Adam el mol muut er a okiis er a Kristo.

19 Chelechang eal ta delbengir me a bedengir tirkang el dolekoi er tir a ditael mo dmak er rokui, a re dengerenger me a remekedung, ng diak dung; ngungia blakdung el kmo, tir rokui a momekiis, me a lechub a taer omesodel a kmo, a okiis er tir a mei ruchei er a chokiis er tirkel mo mad ruriul er a okiis er a Kristo.

20 Chelechang e rungalk, ng diak du okiis er tir a mei er sel taem er a okiis er a Kristo; endi chelechang ea kdi mo dulii a uldesuek el kmo, a delbengir me a bedengir a remekedung a mo dmak er a okiis er a Kristo, me a ngesechel mo er a babeluades.

21 Endi ng mo erngii er a chokiis er Ngii, me a lechub e nguriul, a diak eldung; endi tia kid a bokedelii el kmo, ngarngii er a delongelel a kodall me a okiis er a bedenged, a taem er a delbenged el ngara deuel reng me a lechub eng klengit el reng, e mengiil er sei el taem el Dios a mla tutkii el mla mad a mo mekiis, el mo dmak a delbengel me a bedengel, e mengai el mo dechor er medal a Dios, e mo er a kerrekeriil kirel a urerel.

22 Oi, tiaikid sel mo kudmeklii otireklel a ikel tekoi el mla medung er a ngerir a reprofet.

23 A deleb a lmuut el mo er a cheklechel, me a cheklechel mo er a delbengel; me a rokui el klekedellel me a meduuelel, a lmuut el mo er a bedengel; oi, me a ditang el chui er a btelud meng diak bolriid; le rokui el klekedellel a lmuut el mo er a merang el teletelel me a cherrengelel.

24 E chelechang e rungalk, tiaikid sel lolletel a tekoi el meldung er a ngerir a reprofet.

25 E sola e, a re mekedung a mo melidiich el ngar er a chelsel a rengedel a Dios.

26 Endi chelechang ea kengaol kodall a mo er a re dengerenger; le tir a mo mad er a tekoi el melutk el kirel a teletael er a klungiaol; le tir a diak le beches, e diak el sebechel a diak lebeches el mo soiseb er a rengedel a Dios; me temo obidokl er rikl, e moterkokl el mo mengib a redechel a omerellir me a lechub eng urerir, el mle mekngit; mete mo melim er a rengul a mechuached el kob.